Khotbah Kejadian 12: 1 - 9 Menjadi Berkat Dalam Kepelbagaian

Minggu 4 Setelah Trinitatis; 28 Juni 2020

12:1 Berfirmanlah TUHAN kepada Abram: "Pergilah dari negerimu dan dari sanak saudaramu dan dari rumah bapamu ini ke negeri yang akan Kutunjukkan kepadamu;

12:2 Aku akan membuat engkau menjadi bangsa yang besar, dan memberkati engkau serta membuat namamu masyhur; dan engkau akan menjadi berkat.

12:3 Aku akan memberkati orang-orang yang memberkati engkau, dan mengutuk orang-orang yang mengutuk engkau, dan olehmu semua kaum di muka bumi akan mendapat berkat."

12:4 Lalu pergilah Abram seperti yang difirmankan TUHAN kepadanya, dan Lot pun ikut bersama-sama dengan dia; Abram berumur tujuh puluh lima tahun, ketika ia berangkat dari Haran.

12:5 Abram membawa Sarai, isterinya, dan Lot, anak saudaranya, dan segala harta benda yang didapat mereka dan orang-orang yang diperoleh mereka di Haran; mereka berangkat ke tanah Kanaan, lalu sampai di situ.

12:6 Abram berjalan melalui negeri itu sampai ke suatu tempat dekat Sikhem, yakni pohon tarbantin di More. Waktu itu orang Kanaan diam di negeri itu.

12:7 Ketika itu TUHAN menampakkan diri kepada Abram dan berfirman: "Aku akan memberikan negeri ini kepada keturunanmu." Maka didirikannya di situ mezbah bagi TUHAN yang telah menampakkan diri kepadanya.

12:8 Kemudian ia pindah dari situ ke pegunungan di sebelah timur Betel. Ia memasang kemahnya dengan Betel di sebelah barat dan Ai di sebelah timur, lalu ia mendirikan di situ mezbah bagi TUHAN dan memanggil nama TUHAN.

12:9 Sesudah itu Abram berangkat dan makin jauh ia berjalan ke Tanah Negeb.

12:1 Dung i ninna Jahowa ma mandok si Abram: Bungkas ma ho sian tano hagodanganmu dohot sian hatubuanmu dohot sian bagas ni amam tu tano sipatuduhononku tu ho.

12:2 Hubahen pe ho gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho.

12:3 Jala pasupasuonku angka na mamasumasu ho, jala toruanku angka na mamburai ho, jala dapotan pasupasu marhitehite ho saluhut angka bangso ni tano on.

12:4 Jadi bungkas ma si Abram, songon na nidok ni Jahowa tu ibana, bungkas ma dohot si Lot udur dohot ibana. Marumur pitupulu lima taon si Abram, di na bungkas i ibana sian Haran.

12:5 Dung i diarahon si Abram ma si Sarai, jolmana i dohot si Lot, anak ni hahana i ro di sude na sinamotsamotnasida, dohot jolma, angka na tinuhornasida di Haran, jadi bungkas ma nasida laho tu tano Kanaan. Jadi dung tolhas nasida ro di tano Kanaan.

12:6 Diliati si Abram ma tano i sahat tu inganan ni si Sikem, ro di tombak More, nunga di tano i hian halak Kanaan i, didapot.

12:7 Dung i ro ma Jahowa, diida si Abram, didok ma: Tu pinomparmu ma lehononku tano on. Jadi dipajok disi sada langgatan di Jahowa na niidana i.

12:8 Dung i borhat ma ibana sian i tu sada dolok na tungkan habinsaran ni Betel, jala dipagohon undungundungna, tungkan hasundutan ni Betel, jala tungkan habinsaran ni Ai; jadi dipauli ma disi sada langgatan di Jahowa, jala dipajoujou goar ni Jahowa.

12:9 Dung i bungkas muse si Abram laho dompak dangsina.

Hatorangan

Jotjot do tadok, manang didok halak tu hita: Martua ho da, ai tarpasupasu ho sian Debata. Dung i taalusi ma: i ma da mauliate ma tu Debata! Sasintongna molo tasungkun dirinta ganup marsadasada, aha do pasupasu na nilehon ni Debata di ngolunta nuaeng? Adong do manang ndang? Ra marasing do alus sian hita be hombar tu na tahilala dohot na tadai. Sandok songon halak Kristen hita ndang boi parsoadaonta paboa gok pasupasu ni Debata do ngolunta on. Angka dia ma i huroha? Hahipason ni pamatang pe pasupasu do i. Dungo sian padomanta manogot i dibagasan hahipason, tulus ianakhon sian parsingkolaanna, gabe na niula dohot sinur ni pinahan, pasupasu ni Debata do i. Sadok tung mansai godang pasupasu ni Debata naung tajalo. Ndada holan hagabeon, hamoraon dohot hasangapon pasupasu ni Debata di hita.

Alai angka na so dapot idaon dibagasan ngolunta parhatopotonta ma pasupasu ni Debata. Asa naeng botoonta ndada holan pasupasu na boi idaon, suhaton manang timbangon asa didok pasupasu sian Debata. Alogo, hosa, las ni ari dohot udan saluhutna ragam ni pasupasi sian Debata. Holan i tutu unang sala mangantusi hita taringot tu pasupasu ni Debata. Isarana, molo manangko sasahalak jala ndang hadapotan, boha pasupasu do i? Tontu ndang pasupasu ni Debata i, baliksa sogo ni roha ni Debata do i, maralo tu patik paualuhon. Antong dia do pasupasu ni Debata? I m na mambahen las rohanta jala patauhon hita manghaholongi Debata.

Ihut tusi, ndada singkop dope pasupasu ni Debata molo holan na tajalo sinuaeng. Alai na tongtong dope hita manghirim jala porsea dipasupasu ni Debata sipasahatonNa tu hita tu joloan on. I do ngolu ni na porsea di adopan ni Debata. Ndang hea mansohot panghirimonta tu pasupasu ni Debata sipasahatonNa tu hita. Antong angka dia ma pasupasu ni Debata silehononNa tu hita? Holan Debata sandiri do na umbotosa jala hombar tu lomo ni rohaNa ndada hombar tu lomonta. Holan i rade ma hita jala unduk tu hataNa na pinasahatNa tu hita. I do turpuk jamita di hita, marhite panjoun ni Debata tu naposoNa Abraham asa bungkas sian tano hagodanganna tu tano sipasahatonNa tu ibana. Dijou Debata si Abraham asa bungkas sian tano hatubuanna. Ala naeng pasahaton ni Debata tu ibana pasupasuNa. Atik pe ndang diboto si Abraham aha naeng patupaon ni Debata tu ibana. Alai marhite hata na jinalona nang na ni antusanna dohot haporseaon dapotan pasupasu ma ibana di pardagingon nang di partondion.

I do hata ni Debata na jinalona na mandok: hubahen pe ho gabe bangso na bolon, jala pasupasuonHu ma ho, jala pabalgaonHu goarmu, asa gabe pasupasu ho (ay. 2). Atik pe ndang dipatorang di turpuk on songon dia hataridaan ni pandohan di ayat 2 on. Aut jolma na so porsea si Abraham tontu ndang oloanna panjouon i. Ala sai matua dihasiholi jolma do bona pasogitna, tano hagodanganna manang hatubuanna. Songon nidok ni halak Batak “arga do bona ni pinasa”. Alai anggo si Abraham ummarga do panjouon ni Debata tu ibana atik pe ndang diboto ibana tu dia ibana dijou. Alai sian ayat parjolo di turpuk on didok: tu tano sipatuduhononHu tu ho. Jumpang ma haporseaon ni si Abraham marhite pandohan i. Ndang pola ragu ibana dipanjouon i ala tangkas do panjouon i di rohana. Atik pe nian ndang dipaboa di turpuk on tu dia ibana borhat.

Haporseaon sisongon i ma na ingkon jumpang di hita di adopan ni Debata. Porsea hita na togihonon ni Debata hita manganhon bagabaga i. Diarahon ma jolmana si Sara dohot si Lot anak ni hahana. Dihilala si Abraham pasupasu na sahat tu ibana ingkon dohot tu na humaliangna i ma dongan saripena dohot si Lot (ay. 4-5). Na denggan do na pinatupa ni si Abraham on, ndang pintor tu balian ni halak ibana marbarita taringot tu padan ni Debata. Alai jumolo do tu dirina sandiri dohot keluargana. On ma nidok ni halak Batak: “sian jabu asa tu alaman dohot tu balian”. Lapatanna, parjolo diri sandiri, dongan sabagas dung i tu halak na asing. Songon i ma si Abraham mangantusi panjouon ni Debata tu ibana. Anggiat halak na asong pe taruli disilehon lehon ni Debata.

Alani jamita sadari on manunggulhon tu hita asa gabe pasupasu hita tu halak na asing. Tutu ndang diboto si Abraham dope sangkap ni Debata tu ibana marhite panjouon i. Alai porsea ibana dipanjouon ni Debata. Sipata buni do sangkap ni Debata di ngoluntan on. olo do suhar dirohanta, alai anggo sangkap ni Debata mansai uli do tu angka na porsea. Songon na tarsurat di Jeremia 29: 11 “Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna”. Alani i, molo masa parsorion dohot hamaolon di ngolunta, ndang na ditinggalhon Debata hita, sai tong do dihaholong hita. Asa sude ma hita marhatopothon na Debata do haroroan ni pasupasu. Dijou Debata hita asa manjalo dohot marsaulihon pasupasu i songon na masa tu si Abraham.

Manghamauliatehon panjoun ni Debata, dipajongjong si Abraham ma langgatan pamujion tu Debata, marningot asi ni roha ni Debata naung jinalona. Mandok mauliate tu Debata dibagasan panghirimon nang haporseaob tu bagabaga ni Debata naung sahat tu ibana. Bagasta, ulaonta dohot keluarganta pe boi do gabe langgatan pamujion tu Debata songon na taulahon dipiga-piga minggu naung salpu na patupa parmingguon hita dibagasta ganup marsadasada ala na tongon masa virus corona (Covid-19).

Jesusk Kristus i ma pasupasu na manongtong na pinasahat ni Debata tu hita. Nunga ditobus Debata hita sian dosa dohot uhuman ni sibolis. Pasupasu na sian Debata do i ala malua hita sian rante ni sibolis dohot hamatean na salelenglelengna. Antong sai olo ma hita dijou Debata asa dapotan pasupasu hita, jala gabe pasupasu ma hita tu angka humaliangta. Di dia pe hita maringanan nang gabe pasupasu hita. Ndang pola maol taantusi molo didok gabe pasupasu tu sude jolma, masihaholongan, marpanarihon dohot marsiurupan. Didok tema ni jamitanta dipasupasu asa gabe pasupasu, nunga dilehon Debata pasupasu tu huria, boi jongjong sahat tu tingki on, alani mandok mauliate hita tu Debata, ala Debata do nampuna huria ndada jolma. Jala ndang sarupa dohot organisasi huria i, sandok pamatang ni Kristus do. Jala di huria torop do angka ruas na boi manang berpotensi laho pauliulihon. Masitumpahan ma di angka pambahenan. Unang tubu hosom, bada dohot late, alai naeng ma nian tongtong jumpang hasadaon. Ala diparbaga Debata do tu na marsaroha, pasupasu na godang i ma roha na sonang (BE. No. 122: 4). Amen.