Khotbah Ulangan 16: 13-17 Penyembahan dan Persembahan Kepada Tuhan

Minggu 6 Set. Trinitatis; 19 Mei 2020

16:13 Hari raya Pondok Daun haruslah kaurayakan tujuh hari lamanya, apabila engkau selesai mengumpulkan hasil tempat pengirikanmu dan tempat pemerasanmu.

16:14 Haruslah engkau bersukaria pada hari rayamu itu, engkau ini dan anakmu laki-laki serta anakmu perempuan, hambamu laki-laki dan hambamu perempuan, dan orang Lewi, orang asing, anak yatim dan janda yang di dalam tempatmu.

16:15 Tujuh hari lamanya harus engkau mengadakan perayaan bagi TUHAN, Allahmu, di tempat yang akan dipilih TUHAN; sebab TUHAN, Allahmu, akan memberkati engkau dalam segala hasil tanahmu dan dalam segala usahamu, sehingga engkau dapat bersukaria dengan sungguh-sungguh.

16:16 Tiga kali setahun setiap orang laki-laki di antaramu harus menghadap hadirat TUHAN, Allahmu, ke tempat yang akan dipilih-Nya, yakni pada hari raya Roti Tidak Beragi, pada hari raya Tujuh Minggu dan pada hari raya Pondok Daun. Janganlah ia menghadap hadirat TUHAN dengan tangan hampa,

16:17 tetapi masing-masing dengan sekedar persembahan, sesuai dengan berkat yang diberikan kepadamu oleh TUHAN, Allahmu."

16:13 Ingkon marari raya parlapelapean ho pitu ari lelengna, ia dung dipapungu ho parbue sian pardegeanmu dohot sian pangilanganmu.

16:14 Jala ingkon marlas ni roha ho di ari rayamu, songon i ho dohot anakmu dohot borum dohot naposom baoa dohot naposom parompuan dohot halak Lepi dohot halak dagang dohot dakdanak na tading di lampin dohot parompuan na mabalu di bagasan angka hutamu.

16:15 Ingkon pitu ari lelengna ho marari raya di Jahowa, Debatam di inganan sipilliton ni Jahowa; ai pasupasuon ni Jahowa, Debatam ma ho di saluhut gogo ni tanomu dohot di saluhut ulaon ni tanganmu, dibahen i ingkon marlas ni roha situtu ho.

16:16 Ingkon tolu hali di bagasan sataon ro nasa baoa di tongatongamu tu adopan ni Jahowa Debatam, di inganan sipilliton ni Jahowa, i ma di ari raya sagusagu na so niasoman dohot di ari raya minggu dohot di ari raya parlapelapean, jala ndang jadi rumar boti ro manang ise tu adopan ni Jahowa.

16:17 Ganup tahe marguru tu na tarlehon tanganna, hombar tu pasupasu naung nilehon ni Jahowa, Debatam tu ho.

Sude do hita umboto adong do Ari Raya (Hari-hari besar) di ganup ugamo, jala di negaranta on tanggal rara do kalender di angka ari i (libur nasional). Tingki diparsingkolaan nunga taparsiajari angka goar ni ari raya ni ugamo na adong di negaranta on. Songon di Hakristenon adong lima ari raya i ma Pesta Natal, Pesta Parningotan di Ari Hamamate ni Tuhan Jesus, Pesta Paskah, Pesta Ari Hananaek ni Tuhan Jesus dohot Pesta Pentakosta. Suang songon i do nang di bangso Israel, marragam ari raya nasida. Andorang so bongot bangso i tu tano Kanaan sai tongtong dipaingot si Musa nasida, i ma pangaramotion ni Debata, na marmula na ruar nasida sian tano parhatobanan uju di Misir sahat tu pardalanan nasida di parhorsihan i.

Marhite turpuk on dijarhon tu hita, na tangkas do disurathon di Bibelta i, adong tolu Ari Raya na ingkon pestahonon ni bangso Israel ganup taon na diaturhon di buku ni si Musa, pola marulakulak, i ma di 2 Musa 23: 14 – 19; 2 Musa 34: 18 – 24; 3 Musa 23: 1-44; 5 Musa 16: 1 – 17, on ma na gabe turpuk jamitanta dohot di 5 Musa 26: 1 – 11. Molo pe marulakulak taringot tu aturan tolu Pesta Ari Raya on disurathon, na mangondolhon asa unang lupa bangso Israel mangulahonsa, ala tung mansai ringkot do Pesta Ari Raya on. Ari Raya na nidokna mangihuthon 5 Musa 16 on, na parjolo ima Ari Raya Paska manang digoari Ari Raya sagusagu na so niasoman (ay. 1 – 8); na paduahon i ma Ari Raya Minggu manang Ari Raya Gotilon (ay. 9 – 12); na patoluhon i ma Ari Raya parlapelapen (ay. 13-17). Mangihuthon turpuk on angka dia ma na gabe bohal partondionta sian aturan Ari Raya on?

Parjolo, Ari Raya ditotophon laho marningot balga ni pambahenan ni Jahowa. Ari Raya Parlapelapean, manang ari raya hasisimpul ni suansuanan (2 Musa 36: 13; 34; 22) dipatupa bangso Israel laho marningot pambahenan ni Debata na mangaramoti ompu nasida saleleng diparhorsihan sian tano Misir tu tano Kanaan hira hira 40 taon lelengna. Di na mariraya i bangso i ingkon do mambahen parlapelapean sian bulungbulung dipatupa nasida be di ruar ni bagasna be. Mangihuthon 3 Musa 23, pitu ari ma bangso Israel ndang maringan di bagasa nasida be alai di parlapelapean songon parningotan di ompu nasida na maringan di parlapelapean uju diparhorsihan (ay. 42-43). Di na pitu ari i, ganup ari pelehonon nasida pelean situtungon tu Jahowa, di ari paualuhon marpungu ma sude bangso i ima gabe mata ni Ari Raya Parlapelapean. Dipapungu ma angka hasil ni pardegean dohot pangilangan nasida, somalna parbue anggur, suang songon i nang pelean situtungon. Ndada holan ari raya parlapelapean na laho marningot pambahenan ni Jahowa alai dohot do ari raya na dua nari.

Paduahon, ingkon sude marlas ni roha di ari raya (ay. 14-15). Tangkas diondolhon di ayat 14 paboa nang pe diparlapelapean bangso Israel maringan saleleng pitu ari, ingkon dibagasan las ni roha do nasida. Ndang jadi ari raya diulahon dibagasan arsak. Lapatanna, ingkon sude do mamestahon ari raya dibagasan las ni roha, so mardia imbar. Sude pangisi ni bagas, natoras, ianakhon, naposo/hamba, na mangula di ngolu partondion/parugamoon (halak lepi), nang sude angka na so mardihadiha (halak dagang, dakdanak na tading di lampin, parompuan na mabalu). Ndang adong nanggo sahalak pe na so marlas ni roha. Asa tasulingkit ma jolo rohanta, molo marpesta huria hita manang marari raya minggu hita di bagas joro, adong do tubu las ni roha manang sabalikna? Molo ndang las rohanta, naeng ma nian tapauba rohanta. Ala molo dipatupa pe pesta ari raya, sada dalan do i laho marningot pangaramotion ni Debata dohot denggan basa ni Debata di ngolunta.

Patoluhon, mamboan pelean hombar tu kemampuan ekonomi. Adong dua aturan na mansai tangkas disurathon di turpuk on taringot tu ari raya na tolu i, ima: Parjolo, ingkon adong pelean siboanonna. Ganup ro tu adopan ni Debata ingkon adong pelean sipasahaton ni halak Israel, na so jadi halak Israel ro mandapothon Jahowa “martangan kosong”. Pelean na binoanna i ma patuduhon hamauliateon ni rohana. Paduahon, pelean hombat tu keadaan ekonomi. Ndada pardosdosan pelean tu Jahowa, alai hombar tu sinamot ni na pasahathon do. Manang songon dia pasupasu ni Debata na jinalona, songon i ma nang peleanna tu Debata. Molo balga jinalo, tontu umbalga ma pelean niba, alai molo otik jinalo, ummotik ma peleanniba sian paradongan. I do umbahen ndang anak birubiru dipelehon si Joseph dohot si Maria, natoras ni Jesus, di ari pangiasanNa alai holan dua anduhur tabu manang dua anak darapati do hombar tu kemampuan ni ekonomi nasida (Luk. 2: 22 – 34; 3Musa 12: 6 – 8). Hataridaan ni hamauliateon ni rohanta dipasupasu ni Debata na mangaramoti jala paluahon hita, i ma pelean na tapasahat tu huria. Manang angka dia pe goar ni pelean i alai rajumanta ma i songon dalanta mandok mauliate di sude denggan basa ni Debata naung tajalo. Alai, tontu unang lobi sian gogonta, ai Debata pe diboto do kemampuan ni ekonominta. So tung tapaksahon mangalehon mansai balga asa dos songon angka na mora. Ndang i na pinangido ni Debata, ndang hasangapon diri asa songon na jago diida halak. Pasahathon pelean dibagasan las ni roha na nionjar ni hamauliateon ni roha tu Debata, i do na hinalomohonNa, i do halak na mardaulat roha di adopan ni Debata.

Dijouhon topik ni minggunta sadari on do hita asa marsomba tu Debata dohot marpelean tu Jahowa. Dipabagas muse marhite Epistel di Markus12: 41 – 44 taringot tu pelean ni na mabalu na holan dua peser alai dirajumi Tuhan Jesus umbalga sian pelean ni angka na mora. Tu angka naung mandai denggan basa dohot pasupasu ni Debata, tama do hita unduk mardongan serep ni roha mandapothon Debata di ari raya minggunta di bagas joroNa i. I ma parningotan di hita dohot na patuduhon na tau do hita di sude denggan basaNa i. Ingkon tarajumi do sude na masa dibagasan ngolunta on holan alani basabasa ni Debata sambing do. Antong, taharinggashon ma marsomba tu Debata, pasahat pelean dibagasan las ni roha hombar tu pasupasu naung tajalo. Ala pelean na tapasahat tu Debata ndada disuhat marhite godang ni peleanta i. Alai sian holong dohot haporseaon ni na pasahathon pelean i do. Unang ma nian tabahen peleanta sian lobi lobi manang teba teba ni hamoraonta. Tarlumobi ma i molo lam bagas tajangkon panggomgomion ni Debata marhite AnakNa Tuhan Jesus Kristus na mamelehon diriNa di hau pinarsilang humophop hita pardosa on. marningot i saluhutna, tama ma hita ro tu mandapothon Ibana dibagasan las ni roha mardongan pelean parsombaonta tu Debata. I ma tanda na tutu porsea hita di Ibana nang pangaramotionNa. Amen.