TATA IBADAH MINGGU 2 SET. TRINITATIS 21 JUNI 2020

PARTORDING NI PARMINGGUON DI JABU

GKPI RESORT SAGALA

EVANGELIUM : 3 Musa 25: 1 – 13    

         JOU JOU MANGARADOTI NA TINOMPA

Minggu 2 Dung Trinitatis, 21 Juni 2020

Andorang so dipungka parmingguon, jumolo ditontuhon sian anggota keluarga na manguluhon parmingguon, siboan tangiang pangondianon, dohot parjamita.

 

1.    Pangaradeon : Martangiang na hohom di bagasan roha.

2.    Marende B.E. No. 23 : 1 + 3   “Jesus, hami ro di son, asa”

Jesus hami ro dison, asa masihaholongan.

I pe ro ma Ho tuson, jala baen ma pardomuan.

Ni tondiM tu tondinami, Unang mampar rohanami.

Sondang sian Debata, hatiuron sian ginjang,

Baen ture, sondangi ma rohanami, asa sonang

Lao manjalo hangoluan, pinatupaM i, o Tuhan.

3.    Votum – Introitus – Tangiang :

U  : Dibagasan goar ni Debata Ama, dohot AnakNa Tuhan Jesus Kristus, dohot Tondi Parbadia, na manompa langit dohot tano on.

R   : Amen.

U  : Songon on ninna Tuhan Jahowa: Ianggo halak partigor i mangolu do binahen ni parsihohotna marhaporseaon.

R   : Alai anggo di halak parjahat ndang adong hasonangan. Haleluya!

U  : Martangiang ma hita : Ale Tuhan Debata, Amanami, Ho do mangurupi hami uju hubolus hami parungkilon dohot hasusaan.

R   : Ungkap ma rohanami, asa tarbehen hami manghatindangkon dohot manghamauliatehon asi ni rohaM di ngolunami, marhite hata dohot pambahenannami.

U : Patogu ma haporseaonnami sahat tu ujung ni ngolunami, asa gabe panean hami di ngolu si saleleng lelengna na pinaradeM di saluhut angka na porsea tu Ho, dibagasan Jesus Kristus Tuhannami.

U+R : Amen.

4.    Marende B.E. No. 227 : 1 – 2 “O Tuhan Jesus, Raja”

O Tuhan Jesus, Raja ni sudena, tubu sian Ama i!

Haholonganku sisombaonku, sasada Ho do Tuhanki.

Tombak denggan do, hauma pe denggan do, na rumatarata i!

Jesus dumenggan, Jesus gumodang, sibaen las ni rohanta i.

5.    Epsitel : Pangungkapon 7: 1 – 3           

U  : Tabege ma hata ni Debata, patujolo ni jamita, turpuk di minggu sadarion, i ma na tarsurat di Pangungkapon 7: 1 – 3

Dung salpu i, huida ma opat surusuruan jongjong di na opat desa ni tano i, angka na maniop na opat alogo ni tano i, asa unang mangombus alogo di tano, nang di laut nang tu sada hau pe.

H  : Dung i huida ma surusuruan na asing hehe sian habinsaran ni mata ni ari, na maniop sahap ni Debata na mangolu, jadi balga ma soarana manjouhon dompak surusuruan na opat i, angka naung manjalo sahala mangago tano dohot laut.

U+H : Ninna ma: Unang ma ago hamu tano nang laut nang angka hau, paima husahapi hami angka naposo ni Debatanta di bohinasida be!

U  : (dung sidung manjaha Epistel, didok namanguluhon parmingguon ma)

Martua ma angka na umbege hata ni Debata, na umpeopsa jala na mangulahonsa.

U+R : Amen

6.    Marende B.E. No. 182 : 2 – 3    “Haholongan na badia”

Husolsoli do rohangku na gok dosa i tongtong;

Ai godang ariaringku na hubahen ambolong.

Sai jotjot do hutadingkon dalanMi na tigor i;

Kristen au, hape hutondong, dalan hamagoan i.

7.    Manopoti Dosa – Bagabaga Taringot tu Hasesaan ni Dosa :

U  : Tatopoti ma dosanta, jumolo hita martangiang dibagasan rohanta:

Ale Debata, Tuhannami na badia, Amanami dibagasan Jesus Kristus. Mauliate ma rohanami di Ho, ala sai jumpang nami do dame na sumurung i di tingki ro hami marsomba di adopanMu, alani panghaholongim di hami na mardosa on.

R   : Umbahen i, ro do hami nuaeng marsomba di adopanMu mangido hasesaan ni dosanami, doshon birubiru na lilu i sai jotjot do hulaosi hami uhumMi.

U  : Sai ungkap ma asiasiMi di hami. Jangkon ma hami gabe anakkonMu, ala ndang dihalomohon Ho hamamate ni pargeduk, alai hamubaon ni rohana do asa mangolu Ibana

R   : Sesama saluhut dosa dohot pangalaosionnami i ala asi ni rohaM.

U  : Pahot ma asi ni rohaMi di hami, asa martua hami manjou goarMi, asa sude na huula hami, pangalaho dohot pingkirannami tau hasangapon di goarMu na badia i. Amen. Tabege ma bagabaga ni Debata taringot tu hasesaan ni dosanta.

Tangihon ma ahu hamu angka na mangeahi hatigoran, angka na mangalului Jahowa! Paberengbereng hamu ma dolok batu hapultahanmuna dohot godung parsumuran na hinali, haruaranmuna i. Hasangapon ma di Debata na di ginjang.

U+R : Amen.

8.    Marende B.E. No. 516 : 1 – 2    “Bege Joujou ni Jesus”

Bege joujou ni Jesus i, tongtong dijou na lilu i.

Mago do birubiru i sian Tuhanta Jesus i.

Sai lului, sai lului, birubiru na mago i.

Sai lului, sai lului, mulak boan i tu Jesus.

Ho diarahon Jesus i, silu, lului na mago i,

Togihon ma tu Jesus i na loja, na maheu i.

Sai lului, sai lului, birubiru na mago i.

Sai lului, sai lului, mulak boan i tu Jesus.

9.    Patik : IV dohot Lapatanna

U : Tatangihon ma Patik ni Debata i ma Patik Paopathon dohot Lapatanna

Ingot hamu ma pabadiahon ari Minggu i! Di na onom ari ma ula hamu nasa siulaonmu; alai anggo ari papituhn i, ari paradianan ni Jahowa DebataM do i. Ndang jadi Ho mangula anggo di na sadari i, manang anakmu pe manang borum, manang naposom lahilahi manang naposom boruboru, ro di pinahanmu, ro di isi ni huta ni halak pe na mangebati hutam. Ai di na onom ari ditompa Debata langit dohot tano dohot laut dohot nasa isina, dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadia i.

Dia do lapatan ni i? On do: Ingkon dihabiai rohanta Debata jala ingkon holong rohanta di Ibana asa unang tois rohanta diajar na sian Debata. Ingkon badia do hata ni Debata dirohanta jala ingkon ringgas rohanta tumangihon dohot mangguruhon.

U  : Antong rap mangido gogo ma hita tu Debata

U+R : Ale Tuhan Debata, sai pargogoi ma hami mangulahon na hombar tu PatikMi. Amen.

10.     Marende B.E. No. 512 : 1 – 2     “ Di dalani Jesus tano”

   Didalani Jesus tano dohot laut, tahi holong ni rohaNa do na saut,

   Na mura luhut dibaen tondiNa i, dung disesa utang ni dosanta i.

   Hahaanggi, ro hamu sude, taarahon ma donganta be,

   Hahaanggi dao nang jonok be! Hara tu joloNa donganmu sude.

     Nunga monang di jabum hataNa i? Hata i dipangke ho sinjatam i?

     I do hapistaran na sumurung i, Jumpang do mura sudena baenon nii.

     Hahaanggi, ro hamu sude, taarahon ma donganta be,

      Hahaanggi dao nang jonok be! Hara tu joloNa donganmu sude.

11.      Manghatindangkon Haporseaon :

U  : Tahatindangkon ma haporseaonta i, songon na hinatindangkon ni donganta sahaporseaon di portibi on, rap mandok ma hita : 

12.      Tingting :

13.     Tangiang Pangondianon : (Dipillit ma sahalak sian anggota keluarga)

14.     Marende B.E. No. 429 : 1 – 3    “Portibi torus binolus”

       Portibi torus binolus, tung godang do ulina i.

       Matua so olo do sombu hasisihol ni roha disi.

              Tu jae nang tu julu iba, na humaor do sasude,

              Holsoan lao pasarisari, tu na tau hangoluanna be.

       Sihol do antong rohana di arta nang di sangap pe,

       Alai na andul sumurung ditoishon rohana dope.

15.     Evangelium : 3 Musa 25: 1 – 13    

Nunga hurang lobi tolu pulu taon sai tarbege joujou di portibi on laho mangaradoti na tinompa ni Debata, sian pamarenta nang sian tonga ni huria pe. Di ari na parpudi on lam gogo do soara i manjouhon asa sude jolma mangharingkothon haulion ni na tinompa ni Debata. Marbonsir do i ala lam sega angka dolok, tombak jala suda angka hau ditaba na mambahen ro aek na sumar, masursur angka dolokdolok jala dung salpu i mahiang ma angka tano. Angkup ni i nunga lam tu mohopna nuaeng tahilala portibi on ala so adong be na mangalinggomi jala aek pe nunga lam marsik. Di pigapiga luat nunga torop jolma mate ala na mohopan, ala so ada aek siinumon. Sude i masa ala hisap ni jolma sandiri. Dapotan sinamot do jolma i sian hau naung tinabana i, alai ndang mulak be ianggo haulion ni angka tombak i. Tubu ma sungkun-sungkun: andigan ma mansohot sudena i asa sumuang na tinompa ni Tuhan i tu haulionna hian? Molo tajaha turpuk on tung tangkas do dipaingot Debata bangsoNa marhite si Musa, na ingkon do radotanta saluhut ba tinompa ni Debata. Deba sian angka tona ni Debata dalan laho mangaramoti na tinompa i ma nuaeng turpuk jamita on.

Adorang so bongot bangso Israel tu tano Kanaan, na pinarbaga i nunga dipasahat Jahowa patik tu bangso i marhite si Musa na mandok, ingkon adong di tano i ari paradianan Sabbat di Jahowa. Holan onom taon padodot do i boi ulaon nasida tano i, alai di taon papituhon ingkon mangulon. Dipadomu do taon pangulaon i tu ari panompaon ni Debata na holan onom ari mangula dung i maradian di ari papituhon. Ndada holan mangula tahe na diorai di taon papituhon alai dohot do nang na paiashon ranting ni hau anggur dohot papunguhon angka parbuena. Alani do digoari patik on “Taon Sabbat”, taon paradianan manang taon pangulonan. On ma apala sada hatandion ni patik ni Debata taringot tu tano pangulaan. Na so jadi marlomolomo jolma di tano na nilehon ni Jahowa di bangsoNa i. Dia do lapatan ni patik on? Molo so mangula manipat sataon jolma i, aha do bohal sipanganon nasida? Sae do parbue ni na niula di bagasan 6 taon panganon nasida 7 taon? Ai haru ganup taon do jolma mula ulaon di ladang sipata ndang sai arde sipanganon. Boha muse ma molo masa na so hinirim, isara ro bala tu suansuanan di hauma manang di ladang, amporik mamarguti angka parbue manang bagudung mangallangi suansuanan di ladang i? Aha ma na tau gabe bohal di pardagingon nasida?

Partongan kalender onom taon mangula jala taon papituhon mangulon. Dung pitu hali taon Sabbat i dipatupa, ganup taon papituhon ndang mangula bangso i dung singkop opatpulu sia taon, mangulon ma nasida di taon palimapuluhon (somal didok “Taon Jobel”) mangkuling ma sarune di sandok Israel. Tingting do i na paboahon taon habadiaon ni Jahowa, i ma bulan sipaha pitudi ari sampulu. Taon parolopolopon ma i di sandok bangso i. On ma taon na tung mansai uli situtu dipatupa Jahowa di bangso Israel jala sada dalan laho pasuanghon gogo ni tano. Laos digoari do taon Jobel i taon na badia di Jahowa. Aha ma guna ni na dua taon i (Sabbat dohot Jobel) di bangso Israel jala dia do hadomuonna tu hita saonari. Adong pinomat tolu na ringkot taida sian turpuk on.

Parjolo, taon Sabbat marsuru jolma ndang holan ndang mangula asa unang gabe hatoban ni tano i jolma, alai dohot asa sumuang gogo ni tano i, mulak napu tubuan angka suansuanan. Molo so mangulon tano diula jolma, tungil do do tano i so mangalehon parbue tu na mangula. Marisuang ma gogo ni jolma i ala so mangalehon parbue be tano i. Ala onom ari Jahowa manompa langit dohot tano on nang sude pangisina, na tinompaNa i pe ingkon dapotan taon paradianan. Dalan ni bangso i do i laho marningot songon dia Debata manarihon ngolu nasida di ari panompaon i. Jala ingkon hot do pardalanan ni partingkian di jolma i songon parhusoran ni tingki, adong ari logo, ari rondo, dohot lan na sing pe.

Paduahon, Gogo ni tano saleleng so diula gabe diparade tu angkana hurangan ima angka hatoban na adong di tongatonga ni bangso i. Songon i do Debata sumarihon angka jolma na gale na so marnampuna tano, na so adong pangulaonna. Nasa na tubu dohot parbue na adong di tanp i saleleng taon Sabbat ndang jadi dibuat jala ingkon dipasombu buaton ni angka jolma hatoban. Alai laos sian on ma boi tangkas taboto na so adong huaso na hot di bangso Israel laho mangula tano i, ai hot do Jahowa nampunasa. Nang pe tu bangso i tano i dipasahat Debata alai nampuna tano i Debata sandiri do. Lapatanna, pangula ni Debata do Israel di tano i jala ingkon unduk do tu patikNa.

Patoluhon, hombar tu sungkunsungkun na di ginjang i, songon dia ma boi tuk gogo ni tano onom taon gabe bohal pitu taon molo so diula tano jala holan na tubu disi na boi dibuat? Sada alus na mansai tangkas boi taida sian barita panompaon di 1 Musa 1: 29 “Boti ma i, nunga Hulehon tu hamu nasa suansuanan na marparbuehon boni di sandok tano on, ro di sude hau angka na marparbue sisuanon, bahen panganonmuna ma i”. Borhat sian ayat on boi dohonon nunga diparade Debata na tau panganon ni bangso i molo pe so mangula nasia dibagasan na sataon i. Songon i nang barita na masa diparhorsihan uju haruar sian tano parhatobanon Misir jala di na naeng taripar tu Kanaan (2 Musa 16) taringot tu panarihonon ni Debata tingki male bangso i. Sian hatorangan on ma lam nalnal boi taboto songon dia ma Debata manatap hinauli ni na tinompaNa marhite patik i. Angkup ni diajari patik i do nang nasida laho paradehon bohal saleleng onom taon. Asa molo dung sahat tu taon Sabbat ndang adong be holso na so dapotan sipanganon nasida. Ingkon marbisuk do nasida papunguhon na ringkot di parngoluan sataon i, ai so boi be mangula tano. Hombar do i tu na masa di Misir na pinatupa ni si Josep (1 Musa 41: 47-57) laho mangadopi haleon potir saleleng pitu taon.

Dipatolhas turpuk jamita on do tu hita songon dia Debata sitolusada i manarihon ngolunta. Marhite na manghaporseai Debata na tongtong manarihon nasa na ringkot di parngoluanta. Mangulahon patik ni Debata taringot tu ulaonta na dipasahat laho mangaradoti na tinompaNa. Sae do na tinompa ni Debata bahen bohal ni ngolu di saluhut jolma alai ndang sae i molo hamongkuson mangarajai ngolu ni jolma i. Marhite jamita on dipaingot hita asa taparade ari sogot ni pomparanta, sundut na mangihut marhite na rade bohal ni parngoluan nasida. Bohal ni ngolu i ndada sipanganon na rumingkot alai inganan parmianan nasida. Tasarihon ma na ringkot di pomparanta sogot, ai i do dalanta laho mangoloi dohot mangulahon patik ni Debata. Amen.

16.     Marende B.E. No. 519 : 3    “Tarbege do panjou”

Antong, ringgas ma lao mamboan barita ni Tuhanta i,

Tu angka marga di na holom, asa dapotan dohot i.

Hita sude, naeng ma rade, nang dilele, da, haposan ma di Debata.

17.     Ayat Pelean : Psalmen 50 : 23

U  : Hata ni Debata ojahan ni haporseaonta laho pasahathon peleanta, i ma na tarsurat di Psalmen 50 : 23

Manang ise na mamelehon hamauliateon, i do na pasangap Ahu, jala mambahen lapang, asa hupatuduhon di ibana hatuaon ni Debata.

18.     Tangiang Pelean :

U  : Ale Debata, Amanami na di banua ginjang. Diparhatopot rohanami do sian unduk ni rohanami, Ho do mual ni nasa ulibasa na mauliutus. Dison hupasahat hami do pelean ni hamauliateonnami tu Ho. Sai jalo jala pasupasu ma peleannami on asa gabe dalan panindangion, parsaoran dohot ulaon asi ni roha di huriaMon. Bahen ma ngolunami gabe pelean na hombar tu lomo ni rohaM, jala parsidohot parohon harajaonMu, holong, hasintongan dohot hadameonMu di sandok portibi on. Buhai ma rohanami marhitehite TondiM, asa sai tongtong mandok mauliate tu Ho, dibagasan goar ni AnakMu, Jesus Kristus, Tuhannami. Amen.         

19.     Ende Pelean B.E. No. 307 : 3 “Mata ni ari”

   Sai taendehon ma hasangapon ni Debatanta,

   Jala rohanta sai tapelehon tu Tuhanta i.

   I ma pelean na tongtong dumenggan,

   Endeendenta do doshon daupa, lomo ni roha ni Tuhanta i.

20.     Tangiang Panutup : Ale Amanami (Rap mandok)

21.     Pasupasu

Dipasupasu jala diramoti Tuhan Debata ma hita!

Disondangkon Tuhan Debata ma bohiNa tu hita, jala asi rohaNa mida hita!

Didompakkon Tuhan Debata ma bohiNa tu hita,

Jala dipasaorhon ma dameNa tu tondinta be!

22.     Amen... Amen...Amen...