Khotbah Mazmur 31: 8-16 Bersoraklah Akan Kasih Setia Tuhan

 Minggu Palmarum, 28 Maret 2021

31:8 Aku akan bersorak-sorak dan bersukacita karena kasih setia-Mu, sebab Engkau telah menilik sengsaraku, telah memperhatikan kesesakan jiwaku,

31:9 dan tidak menyerahkan aku ke tangan musuh, tetapi menegakkan kakiku di tempat yang lapang.

31:10 Kasihanilah aku, ya TUHAN, sebab aku merasa sesak; karena sakit hati mengidaplah mataku, meranalah jiwa dan tubuhku.

31:11 Sebab hidupku habis dalam duka dan tahun-tahun umurku dalam keluh kesah; kekuatanku merosot karena sengsaraku, dan tulang-tulangku menjadi lemah.

31:12 Di hadapan semua lawanku aku tercela, menakutkan bagi tetangga-tetanggaku, dan menjadi kekejutan bagi kenalan-kenalanku; mereka yang melihat aku di jalan lari dari padaku.

31:13 Aku telah hilang dari ingatan seperti orang mati, telah menjadi seperti barang yang pecah.

31:14 Sebab aku mendengar banyak orang berbisik-bisik, -- ada kegentaran dari segala pihak! -- mereka bersama-sama bermufakat mencelakakan aku, mereka bermaksud mencabut nyawaku.

31:15 Tetapi aku, kepada-Mu aku percaya, ya TUHAN, aku berkata: "Engkaulah Allahku!"

31:16 Masa hidupku ada dalam tangan-Mu, lepaskanlah aku dari tangan musuh-musuhku dan orang-orang yang mengejar aku!

31:8 Sai marolopolop jala marlas ni roha ma ahu bahen mida asi ni roham, na tinatapmu dangolhon, na marbinoto i Ho di angka hagogotan ni tondingki.

31:9 Jala ndang * dipadapot Ho ahu tu tangan ni musu, * dipajongjong Ho do pathu di halambason.

31:10 Asi ma roham di ahu, ale Jahowa, ai hagogotan do ahu, * pola do lotop matangku binahen ni haarsahon, maras do rohangku dohot dagingku.

31:11 Ai nunga suda ngolungku dibahen hamarason, suda dohot angka taonhu dibahen angguhangguk, * merus do gogongku dibahen dosangki, jala ndang mangalo be holiholingku.

31:12 Jadi gabe parbilean do ahu maradophon sude angka alongku dohot hombarhu hundul, jala tarsonggot situtu do angka donganku magodang; marsidingsiding be do angka na marnida ahu di balian.

31:13 Nunga tung * lupa ahu sian roha, songon halak na mate, * sobokkon ngarngar na ambolongan nama ahu.

31:14 Ai sai hupabegebege do husiphusip ni torop halak, habiaran humaliang; sai marluhut i do nasida martuptup i ahu, mambuat hosangku do dipingkiri nasida.

31:15 Alai anggo ahu, tu Ho do ahu marhaposan, ale Jahowa, ningku do: * Ho do Debatangku.

31:16 Marguru tu tanganmu do angka parsoriongki, sai palua ma ahu sian tangan ni angka musungku dohot sian angka na mangalotongi ahu.

Palmarurn, lapatanna maremare, Kari rays daun palem, manang janur kuning. Ditotophon Palmarum gabe goar ni minggu andorang so ari Parningotan Hamamate  ni  Tuhan  Jesus  marojahan  tu  haroro  ni Tuhan Jesus  tu  Jerusalem andorang so hamamateNa. Ditomutomu na torop Jesus di bagasan las ni roha di na bongot Ibana tu Jerusalem. Las ni rohanasida manjangkon Jesus  dipatuduhon marhite maremare. Somal do maremare, janur kuning, dipangke  tanda ni las ni roha. Molo marpesta halak Jawa pesta penikahan, sunatan dohot pesta lasniroha na asing i,   sai dipantikhon do janur kuning `di .pintu masuk tu` jabu ni na marpesta i. Janur kuning i patuduhon adong las ni roha di inganan i. Hasomalan  mambahen maremare  di tingki  natal  dohot minggu  Palmarum  di  gareja  di  huria  Batak nunga tibu i masa mamungka sian na jolo. Goar ni minggu Palmarum on, manjou hita marolopolop. Boasa marlas ni  roha manang marolopolop hita hape di ari Jumat on ingotonta  Jesus .na tarsilang? Jala molo tapaihutihut muse pangontak ni pandemic covid-19 na so haru tangkas dope taboto haujunganna jala nunga tung torop jolma na susa alani na masa i?

Tagan di ngoluna, tung mansai ragam do angka parmaraan na binolus ni Raja David, pola do sipata mengancam di ngoluna (isarana:na binahen ni Raja Saul tu ibana). Alai nang pe songoni maolna angka parmaraan i, dihilala ibana do tongtong pangaramotion ni Debata di ngoluna, gabe sai jotjot ibana malua sian angka parmaraan i, ndang tarbahen angka musuna manaluhon ibana. Asa mansai togu do haporseaon ni si David maradophon Debata Jahowa, paboa Ibana partanobatoan na mangondihon ngoluna. Marragam do isi ni Psalmen i, hombar tu angka pengalaman ni parPsalmen i sandiri, jala di turpuk on ima Psalmen ni Raja David na marrumanghon sada panindangion marhite tangiang, paboa haposan do Debata jala asa tu Ibana tama pasahatonta ngolunta dohot tondinta.

Marolopolop tu Debata ala malua sian ragam ni angka hamaolon, sian angka musu dohot angka na manggaori. Godang do na marsogo ni roha tu si David, tarlumobi dung dipillit ibana na gabe raja di bangso Israel. Alai tongtong do ibana marpanindangion na tutu tu Debata paboa ndang dipasombu Debata ibana. Diparhatopot ibana do na so dung olo Debata maninggalhon ibana. Jala sai marpos ni roha do ibana tu Debata, “Marguru tu tanganMu do angka parsorionhi, sai palua ma ahu sian tangan ni angka musungku dohot sian angka na mangalotongi ahu”. Nang hita pe naeng ma songon parPsalmen i, mangolu di bagasan olopolop tu Jahowa. Panindangion si songon on ma nian tongtong jumpang di hita di partingkian sinuaeng on. Tutu godang do angka na mangarsahi hita gabe sipata maoto hita alai molo mardonganhon Debata jumpang do las ni roha i.

Sian turpuk jamitanta on, sada hatorangan jala ondol di ngolunta ima:”porsea jala hamauliatehon sitaonon, hinahansit namanosak di ngolum”. Boasa didok songon i? Ai dipatau angka hasosakan i do jolma laho mananda dirina dohot lam mananda dalan ni Debata. Dung ndang margogo jolma i mangadopi na masa, diida ma na adong Debatana tuk paluahon. Di hagaleonna i lam tangkas do huaso ni Debata na mangondihon angka na porsea i. Ido dihangoluhon panurat ni turpuk on. Diparhatututu ibana do tangan ni Jahowa na holip sian pamerengan surduk manogu jolma i sian hamatean tu hangoluon. Asa nang pe diondamondam hamatean na tongon diadopi, ndang sumurut haporseaonna, ndang humordit ojahanna jongjong, ai diboto do adong Debata na sai marnida dohot marpanatap di parsorionna. Dipalua patna sian jorgong na mangihot dirina humusor sian ragam ni angka parmaraan. Sai ditogutogu Tuhan i ibana di pardalananna asa unang tartuktuk..

Manghaposi Jahowa asa jumpang las ni roha, ido apala nidok ni jamita on. Molo marsihohot jolma marhaporusan tu Jahowa sai dapotan parsaulian do ibana. Apala na mansai uli naeng parangehononta sian raja Daud on ima hatana na mandok:” Alai anggo ahu, tu Ho do ahu marhaposan, ale Jahowa, ningku do: Ho do Debatangku.” Pasahat diri tu Debata unang alangalang alai ingkon hibul, ndang mardua roha dohot pingkiran. Ganggu ni roha do na jotjot mambahen jolma i sundat marlas ni roha. Godang do jolma ndang saut dapot hasonangan di ngoluna ala ndang hot hajongjonganna. Sipata tu hambirang, sipata tu siamun. Nang di haporseaon pe sai adong dope jolma na songon i, marminggu do nian ibana ro tu gareja alai haporseaonna di hagogoon ni portibi ndang mago. Raja Daud tangkas mandok na magigi ibana tu angka na manomba ganaganaan. Ndang mardongan, maraleale ibana tu nasida. Dipaholang do dirina sian i.

Marhite turpuk jamitanta on, nuaeng tasungkun ma jo dirinta, so tung do na so hibul haporseaonta tu Tuhan i umbahen sai maol na taadopi? Atik ala na mardua haporseaon do hita umbahen sai sundat na taparsinta di rohanta. Asa boi lam hot jala togu haporseaonta tu Jahowa jala jumpang asi ni roha ni Jahowa, tatanda ma:

Jahowa – Debata haposan: ndang tagamon tarurak jolma na marhaposan tu Jahowa. Diondihon Ibana do jolma na ro pasahathon sori ni ngoluna. Las ni roha na bolon do sijaloonta molo hot haposanta tu Ibana. Ndang maila hita molo holan tu Jahowa marhaposan, ai paluaonNa do hita sian ragam ni hamaolon. Angka na marhaposan tu Jahowa sai dapotan parsaulian godang jala martua ma jolma na Jahowa haposanna dibahen.

Jahowa – hatigoran di angka na porsea: ndang tagamon so godang na ro manusai dohot patubu hamaolon tu ngolu ni na porsea, alai molo Jahowa tahaposi sai pintoran ni hatigoran dohot hasintonganNa i do ngolunta. Sipata hira na talu do taida angka na sintong alai unang ma i gabe manundati hita sian hatigoran ni Debata ai ido na mamintori hita di tano on nang di banua ginjang.

Jahowa – Debata Pangondian: ndang hurang gogo ni Jahowa paluahon hita di sude parungkilon. Diida do hagaleonta jala diboto na jotjot talpe ngolunta tu hamatean alai molo di bagasan pos ni roha hita di huasoNa, sai na dapotan las ni roha do hita di ujung na tahalungunhon. Haporseaon on manjou hita asa unang adong na marpangunsandean tu dirina dohot gogona sandiri.

Jahowa – Debata Partanobatoan: diondingi huaso ni Debata do angka na porsea asa unang mago alani hagogoon na mambahen parmaraan. Partanobatoan marlapatan, Ibana do na mangondingi hita asa unang manaon. Diolani do hita asa unang porsuk ngolunta uju ro angka na maol. Molo didok partanobatoan ima na manggombarhon hagogoon na so boi rumpak ala pangullus ni manang aha pe. Togu, hot jala ndang marnamorot hagogoonNa i.

Antong sai tongtong ma mian olopolop dohot las ni roha i di ngolunta, atik pe mangadopi angka partingkian na mubauba. Di minggu Palmarum on ingotonta ma las ni roha na pinatupa ni Debata marhte AnakNa Tuhan Jesus Kristus na mamboan haluaon i.