Khotbah Mazmur 136: 1-10 Bersyukur Atas Keselamatan Dari Tuhan

 Senin (Paskah II), 05 April 2021

136:1 Bersyukurlah kepada TUHAN, sebab Ia baik! Bahwasanya untuk selama-lamanya kasih setia-Nya.

136:2 Bersyukurlah kepada Allah segala allah! Bahwasanya untuk selama-lamanya kasih setia-Nya.

136:3 Bersyukurlah kepada Tuhan segala tuhan! Bahwasanya untuk selama-lamanya kasih setia-Nya.

136:4 Kepada Dia yang seorang diri melakukan keajaiban-keajaiban besar! Bahwasanya untuk selama-lamanya kasih setia-Nya.

136:5 Kepada Dia yang menjadikan langit dengan kebijaksanaan! Bahwasanya untuk selama-lamanya kasih setia-Nya.

136:6 Kepada Dia yang menghamparkan bumi di atas air! Bahwasanya untuk selama-lamanya kasih setia-Nya.

136:7 Kepada Dia yang menjadikan benda-benda penerang yang besar; bahwasanya untuk selama-lamanya kasih setia-Nya.

136:8 Matahari untuk menguasai siang; bahwasanya untuk selama-lamanya kasih setia-Nya.

136:9 Bulan dan bintang-bintang untuk menguasai malam! Bahwasanya untuk selama-lamanya kasih setia-Nya.

136:10 Kepada Dia yang memukul mati anak-anak sulung Mesir; bahwasanya untuk selama-lamanya kasih setia-Nya.

Barita taringot tu haheheon ni Tuhan Jesus, ndang sahali dua hali be tabege. Ganup taon do dipaingot manang dipaimbaru parningotanta taringot tu haheheon ni Jesus Kristus. Barita taringot tu haheheon ni Jesus, barita las ni roha situtu do i di huria, ai marojahan tu haheheon ni Jesus do hajongjongan ni huria i. Ndang tarbahen tuk utokutok laho mamingkiri haheheon ni Jesus i. Ingkon marojahan tu haporseaon do songon dalanta mangantusi haheheon ni Jesus i. Jala marhite haheheo ni Jesus Kristus sian na mate hehe ma dia ri sogot angka na porsea i jala dapotan hangoluan na manongtong ro di saleleng ni lelengna. Nuaeng pe di pesta haheheon na paduahon on dipanghulingi hata ni Debata jota marhite Parpsalmen, na manjou hita ganup asa mandok mauliate tu Debata alani hamuaon na pinaradeNa tu hita. Psalmen on ima sada ende na pasahathon hamauiateon ni roha.

Ende hamauliateon ala haluaon na pinatupa ni Debata do turpuk on. Dibuhai marhite pandohan: “Mandok mauliate ma hamu tu Jahowa, ai pardengganbasa do Ibana, ai ro di salelenglelengna do asi ni rohaNa.” Pandohan i do na gabe panimpuli ni Psalmen on. asa sian bona sahat ro di ujung sada do joujou ni Parpsalmen on, i ma mandok mauliate. Ai so adong agia aha na boi pasahaton ni jolma songon tanda las ni roha siala na pinatupaNa i. Hata mauliate ndada holan pandohan, alai na ruar sian panandaon na tangkas di hametmeton, hagaleon, hahurangan di adopan ni Debata. Molo sian dirina, ndang adong na boi bahenon ni jolma, alai diondihon Debata do jolma i asa taruli haluaon dohot hatuaon. Jala hombar tu turpuk on adong pigapiga sidalian mandok mauliate.

Parjolo, manghamauliatehon Debata pardengganbasa siala haluaon naung sahat tu hita holan marhite Jesus Kristus. Tung aha ma nian jolma i diadopan ni Debata molo sian hadirionna sandiri. Pardosa do jolma i, sai holan na mangalaosi patik dohot uhumNa. Nang pe adong tajaha taringot tu hadirion ni Debata parrimas jala mangaluluhon dosa sahat tu sundut patoluhon dohot paopathon, alai ndang manongtong Ibana muruk. Ai andul umbalga do holongNa sian murukNa. Alai boi do ndang tahilala dengganbasa ni Debata di ngolunta. Boasa? Godang do jolma dung taruli pasupasu, godang sinamot, mura mangalului pandaraman jala jumpang na jinalahan dohot dapot na niluluanna gabe lupa dengganbasa ni Debata. Dirajumi do na adong di dirina parbue ni hatauonna sandiri. Apala on do parungkilon na umbalga manang pangunjunan na umbolon. Uju so dapot ni jolma angka na sinangkapan ni rohana, sai mangalului do tu Debata, hape dung dapotna gabe jotjot manundalhon Debata.

Paduahon, ro di salelenglelengna do asi ni roha ni Debata. Ndang sahali, satongkin, manang sangombas Ibana marasi ni roha. Nang pe jotjot tabahen arsak ni Debata, talaosi patik dohot uhumNa, taula na maralo tu lomo ni rohaNa, hot do ianggo asi ni rohaNa. Sian ayat 1-3 taida do sadihari hita diondihon Ibana. Molo tajaha ayat 2, ra dohononta do godang dope angka donganta na marlaok haporseaonna. Kristen do nian nasida, ro do tu gareja laho marminggu, rap partangiangan di tonga ni huta. Martangiang do nasida, alai ndang gabe mago panungkunonna tu angka na malo ni tano on. sai adong dope na mardebata sileban uju sungkot pingkiranna ala na masa di parngoluona.

Patoluhon, Debata mangatasi saluhut. Gogo ni Debata mangatasi nasa huaso na adong di tano on. Diondihon hagogoonNa i do ganup jolma na porsea di Ibana. Adong do na maniop huaso di portibi on. Boi do unduk jolma tu sitiop huaso i, alai di toru ni Debata do luhut parhuaso ni portibi on. Mamungka sian ayat 4-10 dipaandar Parpsalmen i do pambahenan ni Debata na patuduhon asi ni rohaNa na manongtong. Dipajojor do luhut na binahen ni Debata sian panompaon sahat tu haluaon ni bangso Israel sian tano parhatobanon Misir. Luhut dipatupa Ibana songon hapataran ni asi ni rohaNa. Sude pambahenan ni Debata dirajumi do halongangan. Lapatanna, ndang mura antusan pambahenan ni Debata molo mangasahon parbinotoan dohot habisuhon. Ndang siat utoktuok jala ndang tolap mangalapati pambahenan ni Debata. Molo tasulingkit pardalanan ni ngolunta, ra godang na boi dohononta taringot tu halongangan naung hea masa di parngoluanta. Termasuk ma haheheon ni Tuhan Jesus Kristus sian na mate na manaluhon sorop ni hamatean.

Di pesta paduahon parningotan ari haheheon ni Tuhan Jesus sadari on dijou turpuk jamita on do hita laho mananda pambahenan ni Debata. Haheheon ni Jesus Kristus sian na mate i do dalan hangoluan di hita. Alani tama ma hita mandok mauliate ala diparar do hita mulak tu hangoluan, munsat sian hamatean. Mulak mangolu Jesus Kristus i ala hehe sian na mate, on ma panompaon na paduahon di hita. Nunga imbaru hita dibagasan Jesus Kristus siala hamonanganNa i. Aut so hehe Jesus Kritus sian na mate, ndang adong agia aha na boi mamboan hita manjanghon hangoluaon na so ra suda i. Alani rap dohot Parpsalmen on tadok ma mauliate tu Ibana, ai pardengganbasa do Ibana jala ro di salelenglelengna do asi ni rohaNa. Sahali do hita ditobus Jesus Kristus, alai hot do panobusionNa i di hita. Nunga malua hita sian hamagoan dohot haholomon ai nunga dipahot Debata di hita haluaon na manongtong i. Ndang diburai be hita siala ni dosanta. Nunga ias hita diburi Jesus Kristus di hau pinarsilang jala sian haheheonNa i do taida haimbaruon ni ngolu rap dohot Debata. Nuaeng mansai ringkot do barita haheheon on di hita. Jotjot do jolma lupa di barita naung hea dibege. Adong do na lupa ala godang manutup pingkiranna dohot manompol panatapanna. Lupa ala ndang diharingkothon barita na binegena. Lupa ala dietong ndang marlapatan i tu dirina na masa i. Alani i do ringkot dipaingot hita hita di angka naung tahalupahon. Barita haheheon ni Jesus Kristus on pe ingkon do sai ingot di parngoluanta ala sian barita i do taruli haluaon hita. Alani tahangoluhon ma hangoluan na pinatupa ni Jesus Kristus i di ngolunta siganup ari. Ganup tingki hita mandok mauliate tu Debata jala lam tatanda ma dirinta di adopanNa i. Amen.