Khotbah Markus 16: 15-20 "Yesus Naik ke Sorga, Orang Percaya Memberitakan Injil"

Kenaikan Tuhan Yesus, Kamis 21 Mei 2020

16:15 Lalu Ia berkata kepada mereka: "Pergilah ke seluruh dunia, beritakanlah Injil kepada segala makhluk.

16:16 Siapa yang percaya dan dibaptis akan diselamatkan, tetapi siapa yang tidak percaya akan dihukum.

16:17 Tanda-tanda ini akan menyertai orang-orang yang percaya: mereka akan mengusir setan-setan demi nama-Ku, mereka akan berbicara dalam bahasa-bahasa yang baru bagi mereka,

16:18 mereka akan memegang ular, dan sekalipun mereka minum racun maut, mereka tidak akan mendapat celaka; mereka akan meletakkan tangannya atas orang sakit, dan orang itu akan sembuh."

16:19 Sesudah Tuhan Yesus berbicara demikian kepada mereka, terangkatlah Ia ke sorga, lalu duduk di sebelah kanan Allah.

16:20 Mereka pun pergilah memberitakan Injil ke segala penjuru, dan Tuhan turut bekerja dan meneguhkan firman itu dengan tanda-tanda yang menyertainya.

16:15 Jadi ninna ma mandok nasida: Laho ma hamu tu liat portibi on; jamitahon hamu ma barita na uli i tu nasa na tinompa.

16:16 Na porsea jala tardidi, dapotan haluaon; alai na so porsea i, hona uhum do!

16:17 Jala on ma tanda angka na mangihut tu na porsea: Pabalionnasida do angka sibolis marhitehite Goarhu dohot mangkatahon hata na imbaru.

16:18 Jomputonnasida do angka, ulok, jala nang diinum rasun hamatean, ndang pola mahua nasida; ampehononnasida ma tanganna tu angka na marsahit, gabe malum ma hilalaonna.

16:19 Asa anggo Tuhan i, dung mangkatai Ibana dohot nasida, tarhinsat ma tu banua ginjang, laho hundul tu siamun ni Debata.

16:20 Alai laho do anggo nasida manjamitahon barita na uli tu ganup luat; jala diurupi Tuhan i ma nasida, dipahot ma jamitanasida marhitehite tanda angka na mangihut i.

Hatorangan :

Selamat ari hananaek, hata na so apala somal dipasahat halak Kristen tu angka donganna, khususna molo jumpang parningotan di ari hananaek. Hira nomor sekian do parningotan ari hananaek di ngolu ni halak Kristen, hape sasintongna, hananaek ni Tuhan Jesus tu banua ginjang, patangkashon tu hita, paboa naung singkop ulaon ni Tuhan Jesus laho manghophop hajolmaon. Alani i, tontu sada halalas ni roha na balga do ari hananaek i, ai marhite hananaek ni Tuhan Jesus tu banua ginjang, tangkas ma di hita, ndang di portibi on ujung ni pardalanan ni ngolu na porsea i, alai surgo i do situjuonna, asa mangolu ro di salelenglelengna, angka na porsea di Tuhan Jesus Kristus (pat. Joh. 3: 16).

       Andorang so sahat dope tu tusi, aha do tugas manang tanggungjawab ni halak Kristen songon siihuthon Kristus di portibi on? Gabe sitindangi ni Kristus, i do tugas dohot tanggungjawab na ingkon ulahonon ni ganup halak Kristen di ngoluna di portibi on (pat. Mat. 10: 27). Sude halak naung manjalo barita na uli i do gabe sitindangi pararathon barita na uli i, ndada holan Pandita manang Parhalado sambing, alai sude do na ingkon pararathon i. Nuaeng boha do hita manjamitahon i, i do na mansai ringkot, boasa? Adong do halak, ianggo manghatahon, i nama malona, alai dipangalaho nang pangulaonna, mansai humurang. Asa manjamitahon dison, tontu ndada holan marhite soara, alai naeng do marhitehite sandok gulmit ni ngolu, boha do hita mangulahon ulaonta, boha do hita di rumatangganta, boha do hita marsaor dohot angka donganta, boha do partangiangonta, dohot lan angka na asing (pat. 2 Tim. 4: 2).

      Nunga dipasahat Jesus parsuruon tu angka siseanNa: “Laho ma hamu tu liat portibi on, jamitahon hamu ma barita nauli i tu nasa na tinompa (ay. 15),”  jala nunga diulahon angka siseanNa parsuruon i. Nang pe ndang di tongatonga nasida be Jesus ala naung manaek tu banua ginjang, alai diargahon nasidado parsuruon ni Jesus i. Barita na uli naung dipasahat angka apostel, i do na sahat nang tu hita jala i do gabe ojahan ni haporseaonta. Barita na uli i nang na mambahen lam uli ngolunta. Tahilala do parbue na arga marhite barita na uli na binoan ni angka parbarita nauli. Tarlumobi barita na uli na binoan ni si Nommensen, na ginoaran Apostel ni halak Batak. Andorang so sahat barita na uli tu tano Batak boi dohonon dibagasan haholomon do bangso Batak hatiha i. Alai dung sahat barita na uli tubu ma ragam ni hamajuon di tano Batak, ndada holan hamajuon di partondion (gereja), dohot do nang hamajuon di parbinotoan (singkola), hamajuon di hahipason (rumah sakit), dohot lan dope hamajuon na asing nunga didai halak Batak alani barita na uli i. Torop do parbue ni barita na uli naung pinatolhas ni angka sisean na mangoloi parsuruon na pinasahat ni Jesus.

      Alai ndada holan tu sisean si sampulusada i dipasahat parsuruon i. Dipasahat do i nang tu hita angka halak Kristen, siihuthon Jesus di partingkian si nuaeng on, asa laho hita marbarita na uli tu liat portibi on, asa lam torop jolma na porsea tu Jesus jala dapotan haluaon na sian Tuhan i. Ragam do dalan na boi patupaonta laho patulushon parsuruon i. Boi do taulahon i songon na pinatupa ni angka apostel na parjolo i manang songon na binahen ni angka Missionaris, i ma marhite na borhat jala mardalan sian sada huta tu huta na asing, mamolus angka lumban dohot luat. Alai di na lam martamba hamajuon di tongatonga ni ngolu ni jolma, lam martamba do nang dalan na boi dipareahi jolma laho pararathon barita na uli. Di partingkian na ginoaran “Era Digital” lam tamba do angka dalan na boi pangkeon ni hita jolma laho pararathon barita nauli. Isarani marhite na mamangke akses internet boi do hita mambahen video, mambahen rekaman, mamangke facebook, Twitter, dohot lan angka na asing dalanta pararathon barita na uli.

      Godang nari dalan na boi patupaonta laho pararathon barita na uli. Tontu ndang sai mura dalan i. Gabe sitindangi ni Kristus, tontu ndada ulaon na mura, bahkan gabe sitindangi ni Kristus do ulaon na umborat di ngolu on, boasa? Tagamon sai adong do angka hamaolon dohot tantangan. Sai adong do na so manghalomohon ulaon i, na marrimas jala jut rohana molo lam mangerbang barita na uli. Ndang pola dia i. Ndang na baru adong sisongon i. Sian mula ni panghobasion ni Jesus di portibi on pe nunga ditulak halak Ibana, nunga direhei jala diinsahi, pola sahat tu na agoan hosa Ibana. Suang songon i nang angka apostel na pararat barita na uli i pe tong do diadopi nasida ragam ni hamaolon dohot parsorion. Alai saluhut na masa i unang ma mambahen sumurut langkanta laho pararat barita na uli. Naeng porsea hita di hata ni Jesus na mandok: “Sai na donganankKu do hamu ganup ari, rasi rasa ro ajal ni hasiangan on (Mat. 28: 20). Alani, molo marungkil pe hita, manang marsitaonon, diinsahi manang direhei di tingki gabe sitindangi ni Kristus, dilambungta do Ibana. Taingot ma, ndang panurirang, ndang apostel, ndang pandita na marjanji mandongani hita, alai Kristus sandiri do na rade jala na togu laho mandongani huhut mangurupi hita. Asa marhite hata na pinasahat ni Jesus lam tau jala lam marsitutu ma hita mangulahon parsuruonNa i asa lam mangerbang barita na uli i jala lam torop jolma na porsea na dipatau parsidohot di harajaon na pinaradeNa marhitehite hananaekNa tu banua ginjang. Amen.