Khotbah Yohanes 13: 31-35 Kasih Sebagai Perintah Baru

Minggu 7 Set. Trinitatis; 26 Juli 2020

13:31 Sesudah Yudas pergi, berkatalah Yesus: "Sekarang Anak Manusia dipermuliakan dan Allah dipermuliakan di dalam Dia.

13:32 Jikalau Allah dipermuliakan di dalam Dia, Allah akan mempermuliakan Dia juga di dalam diri-Nya, dan akan mempermuliakan Dia dengan segera.

13:33 Hai anak-anak-Ku, hanya seketika saja lagi Aku ada bersama kamu. Kamu akan mencari Aku, dan seperti yang telah Kukatakan kepada orang-orang Yahudi: Ke tempat Aku pergi, tidak mungkin kamu datang, demikian pula Aku mengatakannya sekarang juga kepada kamu.

13:34 Aku memberikan perintah baru kepada kamu, yaitu supaya kamu saling mengasihi; sama seperti Aku telah mengasihi kamu demikian pula kamu harus saling mengasihi.

13:35 Dengan demikian semua orang akan tahu, bahwa kamu adalah murid-murid-Ku, yaitu jikalau kamu saling mengasihi."

13:31 Jadi dung laho ruar ibana, didok Jesus ma: Na marsangap ma nuaeng Anak ni jolma i, jala marsangap Debata di bagasan Ibana.

13:32 Molo marsangap Debata di bagasan Ibana, pasangapon ni Debata ma Ibana di bagasan dirina, jala tibu ma pasangaponna Ibana.

13:33 Hamu angka anaha, sangombas nari nama Ahu rap dohot hamu; luluanmuna ma Ahu; alai songon naung hudok tu angka Jahudi: Ndang tarbahen hamu ro tu sitopotonki, laos i do hudok nuaeng tu hamu.

13:34 Patik na imbaru ma hulehon tu hamu: Naeng ma masihaholongan hamu; songon holong ni rohangku di hamu, naeng ma songon i dohot hamu masihaholongan.

13:35 Apala sian on ma tandaon ni halak saluhutna, hamu siseanku: Molo masihaholongan hamu.

Dibagasan pardalanan ni ngolunta on jotjot do maol hilalaonta naung humurang holong ni rohanta tu dongan na di lambungta, nang tu dongan saripenta, ianakhonta, nang tu keluarga na asing pe. Maol do tarjalo rohanta molo songon na ganggu roha ni dongan di lambungta taringot tu holongta tu nasida. Hansit do rohanta molo pola ingkon tadok tu nasida: “Ndang diboto ho holong ni rohangku tu ho! Hira na so dihilala jala diboto ho do holong ni rohangku tu ho!” na boi antusan do molo hansit tahilala molo songon na maol diantusi dongan na di lambungta holongta tu nasida. Tarlumobi siala panghorhon ni Covid-19, na so boi masijalangan, na so boi masihaloan manang masisiuhan, manang patuduhon engkel ala ingkon mamake masker nama. Alai dumenggan ma nian molo tarimangi jala tasulingkit dirinta, tutu do holong rohanta tu nasida? Sungkun-sungkun na arga do on, alai huhut ringkot taingot, holong i ndang holan di hata, ndang holan di panghilalaan, ndang holan di roha. Alai lobi sian i, ingkon marhapataran jala ingkon marparbue do holong i.

Holong i ma patik naung ditonahon tu bangso Israel sian na robi. Ndada holan sahali patik holong i ditonahon. Ndada holan di Padan na Robi, sahat tu Padan na Imbaru tong dope mulakmulak patik holong i ditonahon tu angka na porsea. Jala patik holong i do na naeng idaonta marhite turpuk on. Ndang tarsirang isi ni pangajarion ni Jesus on tu latar belakang ni turpuk on dohot tu situasi na niadopan ni Jesus hatiha i. Tangkas do diboto Jesus na naeng masa tu diriNa, na naeng dijeheon si Judas Iskariot Ibana. Tangkas do diboto Jesus pola tolu hali na naeng soadahonon ni si Simon Petrus Ibana. Tangkas diboto Jesus na ingkon tadinghonon ni angka sisean i Ibana laho maporus (Mat. 25: 26). Diboto Jesus do saluhut na naeng masa i alai ndang sumurut holong ni rohaNa tu angka siseanNa. Disaluhut na naeng masa i, dipungka Jesus do hataNa mandok asa masihalohongan ma nian angka sisean i songon naung hinaholongan ni Jesus nasida sahat ro di ujungna (13: 1). Ala holong i do ciri ni halak Kristen.

Holong, i ma patik na imbaru na pinasahat ni Jesus marhitehite na mangalehon diriNa tu hau pinorsilang i asa marsangap Debata Ama i hinorhon ni pangoloionNa di holong i. Ai tangkas do ala ni holong ni roha do asa ro Jesus sumeahon hosaNa (Joh. 3: 16). Marhite on nunga tarida naung parjolo do Jesus manghaholongi hita, asa songon i ma nian dibahen angka siihuthon Ibana. Naeng ma masihaholongan hamu songon holong ni rohangKu di hamu, naeng ma songon i dohot hamu masihaholongan. Patik na pinaimbaru do na ditonahon Jesus di son. Aha do na imbaru, molo sian na robi nunga diajarhon jala dibege nasida i? Patik na imbaru di turpuk on martudu tu ojahan ni holong ni roha i do. Di Epistel (3 Musa 19: 18) tangkas didok, ingkon haholonganmu donganmu jolma songon dirim, jala pigapiga hali hata na sarupa tong do disurat di Padan na Imbaru (Mat, 19: 19; Mark. 12: 31; Luk. 10: 27; Rom 13: 9; Gal. 5: 14; Jak. 2: 8). Boi do gabe lapatan na sompit diantusi deba halak, ima marhite pangantusion: dirinta do gabe ojaan ni holong ni roha i. Alai molo diturpuk on marasing do pandohan i. Sian pandohan ni Jesus on boi antusanta holong ni Jesus i do na gabe ojahan ni holong ni rohanta. Ndada dirinta na gabe ojahan ni holong ni rohanta, alai holong ni Jesus do. Angka na mangihuthon jala na porsea tu Jesus di ngoluna, naeng do tarida sian cara ni ngoluna na masihaholongan.

Tandaon ni halak ma na sisean ni Jesus angka na masihaholongan, apala sian on ma tandaon ni halak tutu molo tarida haholongan i. Marhite on, singkop ma tutu na nidokna “pargabus do halak na mandok holong rohana di Debata alai dihosomi donganna (1 Joh. 4: 20)”. Molo siihuthon Jesus ingkon manghangoluhon holong i diganup ari ndang marimbar jolma, ndang holan na di bagasna manang parsaoranna sambing. Jala ditopa Jesus do angka siseanNa marhite holong na pinatuduhonNa marhite mamuri pat ni sisean, dohot marhite pangoloion ni Jesus tu hau pinorsilang,  lam ditopa ma angka sisean asa manghangoluhon holong i. Ala marhite holong do tong dipatupa Jesus haluaon tu portibi on. ndang holan di pamangan sambing didok holong rohaNa alai diganup angka ulaon ni Jesus sai na patuduhon holongNa do tu portibi on.

Parenta sian Jesus do holong i, molo didok parenta ingkon siulahonon, unang marpaima jolo hita mangulahon holong i. Ala godang do jolma holan mangalului hasangapon, parbinotoan, jabatan, arta, alai ndang diulahon holong, ujungna dung salpu ngoluna ndang adong situruon sian ibana, holan siingoton do, i do asa adong pandohan na mandok “godang do siingoton sian ibana ala ndang adong sitiruon”. Holong do na umbalga di portibi on, lapatanna umbalga sian arta dohot parbinotoan na di portibi on, jala ndang olo salpu i songon na nidok ni 1 Korint 13: 8. Mangihuthon 1 Korint 13: 4-6, holong i ma marlambas ni roha, ndang tenga, ndang paburnangburnang diri, maradat do, ndang olo pangarimason, ndang dipajujurjujur na jahat, ndang las rohana mida hageduhon.

Holong i ndada holan di hata manang pangantusion sambing, alai naeng marhapataran di parsaoran rap dohot donganta, keluarganta, hombar jabu, hombar balok, dongan saulaon dohot angka na asing di humaliangta. Alana nunga lam ngali holong i. Sipata mansai bidang do tararati taringot tu holong on, gabe lupa hita na di humaliangta. Songon na masa nuaeng marhite media sosial, isarana facebook, whatsapp, dohot na asing. Sipata mansai mura do hita pasahathon manang mandok asi roha di angka na dibaritahon disi, atik pe ndang apala tatanda ise do na marhabot ni roha manang na manaon hasusaan i. Hape hombar jabunta, donganta sahuria ndang taboto na masa diibana. Umbahen i ma ringkot tamulai manghaholongi angka donganta na jumonok dung i asa na dumao. Tiruan na denggan naung dipatupa Jesus ndada holan gabe patik na imbaru, alai tarlumobi gabe patik na mansai arga do i na sai disoarahon tu saluhut angka na porsea sahat tu nuaeng, songon i nang tu hita pe sahat do patik na imbaru i: “Naeng ma masihaholongan hamu, songon holong ni rohangku di hamu”. Amen.