Khotbah Lukas 23: 44-48 Yesus Menyerahkan NyawaNya

 Jumat Agung, 2 April 2021

23:44 Ketika itu hari sudah kira-kira jam dua belas, lalu kegelapan meliputi seluruh daerah itu sampai jam tiga,

23:45 sebab matahari tidak bersinar. Dan tabir Bait Suci terbelah dua.

23:46 Lalu Yesus berseru dengan suara nyaring: "Ya Bapa, ke dalam tangan-Mu Kuserahkan nyawa-Ku." Dan sesudah berkata demikian Ia menyerahkan nyawa-Nya.

23:47 Ketika kepala pasukan melihat apa yang terjadi, ia memuliakan Allah, katanya: "Sungguh, orang ini adalah orang benar!"

23:48 Dan sesudah seluruh orang banyak, yang datang berkerumun di situ untuk tontonan itu, melihat apa yang terjadi itu, pulanglah mereka sambil memukul-mukul diri.

23:44 Jala mareak pungkul sampuludua, songgop ma na holom tu sandok tano i sahat ro di pungkul tolu.

23:45 Ai mangkolom ma mata ni ari i. Jadi maribak ma hirehire na di bagas joro i, bola dua.

23:46 Dung i marsoara na gogo ma Jesus, ninna ma: Amang! Tu bagasan tanganmu ma hupasahat tondingku! Jadi dung didok i, tos ma hosana.

23:47 Marnida na masa i letnan i, dipuji ma Debata, ninna ma: Tutu do, halak na tigor roha do On!

23:48 Jadi sude natorop i, na marluhut mainondur, masitompuk andorana, marnida na masa i, laos mulak ma.

Songon jolma na sorang tu portibi on jala di tingkina muse ingkon monding do, jala tangkas do taboto ndang malua hita soan parungkilon. Na boi masa do parungkilon di ngolunta alani ragam sibonsiri. Adong ma i siala ni parsahiton na tubu di pamatangta. Adong do i siala ni na masa dihumaliangta. Laos adong do i siala ni pambahenan ni donganta jolma di parngoluan siganup ari manang alani na masa di portibi on isarana, alani porang, bencana alam, nang alani pandemic covid-19 on, na mangago ngolu ni torop jolma. Marragam do dalanta songon jolma mangadopi hamatean na tompu manang ndang. Adong dibagasan biar, alai laos adong do dibagasan hadameon nang pos ni roha. Barita na uli on manaringoti songon dia Tuhanta Jesus mangadopi hamatean di hau pinarsilang i, jala aha na masa uju so marujung ngoluna jala dung marujung ngoluna di hau pinarsilang i.

Taboto jala tahatindangkon do ia hamamate ni Jesus di hau pinarsilang i laho manobus dosa ni hajolmaon do. Ndang alani sala manang dosaNa umbahen mate tarsilang Ibana. Hamamate ni Jesus di hau pinarsilang i ndang dos tu hamamate ni angka na diparsilangkon harajaon Rom siala pangaloon nasida maradophon huaso ni harajaon Rom. Dipatupa Debata do dua na masa laho pabotohon marasing do Jesus na tarsilang i sian na dua halak na rap tarsilang dohot Jesus hatiha i, nang na tarsilang na asing andorang so i nang dung na masa i. Na sada ima tanda sian mata ni ari. Masa haholomon saleleng tolu jom, pukul 12.00 sahat tu ukul 15.00, di sandok luat inganan ni Jesus ala mangholom matani ari. Gabe diboto luat Jerusalem dohot humaliangna ma parasingan ni panilangkonon ni Jesus. Arhuaso Rom dohot parhuaso bagas joro di Jerusalem nang natorop mangidosa, nasida do na mamparsilangkon Jesus. Napaduahon, i ma na masa dibagas joro di Jerusalem, i ma maribak hirehire na di bagas joro. Somal do tabaritahon dia lapatan ni parribak ni hirehire i, i ma: Hamamate ni Jesus mangungkap dalan na bungbung tu jolma i mamasuhi habangsa parasian ni Debata, so ingkon marhite angka malim songon na somal diantusi jala diula nasida. Jesus na mate tarsilang i do na gabe malim padomu jolma pardosa dohot Debata.

Manaon Tuhanta Jesus di hinahansit ni na tarsilang i, pola joujou tu Debata AmaNa marhite soara na gogo. Tung mansai hancit do dihilala Tuhan Jesus, ndang adong ilmu kebal di Ibana, ndang gabe so dihilala Ibana hancit ni na dilinsingi, dipaku, digantunghon. Alai nang pe songon i, ditaon, dituhuk Tuhan Jesus do saluhutna i di bagasan haunduhonNa tu parsuruon ni Ama i holan laho paluahon hita pardosa. Molo songon i hancitna diae Tuhan Jesus laho humongkop hita, laos so auhononta be panghophopanNa i? Datdatanta dope mardosa? Torushononta dope ngolu na mangoloi hagiot ni daging? Unang be nian; nunga dilohothon Jesus saluhutna i di hau pinarsilang i. Nunga mate be dosa dohot hamatean i. Alani i, tajanghon, tahamauliatehon ma panghophopanNa i alau naung diseahon Ibana dirina holan laho paluahon hita sian gomgoman ni dosa. Burjuna i Tuhan i humongkop hita pardosa on, alani hita pe nian tahaburjuhon ma manghaporseai Ibana Sipalua hita.

Di na tapatupa parningotan ni hamamate ni Tuhanta Jesus di hau pinarsilang i, ingkon taingot ma dokdok ni sitaononNa i di na tongon mangadopi hamamateNa i, alai ndada holan joujou, diujungna dibagasan pos ni roha do dipasahat Ibana tondiNa tu Amana i. Alai dohot do tong didok i tu hita, asa di na manaon hita di panggosa ni pandemic covid-19 on, anggiat nian tu Debata ma hita joujou jala tongtong pos rohanta pasahathon dirinta. Haporseaon si songon i do na naeng pagabasonta di tingki parningotan di ari hamamate ni Tuhanta Jesus. Di partingkian si songon on naeng ma tadapothon Tuhan i, pasahathon alualu manang anggunganggukta, alai naeng diuduti dohot disimpuli marhite pos ni roha di Debata na tuk palua hita sian parungkilon i. Pandohan ni Tuhan Jesus na mandok, tu bagasan tanganMu ma hupasahat tondingKu mamanghulingi hita dipartingkian ni pandemic covid-19 on. Manaon do hita siala covid-19 on dohot siala ni na asing i di ngolu on, na mambahen hita ndang margogo mangadopisa. Dipartinhkian si songon i dijouhon tu hita asa maniru Tuhan Jesus.

Tung uli do ojahan ni turpuk on, na mandok: diseahon Jesus do hosaNa laho paluahon jolma pardosa, jala tabo begeon. Alai, aha do na laho sidohononna tu hita di tingki on? tagamon do lam martamba angka na paubahon roha songon induk ni soldadu nang angka na torop i dung diida ibana angka halongangan i? Partording ni hamamate ni Jesus marhite na masa angka halongangan ndang songon halak na somal diparsilangkon, gabe mambahen induk ni soldadu i mamuji Debata, jala didok ibana: tutu do, halak na tigor roha do on. Pandohan ni induk ni soldadu i patuduhon na so marsala Tuhan Jesus. Boasa mamuji Debata induk ni soldadu i? Ala dibereng ibana angka halongangan na masa tu Tuhan Jesus. Molo apala halak Rom, na so mananda Padan Narobi, na so paimaimahon Mesias, boi mangantusi jala manghatindangkon na tutu do Jesus anak ni Debata, nda tarlumobi ma hita nian? Dung i marluhut ma sude na torop i huhut mainondur, masitompuk andorana marnida na masa i laos mulak ma. Masitompuk andorana, na marlapatan ma i patuduhon panolsolion. Angka na torop na nidokna dison tontu do nunga parsidohot manginsahi Tuhan Jesus.  On ma tong na ringkot tadok tu dirinta be di na marningot ari hamamate ni Tuhanta, ai ala ni dosanta do umbahen na tarsilang Ibana. Ingkon udutonta do panolsolionta i dohot mangido hasesaan ni dosanta. Jala unang be taulahi mardosa dompak donganta jolma nang dompak Debata.