TATA IBADAH PERGANTIAN TAHUN

                                            partording ni PARTANGIANGAN

BONA TAON 2020

GKPI RESORT SAGALA

rabu, 01 JANUARI 2020; PUKUL 00.00 WIB

1.      Joujou marsomba tu Tuhanta

U  : Hita sekeluarga, nuaeng pe sahat ma hita tu taon na imbaru na pinasahat ni Tuhanta tu hita. Sidok mauliate do hita tu Ibana Pardengganbasa i, ala holan asi dohot dengggan ni basaNa do umbahen tolhas hita tu taon 2020 on. Antong hupasahat ma tu hita sude: Selamat Taon Baru ma tu hita saluhutna. Sai asi dohot holong ni roha ni Debata ma mandongani hita.

H  :  Selamat Taon  Baru. Anggiat ma asi ni roha ni Tuhanta maringan di tonga ni bagasta lumobi keluarganta laho mandalani taon na imbaru na pinasahat ni Tuhanta tu hita.

U  : Songon tanda las ni rohanta di pangaramotion dohot pandonganion ni Tuhanta di pardalan ni ngolunta, tama tutu marsomba hita tu Ibana mamuji pasangap GoarNa na badia i naung patolhashon hita tu taon na imbaru taon 2020 on. Taendehon ma: “O Jesus Sipangolu au”

2.      Marende B.E. No. 70 : 1 – 2 “O Jesus, Sipangolu au”

Naung salpu taon na buruk i, Ho ma hupuji Tuhanki;

Ai diramoti Ho tongtong tondingku dohot dagingkon.

Ai diramoti Ho tongtong tondingku dohot dagingkon.

O Jesus sai asi rohaM, paian denggan ni basaM,

Muse di taon na'mbaru on di nasa huriaM tongtong!

Muse di taon na'mbaru on di nasa huriaM tongtong!

3.      Votum – Introitus – Tangiang

U   : Dibagasan Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen. Marhaposan tu Ho do au ale Debatangku, Ho do partanaboatoan di ngolungku.

H   : Sai Ho ma na manarihon ngolunami, dongani jala patau ma hami mamongoti taon naimbaru on dibagasan las ni roha dohot mauliate.

U   : Marlasniroha ma hita tongtong di bagasan Tuhan i, ai Ibana do nampuna hita. TanganNa na lambok i mamasumasu hita. Antong manang aha na pinangido ni roham, pasahat ma i tu Ibana. Lehononna do i jala alusanna do tangiangmi.

H   : Ale Tuhan asi ma roham, dongani ma hami. Ho ma tongtong na paluahon hami sian angka parmaraan. Haleluya!

U   : Martangiang ma hita!

Mauliate ma di Ho Tuhan, Ho do na manongtong ro di saleleng ni lelengna. Ndang tarasam denggan ni basaM. Singkop do asi ni roham di hami. Dilehon Ho do hosa hangoluan jala dilehon Ho di hami taon na imbaru taon 2020 on. Pasahatonnami ma ngolu nang tondinami tu Ho, asa ramotanMu jala parmudumuduonMu hami. Ragam na boi masa dipardalanan ni ngolunami tu joloan ni ari on. Alai molo mardonganhon Ho do hami, huhamonanghon hami do i. Asi ma roham, anggiat ma na sinangkapan ni rohanami di taon na imbaru on, tangihononMu jala patulusonMu. Alai  ajari ma hami asa sai mandok mauliate hami di gulmit ni ngolunami on. Asa sai tongtong hupangke hami taon on gabe taon las ni roha, pangkeonnami mamuji pasangap goarMu. Paingot keluarganami asa  songon si Josua na manghatindanghon “Alai ianggo donganku sajabu ingkon Jahowa do oloannami”. Gabe rumatangga sipartangiang  ma hami, sioloi patikMu. HataM ma na mangula di ngolunami, mardalan di taon na imbaru on. Ala ni Kristus Jesus Tuhannami mauliate ma di Ho.

U+H : Amen.

4.      Marende B.E. No. 69 : 1 – 2 “Ungkap Bahal na Ummuli”

Jesus, sai urupi hami dohot di taon baru on;

Paimbaru gogonami mangihuthon Ho tongtong;

Pasupasu ma muse na porsea sasude.

Pingkiranku, ulaonku, tau pasangap Ho ma i,

Dungo manang modom ahu, Ho tongtong di lambungki;

Nang lao ruar masuk pe, Ho ma donganki muse.

5.      Manghatindanghon Denggan basa ni Debata :

U   : Nunga marpadan Debata, sai na donganna do hita tongtong jala pasupasuonna. Unang bobos roham, haporseai ma i. Tuhanta mandongnai ho.

H   : Huhaporseai do Debata na manarihon ngolungku. Sian Ibana do haroroan ni pasupasu dohot las ni roha. Ibana do na padamehon rohangku. Asa au pe borhat ma di taon on gabe siboan dame dohot las ni roha.

U   : Unang ho mabiar, sai donganangKu do ho rasi rasa ro ajal ni hasiangan on. On ma jaminan sian Tuhanta tu hita na manghaporseai Ibana. Las ni roha dohot pasupasu lehononna tu keluarganta. Antong pos ma roham, haposi ma Ibana jala tongtong pasahat ngolum tu Tuhan Jesus Parasiroha i.

J    : Porsea do ahu, Tondi Parbadia na mangajari dohot na manuturi ahu, Ibana do na mangalehon hagogoon tu ahu. Pinuji ma Tuhan i. Amen. 

6.      Marende B.E. No. 66 : 1 + 3 “Debata baen donganmi”

Debata baen donganmi! Lao mangula ulaon mu,

Baen Ibana haposanmu; Sai paserep roham i,

Debata baen donganmi! Debata baen donganmi.

Debata baen donganmi! Sai na saut do ulaonmu,

Sai na tulus do sangkapmi, jala sonang roham i.

Debata baen donganmi! Debata baen donganmi.

7.      Jamita : Jesaya 40 : 10

“Unang ho mabiar, ai ahu do donganmu! Unang biahaton ho, ai ahu do Debatam: Ahu margogoihon ho huhut mangurupi ho, huhut maniopi ho marhitehite siamun ni hatigoranku.”

Hamu  keluargaku na hinaholongan dibagasan Tuhanta Jesus Kristus. Di taon na salpu,  marragam na masa di tonga ni keluarganta. Adong ma i las ni roha, alai laos adong ma tutu nang arsak ni roha. Adong ma i parlabaan, alai laos adong ma nang harugian. Alai taingot ma, molo masa pe sudena i, parbinoto do Tuhanta. Ingkon porsea do hita, paboa Debata do na tongtong manarihon ngolunta. Molo pe masa i di taon na salpu, ingkon ongkuhononta do nuaeng, umbalga do asi ni roha ni Tuhanta. Hipas do hita pajumpang, las do rohanta marpungu di borngin on, jala di dongani do hita manghamonanghon angka na maol i.

Asa di taon na imbaru on, tongtong ma tapasahat ngolunta tu Ibana.  Ibana do na manarihon dohot na mangalehon ragam ni pasupasu di ngolunta. Ndang taboto aha na masa di taon 2020 sidalananta dope. Alai dibagasan haporseaon dohononta do: Tuhanta do na marmudumudu dohot na manarihon ngolunta. Ala ni i, ringas ma hita mamuji Ibana, gabe rumatangga siloloi Kristus ma hita, dame dohot las ni roha ma na mian di tonga ni keluarganta. Gabe keluarga sipartangiang, ringgas ma hita tu parpunguan di tonga ni hurianta, ringgas marminggu. Molo dipatolhas Tuhanta hita tu taon na imbaru taon 2020 on, na marlapatan, diparar Debata dope tingkinta, gogonta, pingkiranta laho patupahon angka na denggan di humaliangta. Las ma rohanta, huhut sai tapangido ma Tondi ni Tuhanta i mangaramoti hita asa unang tinggang jala madabu hita tu ragam ni pangunjunan.

Mandok mauliate ma hita tongtong ala ni Denggan ni BasaNa. Naeng ma Ama dohot Ina gabe natoras na sai tongtong mangajarhon Hata ni Tuhan i tu ianakhonna. Naeng ma angka ianakhon gabe sioloi Tuhan i marhite na unduk tu poda ni natorasna. Naeng ma keluarganta gabe keluarga sitiruon di tonga ni masyarakat lumobi ma di tonga ni HuriaNa. Tamasuhi ma taon 2020 on, taon parasinirohaon, taon gok las ni roha jala digohi pasupasu na sian Tuhanta ma hita tongtong. Tuhanta ma ma mandongani hita.

Amen.

8.      Marende B.E. No. 64 : 1 – 2 “Naung Moru do Muse Sataon”

Naung moru do muse sataon, huhut lam suda bohalhi,

Beha do ahu na sai laon, ture do pangalahongki?

Lam ganda haporseaonku, nang holong ni rohangku pe

Di Jesus dohot Debatangku, nang di donganku sasude?

Aut alusanku Debatangku, ra tung maila au disi,

Marningot salpu ni rohangku rodi sude ulaonki.

Ai dosa do binaen ni tangan, gok dosa nang rohangku pe;

Nang pat, nang mata, nang pamangan luhut marsala do hape.

9.      Mandok Hata Selamat Taon Baru 2020

Sian horong ni Ianakhon manang diatur hombar tu ringkotna.

10. Marende B.E. No. 64 : 4 – 5 “Naung Moru do Muse Sataon”

Ndang dapot bilanganku dosa naung huulahon nasailaon.

Huhut ndang harajuman basa ni Tuhan Jesus nasailaon.

Ndang dibaloshon Ho, Tuhanku: tu au hombar tu dosangki;

Sai dipalambas Ho rohaMu marnida pangalahongki.

11. Pasahat Poda Natoras : Ina – Ama è Ianakhon

12. Tangiang Pangondianon         :

13. Marende B.E. No. 68 : 1 “Ihuthon Au sude hamu”

O Jesus, sai urupi au di taon na ro, mamboan

Parbue angka na sai tau padaohon hamagoan.

Sai pargogoi ma au tongtong pasangap Ho di ngolungkon

14. Ayat Peleann : 2 Korint 9 : 7

15. Tangiang Panutup : Rap Mandok “Tangiang Ale Amanami”

16. Pasu-pasu : Molo adong Sintua/ Partohonan

17. Amen… Amen… Amen.

18. Masijalangan     :