Khotbah Mazmur 42: 1-6 "Jiwaku Haus Kepada Allah"

Minggu Quasimodogeniti, 19 April 2020

42:1 Untuk pemimpin biduan. Nyanyian pengajaran bani Korah.

42:2 Seperti rusa yang merindukan sungai yang berair, demikianlah jiwaku merindukan Engkau, ya Allah.

42:3 Jiwaku haus kepada Allah, kepada Allah yang hidup. Bilakah aku boleh datang melihat Allah?

42:4 Air mataku menjadi makananku siang dan malam, karena sepanjang hari orang berkata kepadaku: "Di mana Allahmu?"

42:5 Inilah yang hendak kuingat, sementara jiwaku gundah gulana; bagaimana aku berjalan maju dalam kepadatan manusia, mendahului mereka melangkah ke rumah Allah dengan suara sorak-sorai dan nyanyian syukur, dalam keramaian orang-orang yang mengadakan perayaan.

42:6 Mengapa engkau tertekan, hai jiwaku, dan gelisah di dalam diriku? Berharaplah kepada Allah! Sebab aku akan bersyukur lagi kepada-Nya, penolongku dan Allahku!

42:1 Ende sipodaon sian angka anak ni si Kora.

42:2 Songon pangkalungunhon ni ursa di angka guluan, songon i do pangkalungunhon ni tondingku tu Ho, ale Debata.

42:3 Mauas do tondingku * di Debata, ni Debata na mangolu i, andigan pe tolhas ahu, asa huida bohi ni Debata?

42:4 Sai iluilungku do sipanganonku arian dohot borngin, ai manipat ari do dipandok tu ahu: * Didia do Debatam?

42:5 Molo sapala marningot ahu disi, jadi * use ma huhilala rohangku di bagasan: * Na udur i ahu najolo rap dohot angka natorop manopot bagas ni Debata, huhut marsoara olopolop dohot pujipujian rap dohot angka na laho marari raya.

42:6 Boasa sai tungki ho, ale tondingku, jala boasa sai rusak ho di bagasan ahu? Haposi ma Debata, ai sai na pujionku dope Ibana, hatuaon ni bohingku jala Debatangku.

Hatorangan

Di hamu sude ruas ni huria GKPI Seresort Sagala on na huhaholongi hami di bagasan goar ni Tuhan Jesus Kristus. Di tingki on tong dope hita marminggu di bagasta be alani virus corona on jala molo taida di media lam martamba dope angka na marsahit. Alai nang pe songon i, tongtong do hita mandok mauliate ala boi dope hita tongtong mamuji Tuhan i nang pe di bagasta be. Jala songon na nidok ni angka dongan, adong do tong na denggan panghorhon ni na masa on, gabe tarbege ende puji-pujian dohot tangiang di tonga-tonga ni bagasta, jala na so hea manang ndang pola ringkot martangiang, dung di bagasta be hita patupa parmingguon gabe ringgas do martanggiang.

Ra sude do hita hea mauas. Molo mauas hita gabe koring do aruarunta jala mahiang tahilala. Jala lam gale do hita laho mangulahon angka siualohononta. Didok na deba tumagon do male martimbanghon uasan. Hansit do nian na male alai hansitan do na mauas. Molo male hita boi dope taonon apala satongkin nari paima adong dapot sipangananon. Alai molo mauas, hira so boi do taonon, pintor mahiang, koring do aruarunta, dilanta i pe malhot. Somalna molo mauas hita manigor talului aek siinumon asa sombu uasta i. I do alana molo borhat hita manopot sitopoton, sai taboan do aek siinumon apala sandorguk asa molo mauas hita boi migor minum. Jala tangkas do taboto di tingki na di pardalanan halak Israel haruar sian tano Misir mangamuk bangso i tu si Musa ala so adong aek siinumon pasombu uas nasida. Asa songon i ma nian na porsea i mauas hita tu Debata. Malungun jala masihol rohanta tu asi ni roha ni Debata. I do umbahen pola digombarhon mauas di turpuk on. marpanindangion tu Debata. On ma na naeng putihanta sian jamita on.

Ende pujianpujian sian angka anak ni si Kora, i ma angka horong ni Parpsalmen di turpuk jamita on, i ma panindangionna di adopan ni Debata parholong roha i. Manogihon angka na porsea asa ro tu Debata mangalualu dohot manjalo pasupasu pardagingon dohot partondion. Pola didok ibana, songon panghalungunhon ni ursa di angka guluan songon i do panghalungunhon ni tondingku tu Ho, ale Debata. Somalna molo ursa jotjot mangaluli angka guluan, ala sian i do ibana marsigantung laho manguduti parngoluonna. Dihantindanghon nasida do Debata do na tuk pasombu uasna, ndada tu jolma dipasahat nasida pangidoan nasida i, manang tu portibi on, alai tung tangkas do Debata. Malungun tondina jala masihol. Aha do sibonsiri umbahen na mauas manang masihol Parpsalmen om? I ma ala holang ibana sian bagas joro ni Debata. Ala uju i di Babel do nasida tarbuang, jadi holang do nasida sian Jerusalem inganan bagas joro ni Debata. Jala lam manosak do hauason ni Parpsalmen on ala jotjot ibana direhei angka musuna na mandok: Didia do Debatam? (ay. 4). Roha na malungun manang masihol i tu Debata i do na ingkon jumpang di ngolu ni angka na porsea. Jadi molo masihol tu Debata manghatai ma ibana dohot Debata di bagasan tangiang dohot ende pujipujian. Molo adong dope sihol ni roha di jolma i, i do tanda ni haporseaon dohot panghirimon na mangolu tu Debata. Alai molo so adong be sihol ni roha tu Debata naung gale do haporseaonna, jala moru panghirimonna.

Mauas do tondi ni Parspsalmen on tu bagas joro ni Debata. Hauason ni Parpsalmen on na boi masa do i di tonga-tonganta di partingkian nuaeng on na lam rarat sahit alani virus corona on. Gabe holan na dijabu nama hita (Stay at home) jala dipiga-piga mingguon di bagasta be hita patupahon parmingguon, molo di sungkun hita marsada-sada, lungun do roha dohot tondinta ala ndang boi hita marsaor dope di bagas joro ni Debata? Ra dohononta, lungun jala masihol do hita naeng pajumpang jala marsaor dohot Debata nang dohot angka dongan sahaporseaon di bagas joro i. Nunga pigapiga minggu kosong gareja ala ndang adong parmingguon. Jala molo tapatudos songon na taadopi nuaeng, suman do songon na nidok ni Parpsalmen di ayat 5 on: “Molo sapala marningot ahu disi, jadi use ma huhilala rohangku di bagasan: Na udur i ahu najolo rap dohot angka natorop manopot bagas ni Debata, huhut marsoara olopolop dohot pujipujian rap dohot angka na laho marari raya”. On do arsak ni Parpsalmen, ala so boi ibana manopot bagas joro i. Tung masihol do rohana neng pajumpang dohot Debata di bagas joro i.

Huria na huhaholongi hami dibagasan Jesus Kristus. Mauas jala malungun do tondinta naeng pajumpang dohot Debata di bagas joro i, tarlumobi alani angka sitaonon na taadopi nuaeng. Alai pos ma rohanta, na tongtong do mangula Debata di ngolunta, hombar tu tingki naung binuhulna ingkon mulak do hita muse marsaor dohot Debata di bagas joro ni suang songon i dohot angka donganta sahuria. Na mansai ringkot nuaeng asa tongtong hita marhaposan tu Debata (ay. 6). Manghaposi Debata na marlapatan ndang mardua roha manang mardua haporseaon. Gari mardua holong songon nidok ni lagu Batak i nunga adong na muruk lam ma molo mardua roha manang mardua haporseaon tu Tuhan i. Unang do tadok hita porsea tu Debata alai tong do tahaposi angka hagogoon ni portibi on na boi gabe pangurupi di hita. Ndang dihalomohon Debata halak na mardua haporseaon. Alai ingkon bulus ma tahaporseai Debata.

Goar ni Minggunta tingki on, i ma Quasimodogeniti na marlapatan songon pososposo na uasan di susu na tama (pat. 1 Petrus 2: 2). Dienet sian sada ayat ni turpuk epistelta di Minggu on. Alani tongtong ma hita mauas tu Debata. Alana lehonon ni Debata do aek siinumon asa sombu uasta. Ndang martuhor i sian Debata gariada tahe lobi sian na tahirim jala tapangido dilehon do tu hita. I do umbahen di endehon angka na porsea di Buku Ende No. 405: 1 “Adong sada mual tung sai uli ni, sombu do disi uasmi, ai manang beha jorbut ni sahitm na malum luhutna disi. Oloi ma joujouNa i, lului mual na uli i, so pola martuhor mual i, porsea di ho na ma i”. Alani unang ma hita mandele, unang ma sai tungki jala marsak hita alani panghorhon i virus corona on. Ingkon marsigorgor ma panghirimonta, na urupan ni Debata do hita di tongatonga ni angka parungkilon dohot parsorion i. Alani ro ma hita tu Tuhan Jesus asa sombu uasta dibahen ala Ibana do mual hangoluan i (pat. Johannes 4: 5-26). Jala tangkas do didok Tuhan Jesus di Johannes 7: 37b “Molo adong na mauas, tu Ahu ma ibana ro minum!”