Khotbah 1 Petrus 1: 22-25 Firman Tuhan Tetap Untuk Selama-lamanya

 Malam Akhir Tahun; 31 Desember 2020

1:22 Karena kamu telah menyucikan dirimu oleh ketaatan kepada kebenaran, sehingga kamu dapat mengamalkan kasih persaudaraan yang tulus ikhlas, hendaklah kamu bersungguh-sungguh saling mengasihi dengan segenap hatimu.

1:23 Karena kamu telah dilahirkan kembali bukan dari benih yang fana, tetapi dari benih yang tidak fana, oleh firman Allah, yang hidup dan yang kekal.

1:24 Sebab: "Semua yang hidup adalah seperti rumput dan segala kemuliaannya seperti bunga rumput, rumput menjadi kering, dan bunga gugur,

1:25 tetapi firman Tuhan tetap untuk selama-lamanya." Inilah firman yang disampaikan Injil kepada kamu.

1:22 Paias hamu ma rohamuna, marpangoloion di hasintongan, mangeahi haholongon na so marlaok di dongan, asa masihaholongan situtu hamu sian nasa roha.

1:23 Ai nunga mangulahi tubu hamu, ndada sian boni na olo basebasean, sian na manongtong do: Binahen ni hata na mangolu jala na mian i, na sian Debata.

1:24 Ai "songon duhutduhut do nasa daging, songon bungabunga ni duhutduhut i do saluhut hasangaponna. Nunga malos duhutduhut i jala marurus bungabungana".

1:25 "Alai na mian do ro di salelenglelengna ia hata ni Tuhan i!" I do hata na binaritahon tu hamu.

Tama do hita marlas ni roha dohot mandok mauliate tu Debata Pardengganbasa i, ai diiringiring jala ditogutogu do hita sude sahat tu ombas on, lumobi satongkin nari tutu, taripar nama hita tu taon na imbaru, i ma taon 2021. Tontu holan Debata do na mangondingi jala mangurupi hita, tarlumobi di na boi tabolus pandemic global covid-19. Sian pandemic i, lam marsiajar hita, ndang adong hape nanggo saotik gogonta boi manjamin mangolu jala marhahipason hita. Molo tung pe godang dope anganangan na so jumpang, panghirimon na so tulus, alai sada na pasti, holan tolhas hita tu ujung ni taon on, nunga pasupasu na mansai balga i di hita. Alani do marhite turpuk on naeng disunggulhon tu hita, ianggo na manongtong holan Debata dohot hataNa do, ianggo na di portibi on na laho salpu do i haduan.

Mian ro di salelenglelengna do ia hata ni Debata (ay. 25). Na laho salpu do tano on dohot pangisina, ndang adong na hot. I do na niondolhon ni panurat 1 Petrus on. ndang boi tabereng Debata marhite simalolong parduru, ndang boi tabege hataNa marhite sipareon parduru, alai na boi do tabege hataNa marhite partondionta na marojahan tu Buku Nabadia. Asa, na pinaingot na tu hita, tung mansai arga do Hata ni Debata, ai i do na hot ro di salelenglelengna. Alani taharingkothon ma hata ni Debata. Molo tangkas do tahaporseai hata ni Debata hot ro di salelenglelengna, pasti ma taharingkothon, taargahon, tahauashon. Uju so boi hita marminggu di Bagas Joro alani covid-19, songon i nama lungunna tahilala. Masihol hita marsaor dohot donganta rap manangihon hata ni Debata. Molo so mauas jala sihol be halak Kristen di hata ni Debata, tubu do sungkunsungkun, na so dihaporseai be naeng na monongtong do hata ni Debata i? Ra adong do halak Kristen na so hea mambuka Bibel na dibagasan sataon on.

Sian pamuhai ni surat on, nunga diondolhon apostel Petrus tu angka na porsea na maisolat ala tongon marungkil, dibagasan arsak ni roha dohot pangunjunan (1:6) asa marpanghirimon na mangolu (1:3). Pola do didok apostel Petrus; naung ditubuhon do hita paduahalihon sian godang ni asi ni rohaNa, marhitehite haheheon ni Jesus Kristus sian angka na mate, asa marpanghirimon na mangolu hita. Dohot hata na asing, ndang adong jolma na boi sian gogona tubu paduahalihon; ndang boi jolma i sandiri mangulahi tubu, holan haheheon ni Tuhan Jesus do na boi mambahen hita mangulahi tubu. Diulahi do muse pandohan i diturpuk on alai asing hatana nang pe dos isina. Ianggo di ayat 23 songon on do tarsurat: Ai nunga mangulahi tubu hamu, ndada sian boni na olo basebasean, sian na manongtong do, binahen ni hata na mangolu jala na mian i, na sian Debata. Lapatanna, hata ni Debata do na patubuhon na porsea paduahalihon. Asa ndada holan marojahan tu na di tano on panghirimonta, ai parsatongkinan do na di tano on jala pardangolan sambing do na di tano on, na mura malos jala marurus. I do umbahen didok apostel Paulus: “Anggo holan di tao on do hita manghirim di Kristus i, jolma na dumangol do hita sian saluhutna (1 Kor. 15: 19).

Marhite hata ni Debata do hita boi paiashon roha asa boi masihaholongan situtu sian nasa roha. Ala nunga tubu paduahalihon hita, nunga gabe jolma na imbaru hita dihorhon haheheon ni Tuhan Jesus nang hata ni Debata. Halak naung mangulahi tubu, ias ma rohana, ndang adong be disi hosom, late, pangiburuon, dendam, ginjang ni roha, pargabuson dohot lan angka na asing ulaon haholomon. Marhite hata ni Debata na manongtong i boi nian gabe parroha na ias hita jala sihaholongi dongan. Turpuk jamita on, boi do gabe sada kesempatan on di hita laho mangarimangrimangi pambahenanta tu keluarganta, tu dongan na humaliang hita, tu pangula ni hurianta, tu sude ma tahe, tahaholongi do nasida manang ndang?

Panghirimon di hata ni Debata na manongtong i do na patauhon hita asa unang be marpanghirimon di manang aha pe sian portibi on, ai saluhut na di portibi on na laho salpu jala mago do. Ai songon duhutduhut do nasa daging, songon bunga ni duhutduhut i do saluhut hasangaponna. Nunga malos duhutduhut i jala marurus bungabungana (ay. 24). Panghirimon tu Debata na manongtong i mangurupi hita marhatopothon jala marnida saluhut na di hasiangan on, sinamot manang hamoraon, hasangapon, hagabeon, huaso, gogo dohot lan angka na asing, di ujungna ingkon malos jala marurus. Ndang adong na boi hot ro di salelenglelengna, saluhutna do ingkon mansohot. Domu tu si na nidokna di buku Parjamita i: “Martiti be do luhutna na tinompa. Martiti be do huhut nasa sangkapsangkap di hasiangan on (Parjamita 3: 1). Panghirimon di Hata ni Debata na manongtong i paiashon hita sian panghirimon di angka basebasean, na mura salpu, asa tarbahen hita masihaholongan situtu sian nasa roha.

Marragam do na taadopi di bagasan taon 2020 on, paganti sorin do las ni roha nang arsak ni roha. Patut do ingkon halashononta molo boi tolhas hita sahat tu ujung ni tano on, dibagasan hahipason hita, diloas hita manggotil sian na taula dohot lan angka na asing na boi mambahen las rohanta. Marasing sian i taadopi do nang angka hamaolon, isarana ancaman ni virus corona na marpangontak tu sandok portibi on, pola do hira na digotap i parsaoran ni ganup jolma, songon dalan manggotapi penyebaran ni virus corona, alai tong do torop na agoan hosa hinorhon ni virus corona i. Dibagasan haporseaon tu Tuhan i, tongtong do hita manghirim tu Tuhan i asa mansohot i sian portibi on. Jala taingot ma ndang na murak (kecewa) hita bahenon ni panghirimon i. Saluhutna i manggombarhon tu hita paboa ndang adong na hot di tano on, saluhutna do mansohot. Alai anggo hata ni Debata manongtong do i ro di salenglelengna.

Manongtong do Debata, songon i nang hataNa. Ndang tarhahua ni manang aha pe hata ni Debata. Marhite jamita di dolok didok Jesus: Ai hata na sintong do na hudok on tu hamu: rasirasa sega langit dohot tano on, na so tupa sega sian patik i nang sada siasia manang sanggurit pe (Mat. 5: 18). Ianggo langit dohot tano on na laho sega do, salpu do tingkina, ndang manongtong. Ai saluhutna na di hasiangan on na tinompa ni Debata do, asa ndang manongtong i ro di salelenglelengna, alai anggo Debata na manompa i dohot hataNa hot do manongtong ro di salelenglelengna. I do nang na nidok ni Jesus di Mateus 24: 35 “Ai laho salpu pe sogot langit dohot tano on, anggo hatangKi ndang na olo salpu”.