Khotbah Ibrani 1: 1-4 Allah Berfirman Dengan Perantaraan AnakNya

 Natal I; 25 Desember 2020

1:1 Setelah pada zaman dahulu Allah berulang kali dan dalam pelbagai cara berbicara kepada nenek moyang kita dengan perantaraan nabi-nabi,
1:2 maka pada zaman akhir ini Ia telah berbicara kepada kita dengan perantaraan Anak-Nya, yang telah Ia tetapkan sebagai yang berhak menerima segala yang ada. Oleh Dia Allah telah menjadikan alam semesta.
1:3 Ia adalah cahaya kemuliaan Allah dan gambar wujud Allah dan menopang segala yang ada dengan firman-Nya yang penuh kekuasaan. Dan setelah Ia selesai mengadakan penyucian dosa, Ia duduk di sebelah kanan Yang Mahabesar, di tempat yang tinggi,
1:4 jauh lebih tinggi dari pada malaikat-malaikat, sama seperti nama yang dikaruniakan kepada-Nya jauh lebih indah dari pada nama mereka. 

 

1:1 Jotjot jala ragam najolo pambahen ni Debata mangkuling i angka ama i marhitehite angka panurirang i.
1:2 Alai di angka ari na parpudi on dipanghulingi do hita marhite sian Anak i. Ibana do dipabangkit gabe sitean parluhutan i, jala marhitehite Ibana do ditompa angka hasiangan i.
1:3 Sillam ni hasangaponna dohot suman ni hadirionna do Ibana, jala diusung do parluhutan i marhitehite hatana na marhagogoon i. Jala dung dipatupa Ibana haiason sian angka dosa, hundul do Ibana tu siamun ni Hatongamon na di ginjang i.

1:4 Songon surung ni Goarna na tineanna i, na mangatasi angka surusuruan, songon i do surung ni hasangaponna martimbangkon nasida.

Somalna di pesta parningotan Ari Hatutubu ni Tuhan Jesus jotjot do dienet jamita Evangelium sian angka turpuk na manggurithon taringot tu hatutubu ni Tuhanta Jesus, asa tung togu haporseaonta di ‘kesejarahan’ ni Jesus na sian Nazaret i na taongkui songon Sipalua ni sandok bangso di portibi on. Alai ianggo jamita di pesta Natal sadarion ndang apala turpuk na songon i dienet, alai sian turpuk na manaringoti hadirion dohot ulaon ni Tuhanta Jesus. Buku Heber on disurathon jala ditongos tu angka halak Kristen Jahudi na di parserahan hirahira di taon 80-90 laho mangurupi panjahana asa hot marhaporseaon di Jesus Kristus atik pe uju i tongon mangadopi pangunjunan na balga nasida, i ma na mangadopi pangaleleon nasida jala dipaksa nasida asa mandingkon Kristus ala dipartingkian i ugamo na diongkui Kekaisaran songon ugamo na resmi asing ni ugamo Romawi ima Judaisme, ugamo ni halak Jahudi. Ia haporseaon ni halak Kristen targoar na so ugamo na resmi dope. Ugamo na diida marojahan tu turiturian (tahayul). Alani na hamaolon i, hira adong do naeng mulak nasida muse tu ugamo na robi nasida. Alani do mansai ringkot Surat Heber on ditongos tu halak Kristen na marserahi, asa tongtong hot nasida dihaporsean tu Jesus Kristus.

Di ayat 1-2, dibonai panurat ni buku Heber on do mangondolhon perbedaan ni ulaon ni Debata marhite Jesus AnakNa i. Andorang so ro Kristus, marhite panurirang do Debata mamanghulingi jolma i. Marulak loni jala ragam do pambahenan ni Debata mamanghulingi jolma marhitehite angka panurirang. Jala taida do na dipangke Debata do angka panurirang laho mamangkulingi bangso Israel. Taboto do tangkas ia isi ni panurirangon ni angka panurirang i ma manjouhon hamubaon ni roha unang ro uhum. Molo adong hamubaon boi do diorui uhum manang sundat ro uhum. Tamba ni i, ia isi ni panurirangon ni angka panurirang i ima mamaritahon asi ni roha ni Debata tu angka pardosa, angka naung tarbuang alani dosa. Alani i, asa unang uhum na ro tu nasida nang tu angka bangso sipardosa di sandok portibi on, ro ma Debata mamangkulingi nasida di abad parjolo sahat tu nuaengmarhite AnakNa, Jesus Kristus. I do umbahen na dipangke hata “diangka ari parpudi on”, mangondolhon nunga marasing situtu dalan ni Debata di partingkian nuaeng on. dipahosing Ibana dalanNa mamanghulingi bangsoNa, sian na mamangke panurirang gabe marhite AnakNa. Mansai ringkot do i botoon ni sijaha surat Heber, halak Kristen Jahudi, asa diboto nasida tangkas hinabalga ni ualon ni Debata marhite Jesus Kristus. Sian partingkian ni haroro ni Kristus di Betlehem sahat tu nuang targoar “ari parpudi on” do. Jala tingki parasinirohaon ma nuaeng sahat tu haroro ni Kristus paduahalihon.

Alani do di ayat na mangihut dipaandar ma hadirion dohot ulaon ni Jesus Kristus anak ni Debata i. Nunga dipabangkit Ibana gabe sitean saluhut nasa na adong jala marhite Ibana do ditompa hasiangan on. Mansai ringkot do taboto on di na tapestahon parningotan ari hatutubu ni Jesus i, Ibana do sitean saluhut nasa na adong dohot sitompa hasiangan on. Alani, asa unang be nian gait rohanta manang lemba rohanta mamestahon parningotan ari hatutubu ni Jesus Kristus. Sillam ni hasangaponna dohot suman ni hadirion ni Debata do Ibana, jala diusung do parluhutan i marhitehite hatana na marhagogoon i. Jala hundul do Ibana tu siamun ni Hatongamon na di ginjang i. On dope di Padan na Imbaru dipangke hata sillam, na laho patoranghon hadirion ni Jesus laho patuduhon sian diri ni Jesus do marsinondang hamuliaon ni Jahowa. Dao tumimbo dope sian si Musa na gabe marsahala bohina dung pajumpang dohot Debata di dolok Sinai. Dibagasan hadirion ni Jesus Kristus do ro Debata, laos on do na dibuat gabe tema ni jamita di pesta Natal na parjolo on. Mamestahon hatutubu ni Jesus na dipangkulingi Debata do hita marhite sian Anak i. Jala hundul do Ibana di siamun ni hatongamon laho patuduhon hadirionNa na sumurung goarNa dohot hasangaponNa sian angka surusuruan. Jala ulaon naung pinatupaNa tu hasiangan on i ma paiashon hita siang angka dosanta. Ibana do pardenggananta tu Debata, asa holan Ibana do na mamboan hita tu Debata.

Sian hatorangan on, nunga tangkas di hita boasa apala di pesta Natal na parjolo on marsaringar di tongatonganta ndang taringot tu hatutubu ni Jesus di Betlehem, alai taringot tu hapataran ni hadirion dohot ulaon ni Debata marhite hadirion dohot ulaon ni AnakNa i. Alani i do mansai ringkot tona ni surat Heber on na mangondolhon hasurungan ni Kristus. Marhite turpuk on diondolhon do tu tongatonganta hatimboon ni Kristus maradophon angka na adong di portibi on. Ibana do hagogok ni bagabaga ni Debata marhite angka panurirangon di Padan Narobi laho patupahon haluaon tu hita angka jolma pardosa. Ala tumimbo do Jesus sian saluhutna, jala Ibana do sitompa hasiangan on, ringkot ma ngolunta berpusat dohot marojahan tu Debata di tongatonga ni ngolunta siganup ari. Tarlumobi disiala panghorhon ni masa revolusi industri na paopathon, jala di na tabolus di tongatonga ni bangsonta dohot di portibi on pandemi covid-19, so tung do alani i gabe tatadingkon haporseaonta. So tung mulak marsigantung tu angka hagogoon na so dihalomohon Tuhan i. Mansai ringkot jamita on di partitingkianta nuaeng tarlumobi na mangondolhon hatauon ni parbiotoan ni jolma mangatasi parsiranggutonna na so pola mangalualu tu Debata, jala godang do na tarunjun naeng manadingkon haporseaon di haluaon na pinatupa ni Debata dibagasan Jesus Kristus, haluaon di ari parpudi.