Khotbah Lukas 6: 39 - 42 Cintailah Pendidikan

Minggu 5 Setelah Trinitatis; 12 Juli 2020

6:39 Yesus mengatakan pula suatu perumpamaan kepada mereka: "Dapatkah orang buta menuntun orang buta? Bukankah keduanya akan jatuh ke dalam lobang?

6:40 Seorang murid tidak lebih dari pada gurunya, tetapi barangsiapa yang telah tamat pelajarannya akan sama dengan gurunya.

6:41 Mengapakah engkau melihat selumbar di dalam mata saudaramu, sedangkan balok di dalam matamu sendiri tidak engkau ketahui?

6:42 Bagaimanakah engkau dapat berkata kepada saudaramu: Saudara, biarlah aku mengeluarkan selumbar yang ada di dalam matamu, padahal balok yang di dalam matamu tidak engkau lihat? Hai orang munafik, keluarkanlah dahulu balok dari matamu, maka engkau akan melihat dengan jelas untuk mengeluarkan selumbar itu dari mata saudaramu."

6:39 Jala dihatahon do nang umpama on tu nasida: Tung tartogu na mapitung ma donganna na mapitung di dalan? Nda rap targodung ma nasida duansa?

6:40 Ndada sumurung sisean sian guruna. Naung sun denggan do ganup, molo doshon guruna.

6:41 Aha ma pola paberengberengonmu silbaksilbak na di mata ni donganmu; ia na satiang na di matami ndang diantoi ho!

6:42 Tung dohononmu ma tu donganmi: Ua, huumpat ma jolo silbaksilbak na di matami, anggia; hape na satiang na di matami ndang diida ho! E ho pangansi, jumolo ma umpat tiang i sian matami: Dung pe i, asa pingkironmu, manang beha pangumpatmu di silbaksilbak na di mata ni donganmu.

Mansai uli do poda pangajarion na mamangke tudosan lumobi tu sundut na umposo, ai ditogihon tudosan i do na umbegesa laho mamingkiri, mangarimangi dohot manghangoluhonsa. Somalna ro sian na masa do tudosan i dibaritahon jala alani i do musa diantusi huhut diahuon tu dirina. Nian halak na asing do dipaboa dibagasan tudosan i, alai na boi masa do i di parngoluan na umbegesa. Nang pe ndang apala hita mamolus manang mangadopi, alai molo tangkas taboto sai suan jala ingot do i di roha ala ndang mura hita mangalupahon i. Alani i do tarbege pandohan laho mamodai, “so tung masa songon na hea masa tu si adu i”. Asa gabe tudosan do luhut naung masa i laho paingothon dohot maminsang. Ala tudosan do na ummura maminsang sada halak na marpangalaho na so hombar tu ruhut ruhut na denggan. Asa na mamangke tudosan ndang ibana be manangkasi na umbegesa alai tudosan i sandiri. Songon i do Tuhan Jesus uju marjamita tu situan natorop di Galilea dung dijou Ibana siseanNa na sampulu dua halak i.

Sungkun sungkun ni Jesus, “tung tartogu na mapitung ma donganna na mapitung di dalan?” Ndang apala ringkot be nian alusan on, ala sude do sisean i nang hita umboto, na so boi sahalak na mapitung manogu donganna na mapitung. Alai, sada dalan do i dibahen Jesus manangkasi sisean i, songon dia nasida marnida dohot marpanatap tu humaliang. Di buku Evangelium adong do piga hali barita taringot tu na mapitung. Lapatanna, jotjot do nasida marnida na mapitung jala nidok ni Jesus pe hira na manulingkit hinabagas dohot bidang ni panandaon ni sisean i do. Dipangke Jesus tudosan i laho mandodo pangantusion nasida do. Olat ni dia nasida mamereng parngoluan ni jolma na mapitung. Ndang dipaima Jesus alus sian angka siseanNa i, alai manigor dialusi do, ala nunga rap umbotosa nasida. Alai, Jesus sandiri pe, ndang alus dipasahat. Dialusi do na sinungkunNa i marhite sungkun sungkun, “nda rap targodung ma nasida duansa”?

Ringkot do idaonta lapatan ni hata targodung di son, ai ndada holan patuduhon na so boi mardalan nasida nadua songon jolma na hipas alai dohot do paboahon hinahansit ni partinaonan nasida. Tung mansai jotjot do na hurang simalolong tartuktuk dohot madabu di tonga ni dalan. Hansitan nasida jala mangae siala na mapitung i. Somalna martungkot do nasida laho mandadap dalan sibolusonna. Asa ndang hea masa na so hipas manogu na so hipas. Molo tapahombar tudosan on tu topik ni minggu, ra boi ma taida dia na ringkot sipatolhason di jamita. Songon dia ma tarbahen na oto mangajari na oto? I do na pinasahat ni Jesus tu angka siseanNa na tongon marsiajar sian Ibana. Diparade Jesus angka siseanNa i asa boi gabe uluan manang tiruan di parange nang parsaoran di haporseaon. Di surat si Lukas barita on laho patardashon tu angka panjaha, songon dia ulina parsaoran ni angka na porsea diuluhon na hipas. Angka sisean na mapitung, ndang boi marnida na dumenggan. Di horong ni na mapitung do jolma andorang so dijangkon Jesus di ngoluna. Asa impola ni ayat 39, i ma sada panatapan dao tu jolo taringot tu parpunguan ni siihuthon Jesus ndada holan na marpardomuan tu ari sogot ni punguan i alai na rumingkot songon dia angka siihuthon Jesus i mamingkiri dalan na boi paluahon nasida sian parmaraan. Ihut tu si ma hata ni Jesus di ayat na mangihut.

Didok Jesus “ndang tumimbo sisean sian guru”, i ma na martudutudu tu parsaoran ni Jesus dohot siihuthon Ibana. Guru di tonga ni punguan do na manguluhon punguan i. Alai, ndang holan patubegehon ruhut i Jesus, ai didok do muse, “naung sun denggan ganup, molo doshon guruna”. Sahalak sisean ingkon mamolus tolu tahap, i ma: marsiajar (sisean), sun denggan (nunga simpul marsiajar manang lulus), dung i boi gabe guru, jala ingkon boluson ni sahalak sisean do na tolu tahap i. Molo didok Jesus doshon guruna, na patangkashon parhundul ni sisean naung simpul marsiajar i do, ndada gabe singkat ni guruna. Ai ndang sude sisean naung simpul marsiajar boi gabe guru.

Na boi masa do di sada parguruan, na mangajari jotjot manguhumi na niajaranna. Hahurangan ni siseanna diida, hape hahuranganna sandiri paula so diida. Parsiajaran na mansai arga sian i, i ma manjou angka pangajari laho mananda dohot pature diri. Ndada mamintori dirina. Dungkon ni i, ringkot di angka na tongon marsiajar patupa parsaoran na denggan asa unang adong na mangarajumi dirina dumenggan sian angka donganna. Ingkon sai rade do sasahalak mananda dirina, aha hahuranganna maradophon angka donganna jala rade nang paimbaru diri. Di ayat 41 didok “aha ma pola pabereng berengonmu....”. Hata pabereng bereng marlapatan ndada holan mangida sambolus alai nuga adong panulingkiton, nunga dipamanat dia na niidana taringot tu donganna. Hasomalan naung jotjot masa do na pinabotohon ni ayat 41-42 on. Jotjot do masa na songon i di sada punguan manang parguruan. Sai adong do jolma na marnida hahurangan ni donganna hape dirina sandiri ndang ditanda. Asa naeng adong panandaon na tangkas di diri ni sude jolma di tongan ni punguan. Unang ma marpalensem manang marpangansi jolma tu dirina, hira so adong hahuranganna. Ihut tu si do pangajarion di ayat 42 “tung dohononmu ma tu donganmi, ua huumpat ma jolo silbak silbak na di matami, anggia”. Hata, “anggia” dison manudu parsaoran ni na marhahamaranggi di sada punguan. Angka na sapunguan alani goar ni Jesus ndang denggan molo adong na sai mangetong dirina uli jala donganna parsala. Punguan ni na porsea di Jesus tarihot do di tondi “parhahamaranggion”. Ingkon rade do ruas ni huria masianjuan, masijangkonan huhut rap mangguruhon na dumenggan di nasida.

Hasomalan naung jotjot masa do i di parngoluanta. Ingkon parjolo do diriniba tandaon jala patureon asa diri ni dongan. Parjolo do diriniba ajaran sian na mangajari dongan asa unang sahat hata na mandok, “e ho pangansi”! Jolma naung pature diri do na talup paturehon diri ni dongan. Angka pangajari manang panuturi di tonga ni punguan ingkon parjolo mananda dirina sandir asa unang magopo poda na pinasahatna tu angka na niajaranna manang pinodaanna. Pangajari ndada holan guru di singkola alai dohot do nang natoras di tonga ni bagas, parhalado di tonga ni huria. Jala mangalului pangantusion ndada holan marhite pangajarion paadop bohi. Ringkot adong joujou tu angka siihuthon Jesus asa sai dapotan pangajarion na boi manambai habisukon sian angka niidana dohot na binolusna. Unang be nian masa na hurang denggan di tonga ni punguan molo dung hea masa di ari na salpu. Asa ingkon marsiajar jala marbisuk do sude angka na porsea di Jesus mangalapati pardalanan ng ngoluna be. Amen.