Khotbah 2 Petrus 1: 1-9 "Keadilan Tuhan yang Menyelamatkan"

Minggu Judika; 29 Maret 2020

1:1 Dari Simon Petrus, hamba dan rasul Yesus Kristus, kepada mereka yang bersama-sama dengan kami memperoleh iman oleh karena keadilan Allah dan Juruselamat kita, Yesus Kristus.

1:2 Kasih karunia dan damai sejahtera melimpahi kamu oleh pengenalan akan Allah dan akan Yesus, Tuhan kita.

1:3 Karena kuasa ilahi-Nya telah menganugerahkan kepada kita segala sesuatu yang berguna untuk hidup yang saleh oleh pengenalan kita akan Dia, yang telah memanggil kita oleh kuasa-Nya yang mulia dan ajaib.

1:4 Dengan jalan itu Ia telah menganugerahkan kepada kita janji-janji yang berharga dan yang sangat besar, supaya olehnya kamu boleh mengambil bagian dalam kodrat ilahi, dan luput dari hawa nafsu duniawi yang membinasakan dunia.

1:5 Justru karena itu kamu harus dengan sungguh-sungguh berusaha untuk menambahkan kepada imanmu kebajikan, dan kepada kebajikan pengetahuan,

1:6 dan kepada pengetahuan penguasaan diri, kepada penguasaan diri ketekunan, dan kepada ketekunan kesalehan,

1:7 dan kepada kesalehan kasih akan saudara-saudara, dan kepada kasih akan saudara-saudara kasih akan semua orang.

1:8 Sebab apabila semuanya itu ada padamu dengan berlimpah-limpah, kamu akan dibuatnya menjadi giat dan berhasil dalam pengenalanmu akan Yesus Kristus, Tuhan kita.

1:9 Tetapi barangsiapa tidak memiliki semuanya itu, ia menjadi buta dan picik, karena ia lupa, bahwa dosa-dosanya yang dahulu telah dihapuskan.

1:1 Ahu surat ni si Simon Petrus, naposo jala apostel ni Jesus Kristus, mandapothon angka naung manjalo haporseaon na arga, rap dohot hami, marhitehite hatigoran ni Debatanta dohot Jesus Kristus, Sipalua i:

1:2 Singkop ma di hamu asi ni roha dohot dame, marhitehite panandaonmuna di Debata dohot di Jesus, Tuhanta i!

1:3 Dilehon hagogoon ni hadebataonna i do tu hita nasa na tau hangoluan dohot hadaulaton marhite sian naung tatanda Ibana, na manjou hita, hinorhon ni hasangaponna dohot hadengganonna sandiri.

1:4 Marhite sian i do dilehon tu hita bagabagana angka na arga jala na balga situtu, asa hinorhon ni i gabe partohap hamu di hadebataon, dung sanga maporus hamu sian hamagoan, na di bagasan hahisapon na di portibi on.

1:5 Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i;

1:6 dung i pangarajaion diri ma di bagasan habisuhon i, dung i habengeton ma di bagasan pangarajaion diri i, dung i hadaulaton ma di bagasan habengeton i:

1:7 Dung i holong ni roha di dongan ma di bagasan hadaulaton i, dung i holong ni roha di na saluhutna ma di bagasan holong ni roha di dongan i!

1:8 Ai molo jumpang angka i di hamu jala ganda, ndada loasonna hamu losok jala so marparbue, laho mananda Jesus Kristus, Tuhanta i.

1:9 Alai molo so dapot i di na deba, halak na mapitung ma i, parmata na jonok, naung lupa di haiason sian dosa, na di ibana najolo.

Hatorangan

“Haporseaonmi do na pangoluhon ho!” Sian pandohahon on boi ma taantusi hinaarga dohot hinaringkot ni haporseaon i tu hita jolma. Laos diondolhon do naing i di pangajarion teologis na pinasahat ni Martin Luther, sahalak sian tokoh reformasi di tonga ni huria. Adong do pigapiga ondolan manang impola ni pangajarion ni si Martin Luther, alai sada sian i ima “Sola Fide” na marlapatan: holan marhite haporseaon do sahat tu hita haluaon, i ma haporseaon tu Jesus Kristus. Marhite pangajarion ni si Martin Luther lam diondolhon ma tu hita halak Kristen taringot tu hinaringkot ni haporseaon. Alai ringkot do tasulingkit, holan sasada haporseaon i do na ringkot di ngolunta asa boi hita malua? Naung singkpo do hita gabe halomoan di adopan ni Debata molo dung porsea hita tu Ibana? Dohot hata na jempek boi alusanta: Ndang! Tutu mansai ringkot jala arga situtu do haporseaon i di hita. Nunga didok Jesus: “Haporseaonmi do na pangoluhon ho!” Alai ndang na mandok, ndang adong be na asing na ringkot tapareahi asa sahat tu hita haluaon naung dipatupa Tuhan i di hita angka na porsea i. Alani i, ringkot do tapahusorhusor jala taparrohahon hata na didok di Jakobus 2: 17, “Haporseaon i pe songon i do, anggo so adong pangulaonna, naung mate do hadirionna”. Sian i taboto ma ingkon mangihut do parulaon tu haporseaon i asa mangolu. Boi do i goaronta, haporseaon na mangolu, i ma haporseaon na marparulaon.

Molo tajaha Heber 11: 1-40, boi do jumpangta sampulusia hali hata “hinorhon”. Sian i naeng antusanta paboa ingkon marpanghorhon ma nian haporseaon i. Alani, haporseaon i ndada holan dihatindanghon manang dihatahon manang holan disurathon sambing, alai tarlumobi naeng ma taulahon jala marparbue di ngolunta. I do na patar sian angka sitindangi ni haporseaon i songon na dpatorang di Heber 11.  Laos haporseaon na mangula jala na mangolu si songon i do na marguna jala na mararga di ngolu ni halak Kristen sahat tu partingkian nuaeng on. Ndang jongjong sasadasa haporseaon di ngolu ni jolma. Tutu ditabi na pinasahat ni panurat buku 2 Petrus on didok, “Mandapothon angka naung manjalo haporseaon na arga (ay. 1)”. Nunga dijalo nasida haporseaon naung dibasabasahon Debata tu nasida, jala na arga situtu do i. Huhut dilehon hagogoon ni hadebataonNa patauhon nasida tu hangoluan dohot hadaulaton. Dilehon do nang bagabaga na arga asa gabe partohap hita di harajaon ni Debata. Saluhut marhite asi ni roha ni Debata, nunga dibasabasahon angka na arga di nasida, nang di ganup na porsea i.

Jala di udut ni turpuk on na ingkon ihot do tu haporseaon i nang denggan ni parange. Alani tung tangkas do dijouhon tu nasida: “Dibahen i, haringgashon hamu ma sian nasa gogo, manurdukhon denggan ni parange di bagasan haporseaon i, dung i habisuhon ma di bagasan parange na denggan i, dung i pangajarion diri ma di bagasan habisuhon, habengeton, hadaulaton, holong ni roha di dongan, dung i holong ni roha si saluhutna ma di bagasan holong ni roha tu dongan i (ay. 5-7). Naeng dohonon, godang nari angka na ingkon ihot tu haporseaon i, na ingkon diharinggashon. Ai tangkas didok, “Dibahen i, haringgashon hamu ma sian nasa gogo”. Laho manambornambori jala manungkoli haporseaon i asa marparbue ringkot situtu do pambahenan dohot parulaon na marsitutu. Ingkon marsitutu do hita mamarangehon parange na denggan di adopan ni Debata nang di jolo ni dongan jolma. Ai marhite parangenta i do dipapatar haporseaon na mangolu di dirinta. Ingkon marsitutu do hita mangalului hapistaran dohot habisuhon, asa unang maoto hita dibahen portibi on. ai ringkot do taingot umpasa ni halak Batak na mandok, “Na bisuk nampuna hata, na oto tu panggadisan”. Alani ingkon di bagasan habisuhon do hita asa tau hita mananda dalan na sintong dohot manaluhon sumbia ni sibolis na naeng manegai ngolunta. Ingkon marsitut do hita manghangoluhon habengeton, hadaulaton dohot holong ni roha.

Ndang mura mangulahon i. Godang tantangan mangulahonsa. Isarani na mangulahon holong, tung mansai maol do. Manghatahon, mura do. Alai mangulaho, tung mansai marungkil situtu. Molo ingkon sahat hita tu na mangalehon na adong di hita: arta, partingkian, gogo nang dirinta holan laho manghaholongi na di hita (amanta/inanta, ianakhonta, natuatuanta) ra ndang apala marungkil dope hita, nang pe deba nunga tung marungkil mangulahon i. Alai molo ingkon sahat do hita mangalehon na adong di hita holan manghaholongi dongan jolma dohot manghaholongi saluhutna, godangan dope parungkilon disi.

Alani do umbahen ringkot situtu adong parsitutuon manang haringgason sian nasa gogo laho patupahon i asa boi tarulahon hita, asa mangolu jala marparbue haporseaon i jala gabe arga situtu di ngolunta. Ndang na mandok parulaonta i na gabe ojahan ni haluaonta, haporseaon i do. Alai naeng marhapataran jala marparbue haporseaon i marhite parange na denggan, habisuhon, habengeton, hadaulaton dohot holong. “Ai molo jumpang angka i di hamu jala lam ganda, ndada loasonNa hamu losok jala so marparbue”. Antong marhite turpuk jamita on lammargogo jala lam marsitutu ma hita mamparbuehon na tama di haporseaon i marhite parulaon na denggan, habisuhon, pangarajaion diri, habengeton, hadaulaton dohot marhite holong ni roha. Asa lam tatanda Ibana naung manjou jala mamilit hita tu hasangaponNa jala partohap ma hita di harajaonNa i.