TATA IBADAH SYUKURAN MEMASUKI RUMAH

partording ni acara

MAmongoti bagas na imbaru

kel. ..........................

sabtu, 23 februari 2019

1.   Marende No. 309 : 1 + 4            (Raphon Tuhan Jesus i)

Raphon Tuhan Jesus i pungka ulaonmu;

Ingkon tu Ibana i parguruhononmu

Baen Ibana donganmi hehe dohot modom;

Dege ma bogasNa i rohami pahohom

Hupasahat ma antong saluhut langkangku,

Tu Tuhanku na tongtong mian di rohangku.

Manang aha pe hubaen, Ho hupangasahon,

Ale Tuhan! Tulus baen saluhutna, Amen.

2.   Mambuka Pintu :

Keluarga  : Sian asi dohot holong ni roha ni Jahowa do hupungka jala hupasidung hami pembangunan ni bagas on. Dipasupasu Tuhanta do hami saleleng na paulihon bagas on sahat tu na dimpos. Antong, hupasahat hami ma kunci ni bagas on tu hamu parhaladonami, jala Ungkap hamu ma, asa masuk keluarga on rap dohot sude naginokhonna.

Pandita    : Huungkap ma pintu ni bagas on, dibagasan goar ni Debata Ama, dohot goar ni AnakNa Tuhan Jesus Kristus, dohot goar ni Tondi Parbadia, na manompa langit dohot tano on, gabe bagas parmianan jala parsaoran dibagasan dame dohot las ni roha.

Huria        : Horas ma hamu mangingani bagas on. Inganan na ginohan ni dame dohot holong ni roha ni Tuhanta ma bagas on di hamu.

3.   Marende B.E. No. 6 : 1 + 4       (Puji Jahowa na sangap)

Puji Jahowa na sangap huhut marmulia,

Hamu sudena parroha na ringgas na ria;

Marpungu be, marolop-olop sude, hamu sude manisia.

Puji Jahowa situmpak sude ulaonmu;

Ai ditumpakhon tu ho tongtong hangoluanmu,

Ingot ma i denggan basaNa do i, tomutomuNa sambing do.

4.   Votum – Introitus – Tangiang  :                      

P : Paragenda;               H : Huria                    K : Keluarga

P  : Ianggo pangurupion di hita, i ma dibagasan goar ni Jahowa, Sitompa langit dohot tano on do.

H  : Amen.

P  : Molo so Jahowa paulihon bagas, loja sambing do angka na mamandei.

            H : Molo so Jahowa marhal huta i, ndang marniula hadudungo ni parhal. Haleluya.

            P  :  Marhite hapistaran pinajongjong sada bagas, jala dipahot do i marhitehite roha hapantason.

            H  : Jala marhite parbinotoan, gok angka bilutna dohot ugasan marragam-ragam angka na arga jala                 na uli.

          K  : Mauliate ma rohanami di Ho ale Jahowa namanghaholongi hami, sian hamoraonMi do boi hami         pauli bagas nami on, ndang adong na hupangasahon hami dungkon asi ni rohaM.

           H  : Bagasnai antong hamoraon hapistaran dohot parbinotoan ni Debata. Naso hasigatan do angka             uhumNa, jala naso habogasan do angka dalanNa.

           P  : Onpe, puji hamu ma Jahowa di bagasan hajang hajang ni hagogoonmi. Puji hamu ma Jahowa di          bagasan hamuliaonNa nasun badia. Ibana do Alfa dohot Omega, bonana dohot ujungna. Haleluya!         Martangiang ma hita      

            Ale Tuhan Debata Amanami na di banua ginjang. Pujipujian, hamuliaon dohot hasangapon ma di         goar-Mu na badia I, jala mauliate ma hupasahat hami tu Ho, ala ni asi ni rohaM dohot denggan ni         basaM na hujalo hami ganup ari rasirasa sadari on. Amang na basa, na marpungu do hami nuaeng di      tonga ni bagas on, patupahon Ulaon Mamongoti Bagas na Imbaru Keluarga na hinaholongan ni roha     nami, ima keluarga.............. Songon na andar di adopan-mu di bagasan tingki on.

Saluhutna on, ala asi ni rohaM dohot pasupasuM do tu nasida, umbahen na boi dipauli nasida bagas on. Antong pahot, jala urasi ma bagas on, asa hot ma di batuna, togu di gulang-gulangna jala momos di hansing-hansingna. Gomgomi jala pasupasu ma nasida mangingani bagas nasida on, sai padao ma nasa mara, sahit, huaso haholomon dohot tahi ni halak na jahat sian nasida, asa mardame jala sonang nasida rap dohot angka ianakhon nasida mangingani bagas on. Sai gabe bagas partangiangan ma bagas on, jala sai marsaringar ma sian bagas on pujipujian di goar-Mu dohot panindangion di denggan basa dohot asi ni rohaM na godang i. Ho ma na mangkirap sian na dao jala manjou sian na jonok angka pasupasu, tiur ni pansarian, pansamotan dohot naek ni ngolu partondion di nasida, sai mardame jala sonang ma nasida mangingani bagas on, jala mardame-dame rap dohot angka hombar bagas nang dohot angka dongan na humaliang.

Ale Tuhan Debata Amanami, tangihon jala olio ma tangiang name on, dibagasan goar ni AnakMu Jesus Kristus Tuhan nami.

P+H     : Amen.

5.      Marende B.E. No. 461 : 1 + 3           (Songgop tu hami)

Songgop tu hami na di joloM on, o tondi ni Debatangki.

Uhir patikMu tu rohangkin on, O Tondi ni Debatangki.

Bereng siholmu di haroroM i, molo Ho ro, nda hisar tondingki?

Didihon ma tu au on apiM i, O Tondi ni Debatangki.

Lehon hataM, i ma tau podangki, Debatangki na gogo i,

Asa sai talu sude musuM i, Debatangki na gogo i.

Manghatindanghon tongtong goarMi, asa malua pardosa disi.

Asa dijangkon Tuhanta ma i. Debatangki na gogo i.

6.   Epistel : 5 Musa 8 : 10 – 18

        P  : Ia dung mangan ho jala bosuran, ingkon pujionmu di Jahowa, Debatam, ala ni tano na denggan,         naung nilehonna i tu ho.

        H  : Antong ramoti ma dirim, asa unang lupa roham di Jahowa, Debatam, gabe ndang diradoti ho         angka tonana i, uhumna dohot aturanna, angka na hutonahon i tu ho sadarion.

        P  : Asa unang ia dung mangan ho jala bosuran, jala dipauli ho angka bagas na uli diingani ho.

        H  : Tole lombum dohot birubirum lam sinur do jala ganda perak dohot sere di ho, ganda huhut         saluhut na di ho.

        P  :  Hape lam dipaginjang ho roham jala lupa ho di Jahowa Debatam, na manogihon ho ruar sian             tano Misir, sian bagas parhatobanan.

        H  : Ibana manogunogu ho di halongonan na bolon jala na jorbut, inganan ni ulok tulung api dohot         naga dohot hala, tano hasang huhut na so marisi aek; Ibana tahe paruarhon di ho aek sian dolok batu     na pir sahali.

        P  : Ibana mangalehon ho mangan Manna di halongonan, na so tinanda ni angka ompum, asa Ibana         paserep roham dohot mangunjuni ho, asa marhasonangan ho bahenonna di ujung.

        H  : Asa unang dohononmu di bagasan roham: Gogongku sandiri dohot huaso ni tanganku mangomo     di ahu hamoraon on.

        P  : Ingkon paingotingoton ni roham tahe Jahowa, Debatam, ai Ibana do na mangalehon gogo tu ho         mangomo angka arta i, asa pahothon padanna naung niuarihonna tu angka ompum, songon na andar     sadarion. Martua ma angka na manangihon hata ni Debata, na umpeopsa jala na mangulahonsa.

        H  : Amen.

7.   Marende B.E. No. 30 : 1 – 2     (Jesus lehon hatorangan)

Jesus lehon hatorangan, hapistaran mangantusi hataM i;

Lehon mata na marnida dohot roha na umboto dalanMi.

Asa tongtong maradophon bohi-Mi mardalan hami,

Asa digomgomi Tondi-Mi ma hami.

Ganup ari ma ajari hami na di haotoon i dope;

Asa lam porsea hami, Ho sambing do hangoluan nami i.

Lam lumeleng lam pasolhot tu rohaM ma rohanami,

Hombar tu hataM ma pangalahonami.

8.   Jamita     : Psalmen 128 : 1 – 6

9.   Marende B.E. No. 188 : 1 – 2   (Jahowa Siparmahan au)

Jahowa Siparmahan au, ndang hurang manang aha,

Ai nasa jea dipadao do sian dorbiaNa.

Tongon dibaen na lomak i, lao pangoluhon tondingki, dibaen asi rohaNa.

Ditogu au tu na tio, aek mata hangoluan,

Dibaen do tondingki sio, di dalan hasonangan.

Sabam rohangku do tongtong, saleleng au di tano on, baen sangap di goarNa.

10.        Tangiang Pangondianon      :

11.        Marende B.E. No. 467 : 2     (Asi ni rohaM hupuji)

Sai ramoti ma rohangku, asa boi gohanMu au.

Sai mabaor ma pasupasu nang marhite sian au,

IngananMu rohanami, TondiM i manggohi i.

Pangke dohot ngolunami gabe ulaulaM i.

12.        Ayat Pelean    : 2 Korint 9 : 7

13.        Tangiang Pelean        :

14.        Ende Pelean B.E. No. 470 : 1 + 5     (Jesus Ho nampuna au)

Jesus Ho nampuna au dohot na adong di au.

Gogo dohot hosangki sahat ma tu tanganMi.

Sere, arta, hepeng pe, buat ma di Ho sude:

Tondi nang pamatangki, ingkon Ho oloan ni i.

15.       
Tangiang Panutup    : Ale Amanami

16.        Pasu – pasu :

17.        Amen… Amen… Amen…