Khotbah Kolose 3: 22-25 Bekerja Untuk Tuhan

 Minggu 9 Set. Trinitatis; 9 Agustus 2020

3:22 Hai hamba-hamba, taatilah tuanmu yang di dunia ini dalam segala hal, jangan hanya di hadapan mereka saja untuk menyenangkan mereka, melainkan dengan tulus hati karena takut akan Tuhan.

3:23 Apa pun juga yang kamu perbuat, perbuatlah dengan segenap hatimu seperti untuk Tuhan dan bukan untuk manusia.

3:24 Kamu tahu, bahwa dari Tuhanlah kamu akan menerima bagian yang ditentukan bagimu sebagai upah. Kristus adalah tuan dan kamu hamba-Nya.

3:25 Barangsiapa berbuat kesalahan, ia akan menanggung kesalahannya itu, karena Tuhan tidak memandang orang.

 3:22 Hamu angka anak somang, oloi hamu ma angka indukmuna na di tano on di na saluhutna; unang ma pangoloi di mata hamu, songon na mambuat roha ni jolma, marbulus ni roha ma, sian biar ni roha mida Tuhan i!

3:23 Sian rohamuna ma ula hamu nasa sibahenonmuna; songon na tu Tuhan i, ndada tu jolma!

3:24 Ingot hamu ma: Sian Tuhan i do jaloonmuna siteanon i, balos ni i Tuhan Kristus i ma oloi hamu!

3:25 Ai na mangulahon hageduhon, porsanonna do na niulana i, so adong masa parnidanidaon di bohi.

Adong dosada pandohan di hata Latin na mandok “Homo Laboran”. Sian pandohan i naeng antusanta ndang tarsirang ngolu ni jolma sian ulaon. Ganup jolma ingkon do mula ulaon, asa mangolu ibana. Alai ndada holan asa mangolu ibana, marhite ulaonna boi do patar hadirion ni sasahalak. Ringkot situtu do ulaon i di ganup jolma, asa adong ngolu ngoluna jala asa patar hadirionna. Alani i marlumba do jolma mangalului ulaon. Ganup ari ndang taretong bilangan ni jolma na mangalului ulaon jala marulak loni do nasida pasahat lamaran kerja tu angka lembaga manang perusahaan na dihirim manjalo nasida mangula disi. Torop do na maheu ala sipata nunga tung mansai leleng jala loja mangalului ulaon alai ndang dapotsa. Disituasi maol ni mangalului ulaon, dihirim do nian las ma tutu roha ni angka na boi dapotan ulaon. Alai molo tapamanat, ndang sude hape angka na mangula i boi marlas ni roha mangulahon ulaonna. Godang do situasi na mambahen deba jolma ndang rohana mangula ulaonna, jala molo songon i do na masa tung maol do hirimon parbue na denggan sian ulaonna i.

Di turpuk on dipasahat panurat do joujou tu angka anak somang. Tangkas do i didok di pamuhai ni turpuk on, na mandok “hamu angka anak somang”. Alai naeng ringkot antusanta, joujou on ndang na marlapatan na dihalashon jala ditolopi rohana parhatobanan na tongon masa dope hatiha i uju panuratan ni surat Kolosse on. ai tangkas do taboto hansit ni parhatobanon i. Ndang adong hak dohot huaso ni angka hatoban manang anak somang. Ndang arga ngolu nasida. Alani i marhite panghobasion dohot pangajarion ni Jesus nang angka apostel di huria na parjolo i tangkas do nasida manggotapi parhatobanan i. Unang be nian masa i di tonga tonga ni huria. Alani do umbahen na disurathon di Galatia 3: 28 “Ndang mardia imbar disi.... hatoban manang anak mata.... ai sada do hamu saluhutna dibagasan Kristus Jesus”.

Alai nang pe songon i naeng taantusi ndang mamintor mago parhatobanon i di tonga tonga ni bangso Jahudi nang bangso na asing. Masa dope parhatobanon i jala deba sian halak Kristen tong dope gabe hatoban manang anak somang. Alani i ringkot situtu joujou on tu nasida songon anak somang na tongon dope ingkon mangula ulaonna di adopan ni angka induk nasida. Dipasahat jou jou on asa marparbue na denggan jala na tonggi nian ulaonta  i, tu dirina, tu indukna, tu humaliangna nang tu pardalanan ni ngolu hakristenon pe. Ai marhite ulaonta i do dapotan ngolu ngolu hita nang keluarganta. Jala laos marhite ulaonta ido tandaon ni halak ise hita, tarmasuk tandaon ni humaliang nang haporseaonta tu Jesus. Ai nunga tangkas disoarahon apostel Paulus “Hamu do suratnami .... na tinanda jala na jinaha ni saluhut jolma. Ai tanda do hamu surat ni Kristus....(2 Korint 3: 2-3)”. Marhite ngolu ni angka na porsea i tandaon ni angka humaliang ma haporseaonta tu Jesus. Alani sahat ma nang tu hita jou jou on, asa boi nian las rohanta mangula ulaonta jala asa marparbue na denggan jala na tonggi nang angka ulaonta.

Boha do asa las rohanta mangula ulaonta? Laho mangalusi sungkun sungkun on sahat ma hita tu sungkun sungkun na asing, boha do hita manglapati dohot mangantusi ulaonta? Di deba halak dilapati do ulaon i songon boban na borat. Dietong do ulaon i alani uhum na pinamasa ni Debata alani dosa ni jolma i (1 Musa 3: 17-19). Andorang do madabu jolma i tu dosa, denggan do ngoluna. Alai dung mardosa jolma i, gabe porsukma jala hir hodokna mula ulaon dohot mangalului sipanganonna. Ala boban na borat do dihilala rohana ulaon i gabe soratma ibana mangulahon jala ndang talup ibana marlas ni roha mangulahon i. Baliksa, gabe tubu ma ungut ungut, riting ni roha, maheu ma ibana jala mandate alani boban na borat i.

Alai di hita angka na porsea di Jesus, nang pe digoari hita hatoban, nang pe anak somang dope hita, nang pe ndang adong dope posisi nang jabatanta, nang pe ndang targoar induk jala atasan manang pimpinan dope hita, na boi do hita tongtong dibagasan las ni roha mangula ulaonta molo talapati ulaonta i songon pasu pasu ni Debata di ngolunta. Dalan ni Debata do i manarihon jala marmudu muduhon ngolunta. Ai ringkot taingot godang nari dope donganta na so dapotan ulaon jala porsuk ngoluna. Molo tung pe tahilala hurang denggan manang tama manang hurang pas dope ulaonta i hombar tu parbinotoanta asa tongtong taulahon ulaonta i dibagasan las ni roha. Manang aha pe rumang ni ulaonta, molo dibagasan las ni roha taulahon i tontu marparbue na denggan do i.

Antong molo pasupasu ni Tuhan do ulaonta i talapati, laos pangalapation i do gabe ojahan di hita mangulahon ulaonta dibagasan roha pangoloion tu induk na marsuru hita di ulaon i. Molo tasungkun dirinta, autsugari ma hita sahalak induk maradophon angka anak somangta, boha do rumang ni anak somang na tahalomohon? Tontu lomo do rohanta marnida anak somang na burju, na ringgas jala denggan mula ulaon, na marroha pangoloion di angka na taparenta manang taaturhon siulahononna. Ndang lomo rohanta marnida anak somang na losok, na sai mangalo, na maol aturon, na so olo manangihon hata. Ndang lomo rohanta marnida anak somang na sai mangotootoi, na mangansi. Burju tingki paadopadop bohi alai dipudunta sai na roa do dihatahon jala diulahon. Tahalomohon do anak somang na bulus rohana jala marsitutu mula ulaon, nang tingki paadopadop bohi dohot hita manang uju na holang sian hita. Anak somang na tau haposan, tung arga do i. I ma gombaran ni anak somang na tahalomohon, autsugari hita gabe induk. Alai uju gabe anak somang dope hita, i ma taulahon. Asa tau halomoan hita di jolo ni indukta jala tarlumobi di jolo ni Tuhan i. Asa lam tangkas jala patar ma tutu pangantusionta paboa pasu pasu ni Debata ulaonta. Ai marhite ulaon i diparmudu mudu Debata ngolunta. Alani i taargahon ma pasu pasu ni Debata. Tahasabamhon ma. Jala pos ma rohanta, sian Tuhan i do jaloonta siteanon i balos ni i. Naeng tahaporseai hata ni Tuhan “Ale naposo na denggan roha jala haposan, haposan do ho di na otik, pasahatonku ma tu ho na godang (Mat. 25: 21)”. Alani taargahon ma pasu pasu ni Tuhan i, denggan ma taulahon ulaonta dibagasan las ni roha, asa ditingkina marparbue na denggani di hita nang keluarganta, di indukta tarlumobi gabe hamuliaon di goar n Tuhan i. Amen.