Khotbah Wahyu 12: 10-12 "Menyanyikan Keselamatan Dari Tuhan"

Minggu Kantante; 10 Mei 2020

12:10 Dan aku mendengar suara yang nyaring di sorga berkata:  "Sekarang telah tiba  keselamatan dan kuasa  dan pemerintahan Allah kita,  dan kekuasaan Dia yang diurapi-Nya,  karena telah dilemparkan ke bawah  pendakwa saudara-saudara kita,  yang mendakwa mereka siang dan malam di hadapan Allah kita. 

12:11 Dan mereka mengalahkan dia oleh darah Anak Domba,  dan oleh perkataan kesaksian mereka.  Karena mereka tidak mengasihi nyawa mereka sampai ke dalam maut. 

12:12 Karena itu bersukacitalah,  hai sorga dan hai kamu sekalian yang diam di dalamnya,  celakalah kamu, hai bumi dan laut!  karena Iblis telah turun kepadamu,  dalam geramnya yang dahsyat,  karena ia tahu, bahwa waktunya sudah singkat." 

12:10 Dung i hubege ma soara na gogo di banua ginjang, na mandok: Nunga sahat nuaeng haluaon dohot hagogoon dohot harajaon ni Debatanta dohot hamuliaon ni Kristusna; ai nunga dipabali pangasung i, na mangasungi angka hahaangginta arian dohot borngin di jolo ni Debata.

12:11 Nunga ditaluhon nasida ibana hinorhon ni mudar ni Birubiru i dohot hinorhon ni hata na hinatindangkonnasida; ndang diparhamaol nasida hosanasida rasirasa mate.

12:12 Dibahen i marlas ni roha ma hamu, angka banua ginjang dohot pangisina! Marjea ma tano i dohot laut, ai nunga tuat sibolis i tu hamu, marrimas situtu; ai diboto, otik nama tingkina!

Hatorangan :

Dalam nama Yesus, dalam nama Yesus ada kemenangan

Dalam nama Yesus, dalam nama Yesus, iblis dikalahkan,

Dalam nama Tuhan Yesus, siapa dapat melawan?

Dalam nama Tuhan Yesus, ada kemenangan!

Di ende Sikola Minggu on digombarhon na adong do parporangan tu sibolis alai talu do sibolis i, monang do angka na porsea marhite goar ni Tuhan Jesus. Umbuk tu si do nang jamita di Minggunta sadari on i ma na marisihon ende hamonangan maralohon sibolis. Buku Pangungkapon disurat si Johannes uju di habuangan ibana i ma di pulo Patmos alani panghopkoponna di barita na uli i do (Pangungkapon 1: 9). Ndang mura mangantusi buku Pangungkapon on ala mamangke godang simbol dohot bahasa apoliptik. Alani, sala do pangantusionta molo tajaha jala talapati buku Pangungkapon on secara hurufiah.

Asa tangkas taantusi turpukta on, ingkon taparrohahon do perikop di pudi ni turpukta on na songon latarbelakang na. Ise do na marporang jala di dia do parporangan i masa dipabotohon di ayat 7, Dung i masa ma hamusuon di banua ginjang, martongtang ma Mikhael rap dohot angka surusuruanna dompak naga i. Marmusu ma nang naga i dohot angka surusuruanna.” Jadi na marporang, i ma surusuruan ni Debata mangalo naga (naga i ma simbol ni sibolis songon na tarsurat di ayat 9). Monang ma surusuruan ni Debata jala talu ma sibolis/naga i. Dung talu naga i marende ma angka na monang di banua ginjang i ma na gabe turpuk jamitanta sadari on. dia ma isi ni ende i na gabe bohal ni partondionta?

Parjolo, nunga sahat nuaeng haluaon dohot hagogoon dohot harajaon ni Debatanta dohot hamuliaon ni Kristus (ay. 10). Dipungka do ende hamonangan on marhite hata “nunga”. Lapatanna, dang siluluan be, ndang sipaimaon be, alai nunga masa. Aha ma na masa i? I ma haluaon, hagogoon, harajaon ni Debata dohot hamuliaon ni Kristus. Nang pe disurathon di banua ginjang do parporangan i alai songon naung tadok nangkin, ndang boi talapati turpuk on secara hurufiah. So tung ma tadok, ndang dohot dope hita di ayat 10, ala di banua tonga dope hita.tutu di banua tonga dope hita, alai nunga tapastihon marhite haporseaonta na parnampuna do hita di haluaon dohot harajaon ni Debata, alani dohot do hita manjalo haluaon i, rap do hita dohot na di banua ginjang i mangendehon naung sahat tu hita haluaon. Tung songon dia pe status ekonominta, status sosial-politikta, tangkas ma taauhon naung sahat do hita tu haluaon i. Ndang mardia imbar di jolo ni Debata sijalo haluaon i, pogos manang mora, parpangkat manang ndang, poso manang matua, na markeluarga manang ndang. Nunga sahat haluaon i, tajalo ma, tajanghon ma di bagasan haporseaon. Isarana molo dipatudos haluaon i songon sapiring sipanganon naung rade dijolonta. Molo holan taida sambing sipanganon i, ndang boi bosur hita. Alai ingkon na tapangan do asa boi hita gabe bosur jala margogo. Alani ingkon tajangkon ma haluaon i marhite haporseaon.

Mansai hantus do dipatorang di turpuk on, aha ma sinjata na manaluhon sibolis (naga) i, i ma mudar ni Birubiru. Tontu Birubiru na nidokna i ma Tuhan Jesus Kristus. Hamamate ni Jesus di hau pinarsilang, mudarNa na durus di dolok Golgata, i do hagogoon na so boi dialo sibolis i. Gomos ma tatiop silang i, ai molo tatiop silang ni Tuhanta i ndang boi be sibolis mangago hita. Molo naeng monang hita mangalo sibolis, so tung tapangasahon gogonta, so tung tapangasahon hagogoon ni portibi on. Molo dirinta, gogonta, portibi on do tapangasahon, tontu talu ma hita, alai molo mudar ni Tuhan Jesus i do na sai tagolom, sagogogogo ni sibolis naeng mangago hita, ndang tolapsa, ai nunga talu ibana.

Paduahon, nunga ditaluhon nasida ibana hinorhon ni hata na hinatindangkon nasida (ay. 11). Nang pe nunga talu sibolis i alai dipatorang do di ayat 12b, Marjea ma tano i dohot laut, ai nunga tuat sibolis i tu hamu,marrimas situtu, ai diboto, otik nama tingkina!” Lapatanna, paima ari paruhuman parpudi, sai marusaha dope sibolis i laho mangotootoi jolma i asa godang na mangihut tu ibana. I do umbahen disurathon di 1 Petrus 5: 8, “Torang ma rohamuna, dungo ma hamu, na maotaot do alomuna, sibolis i, songon babiat na marauang, mangalului sibondutonna.” Alai diangka naung gomos maniop silang ni Tuhanta i, ndang boi ibana paotootoon ni sibolis.

Patoluhon, dibahen i marlas ni roha ma hamu, angka banua ginjang dohot pangisina (ay. 12). Dung sidung parporangan i, marlas ni roha ma na monang, talu ma na marsak. Marhite ende hamonangan di ayat 12 on dijouhon ma na monang i, i ma angka banua ginjang dohot pangisina asa marlas ni roha. Huria ni Tuhanta, dohononta ma, na so tu hita joujou i ala pangisi ni banua ginjang do didok marlas ni roha? Molo songon i dope alusta, ndang tahaporseai naung sahat haluaon tu hita songon di ayat 10 nangkin. Molo tahaporseai naung sahat tu hita haluaon na sian mudar ni Kristus, tahaporseai ma naung parnampuna hita di banua ginjang. Alani dohot do hita tu joujou ni ayat 12 on. Ndang adong sidalian ni angka na porsea ndang marlas ni roha. Ala nunga monang Tuhanta i di hau pinarsilang nang di haheheonNa, na marlapatan dohot do hita gabe siparmonang. Las ma rohanta ala nunga adong jaminan di hita haluaon sogot nang di portibi on.

Ende hamonangan on ndada holan ende hamonangan di buku Pangungkapon, alai dohot do gabe endenta, ende ni sude na porsea. Hombar tu goar ni minggunta sadari on, Kantante na marlapatan, endehon hamu ma ende na imbaru di Jahowa. Antong taendehon ma ende hamonangan on i ma ende haluaon. Nunga sahat haluaon i tu hamu nang tu ahu. Taendehon ma i marhite hata nang pambahenanta, asa patar diida portibi on nunga talu sibolis, nunga monang Tuhanta i, nunga monang nang hita.