Khotbah Ulangan 18: 9-14 Menang Atas Kuasa Kegelapan

 Minggu 12 Set. Trinitatis; 30 Agustus 2020

18:9 "Apabila engkau sudah masuk ke negeri yang diberikan kepadamu oleh TUHAN, Allahmu, maka janganlah engkau belajar berlaku sesuai dengan kekejian yang dilakukan bangsa-bangsa itu.

18:10 Di antaramu janganlah didapati seorang pun yang mempersembahkan anaknya laki-laki atau anaknya perempuan sebagai korban dalam api, ataupun seorang yang menjadi petenung, seorang peramal, seorang penelaah, seorang penyihir,

18:11 seorang pemantera, ataupun seorang yang bertanya kepada arwah atau kepada roh peramal atau yang meminta petunjuk kepada orang-orang mati.

18:12 Sebab setiap orang yang melakukan hal-hal ini adalah kekejian bagi TUHAN, dan oleh karena kekejian-kekejian inilah TUHAN, Allahmu, menghalau mereka dari hadapanmu.

18:13 Haruslah engkau hidup dengan tidak bercela di hadapan TUHAN, Allahmu.

18:14 Sebab bangsa-bangsa yang daerahnya akan kaududuki ini mendengarkan kepada peramal atau petenung, tetapi engkau ini tidak diizinkan TUHAN, Allahmu, melakukan yang demikian.

18:9 Ia dung masuk ho tu tano silehonon ni Jahowa, Debatam tu ho, ndang jadi ho marsiajar mangulahon maniru biasbias na niulahon ni angka bangso on.

18:10 Na so tupa adong jumpang di tongatongamu sahalak na pabolushon anakna manang boruna sian api, manang halak pangarunding manang sijujur ari, manang sitabasi ulok manang parsibalik mata.

18:11 Manang sibahen panutupi, manang partondung, manang na manungkun begu ni na mate.

18:12 Ai marbiasbias situtu do roha ni Jahowa mida saluhut halak, angka na mangulahon sisongon i, jala ala ni biasbias angka sisongon i pabalion ni Jahowa, Debatam ma angka bangso i maradophon ho.

18:13 Ingkon sun denggan do anggo mardonganhon ho Jahowa, Debatam.

18:14 Ai bangso parbegu angka sisoluhonmu, somal do nasida patangitangi hatahata ni sijujur ari dohot pangarunding; alai ndang songon i pangalehon ni Jahowa, Debatam anggo tu ho.

Sada parungkilon na bolon na tarida nuaeng sian torop halak Kristen, lam so ada be parsitutuon gabe halak na porsea. Lam so haidaan be parasingan ni halak Kristen i sian portibi on. Holan hasomalan sambing nama diula parsaoranna siganu minggu i dohot Debata. Nadeba holan sahali sataon nama ibana marsaor tu Debata, di tingki Natal manang parsirangan ni taon. Sandok holan digoar i nama ibana tardok na gabe halak Kristen. Ndang haidaan be sian pangulaonna. Na deba ro pe tu gareja holan asal na ro nama, ndang adong be parsitutuonna laho marsaor dohot Debata. Holan handphone na i nama dipajamajama saleleng parmingguon. Sadarion, gonap ma 56 taon GKPI ojak di portibi on. Molo dipatudos tu umur ni jolma, umur 56 taon nunga umur na matoras on, na sasintongna ingkon boi manirang dia do ulaon haholomon dohot ulaon na dihalomohon Debata. Ragam do naung dibolus di pardalanan ni huria na tahaholongi on. Saluhutna i, naeng ma nian patorashon huria ni Tuhan i. Asa boi manirang dohot manadingkon angka ulaon haholomon.

Jumolo dipasahat Debata tonaNa tu bangso Israel asa manat nasida tingki na bongot tu tano Kanaan songon tano bagabaga naung diuarihon Debata tu bangso i. Ai bangso Kanaan naung mian di tano i nunga mangulahon biasbias (kekejian) maradophon Debata. Tona i dipasahat tu angka na porsea di Jahowa di tingki ni si Musa, suang songon i nang dohot tu sude jolma angka na porsea di Jesus Kristus di partingkian sinuaeng. Ala boi do gabe sumurut manang na ganggu haporseaon i hinorhon ni angka na masa di humaliang, gabe mangalului pangurupion manang gabe porsea tu hagogoon ni portibi on.

Adong pitu na so jadi siulaon ni bangso Isarel songon na niulahon halak Kanaan na so dihalomohon Debata.

Parjolo, na so tupa adong jumpang di tongatongamu sahalak na pabolushon anakna manang boruna sian api. Molo di Kanaan, dipatupa do na pasahathon dakdanak gabe pelean situtungon tu dewa Molokh asa gabe dapotan “kesuburan” (3 Musa 18: 21; 5 Musa 12: 31). Jala molo taida di 2 Rajaraja 21: 6 didok na dipele bangso ni Debata do debata sileban (2 Raja 3: 26). Jala sai adong dope masa angka pangalaho sisongon i dipartingkian nuaeng. Adong dope begeon na dipelehon natorasna posoposna laho pasingkophon “ilmu hitam” na ginuruhonna.

Paduahon, pangarunding (4 Musa 22:7; 23:23; Hes. 21:21; 2 Raja 17:17). Hira na naeng pasauthon lomo ni roha ni debata sileban (dewa) marhite na mamereng angka tandatanda. Marhite angka tandatanda gabe botoon ma angka na naeng masa. Suang songon i, mangaliluhon jolma, marhite na mempengaruhi jolma gabe olo ndang sadar jolma i. Tung so dihalomohon Debata do pangalaho sisongon on, gabe mago do hadirion ni sasahalak dibahen.

Patoluhon, sijujur ari, i ma na manjujur manang aha na naeng masa manang manjujur parnasipon ni jolma. Dipangke sibolis do on manggabusi jolma, jala boi do gabe mambahen losok dohot mandele jolma i ala ndang denggan dibereng suratan ni tanganna.

Paopathon, sitabasi ulok, i ma naeng mamereng aha do naung masa, isarana molo adong na agoan gabe disungkun ma sahalak na pistar. Gabe dipatupa ma tabas tabas laho mamereng  aha do naung masa i. Sao godang dope porsea halak tu angka sisongon i. Tung sogo situtu do roha ni Debata jala marlulu do Ibana tu angka jolma na songon i.

Palimahon, sibahen panutupi, i ma na mambahen gabe asing pamerengan, isarana adong halak na manuhor situhoron, boi do bulung bulung dibahen. Hape tingki na naeng mangetong pangomoan partigatiga i, dibereng ma hape bulungbulung do.

Paonomhon, partondung, i ma angka tabas tabas manang podapoda na nidok ni sasahalak laho pamalumhon, asa margogo, asa jago manang na asing, jala ingkon dioloi do podapoda. Molo ndang dioloi ndang marlapatan ninna tabastabas i.

Papituhon, manungkun begu ni na mate. Hape di Bibelta tangkas do didok, ndang adong pardomuan ni na mate tu na mangolu. Alai sai adong do na mambahen hira na boi manghatai na mate tu na mangolu. Adong do sipata na olo lao tu udean manungkun jala mangido pasupasu tu oppungna naung mate, olo do sipata diboan sipanganon tu na mate i.hape holan Debata do na boi mangalehon pasupasu.

I ma pitu pangalahon na so jadi ulahonon na pinasahat ni Debata marhite si Musa tu bangso Israel, tung mansai lohot do angka pangalaho i di tongatonga ni ngolu ni bangso Kanaan. Ai tung porsea situtu do bangso Kanaan tu angka si songon i, porsea di angka debata sileban dohot angka hagogoon ni portibi. Angka pambahenan na songon i do na so dihalomohon Debata, i do umbahen na disuru si Musa pasahathon tona ni Debata tu bangso Isarel, tung na so jadi ulahonon nasida i songon na niula ni bangso Kanaan. Alani do diorai Debata do nasida mangulahon ragam ni pangalaho hasipelebeguon (okultisme).

Ingkon Jahowa do na rumingkot di ngolunta. Ingkon manat do hita asa unang adong na mangambati hita manombat Ibana. Molo taparrohahon do diparngoluon on, hita torop dope halak na mian dibagasan haholomon nuaeng di humaliangta di portibi on. halak na sai olo masiadu nasib marhite angka pangarunding, sijujur ari dohot nipi, partabastabas, arsibalik mata, panutupi, partondung ro di na mamangkulingi begu ni angka naung mate. Hira di sude luat dohot inganan do adong masa angka ulaon haholomon na songon on. dipangke sibolis do dalan on laho mangambati partubu ni haporseaon ni jolma i tu Debata, jala mamboan halak madabu tu bagasan dosa dohot pangunjunan. Sandok ingkon polin situtu bangso i mangasahon Jahowa, tung aha pe na masa (ay. 13). Lapatanna ingkon ndang boi hasirangan bangso i sian Debata. Ingkon jamot do hita songon halak Kristen nang dipartingkian sinuaeng on taringot tu angka haholomon na modern (okultisme modern). Nasa ulaon na mardebatahon na so Debata, mangasahon hagogoon ni portibi on. Na manirang torop jolma sian asi ni roha na sian Debata.

Monang hita maralohon haholomon i do na pinarsinta ni turpuk on sian hita. Ndang boi lipe dohot gale hita mangadopi angka haholomon si songon i. Lumobi dungkon lam mangontak dampak ni pandemi covid 19 on, halak na so togu dihaporseaon dohot dihadirion mura ma diela sibolis i madabu tu bagasan haholomon, mangeahi jalan pintas, tumundalhon Debata. Alani ingkon lam marsitutu do hita masigantung tu Debata, huhut manjamothon songan na di humaliangta, asa hot marojahan tu Jesus Kristus naung paluahon hita sian haholomon i.