Khotbah Matius 20: 29-34 "Tuhan Mendengarkan Seruan Orang Percaya"

Minggu Exaudi; 24 Mei 2020

20:29 Dan ketika Yesus dan murid-murid-Nya keluar dari Yerikho, orang banyak berbondong-bondong mengikuti Dia.

20:30 Ada dua orang buta yang duduk di pinggir jalan mendengar, bahwa Yesus lewat, lalu mereka berseru: "Tuhan, Anak Daud, kasihanilah kami!"

20:31 Tetapi orang banyak itu menegor mereka supaya mereka diam. Namun mereka makin keras berseru, katanya: "Tuhan, Anak Daud, kasihanilah kami!"

20:32 Lalu Yesus berhenti dan memanggil mereka. Ia berkata: "Apa yang kamu kehendaki supaya Aku perbuat bagimu?"

20:33 Jawab mereka: "Tuhan, supaya mata kami dapat melihat."

20:34 Maka tergeraklah hati Yesus oleh belas kasihan, lalu Ia menjamah mata mereka dan seketika itu juga mereka melihat lalu mengikuti Dia.

20:29 Jadi laho ruar sian Jeriko, torop ma halak mangihuthon Ibana.

20:30 Jala hundulhundul ma dua halak na mapitung di pinggol ni dalan i; jadi dung dibege mamolus Jesus, joujou ma nasida, ninna ma: Asi ma roham di hami, Anak ni si Daud!

20:31 Alai dipinsang angka natorop i ma nasida, asa sip nian: Alai lam gogo ma nasida manjoujou: Asi ma roham di hami, Tuhan, Anak ni si Daud!

20:32 Jadi mangulon ma Jesus, dipanghulingi ma nasida: Aha dipangido rohamuna sibahenonku tu hamu?

20:33 Dung i didok nasida ma: Naeng ma mungkap matanami, Tuhan!

20:34 Gabe asi ma roha ni Jesus, dijama ma matanasida jadi pintor marnida ma. Jadi diihuthon nasida ma Ibana.

Hatorangan:

Godang jala marragam do sahit na ro tu ngolu ni jolma. Jala godang do na so boi tarpamalum ala tung mansai maol jumpang obat tu sahit i, songon na tongon taadopi nuaeng na masa sahit na so hea masa ima pandemi Covid 19 on. Alai na so tarpatupa jolna boi do dipatupa Tuhan i. Marhuaso do Ibana di saluhut ngolu ni jolma i. Tuk do gogoNa paluahon jolma dohot pamalumhon nasa sahit na adong di portibi on. turpuk jamita on i ma tanda halongangan na pinatupa ni Tuhan Jesus tu dua halak na mapitung di huta Jeriko, huta na jonok tu Jerusalem. Laho ruar sian Jeriko, torop do jolma na mangihuthon Jesus dohot angka sisean. Hundulhundul ,adua halak na mapitung di pinggol ni dalan i, jadi dung dibege nasida mamolus Jesus, joujou ma nasida ninna ma: “Asi ma rohaM di hami, Anak ni si Daud”. Sada gombaran ni ngolu seharihari do di Palestina hatiha i angka na mapitung. Ulaon nasida i ma mangidoido. Tardok sada panahit na umum manang somal do diae ianggo sahit mapitung on di hatiha i. Molo sanga marsahit simalolong tung i nama dokdokna, hira na sude do pamatang i rap mangae. Boi dohonon luar biasa do parsitutuon ni na mapitung on joujou tu Tuhan Jesus, mauas situtu nasida dihamalumon sian Jesus. Dibege nasida do barita i na boi Jesus Kristus jala dihaporseai na mapitung i do barita i na boi Jesus pamalumhon nasida nang pe so diida nasida dope angka tanda halongangan na pinatupa ni Jesus. Porsea do nasida na marhuaso, na boi Tuhan Jesus patupahon halongangan di nasida umbahen na joujou nasida tu Jesus i laho pamalumhon sahit nasida asa boi marnida. Molo so porsea nasida, ndang pola jouon nasida Jesus i. Jala ndang pola marsurak nasida.

Muruk ma angka natorop i tu na mapitung i jala disuru ma asa sip nasida. Atik pe nunga sai dipinsang angka natorop i, asa dip nasida. Alai sai lam dipagogo nasida do manjoujou. Aha do na mangonjar rohanasida maminsang joujou ni na mapitung i? Boi do marragam alusna, boi do ala marnida hasangapon ni Jesus asa unang gabe digugai angka jolma na so mardihadiha songon na mapitung on. Manang boi do ala dirimpu nasida holan laho mangido hepeng do tujuan nasida manjou Jesus.  Aha pe motivasi nasida alai na tangkas dipinsang nasida ma na mapitung i. Torop manang bilangbilang ni halak na mangihuthon Jesus sipata ndang boi gabe ukuran mutlak kualitas ni haporseaon maradophon Jesus. Baliksa di sisi na asing sihatoropan i pe boi do i gabe pangambati di halak angka na tongon tumatangis tu Jesus. Saboiboina ingkon lam tapareahi ma ngolu na so gabe partuktuhan haroronta maradophon dongan sahaporseaon.

I do na masa di Jeriko, naeng tomuonnasida Jesus alai ndang diguruhon nasida taringot tu holong ni roha. Na tua ni do ndang mansohot na mapitung i joujou tu Jesus. Dijugulhon nasida do laho mangido asi ni roha sian Jesus i marhite soara na gogo. Pos rohanasida, molo dijama Jesus nasida na boi do marnidanasida.  Jala sada parsiajaran na arga na boi dapot hita sian turpuk on, molo nunga sai lam dipinsang sibolis i hita, i do tandatanda naung dumonok nama haluaon i. Alani i ingkon lam tagogo do pangiar ni panjouonta maradophon Debata.

Ditangihon Jesus i do angka na joujou tu Ibana. Parasiroha jala pardengganbasa do Jahowa di ngolu ni jolma na olo porsea tu Ibana. Ndang dipasombu Tuhan i angka na manjou goarNa. Dung i disungkun Jesus ma nasida, aha dipangido rohamuna sibahenonku tu hamu? (ay. 32). Sada rumang ni sungkunsungkun na so hea mansohot sian diri ni Tuhan Jesus maradophon hita. Sipata uju mangalusi sungkunsungkun on godang do hita na pilit. Diboto Jesus do sasintongna na mapitung nasida nadua. Alai tangkas do disungkunhon Jesus aha pinangido ni roha nasida. Sian on tubu ma pangantusion di hita, atik pe diboto Tuhan i na ringkot di hita, tong do ingkon tangkas alualuhononta manang jouhononta tu Ibana. Tanda ni parsitutuonta do i na masigantung tu Ibana hita. Jompok do alusnasida. Naeng ma mungkap matanami, Tuhan (ay. 33)! Gabe asi ma roha ni Jesus dijama ma matanasida jadi pintor marnida ma. Asi ni roha ni Jesus pamalumhon na mapitung i. Parasiroha bolon do Jesus di ngolu ni angka na dangol jala na olo manjou goarNa.

Molo dibagasan parsahiton ni daging nang tondi, manang molo dibagasan hasusaan manang haporsuhon tu dia do hita mangalualu? Tu dia do hita joujou? Tu Tuhan Jesus manang tu hagogoon ni portibi on? Tu Tuhan Jesus ma hita joujou, tu Ibana ma hita pasahathon sude nasa sipingkiranta, pangidoanta dohot sangkap ni rohanta, asa Tuhan i na pasauthon dohot patulushon. Tapangido ma pangurupion sian Tuhan i. Molo porsea hita, jala dibagasan tulus ni roha dohot roha na marsitutu lehonon ni Tuhan i do na pinangido ni rohanta, songon na tarsurat di Mateus 7: 7 “Pangido hamu ma, sai na lehononNa do tu hamu; lului hamu ma, sai na jumpangan do hamu; tuktuhi hamu ma, sai na ungkaponNa do di hamu!” Tajugulhon ma mangido tu Tuhan i aha na naeng sipangidoanta tu Ibana. Unang gale haporseaonta mangido, molo tung pe so pittor ditangihon Tuhan i dope, unang gale jala unang mandele hita. Lam tapagogo ma joujou tu Ibana mangido asa tung marasi ni roha Tuhan i. Jala molo tajaha nangkin di turpuk Epistelta di Psalmen 27: 7 – 14, di ayat 14 ditogihon do hita saluhutna asa paimahon (menantikan/marhanalom) Jahowa. Marhite parsorion i disosoi Ibana hita angka na mangului Jahowa, asa rade paimahon di jolo ni pintu asi ni roha ni Debata mardongan tangiang. Paimahon di toru ni patNa i mardongan toruk ni roha, paimahon di balik ni bilutNa i mardongan panghirimon. Alai ndang boi secara pasif, sabalikna halak na mangalualu/mangalului Tuhan i ingkon maimaima secara aktif, didok di ayat 14 i, pagomos jala patogu roham.

Jala ingkon taingot do ndang sai sarupa partingkianta tu partingkian ni Debata taringot tu joujounta. Alani i ringkot situtu nalom ni roha, jala ndang sasada hita punjung uju maimaima. Alai tongtong ma taingot ndang ditulak Tuhan i angka na joujou tu Ibana. Boi do patupaonNa angka halongangan dibagasan ngolunta. Ndang adong na so tarpatupa Tuhan i. Parasiroha do Tuhan i jala ndang pasombuonNa angka naporsea di Ibana. Amen.