Khotbah Mazmur 69: 30-37 "Suka Cita Dalam Tuhan"

Minggu Letare; 22 Maret 2020

69:30 Tetapi aku ini tertindas dan kesakitan, keselamatan dari pada-Mu, ya Allah, kiranya melindungi aku!

69:31 Aku akan memuji-muji nama Allah dengan nyanyian, mengagungkan Dia dengan nyanyian syukur;

69:32 pada pemandangan Allah itu lebih baik dari pada sapi jantan, dari pada lembu jantan yang bertanduk dan berkuku belah.

69:33 Lihatlah, hai orang-orang yang rendah hati, dan bersukacitalah; kamu yang mencari Allah, biarlah hatimu hidup kembali!

69:34 Sebab TUHAN mendengarkan orang-orang miskin, dan tidak memandang hina orang-orang-Nya dalam tahanan.

69:35 Biarlah langit dan bumi memuji-muji Dia, lautan dan segala yang bergerak di dalamnya.

69:36 Sebab Allah akan menyelamatkan Sion dan membangun kota-kota Yehuda, supaya orang-orang diam di sana dan memilikinya;

69:37 anak cucu hamba-hamba-Nya akan mewarisinya, dan orang-orang yang mencintai nama-Nya akan diam di situ.

69:30 Alai na dangol do ianggo ahu, jala marsingkor, sai patimbulon ni hatuaonmi do ahu sogot, ale Debata.

69:31 Pujionku ma goar ni Debata marhitehite ende, jala pasangaponku ma Ibana marhitehite pujipujian.

69:32 Jadi lomoan ma roha ni Jahowa disi asa mida jonggi manang lombu sitingko tanduk, na martambirik.

69:33 Diida angka na dangol i ma i, gabe las ma rohanasida; sai hiras ma rohamuna, hamu ale angka na mangalului Debata!

69:34 Ai ditangihon Jahowa do angka na pogos, jala ndang lea rohana mida bangsona na tarbuang i.

69:35 Sai pujion ni langit dohot tano on do Ibana sogot, angka laut pe ro di nasa na manginsir di bagasan angka i.

69:36 Ai sai tumpahan ni Debata do Sion jala paulionna do angka huta ni Juda, asa maringan nasida disi jala nampunasa.

69:37 Asa pinompar ni angka naposona i tumeansa sogot, jala angka na mangkaholongi goarna maringan disi.

 

Hatorangan

Marragam panindangion na boi tabege manang tajaha taringot tu sibingkas ni las ni roha jala godangan do i siala naung dapot na pinarsinta, jumpang na jinalahan, dapot pangomoan godang dohot aka ro angka parsaulian. Adong dope na mandok, masa las ni roha ala malua sian parmaraan. Andorang so dipatubegehon parpsalmen on las ni rohana, parjolo do dipajojor ibana angka hasusaan na binolusna. Sian ayat 1 – 29, tangkas dipaboa parniahapan na mansai porsuk diae. Humasusa ngoluna jala diporsan angka na dokdok. Dipangiar ibana hoihoi, tumatangis huhut mangandungi ibana siala hinahansit ni sitaononna i. Gabe hira bura dietong na masa di ngoluna i. Alani i do sai joujou mangido pangurupion ibana jala pola digombarhon sitaonon i hira naung tarbondut tu banua toru, dihuphupi tano on jala mogap hira songon na lonong di bagasan aek. Tung mansai lungun dihilala jala sai dipaila na masa i ibana ala so boi haruar sian haberniton i. Dia do na masa i? Ndada holan tu sasahalak alai tung tu saluhut bangso ni Jahowa do tahe haberniton na masa di turpuk on, uju tarbuang nasida tu Babel.

Aha do jambar ni jolma na porsea di Debata, holan hasusaan do manang adong do las ni roha? Parungkilon sambing do sijaloon ni jolma na porsea di Tuhan i manang adong do na tonggi sidaionta mangihuthon Ibana? Molo taparsiajari pandohan dohot panindangion ni Parpsalmen on, boi taida angka dia do na mambahen tubu las ni roha dibagasan Tuhan i? Parjolo, manghirim hdi hinauli ni ari sogot. Halak na marpanghirimon ndang mandele uju mangadopi ragam ni hamaolon alai sai marbenget ni roha, ala diparhatutu andul ummuli do ari sogot sipasahaton ni Tuhan i sian ari na nidalananna. Ingkon munsat do do parngoluan sian hamaolon, nang pe ndang apala mura patupahon i, jala ingkon olo do sian angka na pasorathon ngolu n. Ndang tarpauba na tongon masa alai tarpaimbaru do na naeng masa sogot. Debata do na paradehon ari sogot ndang ala na tuk parbinotoanta mangeahi i. Debata do na patiurhon dia ingkon sidalanan di ari sogot nang pe holip sian pamerengan. Panghirimon di hinauli ni ari sogot i do na patubu hahisaron ndang holan di daging alai sumurung ma nang tondi. Molo dung hisar tondi, pamatang pe lam hisar manang hipas do. Paduahon, manghaposi jala mangolophon pambahenan ni Debata. Sipata suhar do tu pingkiran ni jolma i pambahenan ni Debata. Molo pe maol, dokdok manang porsuk ngolunta mangadopi saluhutna i, naeng ma nian tongtong marposniroha jala mangolophon pambahenan ni Debata. Ala ni aha? Ndang mago jolma na marhaposan tu Jahowa. Alani i, andul dumenggan do molo taida angka hasusaan na masa i songon dalan laho pasolhothon diri tu Ibana. So tung gabe sada sipaingot i umbahen masa di hita manang gabe pataridahon hagaleonta asa unang marpangunsandean tu gogo dohot pingkiranta hita. Parpsalmen i pe dibolus do ragam hamaolon alai ndada gabe paholang dirina sian Debata, baliksa tahe lam solhot jala togu do haporseaonna marnida pambahenan ni Debata. Manatap do ibana di hinauli ni pambahenan ni Jahowa nang pe porsuk diae angka na masa i. Patoluhon, mangalului Debata uju marsitaonon. Mangalului Debata lapatanna pasahathon diri tu Ibana uju taadopi sitaonon. Gale do dagingta on jala ndang tuk gogonta mamorsan nasa na dokdok i. Alani, molo didok Parpsalmen i, sai hiras ma rohamuna, hamu ale angka na mangalului Debata, marlapatan do i na sitau las ni roha sude sangkao hatuaonNa. Ndang mandele jolma na mangalului Jahowa nang pe uju manaon na hansit. Ndang sai tungki simajujug ni jolma na sai ro mangalului dohot mangalualu tu Ibana. Ai sai rade do pangurupion ni Debata di angka na mangalului Ibana. Pola do tahe didok, ditangihon Jahowa do angka na pogos jala ndang lea rohaNa mida bangsoNa na tarbuang i. Pogos bangso i di habuangan ala so boi marboniaga dohot patupahon pandaraman na tama disi. Lea do dihilala nasida ala ingkon mian di luat na leban.

Las ni roha ndada holan didirinta alai ingkon gabe pujipujian do i tu Debata. Ai didok Parpsalmen i do, lomoan do roha ni Jahowa disi asa mida jonggi manang lombu sitingko tanduk, na martambirik. Ummuli do las ni roha, i ma pujipujian tu Jahowa sian pelean. Lapatanna, ndada ala adong na boi tapasahat tu Debata umbahen lomo roha ni Jahowa mida hita alai dirinta na marlas ni roha mamuji Ibana dao dumenggan ai i do dihalomohon. Molo haruar hata pamujion tu Debata sian dirinta, naung tangkas do tatanda angka pambahenan ni Debata. Ala dihorhon panandaon tu Debata do mangonjar roha mamuji Ibana. Dia do na hinatindangkon Parpsalmen i? Parjolo, dung mulak bangso Juda sian habuangan Babel, lungun dope dihilala nasida ala naung lengse luhut huta i jala tarulang nasa ladang, soada tubuan suansuanan na tau dalan ni ngolu. Alai, diparhatutu nasida do na tuk gogo ni Debata laho pasuanghon huta i dohot tano i. Paduahon, dihaporseai nasida do na so pasombuon ni Debata bangso na leban manaban huta i alai ingkon mulak do tu nampunasa hian. Ndada holan mulak alai ingkon saut bagabaga ni Jahowa, pomparan nasida , pomparan nasida manean tano i. Haporseaon i ma na tangkas dipatubegehon, dihatindanghon. Dipauli do tutu huta dohot tano i, jala i ma na mambahen las ni rohana nang di saluhut bangso i.

Nang pe ndang apala singkop dope sude na hinirim ni rohana alai ala borhat sian haporseaon na togu di panumpahion ni Debata talup do ibana marlas ni roha jala sai pamujion do na haruar sian dirina. Marlas ni roha di bagasan Tuhan i ndada holan ala naung dapotan parsaulian godang alai ala dipaloas hita manghirim haulion ari sogot. Las ni roha ala naung taida angka na uli nuaeng, alai ummuli dope parsaulian na tau las ni roha di angka naung pinarade ni Tuhan i. Minggu Letare sadari on manjou hita asa tongtong marlas ni roha dibagasan Tuhan i. Ra, hansit dope parngoluonta nuaeng, adong do ra sahit na posi diae angka sisolhot jala nang pandaraman pe maol do dapot na dumenggan. Hapogoson dohot hagaleon di pardagingon i, ndang gabe pangambati marlas ni roha ai sai tinggil do sipareon ni Jahowa manangihon angguhangguk ni angka na niasianNa. Lapatanna, nang pe marsitaonon jala hansitan jolma, boi do hisar tondina. I do las ni roha dibagasan Tuhan i. Hoihoi ala haberniton boi masa do tu ganup na porsea. Alai, panatapan dibagasan haporseaon taringot tu ari sogot na ummuli sian Tuhan i, ima na mambahen las roha di hita.