Khotbah Mazmur 85: 9-14 Keselamatan dari Tuhan Sudah Dekat

 Minggu Advent II; 6 Desember 2020

85:9 Aku mau mendengar apa yang hendak difirmankan Allah, TUHAN. Bukankah Ia hendak berbicara tentang damai kepada umat-Nya dan kepada orang-orang yang dikasihi-Nya, supaya jangan mereka kembali kepada kebodohan?

85:10 Sesungguhnya keselamatan dari pada-Nya dekat pada orang-orang yang takut akan Dia, sehingga kemuliaan diam di negeri kita.

85:11 Kasih dan kesetiaan akan bertemu, keadilan dan damai sejahtera akan bercium-ciuman.

85:12 Kesetiaan akan tumbuh dari bumi, dan keadilan akan menjenguk dari langit.

85:13 Bahkan TUHAN akan memberikan kebaikan, dan negeri kita akan memberi hasilnya.

85:14 Keadilan akan berjalan di hadapan-Nya, dan akan membuat jejak kaki-Nya menjadi jalan.

 85:9 * Sai tangihononku do manang aha na nidok ni Debata Jahowa, ai * diparbaga do hasonangan tu bangsona dohot tu angka na niasianna, asa unang mulak nasida tu haotoon.

85:10 Tongon do, * donok do hatuaonna di angka na mangkabiari Ibana, asa mian muse hamuliaon di tanonami on.

85:11 Asa pajumpang sogot asi ni roha dohot hasintongan, jala masiummaan hatigoran dohot hadameon.

85:12 Asa martumbur sian tano i hasintongan, jala hatigoran manatap sian banua ginjang.

85:13 Sai lehonon ni Jahowa do huhut na denggan i, jadi * lehonon ni tanonami ma parbuena.

85:14 Mardalan ma hatigoran di jolona, jala patongononna ma langkanasida tu dalan.

Barita nauli na jotjot tabege di minggu-minggu Advent i ma paboahon bagabaga ni Debata di haroro ni Mesias. Nunga sian padan na robi adong barita dohot boaboa sian angka panurirang taringot tu haroro ni Mesias Sipalua i. Hatiha i, sai joujou do bangso Israel, dipangiar soarana laho mangido pangurupion sian Jahowa. Sungkun-sungkun, aha do na naeng patupaon ni Mesias i umbahen ro tu portibi on? mangihuthon turpuk jamita on sibonsiri dohot tujuan haroro ni Mesias i ma naeng pahothon hasintongan dohot hatigoran. Ala paimahon do hita di ari haroroNa, ringkot parjolo adong parange na marsitutu. Songon dia hita manomu haroro ni Mesias jala aha siparadeonta?

Diarahon turpuk on do hita asa olo manangihon aha na nidok ni Debata Jahowa. Tung mansai godang didok Debata nang pe ndang sude tatangihon jala taulahon, ala godang hata i mangorai asa dao sian bangko na maralo tu lomo ni rohaNa jala deba manjujui patupa na denggan. Mansai borat hata i taoloi. Alai Parpsalmen on manghatindanghon, ditangihon aha pe na nidok ni Debata Jahowa, ai diparbaga do hasonangan tu bangsoNa dohot tu angka na niasianNa asa unang mulak tu haotoon. Marbonsir do panindangion i sian angka holso dohot hoihoi naung pinasahatna tu Debata. Na mangae do ibana mangadopi ragam ni parungkilon dohot sitaonon. Songon naung mandele do ibana di parsorion i. Disadari nasida do hahurangan dohot hagagaleon nasida mangoloi hata ni Tuhan i andorang di ari naung salu. Nuaeng pe, nunga dialusi Jahowa pangidoanna i jala alani i do ibana tinggil laho manangihon dohot mangulahon hata ni Debata. Dirajumi rohanasida ma na so sumurut asi ni roha ni Jahowa sian nasida. Diparhatutu do hata i mamboan hasonangan jala mangarahon tu hamajuon. Ndang manusai manang manambai holso alai mambahen haulion. Haotoon na nidok ni Parpsalmen on i ma parange na so manangihon dohot mangulahon hata ni Debata na mamboan nasida tu hasusaan ala ndang marparbue na niula ni tangannasida jala ndang dapot hadameon di parsaripeonna. Dia lapatan ni pandohan on tu hita? Godang jolma di partingkian na maju nuaeng on marsingkola mansai timbo alai roha dohot parangena hot mian dihaotoon. Sai holan mangasahon parbinotoanna, ndang olo mamarangehon hata ni Debata. Ala na dao do bangso Israel uju i sian Tuhan i, gabe maoto nasida. Dioloi angka ganaganaan. Hape biar mida Jahowa i do mual ni habisuhon dohot hapistaran. Holan na marparange hombar tu hata ni Debata i do na talup dapotan uli, dame, hasonangan dohot hatuaon.

Godang na mangambati jolma ndang dapot hasonangan dohot hatuaon jala lam tangkas ma i dihilala uju ro sahit, arsak dohot parungkilon. Marragam do nang sibonsiri na mambahen sasahalak ingkon mangadopi parngoluan na mansai dokdok. Apala na rumingkot tasungkun dirinta, tu ise do hota mangalualu uju mangadopi hamaolon? Nang pe adong dongan manang aleale di tano on na sai rade mandongani, alai ndang apala singkop harorona dohot panumpahionna di parsorion i. I do alana ingkon taingot hata ni ende na mandok, aleale na sumurung i ma Tuhan Jesus i. Ibana do hatuaonta naung manoro hita sian bura ni dosa, i ma hamatean salelenglelengna. Asa unang marisuang panghophopon ni Tuhan i di ngolunta naeng tongtong hita manghabiari Ibana, huhut managam asi ni roha, hasintongan, haigoran dohot hadameon.

Nang pe ndang apala sude hita mangadopi hagaoron, hasusaan nang parbadaan maralohon dongan jolma, alai tangkas do tahilala na adong paraloan ni ngolunta. Humasusa do torop jolma dapotan dalan ni ngolu na denggan. Apalagi di angka tingki na parpudion, lam rundut angka pingkiran aka hurang uli parsaoran tu dongan na so sahaporseaon. Tahilala gale, ndang margellok hita mangadopi i saluhutna. Alai, dipaingot do hita asa unang madabu tu pandelean ai taboto jala tahaporseai adong Jahowa na mangondihon hita. Alani i ingkon mangolu do panghirimon di hita, unang mansadi martangiang, mangido hagogoon sian Ibana. Ai didok Parpsalmen on do, jumpang do sogot asi ni roha dohot hasintongan jala masiummaan hatigoran dohot hadameon. I do haroro ni Jesus manopot hita pardosa. Dipadame Ibana do hita tu Debata, dipadiri hatigoran nang hasintongan. Alani i, taparangehon ma ngolu na gok asi ni roha.

Jahowa do mangalehon na denggan. Di hamajuon ni habisuhon na taida nuaeng boi lam manambai haulion di ngolunta jala boi lam mura taula angka na maol hian. Nunga tadai parbue ni hamajuon i. Alai adong do na hurang denggan hinorhon ni hamajuon i. Gabe mura rarat barita na so tingkos, tubu hagaoran dohot lan angka na asing. Lapatanna, haulion na pinatupa ni habisuhon ni jolma i ndang sai mampanghorhon tu hadengganon. Angkup ni i, boi do lam tu holangna parsaoran ni jolma dohot Debata siala ni hamajuon i. Alai molo habisuhon ni Jahowa, ndang adong be sihabiaran di angka na pinatupaNa. Angka na taula di hauma, di ladang, di partigatigaan nang di angka usaha na marragam, songon i angka pegawai sai ditumpahi ibana do i. Debata do na mamasumasu hita umbahen na boi hita manggotil di hauma, mangalehon hahipason dohot gogo mangula.

Godang do jolma di tano on na mamangke haboionna sandiri, sipata do ndang sahat tu tujuan ni rohana. Ragam ditahi alai sungkot di tonga dalan. Alai, angka na rap mardalan dohot Jahowa sai na tulus do sude na pinarsinta ni rohana. Molo didok mardalan ma hatigoran di jolona, na paboahon Debata do manjoloani langkana. Nang pe loja mardalan alai ala rap dohot Tuhan i, sonang do panghilalaanna. Asa na mangolu dohot mangula rap dohot Tuhan i, sai haulion godang do jaloonna. Hombar ma on songon na nidok ni Tuhan Jesus, sai jumolo ma lului hamu harajaon ni Debata dohot hatigoranNa dung i tambahononna do angka ondeng tu hamu. Ia harajaon ni Debata, ndada sipanganon dohot siinumon. Mulak ma muse tu dasor na mangulahon hatigoran, hasintongan dibagasan Tondi Parbadia. Molo dung diulahon, lehonon ni Debata ma na denggan, tano pe mangalehon parbuena. Jala tingkos ma sude dalan ni ngoluna. Fokus ni ngolunta manangihon hata ni Debata. Asa unang lilu hita. Otik nama nuaeng roha ni jolma i tartuju tu Tuhan i, hinorhon ni pengaruh ni tekhnologi. Alai ujian do i tu hasatiaon dohot tu haunduhonta tu Tuhanta i.Molo naung taboto jonok do haluaon na sian Tuhan i. Pasti sihol do rohanta mambege hataNa. Di 5 Musa 28. Dipaboa dalan laho manjalo na denggan i, holan marhite na tinggil hita mambege hata ni Tuhan i. Marhite turpuk jamita on, taboto ma haluaon ni hita jolma, diparade Tuhanta do i marhite anakNa Tuhan Jesus na ro tu portibi on. i ma na taingot di minggu-minggu Advent on. Ro Mesias i manopot hita jolma pardosa. Tapaias ma ngolunta marhite na burju mangulahon hatigoran manuju tu ngolu na gok dame. Taparade jala taungkap ma roha ni haporseaonta. Amen.