TATA IBADAH MINGGU 3 SETELAH TRINITATIS 28 JUNI 2020

PARTORDING NI PARMINGGUON

GKPI RESORT SAGALA

EVANGELIUM : KOLOSSE 3 : 18 – 21     

         PAJONGJONG PARSARIPEON NA MARTUA

Minggu 3 Dung Trinitatis, 28 Juni 2020

1.    Pangaradeon : Martangiang na hohom di bagasan roha.

2.    Marende B.E. No. 14 : 1 – 2   “Puji hamu Jahowa tutu”

Puji hamu Jahowa tutu, pardenggan basa, parasi roha saleleng na i;

Pardenggan basa i, parasi roha i.

Ingot tongtong ale tondingkon sude na denggan, Na dipasonggop Debata tu Ho;

Denggan basaNa do na pangoluhon ho.

Nda tung adong pargogo tongon, Na martudosan tu Tuhan Debata di surgo i,

Sun hinagogo i, sun hinagogo i.

3.    Votum – Introitus – Tangiang :

U  : Dibagasan goar ni Debata Ama, dohot AnakNa Tuhan Jesus Kristus, dohot Tondi Parbadia, na manompa langit dohot tano on.

R  : Amen.

U  : Nunga tibu hian diida rohangku Jahowa, ninna Ibana do:

R  : Haholongan salelenglelengna hubahen manghaholongi ho, dibahen i hutogutogu ho marhitehite asi ni roha. Haleluya!

U  : Martangiang ma hita : Ale Tuhan Debata, Pargogo na so hatudosan, basabasahon jala patubu ma haporseaon na marsihohot dibagasan rohanami.

R  : Pahot jala patogu ma haporseaonnami ganup ari, asa tarbahen hami mamolus ragam ni angka pangunjunan.

U : Sai ajari ma hami manghaholongi Ho dohot angka dongannami, asa hupatuduhon hami asi ni rohaM dohot denggan basaM na balga i.

R  : Sai lehon ma tu hami panghirimon na mangolu, asa tongtong marlas ni roha hami maimaimahon haroro ni harajaonMu.

U  : Jala asa tarbahen hami mangulahon lomo ni rohaM di ngolu siganup ari. Dibagasan goar ni AnakMu, Jesus Kristus Tuhannami

U+R : Amen.

4.    Marende B.E. No. 481 : 1 – 2 “Godang dope”

Godang dope siguruhononmi, Asa tudos ho dohot Tuhanmi.

Sai tong na hurang hatigoranmi. So tuk do pe haporseaonmi.

Dirim sambing di haholongi ho. Donganmu laos dihalupahon ho.

Tuhanta Jesus tiruanmu do. Na holong roha di au nang di ho.

Ai diseahon do diriNa i. Singkatta lao tu hamatean i,

Ndang na dialang holong roha i, ai naeng di hita hangoluan i.

5.    Epsitel : Angka Ende sian si Salomo 8: 5 – 7            

U  : Tabege ma hata ni Debata, patujolo ni jamita, turpuk di minggu sadarion, i ma na tarsurat di Angka Ende sian si Salomo 8: 5 – 7  

Ise do ulaning ibana na manaek sian halongonan, jala marpangunsandean tu hasudungan ni rohana? Di toru ni hau unte manis ahu manungguli holong ni roham; laos disi do diae inanta ho, disi do ho ditubuhon na manubuhon ho.

R  : Bahen ma ahu songon tintin sahap tu bagasan roham, songon tintin sahap tu botohonmu! Ai tung na gogo do roha haholongon i, songon gogo ni hamatean tahe; tung na jorbut do pangiburuonna i, songon jorbut ni banua toru tahe. Nalanalana do songon nala ni api, songon hilap sian Jahowa.

U+R: Ro pe angka aek magodang, ndang tarbaorhonsa anggo roha haholongon i, jala ndang taraup angka batang aek. Tung sura pe olo sada baoa mangalehon nasa arta pineopna di jabuna bahen ali ni roha haholongon i nian, ndang parduli ibana disi.

U  :  Martua ma angka na umbege hata ni Debata, na umpeopsa jala na mangulahonsa.

U+R : Amen

6.    Marende B.E. No. 167 : 1 – 2     “Martua do na marhaposan”

Dijangkon Jesus do pardosa, na mangarsakhon dosa i,

Na mangundukhon hinaroa ni pambaenanna sasude.

Alai ditangkup hataon: dijangkon Jesus nang au on.

Pardosa na tarsolsol bagi, na ponjot roha situtu,

Huhut na olomanopoti, dosana i mansai burju,

I do dijangkon Jesus i asa paluaonNa i.

7.    Manopoti Dosa – Bagabaga Taringot tu Hasesaan ni Dosa :

U  : Tatopoti ma dosanta, jumolo hita martangiang dibagasan rohanta:

Ale Debata, Tuhannami na badia, Amanami dibagasan Jesus Kristus. Mauliate ma rohanami di Ho, ala sai jumpang nami do dame na sumurung i di tingki ro hami marsomba di adopanMu, alani panghaholongim di hami na mardosa on.

R  : Umbahen i, ro do hami nuaeng marsomba di adopanMu mangido hasesaan ni dosanami, doshon birubiru na lilu i sai jotjot do hulaosi hami uhumMi.

U  : Sai ungkap ma asiasiMi di hami. Jangkon ma hami gabe anakkonMu, ala ndang dihalomohon Ho hamamate ni pargeduk, alai hamubaon ni rohana do asa mangolu Ibana

R  : Sesama saluhut dosa dohot pangalaosionnami i ala asi ni rohaM.

U  : Pahot ma asi ni rohaMi di hami, asa martua hami manjou goarMi, asa sude na huula hami, pangalaho dohot pingkirannami tau hasangapon di goarMu na badia i. Amen. Tabege ma bagabaga ni Debata taringot tu hasesaan ni dosanta.

Tangihon ma ahu hamu angka na mangeahi hatigoran, angka na mangalului Jahowa! Paberengbereng hamu ma dolok batu hapultahanmuna dohot godung parsumuran na hinali, haruaranmuna i. Hasangapon ma di Debata na di ginjang.

U+R : Amen.

8.    Marende B.E. No. 74 : 3 – 4     “Sai marlas ni roha hita”

O hamu, ale pardosa, molo naeng sonang hamu,.

Sai tangihon ma soara ni Tuhanta i burju.

Sai pauba rohamu jangkon Jesus i tutu,

Asa saut paluaonNa, tondimuna sian dosa

Nunga ro na mangapuli roha ni parbegu i;

Sahat do nuaeng na uli tu na olo unduk di

Tuhan Jesus, Raja i naung ro sian surgo i.

Sai tapuji ma Ibana jala taoloi hataNa.

9.    Ruhut ni Ngolu Naimbaru : Pilippi 2: 2

U : Tatangihon ma Patik ni Debata i ma na tarsurat di Pilippi 2: 2

Gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu!

U  : Antong rap mangido gogo ma hita tu Debata

U+R : Ale Tuhan Debata, sai pargogoi ma hami mangulahon na hombar tu PatikMi. Amen.

10.     Marende B.E. No. 178 : 1 + 3     “ Ro ma tu Jesus”

   Ro ma tu Jesus, ro ma tibu, bege hataNa jangkon burju.

   Na ro do Jesus pangolu ho asal porsea ho.

   Mansai las rohanta i muse molo ias sian dosa pe,

   Sai ro ma hita tu surgo i, laos sonang ma disi.

       Ro ma tu Jesus, hatop ho ro, ai so ditulak Jesus be ho.

       Na asi roha do Jesus i sai pos ma roham i.

       Mansai las rohanta i muse molo ias sian dosa pe,

       Sai ro ma hita tu surgo i, laos sonang ma disi.

11.      Manghatindangkon Haporseaon :

U  : Tahatindangkon ma haporseaonta i, songon na hinatindangkon ni donganta sahaporseaon di portibi on, rap mandok ma hita : 

12.      Tingting :

a.    Bagi warga jemaat yang mengadakan ibadah minggu di rumah, kami mengharapkan agar persembahan dikumpulkan kepada Penatua Sektor (Lingkungan) dengan mencamtumkan nama kelurga dan jumlah persembahan guna kelancaran pelayanan di Gereja.

b.    Bila belum ada perkembangan lebih baik mengenai Covid 19, maka Ibadah Minggu masih akan kita laksanakan di rumah masing-masing sesuai peraturan Pemerintah.

13.     Tangiang Pangondianon : (Dipillit ma sahalak sian anggota keluarga)

14.     Marende B.E. No. 160 : 1 – 3    “O Tondi Parbadi i, bongoti”

   Au dohot na saripengkon, o Jesus, na di joloM on, Ho naeng oloannami.

   Ho nampuna hami on, saleleng hosanami on; Sai pasupasu hami.

   Ho ma Raja Sioloan, pausoan, sisungkunon dipatikMu, ale Tuhan!

       Sai pasupasu hami be, pasingkop bohalnami pe, padao ma hapogoson.

       Horasi dohot daging i, sai tuk ma baen gogona i, manahan di ulaon

       Tolong, tolong, ganup hami, asa hami manghaposi, rohanami na sai marasi.

   Rajai ma hami sai tongtong, pasaor tu rohanami on, dameM o Tuhannami.

   Marhitehite tondiM i, ingani rohanami be huhut patogu hami.

   Dao ma bada sian hami, jabunami baen inganan, pardamean, hasonangan.

15.     Evangelium : Kolosse 3: 18 – 21  

Adong do ruhut ruhut di sikola, adong ruhut ruhut di kantor, adong ruhut ruhut ni lalu lintas, marragam angka ruhut ruhut siihuthon ni jolma hombar tu ingananna jala hombar tu situasina. Laos i do na digombarhon turpukta sadari on i ma ruhut ruhut di parrumatanggaon ni halak Kristen. Adong opat impola na ringkot idaonta sian turpuk on taringot tu na pajongjong bagas na martua.

Parjolo, hamu angka parompuan, oloi hamu ma hata ni hamulianmuna be, songon na tama di roha ni Tuhan i (ay. 18). Disise turpuk on do parompuan asa pangoloi tu baona be. Molo tung pe dipangke hata mangoloi, marlapatan doi marsiajar sian haunduhon manang pangoloion ni Tuhan Jesus tu Debata Ama, jala tangkas do muse didok di pangunjungi ni ayat 18 0n marhite pandohan “songon na tama di roha ni Tuhan i (sebagaimana seharusnya di dalam Tuhan)”. Lapatanna adong do batasan haunduhon ni ina tu ama, batasanna i ma: na hombar di roha ni Tuhan i. Molo maralo do na nidok ni ama i tu hata ni Debata, berhak do ina ndang mangoloi. Jadi pangoloion na pinangido ni hata ni Debata i ma haunduhon manang pangoloion di bagasan Tuhan do. Dihangham pangoloion do “patutoru diri”. Jala sude do halak Kristen diajarhon asa patutoru dirina maradophon dongan jolma. Lam maradophon dongan saripeniba ma ndang olo iba patutoru diri?

Boha angka ina? Rade do unduk manang mangoloi amantana be? Alusna, ingkon rade, ala i do na niaturhon ni hata ni Debata. Biar roha, adong angka ina na so rade be mangoloi hata ni amantana ala ibana na karejo manang ala tumimbo pangkat jala gumodang gajina. Ayat 18 on ditujuhon ndang holan tu angka ina na so karejo alai dohot do tu angka ina na karejo jala dohot do tu angka ina na tumimbo pangkat dohot gajina. Satimbo timbo ni pangkat ni ina, sagodang godang ni gaji ni ina ingkon hormat jala unduk do ina tu ama ala ama i do ulu ni rumatangga (Ep. 5: 22-23). So tung adong ina na bangga molo boi mangatur angka amantana di loloan natorop, so tung adong ina na las rohana molo boi disurusuru amantana di jolo ni torop jolma, jala so tung adong ina na merasa jago molo dipaboaboa tu donganna na mabiar amanta i tu ibana. Ndang hombar pangalaho sisongon i tu hata ni Debata.

Paduahon, hamu angka baoa, haholongi hamu ma pardihutamuna be (ay. 19). Dung sidung dipodai angka ina, uaeng angka ama. Molo ina diaturhon unduk tu amantana, ama diaturhon asa manghaholongi inantana. Hata manghaholongi na dipangke di ayat on i ma agapate na marlapatan holong ilahi, holong na berkorban, na rade sumeahon diri songon na pinatupa ni Tuhan Jesus tu huriaNa (Ep. 5: 25 “hamu angka baoa haholongi hamu ma pardihutamuna be songon Kristus, na manghaholongi huria i jala dilehon do dirina humongkopsa”). Angka ama ingkon rade do manghophop inanta, berkorban tu inanta tanda na holong rohana. Nang pe adong hahurangan ni inanta i, ndang paboaboaonna tu halak, jala ndang gabe i alasanna mangalului parompuan na asing. Dihangham holong do na “patutoru diri”. Sude do halak Kristen diajarhon Debata asa patutoru dirina maradophon dongan jolma. Lam maradophon dongan saripeniba ma ndang olo iba patutoru diri? Sada sian hataridaan ni holong ni ama dipatorang di pudi ni ayat 19 on, i ma “Unang ma jungking hamu maradophon nasida (janganlah berlaku kasar terhadap dia)!” Molo holong do riha tu sasahalak, ndang mungkin jungkat/jungking hita tu ibana. Molo holong roha ni ama tu inantana, pasti ma adong panganjuon. Anjuon ni ama ma angka inantana, rade ma ama manghophop inantana marhite na patutoru dirina. Ndang gabe moru harga diri ni sahalak ama molo dipatutoru dirina tu inantana, baliksa ima sada bukti na tutu ibana manghaholongi inantana songon na pinatupa ni Jesus tu huriaNa.

Patoluhon, Hamu angka dakdanak, sandok pangoloi ma hamu di natorasmuna, ai i do dihalomohon Tuhan i! (ay. 30). Dung sidung hubungan ama dohot ina, disise ma muse hubungan ni ianakhon tu natoras. Tanggungjawab ni ianakhon do mangoloi natorasna songon niaturhon di Patik Palimahon. Di tingki na parpudi on nunga lam moru hormat ni ianakhon marnatuatua, dijou angka natoras, paula do dibege, molo disuru sai adong sidalianna, sada dope didok natoras, sipata nunga pintor sampulu alus ni ianakhon. Boasa boi masa songon i? Ala sipata nunga tumimbo parbinotoan ni ianakhon sian natorasna, adong do ianakhon na mamangke istilah istilah na asing na so apala diatusi natorasna laho mangotootoi. Jala ayat 20 on ndang holan tu ianakhon na so marhasohotan, dohot do tu ianakhon naung marhasohotan, naung gabe natoras. Unang ma leas rohanta manang tasonggahi natorasta manang simatuanta molo nunga suda gogo nasida, molo nunga moru parngingotan manang parbinegeanna. Taingot ma, ndang songon  i nasida na jolo. Umbahen sahat pe hita songon saonari, alani nasida do i. Alani tama do hita mandok mauliate marhite na manghormati nasida nang pe nunga moru gogo nasida. Tasolsoli ma dirinta na hea leas rohanta tu natorasta manang simatuanta naung suda gogo i. Hita pe haduan matua do songon nasida, so tung songon i haduan dibahen ianakhonta tu hita.

Napaopathon, Hamu angka ama, unang gintali hamu angka anakkonmuna, asa unang mandele (ay. 21)! Dung sidung tu ianakhon, nuaeng tu natoras. Nang pe hata ama na tarsurat di turpuk on, sasintongna na hinamhamna i ma natoras. Unang manggintali anakhon, di hata Indonesia didok “janganlah sakiti hati anakmu.” Ndang holan ianakhon na so boi mambahen hasit roha ni natoras, alai natoras pe hape ndang boi mambahen hansit roha ni anakhonna. Molo nunga digohi sude kebutuhanna, dilehon sude fasilitas, sai dietong natoras do nunga sae tanggungjawabna, hape ndang. Mansai ringkot do natoras manghatahatai dohot ianakhonna, manungkun parsikolaanna dohot angka ise donganna, didok ma “quality time”. So tung hurang holong tu anakhonta i gabe laho ibana tu pergaulan na so denggan, so tung mandele angka ianakhonta i ala jotjot tasundati angka janjinta tu nasida. Manat hita angka natoras dibasa basa na nilehon ni Debata tu hita. Tahaholongo ma anakhonta i, talehon ma tingkinta dohot rohanta tu nasida. Ndang jaminan arta na godang na laho teanteanan tu nasida asa martua hita, baliksa olo do gabe sega rumatangga. Alai asa boi tapajongjong bagas na martua songon tema ni jamita on, tabahen ma holong ni Tuhan Jesus na gabe ojahan di rumatangga. Rade ma hita patutoru dirinta songon Kritus na olo patutoru diriNa. Amen.  

16.     Marende B.E. No. 227 :2 – 3 “Jesus ngolu ni”

   Lam tangkas ma patuduhon tu au on panghophopMi,

   Asa i huhalungunhon; Hot ma au di lambungMi.

       Jangkon au baen siseanMu, na girgir tu podaM i.

       Sai surdukkon ma tanganMu asa tong hutiop i.

17.     Ayat Pelean : Psalmen 50 : 23

U  : Hata ni Debata ojahan ni haporseaonta laho pasahathon peleanta, i ma na tarsurat di Psalmen 50 : 23

Manang ise na mamelehon hamauliateon, i do na pasangap Ahu, jala mambahen lapang, asa hupatuduhon di ibana hatuaon ni Debata.

18.     Tangiang Pelean :

U  : Ale Debata, Amanami na di banua ginjang. Diparhatopot rohanami do sian unduk ni rohanami, Ho do mual ni nasa ulibasa na mauliutus. Dison hupasahat hami do pelean ni hamauliateonnami tu Ho. Sai jalo jala pasupasu ma peleannami on asa gabe dalan panindangion, parsaoran dohot ulaon asi ni roha di huriaMon. Bahen ma ngolunami gabe pelean na hombar tu lomo ni rohaM, jala parsidohot parohon harajaonMu, holong, hasintongan dohot hadameonMu di sandok portibi on. Buhai ma rohanami marhitehite TondiM, asa sai tongtong mandok mauliate tu Ho, dibagasan goar ni AnakMu, Jesus Kristus, Tuhannami. Amen.

19.     Ende Pelean B.E. No. 307 : 3 “Mata ni ari”

   Sai taendehon ma hasangapon ni Debatanta,

   Jala rohanta sai tapelehon tu Tuhanta i.

   I ma pelean na tongtong dumenggan,

   Endeendenta do doshon daupa, lomo ni roha ni Tuhanta i.

20.     Tangiang Panutup : Ale Amanami (Rap mandok)

21.     Pasupasu

Dipasupasu jala diramoti Tuhan Debata ma hita!

Disondangkon Tuhan Debata ma bohiNa tu hita, jala asi rohaNa mida hita!

Didompakkon Tuhan Debata ma bohiNa tu hita,

Jala dipasaorhon ma dameNa tu tondinta be!

22.      Amen... Amen...Amen...