Khotbah 2 Korint 4: 1-6 Pelayan Tuhan yang Setia

 Minggu Estomihi, 14 Februari 2021

4:1 Oleh kemurahan Allah kami telah menerima pelayanan ini. Karena itu kami tidak tawar hati.

4:2 Tetapi kami menolak segala perbuatan tersembunyi yang memalukan; kami tidak berlaku licik dan tidak memalsukan firman Allah. Sebaliknya kami menyatakan kebenaran dan dengan demikian kami menyerahkan diri kami untuk dipertimbangkan oleh semua orang di hadapan Allah.

4:3 Jika Injil yang kami beritakan masih tertutup juga, maka ia tertutup untuk mereka, yang akan binasa,

4:4 yaitu orang-orang yang tidak percaya, yang pikirannya telah dibutakan oleh ilah zaman ini, sehingga mereka tidak melihat cahaya Injil tentang kemuliaan Kristus, yang adalah gambaran Allah.

4:5 Sebab bukan diri kami yang kami beritakan, tetapi Yesus Kristus sebagai Tuhan, dan diri kami sebagai hambamu karena kehendak Yesus.

4:6 Sebab Allah yang telah berfirman: "Dari dalam gelap akan terbit terang!", Ia juga yang membuat terang-Nya bercahaya di dalam hati kita, supaya kita beroleh terang dari pengetahuan tentang kemuliaan Allah yang nampak pada wajah Kristus.

4:1 Onpe, ala naung hujalo hami tohonan on, sian pangasina di hami, ndang marnaloja hami.

4:2 Sandok hutulakkon hami do angka na buni, angka sihailahononhon; ai ndang marangkal hami, jala ndang marlaok hubahen hami hata ni Debata; hasintongan i do hupapatar hami, gabe jongjong hami, tandaon ni roha ni saluhutna jolma di adopan ni Debata.

4:3 Jala molo tung tartutup barita na uli, na hujamitahon hami, di angka na laho mago do i tartutup.

4:4 Ai dipapitung debata ni portibi on do pingkiran ni angka na so porsea, asa unang nasida dipatiur sondang ni barita na uli, na taringot tu hasangapon ni Kristus, na tardok suman ni Debata.

4:5 Ai ndada dirinami hujamitahon hami, Kristus Jesus i do, paboa Ibana Tuhan; alai naposomuna do hami ala ni Jesus.

4:6 Ai Debata, na mandokkon marsinondang hatiuron i sian haholomon i, Ibana do patiurhon rohanami, pabinsar parbinotoan di sangap ni Debata, na di bagasan bohi ni Kristus i.

Sude do hita manghalomohon halak na satia, satia di tongatonga ni rumatangga, punguan, pardonganon, lumobi ma hasatiaon di panghobasion laho marbarita na uli. Tontu tahasiholi do parhalado nang dohot sude ruas gabe naposo ni Debata na tongtong satia, satia marhuria, satia nang manghobasi. Ndang putus ditonga dalan nang pe godang hamaolon songon na niadopan ni apsotel Paulus di huria Korint suang songon i nang songon na niadopan ni panurirang Elia dohot Elisa. Ragam dibolus nasida angka hamaolon uju marbarita na uli, alai tongtong do satia nasida songon naposo ni Debata.

Ndang marnaloja hami, ninna apostel Paulus ala dirajumi ibana silehonlehon ni Debata do tohonan haapostelonna i. Dihaporseai apostel Paulus asi ni roha ni Debata do na manjou ibana gabe apostel manang gabe parhobas. Najolo silele na porsea do ibana, alai ditangkup Tuhan Jesus ma ibana di pardalananna tu Damaskus asa gabe parbarita na uli (Ul. Ap. 9). Mansai arga do silehonlehon i tarlumobi molo Debata na mangalehon. I do umbahen las roha ni apostel Paulus mangulahon haapostelonna on. Di na marbarita na uli ibana godang situtu tantangan dohot hamaolon na niadopan ni ibana. Manaon hata, insak insak, pangaleleon, jala dipamasauk tu hurungan (ay. 8-9). Na gabe sungkun-sungkun di hita: Moru do las ni roha ni apostel Paulus ala saluhutna i? Manang sumurut do ibana sian paghobasion na pinasahat ni Debata tu ibana? Ndang, ala tung arga situtu do silehonlehon ni Debata, i do umbahen dihatindanghon apostel Paulus, ndang marnaloja hami. Ndang ganggu apostel Paulus di Tuhan i, nang pe marsitaonon jala dipalelelele ibana ala barita na uli. Ndang mabiar ibana manghatahon dohot manghatindanghon Jesus nang pe diboto ibana pangaleleon i panghorhon ni panindagion i. Molo lomo roha mangula sada ulaon, nang pe loja daging, neang do nihilala ulaon i jala las roha mangulahonsa. I do na hinatindanghon ni apostel Paulus di turpuk on.

Sungkun sungkun di hita, holan tu angka apostel do silehonlehon ni Debata mangohabasi? Tontu ndang. Dipasahat do i nang tu Pandita, Sintua, Evangelis, Diakones, i ma angka parhalado partohonan na diparar Debata laho marbarita na uli hombar tu ruhut ruhut ni parugamoon. Alai huhut do tahaporseai, nasa naung tardidi tu bagasan goar ni Debata Ama, AnakNa Tuhan Jesus Kristus, dohot Tondi Parbadia, sude halak na porsea dijou Debata do asa dohot manghobasi, asa dohot marbarita na uli. Tontu godang do hamaolon taadopi, ala ndang dihalomohon portibi on angka na denggan. Manaon hata, hona insak, alai boha, gabe dohononta ma loja na i gabe halak Kristen? Manang mandele ma hita alani angka hamolon i? Marhite angka na masa di apostel Paulus naeng ma nian tadok songon na nidok ni apostel Paulus, ndang marnaloja hami mangihuthon Kristus.

Molo tahaporseai na dohot do hita dipanghobasion marbarita na uli, ulahononta ma hasintongan asa unang marlaok hata ni Debata. Marlaok do hata ni Debata molo ndang ture pangalaho ni halak Kristen, gabe rumar do hata ni Debata diida portibi on molo dos pangalaho ni na so mananda Kristus dohot na mananda Kristus. Alani, molo parlate ni roha jala pangiburu donga humaliang, unang ma nian dohot hita songon nasida. Molo manangko dongan di humaliangta, unang ma nian songon i nang hita. Molo manipu jolma asa maruntung, unang ma nian songon i nang hita. Ai angka na laho mago do na mangulahon sisongon i songon na nidok ni ayat 3. Molo mago halak gabe dohot ma hita mago? Tontu songon halak siihuthon Kristus hita, ingkon marasing ma nian parangenta sian parange ni portibi on.

Molo nunga sintong hata dohot pambahenan ni angka na porsea tontu talu ma haholomon i marsinondang ma hatiuron i (ay. 6). Ndang tuk be haholomon i manghukupi na tiur i. Didok di Johannes 8: 12 “Ahu do Panondang ni portibi on. Na so tupa mardalan di na holom na mangihuthon Ahu; di ibana do tahe Panondang hangoluan”. Sasintongna molo nunga ro na tiur i talu do na holom i, i do na hinatindanghon ni apostel Paulus di ayat 6 “Ai Debata, na mandokkon marsinondang hatiuron i sian haholomon i, Ibana do patiurhon rohanami, pabinsar parbinotoan di sangap ni Debata, na di bagasan bohi ni Kristus i”. Molo tatilik be rohanta, nunga tiur manang holom dope? Anggiat ma nunga tiur be sude. Jala molo nunga mian hatiuron na sian Jesus i tarida ma i sian angka panghataion nang parangenta na so marpardomuan tu ulaon haholomon. Dao ma sian hita na mangotootoi, dao ma sian hita angka na so tingkos, dao ma sian hita mambuat na so jambarniba. Tapasiding ma nasa na maralo tu hasintongan, jala tagogo ma mangulahon hasintongan asa tiur marsinondang portibi on. Songon panindangion na tarsurat di Buku Ende no 518: Marsinondang dibaen Jesus asi ni rohaNa i, Jala hita do disuru asa tapaboa i. Tapagalak palitonta, tapatiur dalan i, Ai torop dope na lilu, sai hatop ma mulak i. Nang au on na dao najolo, di na holom lilu au, Alai sondang ni Tuhanku do mamboan mulak au, Tapagalak palitonta, tapatiur dalan i, Ai torop dope na lilu, sai hatop ma mulak i. Haholomon manghuphupi toropna di tano i, Tung torop manghalungunhon, sondang tu dalanna i. Tapagalak palitonta, tapatiur dalan i, Ai torop dope na lilu, sai hatop ma mulak i. Dongan, so tung mintop lampu na ringkot tu dongan i, So tung mago angka jolma dibaen halembaonmi. Tapagalak palitonta, tapatiur dalan i, Ai torop dope na lilu, sai hatop ma mulak i.

Boha do hita nuaeng, angka halak na porsea, nunga gabe naposo ni Debata na satia hita? Tontu ndada holan apostel Paulus na dijou Debata laho marbarita na uli, alai dohot do sude angka na porsea. Asiasi ni Debata sambing do i. Alani tagogo ma marbarita na uli marhite ulaon hasintongan, unang saor hita tu ulaon haholomon asa unang marlaok hata ni Debata. Unang marnaloja hita mangulahon jala manghatahon hasintongan. Didok si Martin Luther, sasintongna manang aha pe ulaon na pinasahat ni Debata tu hita ingkon asiasi ni Debata do i jala ingkon tarajumi do songon panjouon ni Tuhan i di hita laho marbarita na uli marhite ulaonta siganup ari i. Antong, taoloi ma parsuruon ni Debata diganup ulaonta jala tarajumima nasa siulaonta i i ma dalanta laho marbarita na uli. Ndang tarpasiding hita angka resiko manang hamaolon tingki marbarita na uli, alai beha do hita mandalani hamolon i? Gabe moru do las ni rohanta manang sumurut do hita laho marbarita na uli? Ganup siihuthon Jesus ingkon do unduk jala satia tu tugas parsuruon na sian Jesus. Asa ganup halak Kristen ingkon do gabe ruas na missioner, ndang ruas na hohom. Taargahon ma panjoun ni Debata naung sahat tu hita. Alani tongtong ma hita satia, ala Debata na tasomba dohot tahaporseai ima Debata na satia sahat ro di saleleng ni lelengna.