Khotbah Kejadian 9: 8-17 Janji dan Kuasa Allah

 Minggu Invokavit, 21 Februari 2021

9:8 Berfirmanlah Allah kepada Nuh dan kepada anak-anaknya yang bersama-sama dengan dia:

9:9 "Sesungguhnya Aku mengadakan perjanjian-Ku dengan kamu dan dengan keturunanmu,

9:10 dan dengan segala makhluk hidup yang bersama-sama dengan kamu: burung-burung, ternak dan binatang-binatang liar di bumi yang bersama-sama dengan kamu, segala yang keluar dari bahtera itu, segala binatang di bumi.

9:11 Maka Kuadakan perjanjian-Ku dengan kamu, bahwa sejak ini tidak ada yang hidup yang akan dilenyapkan oleh air bah lagi, dan tidak akan ada lagi air bah untuk memusnahkan bumi."

9:12 Dan Allah berfirman: "Inilah tanda perjanjian yang Kuadakan antara Aku dan kamu serta segala makhluk yang hidup, yang bersama-sama dengan kamu, turun-temurun, untuk selama-lamanya:

9:13 Busur-Ku Kutaruh di awan, supaya itu menjadi tanda perjanjian antara Aku dan bumi.

9:14 Apabila kemudian Kudatangkan awan di atas bumi dan busur itu tampak di awan,

9:15 maka Aku akan mengingat perjanjian-Ku yang telah ada antara Aku dan kamu serta segala makhluk yang hidup, segala yang bernyawa, sehingga segenap air tidak lagi menjadi air bah untuk memusnahkan segala yang hidup.

9:16 Jika busur itu ada di awan, maka Aku akan melihatnya, sehingga Aku mengingat perjanjian-Ku yang kekal antara Allah dan segala makhluk yang hidup, segala makhluk yang ada di bumi."

9:17 Berfirmanlah Allah kepada Nuh: "Inilah tanda perjanjian yang Kuadakan antara Aku dan segala makhluk yang ada di bumi."

9:8 Dung i ninna Debata ma mandok si Noak dohot tu anakna angka na rap dohot ibana, botima i:

9:9 Ida ma anggo Ahu, pahotonku ma padanhu tu hamu ro di pinomparmuna sogot.

9:10 Dohot tu nasa na marhosa na mangolu angka na rap dohot hamu, angka pidong, pinahan dohot nasa binatang ni tano on, angka na rap dohot hamu, sian luhut angka na ruar sian parau ro di sude pahanpahanan ni tano on.

9:11 Pahotonku ma padanhu dohot hamu, paboa na so jadi be ripashonon ni aek na sumar nasa na mardaging, huhut paboa na so masa be aek na sumar i mangaripashon tano on.

9:12 Dung i ninna Debata ma: On ma tanda ni padan na hubahen i tu hamu dohot tu nasa na marhosa na mangolu, angka na rap dohot hamu ro di salelenglelengna:

9:13 Halibutonganki, na hubahen i di ombun, i ma tanda ni padanhu dohot tano on.

9:14 Onpe, molo huparo ombun tu tano on, sai tarida ma halibutongan i di ombun.

9:15 Jadi ingotonku ma padan na hubahen i tu hamu dohot tu nasa na marhosa na mangolu, ro di sude na mardaging, paboa na so pamasaonku be aek na sumar i mangaripashon nasa na mardaging.

9:16 Sai bahenonku do halibutongan i tu ombun, asa hubereng ibana marningot padan salelenglelengna binahen ni Debata tu nasa na marhosa na mangolu, tu nasa na mardaging, na di tano on.

9:17 Dung i ninna Debata ma tu si Noak: On ma tanda ni padan na hupahot tu nasa na mardaging, na di tano on.

Somal do masa aek magodang di portbi on, lumobi di pigapiga luat di Indonesia, gabe digoari ma “banjir langganan”. Sibonsirina pe taboto do, alani hamongkuson ni jolma naeng dapotan godangarta gabe ditabai ma hau ditombak. Gabe tungil ma tano i jala rahar ma angka duhutduhut. Uju ro udan ndang adong be na mangambat aek mabaor tu toruan. Maroprop ma nang angka dolok, dung i ro ma aek magodang. Sipata mulahulak do masa songon i disadasada huta (banjir langganan). Alai ndang jora jolma i manegai tombak dohot adaran nang pe mansai torop jolma na humasusa ala pambahenanna. Songon na jotjot masa dihutanta on, molo nunga musim parudan gabe tubu do holso, alani ni godang ni aek gabe olo do “banjir” jumanta jala sega ma angka suansuananta, ala binanga habaoran ni aek nunga lam metmet jala godang “sampah” (plastik mulsa, botol obat-obatan, limbah rumah tangga) di binanga i.

Songon dia ma pingkiranta molo tajaha taringot tu barita ak na sumar na masa dipartigkian ni si Noak? Talpe tu hamatean do ngolu ni jolma i. Molo ro hinamago, ndang adong pangunsandean na boi paluahon. Sangkidop mata do sude parngoluan i, ndang adong na hot. Salpu do sude arta, mago ala hagogoon ni tanoon. Tontu molo masa sada parmaraan bolon, isarana songon na masa dope nuaeng pandemic Covid-19, jala na so taboto dope haujunganna, ra boi do gabe tubu sungkunsungkun, on nama naeng ujung ni parngoluan on, salpu nama hasiangan on? Boi do alani parmaraan bolon i gabe tubu biar ni roha di ngolunta. Alai molo tangkas tajaha turpuk sadari on, dipaboa do tu hita songon dia Debata manarihon ngolu ni natinompaNa. Na manolsoli do Ibana dung tarrimas ala dosa dohot hajahaton ni jolma gabe diparo ma aek na sumar laho mangarimpashon saluhut. Ndang umbalga rimas sian holong ni rohaNa. Dilehon ma sada tanda songon hapataran ni padanNa, na so tupa be ro aek na sumar mangagohon luhut na tinompaNa i. Halibutongan na dibagasan ombun ma hataridaan ni padanNa. I ma tanda huaso ni Debata na pasohon aek na sumar.

Debata do na pajongjonghon parpadanan maradophon jolma i. Tanda parpadanan na dipajongjong Debata di ombun gabe tanda do di asi dohot holong ni roha ni Debata na bagasa jala na manongtong. Hombar tusi dua hali didok Debata, na pahotonna padanNa na i di portibi on (ay. 9+11). Ndada holan tu si Noak dohot tu anakna Debata marpadan, nang tu angka pidong, pinahan dohot nasa binatang di tano on pe dapotan asi ni roha ni Debata  siala padanNa i. Nasa na malua rap dohot si Noak sian aek na sumar taruli dipadan ni Debata. Aha pe na masa di tano on hot do padan ni Debata jala manongtong do. Aha jala dia ma lapatan ni padan? Halak Batak mandok, togu urat ni bulu toguan urat ni padang, togu na nidok ni uhum, toguan na nidok ni padan. Jala diuduti do muse mandok: manang na ise siode padan tu ripurna tu magona. Marhite pandohan on boi antusanta mansai timbo, bagas jala bidang do lapatan ni padan i. Molo diturpuk jamita on, holan Debata do na mangalehon padan (unilateral), ndang dohot si Noak dohot pomparanna marpadan ditingki i (bilateral). Sian turpuk on pe tangkas do tajaha ndang adong agia aha dipangido Debata, ndang na adong manang aha na ingkon sipatuaon ni si Noak asa hot padan ni Debata i (perjanjian yang bersifat tidak bersyarat). Alai hot do padan ni Denbata i sahat tu partingkian si nuaeng (perjanjian yang bersifat permanen). On do apala na umbalga hataridaan ni holong ni Debata tu na tinompaNa.

Mangihuthon pangantusion na adong di Padan Narobi di humaliang ni bangso Israel, halibutongan diantusi do i songon tanda hagogoon ni porang hamusuon. Tanda ni huaso na gogo na so taralo ni manang ise. Molo tarida halibutongan di ombun, i ma tanda na ingkon so parporangan, ala nunga ro na ungogo (Debata) tu parporangan i. Ibana pargogo na so hatudosan, na so taralo ni manang ise pe. Alani dilapatai halibutongan i songon tanda na pasohon parmusuon manang pangarupaon. Debata sandiri do na pasohon i marhite na patuduhon halibutongan i.

Nang pe songon na maol dapot roha ni jolma na sinuru ni Debata si Noak laho pajongjonghon sada parau na mansai balga, alai tong do diulahon si Noak, jala i do na mamboan haluaon tu si Noak. Diondolhon barita ni aek na sumar i do tu jolma i taringot tu panghophopon ni Debata. Ndada hamagoan angka hasusaan na taadopi, alai gabe hapataran ni asi dohot holong ni Debata. Asa sian i ma boi taida barita na holip sian aek na sumar i ma huaso ni Debata tu angka na niasianNa. Ndada hamagoan na naeng papataron ni barita i ala songon dia Debata manondihon na satia tu Ibana.

Mangolu dibagasan padan ni Debata do hita sahat tu sadari on. Nunga marribu taon Debata pasahat padanNa tu hita jolma, alai sai tong dope mangula dosa mangalaosi jolma i. Sian hatorangan on ma boi tapabagas sada pangantusion taringot tu angka bencana alam na masa di ari parpudi on. Ndada Debata na mambahen na masa i. Alani, ndang be sungkunonta, didia Debata uju masa na songon i. Alai, taingot ma, sasintongna ndang lomo roha ni Debata manaon na hansit jolma i, alani ndang Debata na parohon mara bolon tu ngolu ni jolma, nunga dipadanhon Debata i tu si Noak dohot pomparanna. Alani ndang rimas be na ro tu jolma i alai gumodang jala umbalga do holongNa, alani ditogu Ibana do jolma i mamolus angka na masa i nang pe ingkon manaon na hansit di tano na so taruli haluaon na manongtong i. Nang pe godang parmaraan taadopi di portibi on, taingot ma na hot do padan ni Debata. Margogo jala marhuaso situtu do padan i mamboan hita tu hangoluan. I do tanda asi dohot holong ni Debata na so tardodo jala na so hasuhatan nang pe sai mangulahon dosa jolma. Diboto Debata do na so mura jolma marhamubaon dohot mangulahon lomo ni rohaNa alai nunga dipahot padanNa. Taparhaseang ma isi ni padan i, asa unang be didatdati jolma i manegai tomabk, manabai hau, manurbu adaran dohot mangambolongkon “sampah sembarangan”.

Molo tapaihutihut na masa di Padan Narobi sahat tu Padan Naimbaru, boi taida ia hadomuan ni turpuk Epistel dohot Evangelium i ma taringot tu pambahenan ni Debata na paluahon jolma sian hamagoan manang hamatean. Huaso na paluahon jolma sian hamatean songon hataridaan ni asi dohot holong ni Debata i ma Jesus Kristus na sumeahon hosaNa laho paluahon portibi on sian hamagoan. Hasisingkpo ni huaso dohot padan ni Debata do Jesus Kristus tu portibi on, asa unang mago ganup na porsea di Ibana alai asa hangoluan na salelenglelengna. Minggu Invokavit sadarion mangondolhon panjouon ni Debata tu angka na sinuruNa. Molo Ibana manjou hita naeng adong alus na tangkas sipabotohononta. Ganu ari manang ganup tingki do hita dijou Debata, ganup tingki do boi taalusi Debata? Amen.