Khotbah Mazmur 24: 7-10 Nubuat Tentang Kedatangan Raja Kemuliaan

 Minggu Advent I; 29 November 2020

24:7 Angkatlah kepalamu, hai pintu-pintu gerbang, dan terangkatlah kamu, hai pintu-pintu yang berabad-abad, supaya masuk Raja Kemuliaan!

24:8 "Siapakah itu Raja Kemuliaan?" "TUHAN, jaya dan perkasa, TUHAN, perkasa dalam peperangan!"

24:9 Angkatlah kepalamu, hai pintu-pintu gerbang, dan terangkatlah kamu, hai pintu-pintu yang berabad-abad, supaya masuk Raja Kemuliaan!

24:10 "Siapakah Dia itu Raja Kemuliaan?" "TUHAN semesta alam, Dialah Raja Kemuliaan!" Sela

 24:7 Patuginjang ma tohangmuna, hamu ale angka harbangan, patuginjang ma hamu, ale angka pintu sian na robi, asa bongot Raja ni hamuliaon!

24:8 Ise ulaning Raja ni hamuliaon i? I ma Jahowa, na gogo jala Ulubalang, Jahowa Ulubalang di hamusuon.

24:9 Patuginjang ma tohangmuna, hamu ale angka harbangan, jala patuginjang ma hamu, ale angka pintu sian na robi, asa bongot Raja ni hamuliaon i!

24:10 Ise ulaning Ibana, Raja ni hamuliaon i? I ma Jahowa Zebaot, Ibana do Raja ni hamuliaon i. Sela.

Minggu on, i ma minggu Advent na marlapatan paradehon roha di haroro ni Tuhan i. Di na bongot hita di minggu Advent na parjolo on, naeng diparata (disegarkan kembali) pangaradeonta di na laho pajumpang manang marparsaoran dohot Debata. Ala boi do gabe gale manang lemba pangaradeonta ala nunga tung leleng hita paimahon haroro ni Tuhan i. Tasigati ma jolo dia do na mambahen hita gabe lemba manang lupa mangarade diri. Na parjolo, boi do i ala halojaon ni ngolunta mangaradoti nasa ulaonta siapari, gabe ndang dungo hita laho manomu haroro ni Tuhanta, ala holan dompak halojaon manang hamaolon rohanta. Na paduahon, boi do sundat pangaradeonta ala tarlalap hita di hasonangan na nilehon ni portibi on, gabe laos so tasadari naung sahat nama tingki haroro ni Tuhanta. Na patoluhon, boi do laos tarlalap hita ala bongot hita tu zona nyaman, menak situtu panghilalaanta. Gabe ndang taharingkothon parsaoranta dohot Debata, dohot siparadeonta manjanghon haroroNa.

Somal do taulahon pangaradeon na tumangkas uju laho pajumpang dohot sasahalak na pinarsangapan, tontu denggan do pangaradeonta, songon hataridaan ni ‘penghormatanta’ tu na taparsangapi i. Ndang dia dalanna, gabe neang manang langgus pangaradeon ni rohanta, molo tutu do na naeng tajumpangi i na pinarsangapan. Jala pangaradeon i ndada holan jolma parduru, isarana pahean dohot aksesoris na asing; alai dohot do jolma parbagasan (suasana hati). Ai tarida do somalna pangaradeon jolma parbagasan i marhite ‘gerak tubuh’. Boi tarida i marsitutu do hita manang ala na so tarjua, las rohanta manang ndang.

Psalmen 24 on i ma ende di tingki Raja Daud mamboan poti parpadanan mamasuhi Jerusalem. Poti parpadanan on songon tanda ni Debata na mian di tongatonga ni sampulu dua suku bangso Israel. Poti parpadanan on hea do on di huta ni halak Palistim, alai gabe susa do halak Palistim uju i. Di masa ni raja Daud ma di pindahon Poti Parpadanan i tu Jerusalem. Di tingki naeng bongot nama Poti Parpadanan on tu undungundung ni Jahowa, dipalu ma angka alat musik, laos ditomutomu ma barisan prosesi/arak-arakan marhite ende na pabotohon tu situan natorop naeng bongot nama Poti Parpadanan tu bagas joro. Laos dipio Parpsalmen on ma angka na porsea asa siparsidohot di arak-arakan i.

Dibuhai do ayat 7 on marhite pandohan: “Patuginjang ma tohangmuna, hamu ale angka harbangan, patuginjang ma hamu, ale angka pintu sian na robi, asa bongot Raja Hamuliaon i”. Na jolo somal do sada huta adong tohang na (pintu gerbang), alana sude huta na jolo marparik do. Tujuan ni parik i laho manjaga/melindungi huta i sian angka musu. Dalan masuk tu huta i ma tohang manang pintu gerbang. Asa molo didok patuginjang, nunga ungkap be tohang i salelengna, ndang tagamon boi hungkup be. Ingkon ungkap ma huta i manjangkon haroro ni angka na ro manang bongot tu huta i. Tarlumobi di turpuk on na manaringoti arak-arakan na mamboan Poti Parpadanan tu huta Jerusalem. Molo so ungkap tohang (pintu gerbang) i, tontu ndang boi masuk tu huta i. Adong do na mambahen tudosan ni roha ni manisia songon pintu na tarsordak sian bagas. Anggo sian ruar ndang adong cara mambuka pintu ni bagas i. Di tudosan i digombarhon do Jesus na manuntuhi pintu ni bagas i. Saleleng so dibungka nampuna bagas pintu ni jabuna i, ndang boi masuk Tuhan Jesus tu tonga ni bagas i. Ndang songon panangko Tuhan Jesus i, molo so boi masuk gabe dipaksahon asa boi masuk tu tonga ni bagas i.

Na mangihut muse didok i ma pintu sian na robi. Pandohan on mandokhon taringot tu tingki naung mansai leleng ndang hea diungkap manang dipatuginjang. Pandohan on muse boi do martudu tu roha ni manisia naung leleng tarhunci, ndang olo manangihon hata ni Jahowa. Olo do roha nang pingkiranta tarhunci laho manangihon hata ni Jahowa alani ragam ni hasusaan na taadopi manang alani hasonangan na nilehon ni portibi on, songon naung dipatorang nangkin dipamuhai ni jamita on. Olo do rohanta on songon pintu naung leleng ndang hea diungkap gabe karatan, dibahen i gabe maol bungkaon. Pola dua hali didok: “Patuginjang ma tohangmuna, hamu ale angka harbangan, patuginjang ma hamu, ale angka pintu sian na robi, asa bongot Raja Hamuliaon i” (ay. 7&9), laho mangondolhon parsitutuon ni na masa i. Harbangan songon inganan parpunguan ni angka situan natorop dohot pangituai ni bangso i, dijouhon asa hobas jala mangarade parsidohot diarak-arakan ni Raja hamuliaon i.

Dung i dipatorang ma muse taringot tu ise do Raja hamuliaon i? Dua hali alus ni sungkun-sungkun on dipatorang di turpuk on, alus na parjolo di ayat 8 mandok: I ma Jahowa, na gogo jala ulubalang, Jahowa ulubalang di hamusuon. Di tradisi ni halak Batak na jolo, adong do sebutan Ulubalang. Jala somalna Ulubalang on laho manjaga jala mangaramoti pangisi ni huta i. Di turpuk on digombarhon do Tuhan i songon Ulubalang di hamusuon. Ndang adong hagogoon ni hamusuon na tuk manaluhon Jahowa. Dung i di ayat 10 mandok: I ma Jahowa Zebaot (sitompa nasa na adong), jala guru di Ibana do liat tano on. Ibana do Raja hamuliaon i. Asa molo tarimpun hatorangan na dua on, haroro n Raja i, i ma laho mamorangi dohot manaluhon angka musuna, jala pajongjonghon huasoNa na manontong i salelenglelengna di atas tano on.

On ma sada sian ragam ni lapatan ni na maradvent, sapala naung taungkap rohanta manjanghon Tuhan i, manongtong ma ungkap rohanta, ndang tagamon hungkup be ibana mangulahi sogot. Unang be nian songon angka pangalaho na jotjot masa, uju marpesta Natal halak Kristen, tung i nama riburna, alai dungkon ni i mangulah ma muse songon na agoan tondi. Tangkas do digoari Raja i, i ma Raja ni hamuliaon, asa ndang tama humurang pangaradeonta laho manjanghonsa. Gari manjanghon hulahula manang tulangta hita, ndang boi neang manang marlanggus ni roha, tarlumobi ma laho manjanghon Raja ni hamuliaon i. Ibana do Raja hamuliaon naung ro jala na naeng ro i muse. Nunga dipanghilalahon Ibana songon na tahilala uju gabe jolma Ibana di hasiangan on. Asa manang aha pe ‘hamusuon’ ni ngolu na taadopi tangkas do diboto Ibana. Jala ndada holan diboto, dohot do Ibana manghilalahon ‘hamusuonta i’. Jala musu na parpudi, i ma hamatean, i pe nunga ditaluhon Jesus (1 Kor. 15: 26). Molo tung pe ingkon marungkil, marsitaonon manang marsiranggut angka na porsea nuaeng di hasiangan on. Benget ma manahan jala marpanghirimon tu Raja hamuliaon i, ala diujungna sangkap hamonangan dohot hamuliaon do pasahaton ni Debata tu angka na porsea. Amen.