Khotbah 1 Tawarikh 16: 31-36 "Bersoraklah Bagi Tuhan"

Minggu Jubilate; 3 Mei 2020

16:31 Biarlah langit bersukacita dan bumi bersorak-sorak, biarlah orang berkata di antara bangsa-bangsa: "TUHAN itu Raja!"

16:32 Biarlah gemuruh laut serta isinya, biarlah beria-ria padang dan segala yang di atasnya,

16:33 maka pohon-pohon di hutan bersorak-sorai di hadapan TUHAN, sebab Ia datang untuk menghakimi bumi.

16:34 Bersyukurlah kepada TUHAN, sebab Ia baik! Bahwasanya untuk selama-lamanya kasih setia-Nya.

16:35 Dan katakanlah: "Selamatkanlah kami, ya TUHAN Allah, Penyelamat kami, dan kumpulkanlah dan lepaskanlah kami dari antara bangsa-bangsa, supaya kami bersyukur kepada nama-Mu yang kudus, dan bermegah dalam puji-pujian kepada-Mu."

16:36 Terpujilah TUHAN, Allah Israel, dari selama-lamanya sampai selama-lamanya. Maka seluruh umat mengatakan: "Amin! Pujilah TUHAN!"

16:31 Ingkon marlas ni roha ma antong angka langit, jala marolopolop tano on, jala paboaboa hamu ma di tongatonga ni angka parbegu, Jahowa do Raja!

16:32 Marhasakhasak ma laut i ro di isina! Marolopolop ma ladang i ro di nasa na disini!

16:33 Marolopolop ma disi sude angka hau di tombak di adopan ni Jahowa, ai nunga ro Ibana laho manguhum tano on.

16:34 Mandok mauliate ma hamu di Jahowa, ai na basa do ibana, ai ro di saleleng ni lelengna do asi ni rohana i.

16:35 Jala dok hamu ma: Tumpahi ma hami, ale Debata ni hatuaonnami, jala papungu, jala palua hami sian angka bangso parbegu, asa hupuji Goarmu na badia i jala martanggulhon pujipujianmi hami.

16:36 Pinuji ma Jahowa, Debata ni Israel, sian na saingan sahat ro di salelenglelengna, jala rim bangso i mandok: Amen! Jala pujipujian di Jahowa!

Hatorangan :

Digora turpuk on do sude na tinompa rap parsidohot marolopolop tu Debata. Marojahan do olopolop on sian parningotan ni bangso ni Debata di panompaon ni langit dohot tano. Asa molo taida dibagasan turpukta tingki on miduk do bilangan ni angka pandohan na mardomu tu panompaon. Hinauli ni panompaon i do na mangonjar nasida mangendehon olopolop on. boasa songon i? Ala dirajumi nasida dipatuduhon langit dohot tano on do gogo dohot huaso ni Debata. Lobi sian i, Debata do na mangarajai saluhut na tinompaNa. Molo mangihuthon sejarah ni turpuk on, marbingkas do on sian olopolop ni bangso ni Debata ala naung diboan nasida mulak “Poti Parpadanan” i tu Jerusalem, alani masa ma sada pesta olopolop na bolon marningot gogo dohot hamonangan na sian Debata. Las ni roha dipanompaon ni Debata di langit dohot tano on dipatudos nasida tu las ni roha naung mulak “Poti Parpadanan” i tu Jerusalem. Sudena masai denggan situtu songon hinadenggan ni panompaon i. Dungkon mian di Jerusalem poti parpadanan i, dirajumi nasida do hinagok ni pandonganion ni Debata di nasida songon bangsoNa.

Na gabe sungkun-sungkun nuaeng di hita, boha do olopolopta maradophon Debata, dia do na mangonjar olopolopta tu Debata? Na Parjolo, olopolop ni bangso ni Debata bungkas sian “kehadiran” ni Debata di tongatonga nasida, naung bongot Poti Parpadanan i tu Jerusalem. Antong kehadiran ni Debata na songon dia ma nuaeng na boi tangkas tahilala di parngoluanta tingki on? Kehadiran ni Debata di tongatonganta ma na gabe puncak ni olopolopta di tingki on, ndada holan marhite silehonlehon ni Debata di hita. Molo tapatudos isarana tu sada dakdanak na marumur 2-3 taon, somalna mansai las do idaon rohana molo dilehon natorasna sada hadiah na menarik tu ibana, alai dungkon lao natorasna olo do gabe tubu jut ni rohana. Las rohana di hadiah i, alai ummarga do di ibana kehadiran ni natorasna i. Na gabe pergumulan nuang di hita, gumodang nama las ni roha ni jolma nuaeng marnida silehonlehon ni Debata martibanghon marnida Debata sandiri.

Na paduahon, parsidohot do nasa natinompa marolopolop raphon bangso i mamuji Debata. Ndada holan jolma. Asa molo langit, tano, laut, suansuanan manggombarhon olopolop tu Debata, lam boha ma hita jolma naung tangkas manghilala, marsaor dohot Debata. Molo dipangke Debata angka na tinompa i parsidohot mamuji Debata antong ingkon lam jamot ma hita mangaramoti angka jadijadian ni Debata. Alai dungkon ditaringoti ende olopolop on las ni roha ni bangso Israel taringot tu Poti Parpadanan i, morot ma olopolop i tu haroro ni Debata na gabe panguhumi. Ai nunga ro Ibana laho manguhum tanon on (ay. 33). Dipatudu turpuk on sada kesadaran na imbaru diolopolop ni bangso i paboa sandok na tinompa, na tumanda Debata nang so tumanda Debata ingkon pajumpang dohot Debata di ari paruhuman. Asa patut ma sude na tinompa marolopolop maradophon Ibana. Asa olopolop dohot mauliate ni roha do na gabe sintuhu ni haroro ni Tuhan i gabe panguhum na kekal. Mandok mauliate ma hamu di Jahowa, ai na basa do Ibana, ai ro di salelenglelengna do asi ni rohaNa i (ay. 35). Asa dasor na mangihut di bangso i laho marolopolop tu Debata, ala na manontong do asi ni rohaNa. Jala on ma na mandasori olopolopta dibagasan tingki on, atik manaon hita di ragam ni angka parungkilon, sitaonon, arsak ni roha dohot hoihoi, tarlumobi panghorhon ni virus corona (Covid 19) na patubu biar ni roha dohot angka arsak ni roha, jala manghorhon hamaolon di perekonomionta, alai tuk do hita marolopolop ala Debata salelenglelengna jala manontong do asi ni rohaNa, molo tung pe ndang salpu dope Covid 19 on sian portibi on ndang gabe dohononta na so asi be roha ni Tuhan i tu jolma i.

Di ayat 35 didok: “Tumpahi ma hami, ale Debata ni hatuaonnami, jaa papungu, jala palua hami sian angka bangso parbegu, asa hupuji goarMu na badia i jala martunggulhon pujipujianmi hami.” Marhite pandohan on diongkui nasida na sipalua do Debata. Na tuk paluahon nasida sian gomgoman ni angka bangso na asing. Diongkui nasida do hagaleon nasida songon sada bangso maradophon angka bangso na di humaliangna. Tung sada sitiruon do toruk ni roha na songon on, ala marhite i do nasida tumanda diri diadopan ni Debata Sipalua i. Ojahan na mangihut olopolop ni bangsoNa ujui dohot hita angka na porsea dibagasan tingki on i ma Sipalua do Debata. Ndang tuk hita malua ianggo mangasahon gogo dohot dirinta sandiri, holan mangasahon Ibana Sipalua hita do. Roha na dibagasan mauliate (Epistel: Efesus 5: 20), i do na gabe joujou na umbalga laho marolopolop mamuji dohot pasangap Tuhanta. Ndang tarpajongjong hita sada pamujion maradophon Debata marhite ende dohot parsombaon ianggo so mardongan roha mauliate tu Debata. Alani i, nang pe ndang merdu suaranta tingki marende, ndang malo hita marende, holan marlagu tongon do na tolap hita, unang ma i gabe pangambati di hita laho mamuji dohot marolopolop disaluhut pambahenan ni Debata. Hombar tu goar ni minggunta sadari on, i ma Jubilate na marlapatan marolopolop tu Debata ma ale sandok tano on (Psalmen 66: 1), diarahon asa sude hita marende jala marolopolop tu Debata.