Khotbah Efesus 2: 1-10 Kasih Karunia Allah yang Menghidupkan

 

Minggu Letare; 14 Maret 2021

2:1 Kamu dahulu sudah mati karena pelanggaran-pelanggaran dan dosa-dosamu.

2:2 Kamu hidup di dalamnya, karena kamu mengikuti jalan dunia ini, karena kamu mentaati penguasa kerajaan angkasa, yaitu roh yang sekarang sedang bekerja di antara orang-orang durhaka.

2:3 Sebenarnya dahulu kami semua juga terhitung di antara mereka, ketika kami hidup di dalam hawa nafsu daging dan menuruti kehendak daging dan pikiran kami yang jahat. Pada dasarnya kami adalah orang-orang yang harus dimurkai, sama seperti mereka yang lain.

2:4 Tetapi Allah yang kaya dengan rahmat, oleh karena kasih-Nya yang besar, yang dilimpahkan-Nya kepada kita,

2:5 telah menghidupkan kita bersama-sama dengan Kristus, sekalipun kita telah mati oleh kesalahan-kesalahan kita -- oleh kasih karunia kamu diselamatkan --

2:6 dan di dalam Kristus Yesus Ia telah membangkitkan kita juga dan memberikan tempat bersama-sama dengan Dia di sorga,

2:7 supaya pada masa yang akan datang Ia menunjukkan kepada kita kekayaan kasih karunia-Nya yang melimpah-limpah sesuai dengan kebaikan-Nya terhadap kita dalam Kristus Yesus.

2:8 Sebab karena kasih karunia kamu diselamatkan oleh iman; itu bukan hasil usahamu, tetapi pemberian Allah,

2:9 itu bukan hasil pekerjaanmu: jangan ada orang yang memegahkan diri.

2:10 Karena kita ini buatan Allah, diciptakan dalam Kristus Yesus untuk melakukan pekerjaan baik, yang dipersiapkan Allah sebelumnya. Ia mau, supaya kita hidup di dalamnya.

2:1 Hamu pe, nunga mate hamu najolo hinorhon ni angka pangalaosion dohot dosamuna,

2:2 angka na niulahonmuna marguru tu tingki ni hasiangan on, mangihuthon lomolomo ni na marhuaso di aoangaoang, i ma tondi na mangula nuaeng di bagasan angka anak na so siat hata.

2:3 Raphon nasida do nang hita sasudena najolo mangulahon angka hisaphisap ni dagingta, di na taturut lomolomo ni daging i ro di sangkapsangkapna, jadi anak sirimasan do hita sian bangko hian, doshon angka na asing.

2:4 Alai anggo Debata parasiroha bolon do jala parholongroha na balga maradophon hita.

2:5 Jala raphon Kristus do dipangolu Ibana hita, angka naung mate di bagasan angka pangalaosion; na sian asi ni roha do, umbahen na malua hamu!

2:6 Gabe rap dipangolu jala rap dipabangkit hita tu gomgoman banua ginjang, di bagasan Kristus Jesus.

2:7 Laos patuduhononna do di angka tingki na naeng ro dope surung ni hamoraon ni asi ni rohana, di habasaonna i maradophon hita, di bagasan Kristus Jesus.

2:8 Ai sian asi ni roha do, umbahen na malua hamu, dalan haporseaon; jala ndada binahenmuna, silehonlehon ni Debata do.

2:9 Nda tung sian parulaon i, asa unang adong na mamuji diri.

2:10 Ai jadijadianna do hita, angka na tinompa di bagasan Kristus Jesus, asa marulaon na denggan hita; ai angka i do dipature Debata hian, asa taparangehon i.

Turpuk on ima surat ni Apostel Paulus na tinongosna tu huria Efesus uju dibagasan hurungan ibana di Rom alani barita na uli (3: 1), na digurithon ibana hurang lobi di taon 60-63 M. Jala si Tikikus do disuru apostel Paulus laho manaruhon surat on (6: 21-22). Huria Epesus ima sada huria na jongjong di huta ni angka na marsomba tu hasipelebeguon, tu ganaganaan, jala songon sada luat ribur tontu marragam ma nang paradaton di luat i. Huria Epesus, ima sada huria na mansai dihaholongi apostel Pauus, jala hea do ibana mian di Epesus hurang lobi 3 taon (Ulaon Ap. 18: 19-21). Ditongos ibana surat on laho patoguhon asa hot haporseaon ni ruas ni huria na adong di Epesus, asa unang ganggu haporseaon nasida hinorhon ni panosak ni angka panurirang pargapgap. Dimulana i mansai togu do parsaoran na denggan, haholongan dohot haporseaon ni huria i, jala pola dipuji apostel Paulus dibagasan las ni roha. Alai sian naso panagaman ro ma tu huria Epesus angka panurirang pargapgap na mamodahon barita nauli asa mulak nasida tu hasomalan naung leleng. Poda na mangajarhon marhitehite na mangulahon patik nboi dapot haluaon manang marhite na mangulahon patik do boi targoar nasida gabe anak ni Debata. Alani ni angka poda i gabe sisoada ma panghophopon ni Kristus i, gabe sisoada ma di ngoluon asi ni roha ni Debata na paluahon jolma sian hamatean na saleleng ni lelengna (Sola Gratia).

Sola Gratia na marlapatan holan asi ni roha. On ma sada pangajarion ni Martin Luther di tongatonga ni huria taringot tu haluaon ni angka na porsea. Holan marhite asi ni roha ni Debata do umbahen na sahat jolma i tu haluaon. Ndang adong na tama jolma i di adopan ni Debata, ala saluhutna nunga mardosa jala tama dapotan rimas sian Debata. Ndang adong na boi patupaon ni jolma asa malua ibana sian rimas ni Debata. Tutu adong do pangajarion di tongatonga ni hajolmaon taringot tu “pahala” manang digoari di hata Batak tohap. Pangajarion i mandok: jumpang hita do haluaon jala boi do tolhas hita tu banua ginjang molo godang jala singkop hita mangulahon na denggan, molo gumodang do ulaon na denggan taula sian ulaon hadosaon. Hape, ise ma jolma na boi singkop mangulahon na denggan? Ndang adong. Ala naung madabu do jolma i tu bagasan dosa, gabe sai tartait do rohana mangulahon dosa.

Di ayat 1 – 3, dipatorang do naung mate do jolma i hinorhon ni angka dosana. Angka lomo ni rohana jala angka na maralo tu lomo ni roha ni Jahowa angka parulaonna. Sude do jolma nunga mardosa. Saluhut do nunga mardosa jala tama dapotan rimas sian Debata. Ndang patut nian sasintongna dapotan asi ni roha, hasesaan ni dosa dohot haluaon. Ala naung mate do jolma i hinorhon ni dosa, ndang tarbahen jolma i be paluahon dirina sian huaso gomgoman ni dosa hamatean i. Alai di ayat 4-8 tangkas do dipatorang, ala asi ni roha dohot holong ni roha ni Debata, nunga dipangolu jolma i. Raphon Kristus nunga dipangolu jala dipalua hita. Tuhan Jesus do parhitean manang dalanta tu haluaon dohot hangoluon naung pinarade ni Debata. Ndada ala na tau jala na tama hita manjalo i alai ala ni rohaNa do na patauhon hita gabe parjambar di habangsaNa. Ai sian asi ni rohaNa do umbahen na malua hita, ndada alani pambahenanta alai silehonlehon ni Debata do. Songon halak na niasian hita, alani unang adong na mamuji diri jala manghaginjangkon rohana di jolo ni donganna jolma, songon na masa jotjotan di tongatonga ni parsaoran ni halak Jahudi rap dohot halak na Jahudi hatiha i. Jotjot do halak Jahudi, nang pe nunga Kristen nasida, marneang ni roha marnida halak di duru ni hajahudion. Holan nasida do na tama jala na tau dapotan haluaon, sumurung do nasida sian angka bangso na asing, i do didok rohanasida.

Alai ndang asi ni roha dohot haluaon i panimpuli dohot ujung ni pangajarion ni apostel tu huria Epesus. Di ayat 10 turpuk on na mandok: ai jadiajadian do hita, angka na tinompa dibagasan Kristus Jesus, asa marulaon na denggan hita, ai angka i do dipature Debata hian, asa taparangehon i. Ringkot do taparrohahon hata “asa marulaon na denggan hita”. Asa marhite ayat 10 turpuk on naeng taantusi: tutu do ndang ala ni parulaonta umbahen na mangolu jala malua hita, tung ala asi ni roha ni Debata do. Alai ndang na marlapatan gabe ndang ringkot ulaon na denggan. Ala silehonlehon ni Debata do i, ndang na gabe so sambing hita so marniula. Alani ringkot situtu ma i dijamothon jala disunggulhon apostel i tu ruas ni huria na adong di Epesus, na hurang marsitutu papatarhon haluaon marhite parbue ni ngolu na imbaru. Ai nang pe nunga Kristen nasida alai sipata mulak dope nasida mangulahon pangalaho na robi na dibagasan dosa. Sipata ndang apala patar tarida hatandian nasida songon halak Kristen martimbanghon ngolu nasida na ujui andorang so Kristen nasida. Sipata ndang marimbar halak Kristen di tongatonga ni halak na so Kristen. Alani ringkot situtu disunggulhon tu nasida asa marsitutu nasida manadinghon ngolu na buruk i jala mangolu huhut mangula dibagasan haimbaruon asa patar hadirion nasida songon jolma naung niasian ni Debata jala naung pinalua ni Debata, i ma marhite ngolu naimbaru dohot angka ulaon na denggan marhite na hinalomohon ni Debata. Alai ingkot taingot do, parange na denggan i ndada asa malua hita sian dosanta, ndada asa lam balga holong ni roha ni Tuhan i, ndada asa lam tangkas lomo ni roha ni Tuhan i tu hita, alai saluhutna parange na denggan i, parbue ni haposeaonta do i dilasnirohanta diasi ni roha ni Debata naung manompa hita gabe jolma na imbaru dibagasan Jesus Kristus.

Alani dipaingot jala dijouhon do tu huria Epesus nang tu hita halak Kristen asa taulahon ulaon na denggan, ndada asa dapotan haluaon hita alai songon parbue ni haluaon naung dibasabasahon Tuhan i do i. Ditompa Tuhan i do hita asa taulahon do ulaon na denggan. Diasii Tuhan i do hita asa taulahon do ulaon na denggan. Dipasupasu jala dipalua Tuhan i do hita asa taulahon do ulaon na denggan. Dipasupasu jala dipalua Tuhan i do hita asa taulahon do ulaon na denggan. Jala i do dipature jala disangkapi Ibana sian mulana tu hita jolma na niasianNa. Nunga tajalo asiasi dohot holong ni roha sian Debata naung paluahon hita sian dosa jala naung patau hita gabe parjambar di harajaon banua ginjang. Alani las ma rohanta songong goar ni minggunta sadarion ima Letare. Antong songon tanda las ni rohanta taargahon jala tahamauliatehon ma i, marhite na mangulahon ulaon na denggan songon parbue ni haluaon naung dibasabasahon Tuhan i tu hita. Ingkon marparbue na denggan ma ngolunta, i do mangargahon jala mangauhon haluaon naung dibasabasahon Tuhanta tu hita. Taingot hata ni Debata di 1 Korint 6: 20 : “Ai arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna; ai Debata do nampuna i.”