Khotbah Yesaya 40: 27 - 31 Allah Kekuatan Kita

 Minggu Sexagesima; 7 Februari 2021

40:27 Mengapakah engkau berkata demikian, hai Yakub, dan berkata begini, hai Israel: "Hidupku tersembunyi dari TUHAN, dan hakku tidak diperhatikan Allahku?"

40:28 Tidakkah kautahu, dan tidakkah kaudengar? TUHAN ialah Allah kekal yang menciptakan bumi dari ujung ke ujung; Ia tidak menjadi lelah dan tidak menjadi lesu, tidak terduga pengertian-Nya.

40:29 Dia memberi kekuatan kepada yang lelah dan menambah semangat kepada yang tiada berdaya.

40:30 Orang-orang muda menjadi lelah dan lesu dan teruna-teruna jatuh tersandung,

40:31 tetapi orang-orang yang menanti-nantikan TUHAN mendapat kekuatan baru: mereka seumpama rajawali yang naik terbang dengan kekuatan sayapnya; mereka berlari dan tidak menjadi lesu, mereka berjalan dan tidak menjadi lelah.

40:27 Boasa ma dohononmu ale Jakkob, jala didok ho ale Israel: Buni do dalanku maradophon Jahowa, jala ndang maruli uhum ahu sian Debatangku.

40:28 Atehe, ndang diboto ho, manang ndang dung dibege ho? Debata salelenglelengna do Jahowa, * sitompa angka ujung ni tano on, ndang olo loja manang mandate ibana, jala ndang * hadodoan pingkiranna i.

40:29 Ibana balik mangalehon gogo tu na loja, jala dipargogoi situtu angka na so margellok.

40:30 Loja pe angka dolidoli jala mandate, jala tarsulandit angka na mardaging na tambos.

40:31 Alai angka na marhaposan tu Jahowa maruli hagogoon mardapotdapot, gabe marhabong ni * lali laho manaek. Marlojongi nasida ndang olo loja, mardalani nasida ndang olo mandate.

Molo didok Debata do hagogoonta na marlapatan ma i, ndang adong na asing dungkon ni Debata na boi mangalehon gogo tu hita. Suang songon i do nang na masa tu bangso Israel hatiha i, dijou Debata do bangso Israel na hinaholonganNa jala dipasahat do nang gogo tu nasida. Hot do hagogoon ni Debata di nasida nang pe sanga nasida ditaban halak sileban. Alai diboan Debata do nasida muse mulak tutano ni ompu nasida ima huta Sion, Jerusalem. Hot do holong ni Debata tu angka na porsea tu Ibana. Alani i ndang adong na holip di adopan ni Debata, diboto Debata do sude angka na hinasiholan ni bangso i di ngoluna. Alani ndang boi nasida marsak jala mandele laho mangadopi saluhut na masa di ngoluna. Na ringkot di nasida i ma hasatiaonna tu Debata, ala Debata pe satia do tu bangsoNa. Hataridaan ni hasatiaon ni bangso i tu Debata i ma marhite na marhaposan tu Jahowa jala marhaporseaon na polin. Dia ma i?

Parjolo, panghuling dohot parbinegean na tingkos i do na naeng tongtong jumpang di bangso ni Debata. Di turpuk jamita sadari on dipasahat panurirang Jesaya do tu bangso Israel asa unang muba haporseaon nasida. “Boasa ma dohononmu ale Jakob, jala didok ho ale Israel: bun do dalanku maradophon Jahowa, jala ndang maruli uhum ahu sian Debatangku”. Nda hata pandelean do i? Dohonon ma Debata martabuni? Ndang hea martabuni Debata sian hita,. Hita do na olo martabuni sian Debata. Hape dibereng Debata do sude gulmit di ngolunta. Dipaingot Debata do bangso i marhite panurirangNa ala didok nasida na buni Debata tu nasida. Hape nasida do na buni sian Debata alani pangalaosion nasida tu Debata. Ndang radot nasida di uhum ni Debata, hape tong do dipatuduhon Debata holong ni rohaNa tu nasida.

Paduahon, patoguhon roha ni bangso i asa manjalo gogo sian Debata di sude angka na masa i. Sian mula ni mulana nunga taboto ia Debata pargogo na so hatudosan. Ndang boi tarpangasahon hita pangurupion ni jolma. Ndang adong na boi mangimbangi hagogoon ni Debata. Laos ise pe ibana. Laos boha gogo ni jolma di portibi on parsatongkinan do i. Di ayat 29 didok: “Ibana do balik mangalehon gogo tu na loja, dipargogoi situtu angka na so margellok”. Molo so adong gogo ni halak ndang boi mula ulaon. Alai ndang boi pangasahononta gogonta i. Sungkunsungkun boi do hita mangido hagogoon sian jolma? Boi, alai taingot ma satongkin do i. Boi do hita mangido pangurupion sian jolma? Boi, alai tarbatas do i. Alai anggo Debatanta i, Ibana do hagogoonta. Hagogoon ni Debata ndang dibatasi tingki dohot inganan.

Patoluhon, terbatas do gogonta. Di ayat 30 didok: “Loja pe angka dolidoli jala mandate, jala tarsulandit angka na mardaging na tombos”. Molo didok dolidoli i ma gombaran ni hatoguon ni pamatang manang lambang ni keperkasaan. Alai nang pe songon i togu ni pamatang tong do ingkon suda gogona. Alai anggo tu Debata manang sadihari hita mangido gogo sai na lehononna do i. Jala Ibana do haroroan ni sandok gogo. Ndang tarpatupa hita agia aha molo so mardonganhon Debata. Asa ganup hita ingkon tongtong manghatindangkon hagogon ni Debata di ngolunta. Gogo ni Debata do na tajalo umbahen margogo hita mangula ulaonta siganup ari. Manang aha pe na taula molo so mardonganhon Debata, ndang mamaboan hasonangan i. Jala i do na hinatindangkon di Buku Ende no 309: “Raphon Tuhan Jesus i pungka ulaonmu; Ingkon tu Ibana i parguruhononmu; Baen Ibana donganmi, hehe dohot modom. Dege ma bogasNa i, roham i pahohom. Ganup sogot ingkon do Jesus jouhononmu, Asa urupanNa ho di siulaonmu, Ai arian, borngin pe, naeng ho dongananNa, Dosam i pe sasude, naeng taluhononNa. Molo Jesus donganmi, ndang tarbaen ho mago; Nang bisuk sibolis i, Jesus do gumogo. Asal dihaposi ho Jesus i, Tuhanmu, Ingkon sai maporus do, NaniarsakkonMu.”

Paopathon, porsea tu Debata. Marhite turpuk jamita on dijou ma hita asa tongtong marhaposan tu Debata, unang marhaporseaon tu jolma dohot tu portibi on. Tangkas do didok di ayat 31: “Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate”. Ai halak na marhaposan portibion manang donganna jolma boi do i mambahen hita gabe tarhirim, alai anggo halak na marhaposan tu Debata maruli las ni roha do. Boasa maruli las ni roha? Ala Debata do na rap mardalan dohot angka na porsea. Tarlumobi ma di na laho mandalani taon on hita, na so taboto dope aha na naeng siadopanta di na laho mandalani taon on, tarlumobi siala ni pandemic Covid-19 na so binoto dope sadihari marhaujungan, na manghorhon gok hasusaan di ngolunta. Sian na masa on sasintongta boi idaonta hira so margellok do hita mararadophon pandemic i, hira so tuk do hapistaran dohot parbinotoan ni jolma i laho paujunghon pandemic i.

Alani do marhite turpuk jamita on naeng diarahon hita asa tongtong gogo na sian Debata tapangasahon. Asa Debata tongtong mardalan rap dohot hita manang tudia pe hita mangalangka. Sungkun sungkun di hita nuaeng, tahilala dope gogo ni Debata di ngolunta? Jala molo tahilala, dia ma hataridaan ni hagogoon ni Debata i di ngolunta? Jala molo so tahilala be, dia ma ulahononta asa taruli hita di hagogoon ni Debata? Asa sasintongna ganup hita ingkon boi hatahononta dohot patubegehononta manang didia pe hita maringanan, gariada ingkon dohononta do ndang hasuhatan gogo ni Debata di ngolunta.

Laos i do na nidok ni apostel Paulus di turpuk Epistelta di 1 Korint 9: 16-23, di na marbarita na uli ibana tu huria na hinobasanna. Ala Tuhan Jesus do na binaritahonna ndang sumurut ibana atik pe ragam hamolon na binolusna. Molo mangasahon gogona sandiri do ibana mangulahon ulaon i, ndang tarpatuba ibana i laho marbarita na uli. Alai ala mangasahon gogo na sian Debata apostel i, gabe tarpatupa ibana do. Jala i do asa di hatindanghon apostel di Pilippi 4: 13: “Saluhutna do tarpatupa ahu marhitehita Ibana na margogoihon ahu”. Sandok margogo do ibana. Alani do nang hita pe angka na porsea na mangolu di masa nuaeng on, tarlumobi di zaman na lam maju, di na mangula angka siulaonta hita ingkon parhatopotonta ma gogo na sian Debata. Ndang hea Debata manadinghon hita. Ingkon hilalaonta do pandonganion ni Debata. Alani tauduti ma pardalanan ni ngolunta di taon on mardonganhon Debata asa Ibana tongtong na margogoihon hita.