Khotbah Yesaya 63: 11-14 "Roh yang Menuntun"

Minggu Pentakosta; 31 Mei 2020

63:11 Lalu teringatlah mereka kepada zaman dahulu kala, zaman Musa, hamba-Nya itu: Di manakah Dia yang membawa mereka naik dari laut bersama-sama dengan penggembala kambing domba-Nya? Di manakah Dia yang menaruh Roh Kudus-Nya dalam hati mereka;

63:12 yang dengan tangan-Nya yang agung menyertai Musa di sebelah kanan; yang membelah air di depan mereka untuk membuat nama abadi bagi-Nya;

63:13 yang menuntun mereka melintasi samudera raya seperti kuda melintasi padang gurun? Mereka tidak pernah tersandung,

63:14 seperti ternak yang turun ke dalam lembah. Roh TUHAN membawa mereka ke tempat perhentian. Demikianlah Engkau memimpin umat-Mu untuk membuat nama yang agung bagi-Mu.

63:11 Alai sai tongtong do anggo ibana marningot di bangsona uju di ngolu ni si Musa di angka ari na robi, alai anggo naung didok nasida: Didia do ibana naung mamboan nasida, nangkok sian * laut rap dohot parmahan ni parduaan ni birubiruna? Didia ibana na * marsagihon Tondina na badia i tu tongatonganasida?

63:12 Ise ibana na manogu si Musa marhite sian tangan hamuliaonna naung patolak aek di jolonasida laho mambahen baritana salelenglelengna.

63:13 Ibana na manogu nasida mamolus angka pusat, songon hoda di adaran, ndang dung tartuktuk?

63:14 Songon pinahan na tuat tu rura, ditogihon Tondi ni Jahowa nasida tu hasonangan; songon i pe ditogihon ho bangsom asa mambahen goarmu marmulia.

Hatorangan 

Horas, jala selamat Pentakosta ma di hita saluhutna. Tondi ni Tuhan i do na pahothon parjongjong ni angka punguan parsaoran na badia di portibi on. Alani, molo tapestahon ari hasasaor ni Tondi Parbadia naeng ma nian tasulingkit be dirinta songon huria na pinaojak ni Tondi i. Dia do na niigil Tondi i sian angka huria sian mulana sahat tu nuaeng on. Molo tajaha di Padan na Imbaru taringot tu ari hasasaor ni Tondi Parbadia, tangkas do dipabotohon taringot tu ulaon ni Tondi i dimgolu ni angka apostel. Tondi i do na manggohi angka na porsea marpanindangion taringot tu Jesus naung mate jala mulak mangolu, manaek tu banua ginjang laho parade inganan hangoluan salelenglelengna.

Sada sungkunsungkun na tongtong sai tarbege sahat tu nuaeng “didia do Debata?” Taboto do songon dia Debata jala aha naung pinatupaNa di ari naung salpu, alai jotjot situtu do tahalupahon Ibana di partingkian nuaeng. Boi do tapajojor angka dia naung binahen ni Debata di ngolunta di tingki na salpu alai sipata lomos do hita manghaporseai Ibana di ari sadari on. pangalaho sisongon i do na pinatolhas ni Panurirang Jesaya di pamuhai ni turpuk on. Tongtong do Jahowa marningot bangsoNa sian partingkian ni si Musa. Ibana sandiri do naung patariparhon bangso i haruar sian tano parhatobanon Misir sahat tu na tolhas tu tano na pinarbagabaga i. Hape ala ndang manigor uli sude na sinangkapan dohot na pinarsinta bangso i, maheu dohot marsak do nasida jala sungkunsungkun, didia do Debata? Didia do Ibana naung marsagihon TondiNa na badia i tu tongatonga nasida? Boasa ro sungkunsungkun i? Ringkot nuaeng talului sidalian ni bangso i, boasa mangalului Debata. Na ditadingkon Debata do bangso i, dipasombu so mangalehon panuturion dohot angka sipaingot? Boasa lungun situtu sungkunsungkun i, manang na so dianturehon Debata be nasida? Mangida na masa nuaeng, na so boi dope hita mambahen parmingguon di gereja, ra boi do tubu sungkunsungkun na songon on? Didia do Debata? Boasa pasombuonNa na masa on?

Turpuk jamita on marbingkas sian na masa di Jerusalem dung mulak bangso i sian tano habuangan Babel. Dihirim do naung rade sude nasa na ringkot di parngoluan siap ari. Hape, tarhirim ma nasida ala nunga mansai dao na niadopan nasida sian na tinagam ni rohana. Alani i ma dipangiar bangso i soara mandok didia do Debata naung mamboan nasida nagkok sian laut rap dohot parmahan ni parduaan ni birubiruna? Boasa najolo uju di ngolu ni si Musa tung margogo jala marhuaso situtu Jahowa mangondihon nasida hape nuaeng hira na dipasombu bangso i mangadopi hansit ni na masa i di bonapasogit? Boi do siat tu roha na pinatubegehon nasida i. Alai, nuaeng taida ma sian barita on aha do na rumingkot sipeoponta.

Parjolo, jotjot ndang boi taida Debata di pardalanan ni ngolunta jala hira so diantoi angka na taadopi. Ndang pola adong sitihaan di roha na songon i asal ma porsea hita na tongtong do Debata marnida na masa di ngolunta. Ndada holan marnida dohot do mangondihon, mangurupi nang sumarihon angka na ringkot. Debata marnida dohot manatap di sude panggulmiton ni ngolunta jala ditanda Debata do hita. Panandaion ni Debata ndada holan di ruhut pardagingon tano on alai ihut do nang hangoluan sogot. Paduahon, ingkon tandaonta do pambahenan ni Debata di sude gulmit ni ngolunta. Molo tasulingkit sude na masa di pardalanan ni ngolunta, sada do ra na mansai tangkas hatindanghononta, godang do halongangan dipatupa Debata di hita. Songon bangso Israel na tolhas manaripari aek bolon sian pangaleleion ni parangan ni raja Parao, nunga tung godang tabolus tudos tusi. Panarihonon ni Debata na tangkas do i di hita. Nunga dipalua Debata hita di ragam ni hamaolon na taadopi di ari naung salpu. pangondihononNa i do na mambahen talup mangolu sahat tu sadari on.

Marhite turpuk jamita minggu Pentakosta on, naeng ma tangkas taida songon dia ualon ni Tondi ni Tuhan i mangula di parngoluanta. Ingkon tongtong do ingontonta na diida Debata sude na masa di hita be. Diingot Ibana do hita na jotjot ndang margogo mangadopi na masa i. Ditatap Ibana do pardangolanta jala dipatau hita mamolus ragam na masa jala marhite i lam tangkas panandaonta di Ibana. Dia na hea masa di Padan na Robi tu bangsoNa i, i ma tahaporseai. Unang ma tatiru parange ni bangso i na sai usouso di Debata, hape jonok do Ibana di lambungnasida. Unang ma sai pangarimason hita mangadopi angka na maol alai taingot ma na hot do padan ni Debata di hita. Ndang dung dihalupahon Ibana bangso na tinobusNa jala dipasombu manaon so dianturehon gariada tahe sai dijoloani do hita mamolus saluhutna. Ingkon pos do rohanta di pangondihononNa asa unang lomos, mabiar manang gabe mandele hita mangadopi sude na taadopi.

Tondi ni Debata manongtong di tongatonga ni na hinophopNa. On ma apala na mansai ringkot auhononta. Pardalanan ni bangso Israel mamungka ruar sian Misir dohot mamolus parhorsihan marragam do diae ala so pos rohanasida di pandonganion ni Debata. Ndang diloas bangso i mauas male mate anturaparon, alai sai diparade do bohal ni pardagingon nasida mamolus ari na mohop nang ari na ngali. Godang do dibereng nasida angka pangago saleleng di pardalanan i, alai sude i sumisi do. Ai angka bangso na naeng mangago nasida dipapatu do asa unang mambahen hamaolon di bangso i. Pambahenan ni Debata na songon i uli di nasida boi do dihalupahon ala adong tongon na maol sonson di jolonasida. Ala so singkop dope saluhut di Jerusalem dung mulak nasida sian habuangan, dilului Debata. I ma na mangonjar roha ni si Jesaya mamangkulingi bangso i. Dipaingot nasida unang madabu tu pandelean. Dipahot jala dipatogu tondinasida unang tarmali molo pe sipata maol parngoluan i. Panarihonon ni Debata marhite TondiNa na mangondihon Israel di ari naung salpu, songon i do Ibana mangondihon hita di ari nuaeng. TondiNa i ma na mandongani hita mamolus sude partingkian. Unang ganggu be rohanta manghaporseai Ibana. Tondi ni Jahowa do manogihon bangso Israel tu hasonangan jala Tondi i ma nang na manogihon hita mamolus sude na masa dohot na naeng masa di tongan ni parngoluanta. Amen.