Khotbah 1 Timotius 2: 1-7 Tanggung Jawab Orang Kristen Dalam Politik

 Minggu 22 Set. Trinitatis; 8 November 2020

2:1 Pertama-tama aku menasihatkan: Naikkanlah permohonan, doa syafaat dan ucapan syukur untuk semua orang,

2:2 untuk raja-raja dan untuk semua pembesar, agar kita dapat hidup tenang dan tenteram dalam segala kesalehan dan kehormatan.

2:3 Itulah yang baik dan yang berkenan kepada Allah, Juruselamat kita,

2:4 yang menghendaki supaya semua orang diselamatkan dan memperoleh pengetahuan akan kebenaran.

2:5 Karena Allah itu esa dan esa pula Dia yang menjadi pengantara antara Allah dan manusia, yaitu manusia Kristus Yesus,

2:6 yang telah menyerahkan diri-Nya sebagai tebusan bagi semua manusia: itu kesaksian pada waktu yang ditentukan.

2:7 Untuk kesaksian itulah aku telah ditetapkan sebagai pemberita dan rasul -- yang kukatakan ini benar, aku tidak berdusta -- dan sebagai pengajar orang-orang bukan Yahudi, dalam iman dan kebenaran.

2:1 Onpe, on do sipaingothu, naeng ma ulahononhon parjolo situtu pangidoan, partangiangon, parpangondianon dohot hamauliateon humongkop saluhut halak,

2:2 humongkop angka raja dohot saluhut parhuaso, asa marsonangsonang jala so hariboriboan hita marpangalaho, di bagasan sandok hadaulaton dohot hahormaton.

2:3 Na denggan do i, jala halomoan ni roha ni Debata, Sipalua hita.

2:4 Ai dipangido rohana do, naeng saluhut jolma malua jala sahat mananda hasintongan i.

2:5 Ai sada do Debata, jala sada do nang Pangulu ni Debata dohot jolma, i ma jolma Kristus Jesus i.

2:6 Dilehon do dirina, bahen tobus humongkop saluhut, i ma sihatindangkononhon di tingki hadenggananna.

2:7 Tusi do ahu dipabangkit, gabe parjamita jala apostel, gabe pangajari di halak sipelebegu, di bagasan haporseaon dohot hasintongan; tutu do hatangki, ndang margabus ahu.

 

Halak Kristen na manghaposi Debata, diingot jala dipasangap do angka raja nang saluhut parhuaso na adong di tongatonga ni ngoluna. Suruan ni Debata do nasida di tano on laho paturehon saluhut na tinompa ni Debata asa mulak denggan, jala marhasintongan. On ma sada joujou na pinasahat ni apostel Paulus tu huria Rom, na manosoi ruas ni huria asa marhaunduhon tu panggomgomi. Jala joujou na sarupa tong disoarahon di buku Titus na mandok “paingot ma nasida, asa marroha na unduk mangoloi panggomgomi na mangarajai (Titus 3: 1).

Alai molo tapamanat angka na masa di humaliangta, boi do tubu sungkunsungkun: “Tutu do nasida suruan ni Debata, na manjalo sahala sian Debata?” Na boi tubu do sungkunsungkun sisongon i ala taboto panggomgomi i ndang siihuthon Jesus. Huhut do taida pangalaho ni pigapiga panggomgomi na maralo tu hasintongan ni Debata. Gariada deba angka panggomgomi gabe pangambat do di hakristenon, na patubu hamaolon tu angka halak Kristen laho mangulahon ruhutruhut ni hakristenon. Di Bibelta pe boi do jahaonta taringot tu angka panggomgomi na hurang denggan, isarani di Markus 10: 42 didok: “Dirajai angka sigomgomi bangso do parripenasida jala dipaksa angka na sangapna do nasida”. Jala adong do pigapiga panggomgomi disurathon di Bibelta on na naeng mambuat sangap ni Tuhan, asa ibana sisombaon, ndada Tuhan i. Boi do i idaonta di turpuk Epistel, ima sada sian pigapiga barita taringot tu panggomgomi na naeng mambuat sahala ni Tuhan. Sahat tu Padan na Imbaru nang di ngolu ni hakristenon na parjolo i masa do nang i. Disomba do angka kesar jala digosagosa do halak Kristen, pola do godang halak Kristen nang angka apostel pe agoan hosa, ala panggosa ni halak na so manghalomohon hakristenon nang panggosa ni panggomgomi pe.

Alai nang pe songon i situasi na niadopan ni halak Kristen hatiha i nang nuaeng pe, ndang hea didok Tuhan Jesus nang angka apostel i sungkunsungkun “tutu do nasida suruan ni Debata, na manjalo sahal sian Debata?” Ndang tubu manang disoarahon sungkunsungkun si songon i di jolo ni ruas ni huria. Baliksa, tongtong do dijouhon asa unduk tu panggomgomi.

Ai tangkas do dijouhon tu nasida asa manangianghon angka raja dohot saluhut parhuaso. Tutu ndang holan raja dohot parhuaso na ringkot ditangianghon. Ai didok do di turpuk on: “Naeng ma ulahononhon parjolo situtu pangidoan, partangiangon, parpangondianon dohot hamauliateon humophop saluhut halak, humophop angka raja dohot saluhut parhuaso (ay. 1-2)”.

Manang boha pe pangalaho nasida, manang aha pe na niula nasida, tung tangkas do dijouhon tu si Timoteus nang tu saluhut halak Kristen nang tu hita di partingkian si nuaeng, asa tatangiangko angka raja dohot parhuaso. Molo tung humurang pe parange nasida, unang tauhumi nasida. Unang taburai nasida, alai tatangianghon. Ala suruan ni Debata do nasida. Ndang guru di hita ngolu nasida dohot pambahenan nasida, alai guru di Debata do. Songon na hinatindanghon apostel Paulus di Rom 13: 4.

Alani ringkot tatangianghon angka panggomgominta asa denggan nasida mangulahon ulaon na pinasahat ni Debata, asa denggan diulaho nasida sahala naung dipasahat Debata tu nasida, asa marhite angka panggomgominta i boi hita marsonangsonang jala so hariboriboan. Asa unang pilit langka nasida. Asa tigor uhum dipajongjong nasida. Asa disarihon jala diramoti angka na metmet, na gale jala na pogos. Asa nasida pe malua sian hamagoan jala marsonangsonang ngolu nasida. Tutu na boi patar do di parnidaanta angka na sala jala na hurang na binahen ni angka panggomgominta di angka huaso na pinasahat ni Debata tu nasida. Alai marhite turpuk on ditogihon do hita asa dibagasan hadaulaton dohot hahormaton hita marnida jala patureture angka na hurang i. Unang masipaliaan jala unang marhite roha na jat, unang sai mangalului sala nasida. Adong do hata ni sahalak na bisuk na mandok: unang ma tapunten dongan na asing molo ndang sumurung haburjuonta sian ibana. Jala boi do i tapatudos tu pangajarion ni Jesus songon na tarsurat di Mateus 7: 3 “Aha ma pola paberengberengonmu silbaksilbak na di mata ni donganmu, ia na satiang na di matami ndang diantoi ho!”

Alani molu tung jumpa hita na sala na binahen ni saluhut halak, tarlumobi angka raja dohot parhuaso, angka panggomgomi, denggan ma tatangianghon nasida, taondihon saluhut nasida di jolo ni Debata, asa nang hita suang songon i nang nasida boi marsonangsonang. Alani i naeng lam marsitutu ma hita, angka na mandok porsea di Tuhan Jesus, laho pasahat pangidoan, partangiangon, parpangondianon dohot hamauliateon humophop saluhut halak, humophop angka raja dohot saluhut parhuaso. Asa lam martamba angka jolma na so mananda hasintongan dohot haluaon na pinarade ni Tuhan Jesus Kristus.

Ragam do cara manang kebijakan na binahen ni pangomgomi laho paturehon manang pasidung ragam parsualon na adong di tongatonga ni masyarakatna. Nang pe ndang siparsidohot hita di ulaon laho mambuat haputusan manang kebijakan panggomgomi, alai tong do ingkon tapataridahon haparsidohotonta asa denggan saluhutna i mardalan. Haparsidohotonta boi ma i tapatuduhon marhite na manggarar angka kewajibanta na marrumanghon pajak na marragam, isarani pajak tanah, pajak bangunan, pajak mobil, pajak motor dohot lan na asing muse. Tamba ni angka i, i ma haunduhonta di angka aturan manang ulaon siihuthononta na pinatupa ni panggomgomi, isarani angka pesta demokrasi. Ingkon marparange na tama do hita songon tanda ni hamauliateonta tu Debata. Amen.