Khotbah Roma 8: 18-25 "Tuhanlah Pengharapanku"

Minggu Okuli; 15 Maret 2020

8:18 Sebab aku yakin, bahwa penderitaan zaman sekarang ini tidak dapat dibandingkan dengan kemuliaan yang akan dinyatakan kepada kita.

8:19 Sebab dengan sangat rindu seluruh makhluk menantikan saat anak-anak Allah dinyatakan.

8:20 Karena seluruh makhluk telah ditaklukkan kepada kesia-siaan, bukan oleh kehendaknya sendiri, tetapi oleh kehendak Dia, yang telah menaklukkannya,

8:21 tetapi dalam pengharapan, karena makhluk itu sendiri juga akan dimerdekakan dari perbudakan kebinasaan dan masuk ke dalam kemerdekaan kemuliaan anak-anak Allah.

8:22 Sebab kita tahu, bahwa sampai sekarang segala makhluk sama-sama mengeluh dan sama-sama merasa sakit bersalin.

8:23 Dan bukan hanya mereka saja, tetapi kita yang telah menerima karunia sulung Roh, kita juga mengeluh dalam hati kita sambil menantikan pengangkatan sebagai anak, yaitu pembebasan tubuh kita.

8:24 Sebab kita diselamatkan dalam pengharapan. Tetapi pengharapan yang dilihat, bukan pengharapan lagi; sebab bagaimana orang masih mengharapkan apa yang dilihatnya?

8:25 Tetapi jika kita mengharapkan apa yang tidak kita lihat, kita menantikannya dengan tekun.

8:18 Ai hurajumi angka sitaonon di hasiangan on, hira na so adong do martimbangkon hasangapon sipapataron tu hita sogot.

8:19 Ai malungun do nasa na tinompa i paimaimahon tingkina, asa dipapatar angka anak ni Debata.

8:20 Ai tu habusukon do dipatunduk na tinompa i; ndada sian lomona, tung binahen ni na patundukkonsa do.

8:21 Huhut mangkirim: Paluaonna ma nang na tinompa i sian pangadopan hamagoan, sahat tu haluaon hasangapon na di angka anak ni Debata.

8:22 Ai taboto do, sai tong dope rap marhoi jala mambebe nasa na tinompa i.

8:23 Angkup ni i, nang hita angka naung manjalo patumonaan ni Tondi i, marhoihoi di bagasan rohanta, paimaimahon haanakon, asa disi marhaluaon pamatangta.

8:24 Ai tong dope mangkirim hita, angka naung malua. Alai molo niida na hinirim i, ndang pangkirimon be i dohonon; ai marhua hirimon, anggo dung diida mata!

8:25 Alai molo mangkirim hita di na so taida dope, marbenget ni roha ma hita paipaimahonsa.

Hatorangan

Unang ma nian dibereng angka anak boru, ina na lagi mambebe, na naeng manubuhon posoposona. I ma pandohan ni torop halak. Boasa? Ala dang tanggung hansit ni na mambebe sahat tu na sorang posoposona; jadi molo dibereng anak boru ina mambebe, so tung gabe mabiar ibana haduan marianakhon. Pandohan i manggombarhon bernit ni sitaonon ni angka ina na laho manubuhon ianakhon. Sipata didok angka ina, ndang adong tudosan ni hansit ni na manubuhon gelleng mulai sian na mambebe, bahkan mulai sian na mangidam. Alai, nang pe songon i hancitna, ndang adong ina na mabiar marianakhon nang pe tung hancit situtu ditaon, na so dapotan ianakhon pe sai diusahahon do asa marianakhon nang pe diboto hancit ni na manubuhon; i ma patuduhon ndang jora parompuan i mambebe dohot manubuhon posoposona nang pe hancit. Boasa pola taringotan na mambebe dohot na manubuhon gelleng di jamita minggu on? tinaringotan on ala memang adong do disurathon di turpuk jamita on, i ma di ayat 22, “Ai taboto do, sai tong dope rap marhoi jala mambebe nasa na tinompa i”. Aha do lapatan ni pandohan ‘rap marhoi jala mambebe’ na disurathon di turpuk on? Boasa marhoi jala mambebe? Sungkun-sungkun on ma na naeng mangarahon hita laho mangantusi turpuk on asa taruli ngolu partondionta.

1.      Adong do sitaonon di hasiangan on (ay. 18,22,23)

“Partangisan do hape, anggo hasiangan on, holso, arsak, sahit pe, sai manosak do tongtong”, i ma syair ni Buku Endenta no 520, na tangkas manggombarhon sai adong do angka sipingkiran, sitaonon, arsak saleleng mangolu di portibi on, i ma uhum alani dosa, alai ndang na mandok gabe holan arsak ma torus. Ingkon ongkuhononta do godang las ni roha dohot olopolop na taida jala tadai saleleng mangolu. Na naeng ondolhonon ni ende i nang turpuk jamitanta sadarion i ma ndang holan las ni roha na boi masa di ngolu ni angka na porsea. Marganti sorin do arsak nang las ni roha. Ndang tarbahen hita lari sian kenyataan on. I do umbahen digombarhon si Paulus ma sitaonon na di portibi on di ayat 22 pola hira “mambebe dohot marhoi”. Angka dia ma haroa sitaonon na niadopan ni si Paulus nang huria Rom hatiha i? Molo sitaonon ni si Paulus boi tajaha di 2 Korint 11: 23-33, i ma dilinsingi, dilasahi, didangguri mangihuthon uhum Jahudi, dung i dilele jala dihurung, marmara di darat nang di aek, saluhutna ala panghophopionna na marbarita nauli i. Songon i do nang sitaonon ni huria Rom. Dihasogohon angka donganna sabangso jala dilele do nasida asa manadinghon haporseaonna. I do umbahen digombarhon si Paulus sitaonon nasida marhoihoi songon na mambebe. Tung hansit situtu. Tontu hita pe di partingkian sisaonari godang tongon ragam ni sitaononta, nang pe ndang apala dos songon sitaonon ni si Paulus dohot huria Rom. Boi do parsahiton na renge, na so ra malum hape nunga sai binoan marubat tusan tuson; boi do maol ni pandaraman, sai niula alai so manjadi, boi do maol ni na saroha dohot keluarga, gabe jotjot marbadai, dao dame, boi do ala ni angka ianakhon na so mangoloi ajar, dohot lan angka na asing. Boha, alani sude sipingkiran i, gabe mandele ma hita? Tatadinghon ma haporseaonta tu Jesus alani sitaonon i?

2.      Manghirim di hasangapon sogot (18-19; 21-23)

Boasa ndang jora angka ina manubuhon gellengna nang pe marhoihoi di tingki mambebe? I ma ala na nionjar ni panghirimon na andul umbalga sian hansitna i. Marningot las ni roha, i ma dapotan basabasa parianakhonon, ndang mabiar manang talu do biar angka ina manubuhon gellengna nang pe hansit. Songon i ma gombaran ni halak na porsea. Unang ma holan angka sitaononta i ma sai tapaingotingot, na manggohi rohanta gabe lua hita na adong do hasangapon sogot sipaimaonta. Pola do didok Apostel Paulus di ayat 18, “Ai hurajumi angka sitaonon di hasiangan on, hira na so adong do martimbanghon hasangapon sipapataron tu hita sogot”. Na so hansit do dihilala si Paulus uju dilinsingi ibana? Hansit. Na so marhoi do ibana uju dipalelelele jala dipamasuk tu hurungan? Marhoihoi. Alai marningot jala manghirim hasangapon rap hundul dohot Debata mambahen hira na soada saluhut na hansit i. Panghirimon di las ni roha bolon i ma margogoihon angka na porsea. Halak Kristen ingkon mampu do manghaporseai sijaloon na marsogot nang pe so diida dope jala nunga ingkon manghorhon di ngolu sisaonari. Songon nidok ni ayat 24, molo nunga diida mata, ndang panghirimon be goarna. Holan angka na porsea do na boi marnida panghirimon hasangapon sogot, i ma hapapatar gabe anak ni Debata (ay. 19;21). Boasa? Ala “haporseaon” i ma pos ni roha do i di angka sihirimon, jala pamotoan na tontu taringo tu na so niida (Heber 11: 1). Molo so manghirim hita di hasangapon sogot, na marlapatan ndang na porsea be hita.

3.      Marbenget ni roha (ay. 25)

Manang ise naung manghaporseai jala manghilala hira na so adong sitaonon saonari martimbanghon hasangapon sogot, pasti benget ma manaon angka parungkilonna. Ndang adong be kamus “putus asa, mandele” di halak na marpanghirimon tu Jahowa. Ala jahowa do paradehon hasangapon sogot, pos ma rohanta urupan ni Jahowa do hita manghamonanghon sude sitaonon saleleng diportibi on. Benget manaon nasa parsorion na songgop; ndang olo manarita manang mandele, baliksa sai tong marsigantung tu Jahowa asa dipamonang hita di hasiangan on gabe boi sahat hita tu hasangapon sogot.

            Saluhut do jolma di portibi on manaon angka ragam ni sitaonon. Ndada marimbar i. Na pogos, na mora, na sangap, na lea, na roa manang angka na uli. Saluhutna adong be do sitaononna. Holan i, ingkon tangkas do antusanta, ai holan panghirimon do na gabe sinjatanta di na laho mangalo sitaonon i. Antong di Minggu Okuli, na marlapatan “Sai tong do mangaranapi matangku dompak Jahowa”, disoarahon tu hita asa unang sai holan manatap tu sitaonon hita asa unang mandele hita. Nunga diparade Jahowa di hita hasangapon si jaloonta di ari sogot. Tu si ma hita manatap asa marbenget ni roha hita manghamonangkon sude sitaonon na di hasiangan on. Jala i do na niondolhon ni Epistelta. Dokdok jala bernit ditaon Parpsalmen i songon na niae ni apostel Paulus. Alai nang pe songon i ndang mandele ibana, baliksa tu Jahowa do tongtong ibana mangaranap ala dihaporseai Ibana na tuk do gogo ni Jahowa paluahon ibana sian saluhut sitaononna i.