Khotbah Matius 27: 45-56 "Pengorbanan Yesus yang Menyelamatkan"

Jumat Agung, 10 April 2020

27:45 Mulai dari jam dua belas kegelapan meliputi seluruh daerah itu sampai jam tiga.

27:46 Kira-kira jam tiga berserulah Yesus dengan suara nyaring: "Eli, Eli, lama sabakhtani?" Artinya: Allah-Ku, Allah-Ku, mengapa Engkau meninggalkan Aku?

27:47 Mendengar itu, beberapa orang yang berdiri di situ berkata: "Ia memanggil Elia."

27:48 Dan segeralah datang seorang dari mereka; ia mengambil bunga karang, mencelupkannya ke dalam anggur asam, lalu mencucukkannya pada sebatang buluh dan memberi Yesus minum.

27:49 Tetapi orang-orang lain berkata: "Jangan, baiklah kita lihat, apakah Elia datang untuk menyelamatkan Dia."

27:50 Yesus berseru pula dengan suara nyaring lalu menyerahkan nyawa-Nya.

27:51 Dan lihatlah, tabir Bait Suci terbelah dua dari atas sampai ke bawah dan terjadilah gempa bumi, dan bukit-bukit batu terbelah,

27:52 dan kuburan-kuburan terbuka dan banyak orang kudus yang telah meninggal bangkit.

27:53 Dan sesudah kebangkitan Yesus, mereka pun keluar dari kubur, lalu masuk ke kota kudus dan menampakkan diri kepada banyak orang.

27:54 Kepala pasukan dan prajurit-prajuritnya yang menjaga Yesus menjadi sangat takut ketika mereka melihat gempa bumi dan apa yang telah terjadi, lalu berkata: "Sungguh, Ia ini adalah Anak Allah."

27:55 Dan ada di situ banyak perempuan yang melihat dari jauh, yaitu perempuan-perempuan yang mengikuti Yesus dari Galilea untuk melayani Dia.

27:56 Di antara mereka terdapat Maria Magdalena, dan Maria ibu Yakobus dan Yusuf, dan ibu anak-anak Zebedeus.

27:45 Alai olat ni hos ni ari ro di pungkul tolu holom ma sandok tano i.

27:46 Alai tar di pungkul tolu dipangiar Jesus ma soarana, dianggukhon ma: Ale Debatangku, Debatangku, boasa tung tadingkononmu Ahu (Eli, Eli, lama sabachtani)?

27:47 Alai umbege i, ninna na deba sian angka na jongjong disi: Na manjou si Elia do

27:48 Dung i pintor marlojong ma sada sian nasida mangalap limut, dibutongi ma i tu na asom, dipalohot ma tu tolong painumhon Ibana.

27:49 Alai na deba nari mandok: Pasombu jolo: Taida ma, manang na olo ro si Elia paluahon Ibana!

27:50 Alai diulahi Jesus ma marsoara na gogo; dung i tos ma hosana.

27:51 Laos di na satongkin i maribak ma hirehire na di bagasjoro sian ginjang ro di toru. Dung i humuntal ma tano i, marigat ma dohot angka batu mamak.

27:52 Mungkap ma angka tanoman, dung i hehe ma daging ni torop na badia angka na modom disi,

27:53 gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak.

27:54 Alai dung diida induk ni soldadu i rap dohot angka donganna, na jumaga Jesus, lalo i ro di angka na masa i, mabiar situtu ma nasida, ninna ma: Tutu do On Anak ni Debata!

27:55 Alai adong ma disi torop boruboru, na manatapnatap mandaodao, i ma angka naung mangihuthon Jesus sian Galilea, patureturehon Ibana.

27:56 Si Maria Magdalena ma sada sian nasida dohot si Maria, ina ni Jakobus dohot Josep, dohot ina ni angka anak ni si Sebedeus.

Hatorangan

Molo disungkun tu hita saluhutna, piga do pandohan ni Tuhan Jesus uju di hau pinarsilang? Tontu sud do hita mangalusi pitu. Sian pandohan na pitu i, di turpuk on adong sada pandohan ni Jesus, “Ale Debatangku, Debatangku, boasa tung tadingkononMu Ahu (Eli, Eli, lama sabachtani?). Tarsurat holan di Mateus (ay. 46) dohot di Markus 15: 34, jala mangihuthon hasomalan didok ma on, pandohan ni Jesus napaopathon di hau pinarsilang. Pandohan on ma na ummaol antusan sian pitu pandohan i. Boasa? Ala sai hira na mandele Jesus marhite pandohan i, hape sasintongna ndang. Antong aha do lapatan na nidok ni Jesus i? Dipatuduhon pandohan i ma, tung mansai bernit do ditaon Tuhan Jesus, sahat do Ibana tu titik nol di na gantung Ibana di hau pinarsilang i. Dokdok situtu do parniahapan ni Tuhan Jesus holan laho manghophop hamu dohot ahu. Ndang targombarhon Tuhan Jesus hancit jala parirna ala ni dipangke/dikutip Ibana ma hata sian na tarsurat. Pandohan “Ale Debatangku, Debatangku, boasa tung tadingkononMu Ahu (Eli Eli lama sabachtani)?” dienet sian Psalmen 22:2, ima ende/tangiang ni sahalak na tigor roha na dipasiaksiak angka parjahat/musu. Tung mansai posi do sitaonon ni parPsalmeni alani dialualuhon ibana ma tu Debata;

“Ale Debatangku, Debatangku, boasa tung tadingkononMu Ahu, pandohan on ndada laho patuduhon holso manang pandelean, na tung mansai hancit do dihilala Tuhan Jesus, ndang adong ilmu kebal di Ibana, ndang gabe so dihilala Ibana hancit ni na dilinsingi, dipaku, digantunghon. Alai nang pe songon i, ditaon, dituhuk Tuhan Jesus do saluhutna i di bagasan haunduhonNa tu parsuruon ni Ama i holan laho paluahon hita pardosa. Molo songon i hancitna diae Tuhan Jesus laho humongkop hita, laos so auhononta be panghophopanNa i? Datdatanta dope mardosa? Torushononta dope ngolu na mangoloi hagiot ni daging? Unang be nian; nunga dilohothon Jesus saluhutna i di hau pinarsilang i. Nunga mate be dosa dohot hamatean i. Alani i, tajanghon, tahamauliatehon ma panghophopanNa i alau naung diseahon Ibana dirina holan laho paluahon hita sian gomgoman ni dosa. Burjuna i Tuhan i humongkop hita pardosa on, alani hita pe nian tahaburjuhon ma manghaporseai Ibana Sipalua hita.

Alai, ndada holan Psalmen 22 na dikuti di Evangelium Mateus laho manggombarhon parniahapan ni Tuhan Jesus di hau pinarsilang, dohot do Psalmen 9: 22, ima di ayat 34; 48, “Disi ma dipainum nasida tu Ibana tuak anggur na marsaor pogu; jadi dung didai, ndang olo Ibana manginum... Dung i pintor marlojong ma sada sian nasida mangalap limut, dibutongi ma i tu na asom, dipalohot ma tu tolong painumhon Ibana”. Sungkunsungkun boasa pola ingkon dipangke panurat Evangelium Mateus Psalmen 22 dohot Psalmen 69 on di turpuk on taringot partinaonon ni Tuhan Jesus dihau pinarsilang? Ala duansa Psalmen on marisihon ende ni partigor na marsitaonon na mangido pangurupio tu Debata. Jadi marhite na dua Psalmen on diondolhon si Mateus ma, ia Tuhan Jesus marsitaonon alani hatigoran do, songon Parpsalmen i, ndada ala ni dosaNa, alani dialualuhon Jesus tu Debata. Sian on marsiajar hita marnida kesetiaan ni Tuhan Jesus tu Padan na Robi. Tontu lobi sian na nialaman ni Parpsalmen do ianggo na nialaman ni Tuhan Jesus. Saluhut na masa tu Tuhan Jesus di hau pinarsilang i ma dalan ni Debata patulushon sangkap haluaon naung pinaradeNa sian na robi. Tuhan Jesus ma puncak penggenapan ni sude bagabaga di Padan na Robi, on ma na naeng diondolhon panurat ni Evangelium Mateus on pola dikutip Psalmen 22 dohot Psalmen 69. Alani, molo tung pe digombarhon hinahancit ni partinaonon ni Tuhan Jesus di hau pinarsilang, ndada holan asa taboto na hancit diae Tuhanta, alai lobi sian i tahe. Na umbagas sian i ima asa taboto jala tahaporseai ia hamamate ni Tuhan Jesus laho patulushon bagabaga haluaon ni Debata di Padan na Robi. Dung marsoara na gogo di ayat 46, diulangkon Tuhan Jesus ma muse marsoara na gogo di ayat 50, dung i maribak ma hirehire ni Bagas Joro na marlapatan nunga ungkap be dalan tu Debata. Ndang adong be na mangambati, ndang pola be ingkon marhite Sintua ni Malim songon di Padan na Robi, alai songon na tarsurat di Epistelta di Heber 10: 19-29, Tuhan Jesus nama Sintua ni Malim di hita laho mandapothon habadiaon ni Debata.

Dung masa angka ondeng ima mangholom sude hape hos ni ari do (ay. 45) tarlumobi dung humuntal tano dohot marigat angka batu mamak (ay. 51), gabe mabiar ma induk ni soldadu dohot angka donganna. Diantusi nasida ma na so jolma biasa do hape Tuhan Jesus. Didok nasida ma, “Tutu do on Anak ni Debata”. Ndang halak Jahudi nian nasida, halak Rom do, ima na so mananda Padan na Robi, na so dohot paimaimahon Mesias Sipalua i. Dung diida nasida na masa i gabe diantusi nasida ma jala tangkas ma dihatindanghon nasida ma Anak ni Debata do Tuhan Jesus naung diparsipal nasida i. Molo apala halak Rom, na so mananda Padan na Robi, na so paimaimahon Mesias, boi mangantusi jala manghatindanghon na tutu do Jesus Anak ni Debata, nda tarlumobi hita ma nian? Hita angka naung porsea di Tuhan Jesus, naung dipalua sian parhatobanon ni dosa, naeng ma tahantindanghon na Anak ni Debata do Tuhan Jesus. Songon dia carana? Tontu tarida ma sian parngoluanta siganup ari na so sarombang dohot portibi on. alani i, tahalashon ma Parningotan Ari Hamamate ni Tuhan Jesis sadari on ala nunga tangkas tahaporseai na so margogo be dosa dohot sibolis di ngolunta. Tahatindanghon ma marhite hata nang pambahenanta na Anak ni Debata do Tuhanta Jesus i, na paluahon hita sian dosa. Dibahen i, hita angka na tinompa na imbaru (2 Kor. : 17), unang be mangadop tu dosa, jala unang be tapasahat dirinta tu dosa, bahen sinjata hajahaton; tu Debata ma tahe tapasahat dirinta songo angka naung pinangolu sian na mate, songon i nang ruasta/pamatangta, tu Debata ma i, bahen sinjata hatigoran (pat. Rom 6: 13). Marhite parningotan di ari hamamate ni Tuhan Jesus on, naeng ma nian lam martamba angka na paubahon roha jala porsea di Jesus songon induk ni soldadu i dung diida angka tanda halongangan i. Molo tung adong deba barani mate humongkop na ulibasa, alai Jesus lobi sian i. Ibana mate humongkop hita jolma pardosa. Singkatta do Ibana tu paruhuman alani dosa asa dapot hita haluaon (Rom 5: 7-8). Antong tama ma hita paubahon roha, marserep ni roha, mangihuthon Ibana, mangoloi hataNa saleleng hita mangolu.