Tata Ibadah Jumat Agung, 10 April 2020

    PARTORDING NI PARMINGGUON ARI HAMAMATE

GKPI RESORT SAGALA

                 TEMA : DISEAHON JESUS DIRINA PALUAHON PARDOSA

(MATEUS, 27 : 14 – 56)

Jumat, 10 April 2020

Andorang so dipungka parmingguon, jumolo ditontuhon sian anggota keluarga na manguluhon parmingguon, siboan tangiang pangondianon, dohot parjamita.

1.    Marende B.E. No. 76 : 1 – 2 “Sada nama sangkap”

Sada nama sangkap ni rohangku di sandok portibi on,

Ndang tagamon na so las rohangku, molo jumpang au inon.

Naeng ma sai ingoton ni rohangku na binaen ni Jesus tu tondingku.

Uju pinorsanNa i, saluhutna dosangki.

Ingkon sai Ibana ingotonku, uju na tarpajal i,

Tu hau pinarsilang ginantungkon, sai mabaor mudarNa i.

Ai humophop au ditaon uasNa asa dohot au muse upaNa;

Ai ditatap do au on di pandokNa: "Nunga sun!"

2.    Votum – Introitus – Tangiang :

U  : Dibagasan goar ni Debata Ama, dohot AnakNa Tuhan Jesus Kristus, dohot Tondi Parbadia, na manompa langit dohot tano on.

R  : Amen.

U  :  Ai sintua ni malim na songon i do tama di hita, na badia, na so marlaok, na so marlindang, na marbolat sian angka pardosa, naung gabe tumimbo sian angka banua ginjang i, na so pola ganup ari pasahathon jumolo pelean ala ni dosana sandiri, dung i ala ni dosa ni bangso i, songon angka sintua ni malim i; ai sahali do i diulahon, di na pinelehonna i dirina Haleluya! Martangiang ma hita : Ale Amanami jala Debatanami! Parasiroha na sumurung do Ho tu saluhut jolma manisia.

R  : Nunga dilehon Ho, AnakMu, Tuhan Jesus Kristus Tuhannami, manaon haleaon dohot siak ni bagi.

U  : Pola mate tarsilang, asa malua hami sian gomgoman ni sibolis.

R  : Sai parrohai ma hami mamingkiri panaonon ni AnakMu, asa maruli hami marhite sian i di hasesaan ni dosa dohot haluaon sian hamatean padua halihon.

U  : Asa dapot hami hangoluan salelenglelengna marhitehite Tuhan Jesus Kristus Tuhannami, Anak haholongan ni rohaM.

U+R : Amen.

3.    Marende B.E. No. 77 : 1 + 5 “Hamu saluhut halak”

Hamu saluhut halak ro ma hamu manatap hangoluan mu on,

Na gantung di porsilang, tumahan hamatean; Naeng ingoton mu i tongtong

Sandok mauliate, do au di Ho, naung mate Lao pangoluhon au.

Sai tong parrohaonku, Na busuk bunuonku; tu ho sambing marguru au.

4.    Epsitel : Heber 10 : 19 – 29  

U  : Tabege ma hata ni Debata, patujolo ni jamita, turpuk di minggu sadarion, i ma na tarsurat di Heber 10 : 19 – 29

U  : (dung sidung manjaha Epistel, didok Uluan ma)

Martua ma angka na umbege hata ni Debata, na umpeopsa jala na mangulahonsa.

U+R : Amen.

5.    Marende B.E. No. 417 : 1 – 2 “Rade situtu haluaon”

Rade situtu haluaon, na naeng tangkuponmu antong.

Rade nang di ho hatuaon, sihalashononmu tongtong.

Bernit do ditaon Tuhanmu pasaehon dosam sasude.

Tung unang paujat Ibana, sai jangkon panghophopNa i.

Patedek sude hahurangan, topoti sandok dosam i,

Pangido: Sai sesa o Tuhan, sude pangalaosionki.

Datdati, sai saut botoonmu naung sesa dosam sasude,

Mardame dagingmu nang tondi, maniop tongtong Tuhan i.

6.    Manopoti Dosa – Bagabaga Taringot tu Hasesaan ni Dosa :

U  : Tatopoti ma dosanta, martangiang ma hita :

Ale Debata, Amanami pargogo na so hatudosan jala parholongRoha. Ro do hami tu adopanMu manopoti jala manolsoli saluhut dosanami.

R  : Sian hatutubunami, nunga marlaok dosa hami, jala ndang adong na sintong dibagasan rohanami, gabe hutondong hami do dalan na lilu i, i ma na mangalaosi uhumMi.

U  : alai na manolsoli do hami jala hupasahat hami ma tu Ho saluhut hadirionnami.

R  : Ala porsea situtu do hami Ho do Tuhan parasiroha na sumurung jala parholong roha.

U  : Ndang dihalomohon Ho hami mago, gabe dilehon Ho di hami hasesaan ni dosa dohot hangoluan na imbaru ala holong ni AnakMu na manongtong i, Tuhan Jesus Kristus Sipalua hami. Amen. Tabege ma bagabaga ni Debata taringot tu hasesaan ni dosanta.

Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. Hasangapon ma di Debata na di ginjang.

U+R : Amen.

7.    Marende B.E. No. 83 : 1 “Na lao do birubiru i”

Na lao do birubiru i, mamorsan angka dosa,.

Ni nasa hajolmaon i dibenget ni rohana,

Diporsan do sahitta i, dilehon do diriNa i tu tangan ni pamunu,

Ditaoni do nabernit i, ro di na tos hosaNa i, didok naeng porsanonku

8.    Ruhut ni Ngolu na Imbaru : 1 Korint 13 : 4 – 7

U : Tatangihon ma hata ni Debata na gabe ruhut ni ngolu na imbaru, i ma na tarsurat di  : 1 Korint 13 : 4 – 7

Na lambas do haholongon i jala na sorta, ndang na mangiburu haholongon i, ndang tenga jala ndang dipaburnangburnang dirina. Maradat situtu do haholongon i, ndang na ahut, ndang olo pangarimason, ndang dipajujurjujur na jahat. Ndang las rohana mida hageduhon; alai tongtong do dihalashon hasintongan i. Saluhut do ditanom rohana, saluhut do dihaporseai, dihirimi jala ditaon.

U  : Antong rap mangido gogo ma hita tu Debata

U+R : Ale Tuhan Debata, sai pargogoi ma hami mangulahon na hombar tu hataMi. Amen.

9.    Marende B.E. No. 407 : 1 – 2  “Panotnoti ma silang”

Panotnoti ma silang ni Tuhanta i na mamorsan sude dosam i,

Sai tinggangkon sude arsak ni roham i, pasesahon sude dosam i.

So, jo, bereng i! Panotnoti ma silang ni Tuhanta i, ngolum i, ngolungki sian i.

Tung beasa ditaon Ho, Tuhan, songon i Di bagasan sude burjuM i?

Tung beasa sap mudar sude dagingMi, Ai tigor do sude dalanMi?

Nda i holongMi? MudarMi na use pasonangkon muse sasude na porsea disi.

10.     Manghatindangkon Haporseaon :

U  : Tahatindangkon ma haporseaonta i, songon na hinatindangkon ni donganta sahaporseaon di portibi on, rap mandok ma hita :

11.     Tangiang Pangondianon : (Dipillit ma sahalak sian anggota keluarga)

12.     Marende B.E. No. 449 : 1 + 3 “Sai solhot tu silangMi”

   Sai solhot tu silangMi, Jesus ingananku,

   Mual na mabaor disi, i ma inumonku.

   SilangMi, Tuhanki i ma pujionku,

   Paima sogot sahat au, i endehononku.

     Domu ma tu silangMi, i ma tioponku,

     Asa unang lilu au, Ho ihuthononku.

     SilangMi, Tuhanki i ma pujionku,

     Paima sogot sahat au, i endehononku.

13.     Evangelium : Mateus 27 : 45 – 56

14.     Marende B.E. No. 15 : 5  “Aut na saribu hali ganda”

   Hupuji dohot Ho, o Jesus, marningot asi ni rohaM

   Marningot mudarMi na durus ro di sude denggan basaM

   Patupa haluaon i di au pardosa godang i.

15.     Ayat Pelean :1 Kronika 29 : 17

U  : Hata ni Debata ojahan ni haporseaonta laho pasahathon peleanta, i ma na tarsurat di 1 Kronika 29 : 17

Tangkas do huboto, ale Debatangku, Ho do na manguji roha, jala hasintongan do lomo ni roham; dibahen i saluhutna on sian sintong ni rohangku umbahen na mangaringgas ahu margugu, tole dohot bangsomu na pungu dison, nunga huida marlas ni roha mangaringgas be margugu tu Ho.

16.     Tangiang Pelean :

U  : Ale Debata, Amanami na di banua ginjang. Diparhatopot rohanami do sian unduk ni rohanami, Ho do mual ni nasa ulibasa na mauliutus. Dison hupasahat hami do pelean ni hamauliateonnami tu Ho. Sai jala jala pasupasu ma peleannami on asa gabe dalan panindangion, parsaoran dohot ulaon asi ni roha di huriaMon. Bahen ma ngolunami gabe pelean na hombar tu lomo ni rohM, jala parsidohot parohon harajaonMu, holong, hasintongan dohot hadameonMu di sandok portibi on. buhai ma rohanami marhitehite TondiM, asa sai tongtong mandok mauliatetu Ho, di bagasan goar ni AnakMu, Jesus Kristus, Tuhannami. Amen. 

17.     Ende Pelean B.E. No. 465 : 1 “Ale Tondi Parbadia”

   Pasupasu lehononMu, i do bagabagaM i

   Songon angka udan nene sai tu au manetek i.

   Nang tu au, nang tu au, patetekkon i tu au.

18.     Tangiang Panutup : Ale Amanami (Rap mandok)

19.     Pasu-Pasu :

   Dipasupasu jala diramoti Tuhan Debata ma hita!

   Dipasondangkon Tuhan Debata ma Bohina tu hita, jala asi rohana mida hita!

   Didompakkon Tuhan Debata ma Bohina tu hita,

   Jala dipasaorhon ma dame tu tondinta be!

20.     Amen... Amen...Amen...

Pitu Parhataan na sian silang i

1.        Ale Amang! Marpamuati ma roham mida nasida, ai ndang diboto nasida na binahennasida i (Lukas 23 : 34).

2.        Situtu do hatangkon tu ho: Sadari on do ho rap dohot Ahu di Paradeiso (Lukas 23 : 43)

3.        Anggo Jesus, dung diida, disi inana i dohot sisean haholongan ni rohana di lambungna, didok ma tu inana i: Ndi ma, inang, anakmi! Dung i didok ma tu sisean i: Ndi ma, inangmi (Johanes 19 : 26 - 27)

4.        Ale Debatangku, Debatangku, boasa tung tadingkononmu Ahu (Eli, Eli, lama sabachtani) (Mateus 27 : 46)

5.        Mauas Ahu! (Johanes 19 : 28)

6.        Nunga marujung (Johanes 19 : 30)

7.        Amang! Tu bagasan tanganmu ma hupasahat tondingku (Lukas 23 : 46)