Khotbah Kejadian 1 : 26-31 "Kemuliaan Allah Atas CiptaanNya"

Minggu Trinitatis; 7 Juni 2020

1:26 Berfirmanlah Allah: "Baiklah Kita menjadikan manusia menurut gambar dan rupa Kita, supaya mereka berkuasa atas ikan-ikan di laut dan burung-burung di udara dan atas ternak dan atas seluruh bumi dan atas segala binatang melata yang merayap di bumi."

1:27 Maka Allah menciptakan manusia itu menurut gambar-Nya, menurut gambar Allah diciptakan-Nya dia; laki-laki dan perempuan diciptakan-Nya mereka.

1:28 Allah memberkati mereka, lalu Allah berfirman kepada mereka: "Beranakcuculah dan bertambah banyak; penuhilah bumi dan taklukkanlah itu, berkuasalah atas ikan-ikan di laut dan burung-burung di udara dan atas segala binatang yang merayap di bumi."

1:29 Berfirmanlah Allah: "Lihatlah, Aku memberikan kepadamu segala tumbuh-tumbuhan yang berbiji di seluruh bumi dan segala pohon-pohonan yang buahnya berbiji; itulah akan menjadi makananmu.

1:30 Tetapi kepada segala binatang di bumi dan segala burung di udara dan segala yang merayap di bumi, yang bernyawa, Kuberikan segala tumbuh-tumbuhan hijau menjadi makanannya." Dan jadilah demikian.

1:31 Maka Allah melihat segala yang dijadikan-Nya itu, sungguh amat baik. Jadilah petang dan jadilah pagi, itulah hari keenam.

1:26 Dung i mangkuling muse ma Debata: Tole ma, itatompa ma jolma, tumiru rupanta, tudos tu pangalahonta, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on.

1:27 Jadi ditompa Debata ma jolma i tumiru rupana, rupana ditiruanhon Debata laho manompa ibana, baoa dohot boruboru nasida ditompa.

1:28 Dung i dipasupasu Debata ma nasida, ninna Debata ma tu nasida: Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on.

1:29 Dung i ninna Debata ma: Boti ma i, nunga hulehon tu hamu nasa suansuanan na marparbuehon boni di sandok tano on, ro di sude hau angka na marparbue sisuanon, bahen panganonmuna ma i.

1:30 Alai anggo tu sude angka binatang ni tano on dohot tu angka pidong na martongatonga langit, ro di sude na manjirir di atas tano on, angka na marhosa di bagasan: Bulung ni angka suansuanan (hulehon) bahen panganonna, gabe manjadi ma songon i.

1:31 Dung i ditilik Debata ma sude na tinompana i, jadi nunga denggan situtu. Dung i bot ma ari, torang ma ari muse, i ma ari paonomhon.

Hatorangan

 Taparhatopot do buku 1 Musa on buku panindangion ni haporseaon ni halak Kristen taringot tu panompaon ni Debata di langit dohot tano ro di nasa isina. Sada na tangkas dohonon ni buku 1 Musa on i ma panindangion taringot tu Debata Panompa. Sian i ma taboto ia Debata pargogo na so hatudosan jala parhuaso situtu. Ibana do Alfa dohot Omega, Bona dohot Ujungna na hinatindanghon ni si Johannes (Pangk. 2: 8). I do turpuk jamita on, panindangion ni haporseaonta tu panompaon ni Debata tu jolma na parjolo. Ia jolma i tudos tu rupa ni Debata. Dia do lapatan ni i?

Parjolo, paulihon na tinompa ni Debata. Tanggungjawab ni jolma i do laho pauliulihon na tinompa ni Debata. Dilehon Debata do tu jolma i huaso laho padimundimun nasa na tinompaNa i. Ndada gabe manusai manang manegai angka na denggan naung pinatupa ni Debata. Ra taingot dope di taon naung salpu na masa kebakaran hutan dohot lahan di propinsi Riau dohot Kalimantan Tengah, pola mambahen godang angka hamaolon dohot harugian tu ngolu ni jolma dohot tu suansuanan nang binatang hinorhon ni pembakaran hutan i. Ndada holan i tahe, di manang piga bandara pola ingkon ditunda, delay bahkan sahat tu na pembatalan penerbangan marningot bahaya ni asap na tobal na mambahen jarak pandang na so haidaan alani asap i. Tontu songon halak Kristen hita, na tinompa ni Debata dohot do hita laho pauliulihon na tinompa ni Debata. Nunga tung uli situtu naung tinompa ni Debata alani i ingkon dohot hita paulihon muse. Asa dohot sundut na mangihut marsaulihon na tinompa ni Debata. On ma tugas na ummarga di hita songon naung tinompa ni Debata, tudos tu rupa ni Debata (Imago Dei). Suarahononta ma angka suara hamubaon ni roha, asa sude mangaradot haulion ni suansuanan, tombak, sunge, tao dohot laut. Sipaingoton ni huria do angka penebangan liar na mambahen sega angka tombak dohot harangan. Ai molo sega tombak dohot harangan i, mamboan hasusaan do i tu ngolunta. Masa ma banjir, moru ma persediaan ni aek.

Paduahon, martambatamba bilangan ni angka na porsea tu Debata. Asa tamba bilangan ni angka na porsea jala na mangaradoti na tinompa ni Debata. Dihalomohon Ibana do jolma i asa martambatamba, marpinompari marhite na marhasohotan. Umbahen na ditompa Debata jolma i, asing ni mangarajai angka na tinompaNa i, ndang holan marlapatan tu luar ni dirina, alai ingkon marlapatan nang tu dirina sandiri. I ma laho memelihara kelangsungan ni hajolmaon. Alani i tatulak do angka pangalaho pengguguran kandungan dohot pangalaho mamunu hosa ni jolma dohot alasan na so topet.

Patoluhon, panarihonon ni Debata tu na tinompana i. Manang boha pe unang lupa hita dipanarihonon ni Debata tu jolma na tinompaNa. Ndang dipasombu Debata na tinompaNa i anturaparon, alai dilehon do sipanganon di nasida. Ndang holan sipanganon ni jolma alai ingkon sipanganon ni nasa na manggulmit. Asa ndada holan jolma disarihon Debata dohot do angka dorbia, gulokgulok dohot binatang. Nunga adong be angka bagianna, alani i unang marsirampusan. Unang marbadai alani sipanganon dohot na tinubuhon ni tano i isara ni angka suansuanan, hau dohot tombak. Ai nunga adong be diparade Debata. Ai songon na tinompa ni Debata hita, disarihon do na ringkot di ngolunta. Alai memang sipata jolma i ndang porsea tu panarihonon ni Debata gabe mabiar ma ujungna dibuat ma bagian ni halak. Hape sala do mambuat bagian ni halak, i ma bukti na so porsea di panarihonon ni Debata. Alani ingkon pos do rohanta ala nunga adong be angka bagianta diparade Debata jala pasahatonNa do i tu hita ganup. Tuhan Debata do parade sipanganon di hita. Naeng taingkiri jala taingot pandangan dasar ni halak angka na porsea on. tutu ingkon ala na mulaulaon do hita asa dapot parbue, asa boi mangan. Alai molo lam bagas tapahusorhusor ingkon sahat do hita tu na manghatindanghon na Tuhan Debata do paradehon i di hita na tinompaNa tumiru rupaNa i. Na so marlapatan angka ulaon, pambahenanta, sude usahanta autsura so disarihon Debata hita.

Paopathon, patuduhon hamuliaon dohot hasangapon ni Debata. Mangihuthon panompaon ni Debata tu jolma naparjolo i, tangkas tarida tanggungjawab ni jolma di adopan ni Debata laho mangaramoti angka na tinompa ni Debata. Alani dohot ma jolma gabe ulaula ni Debata laho patuduhon hamuliaon ni Debata. Alani i ndang boi jolma i marlomolomo laho mangarajai angka na tinompaNa i. Panarihonon ni Debata sian sundut tu sundut ndang hea mansohot, hot do ro di saleleng ni lelengna. Ro do Jesus Kristus tu portibi on asa tatanda Ibana sitompa hita jala na sumarihon ngolunta. Jesus do Birubiru ni Debata na mamorsan dosa ni portibi on (pat. Johannes 1: 29-34). Marhite Ibana disarihon Debata do hita. Ndada holan diportibi on alai dohot do dingolu sogot i. I ma tahaporseai panoa na tinompa ni Debata do hita, unang mabiar, sandok pos roha tu Debata na sumarihon hita dibagasan Jesus dohot Tondi Parbadia. Di Minggu Trinitatis sadarion, tangkas ma hatindanghononta Debata Sitolusada i, ima Debata Ama, Anak dohot Tondi Parbadia. Na tongtong adong sian mula ni mulana jala tarida ma huaso dohot hagogoonNa di angka na tinompaNa. Jala sude angka na tinompaNa i naeng mamuji Debata. Asa tarjou ma jolma na tinompaNa i laho mangaramoti angka na tinompaNa i. Amen.