Khotbah Mazmur 106: 1-5 Hidup dalam Kasih Setia Tuhan

 Minggu Misericordias Domini, 18 April 2021

106:1 Haleluya! Bersyukurlah kepada TUHAN, sebab Ia baik! Bahwasanya untuk selama-lamanya kasih setia-Nya.

106:2 Siapakah yang dapat memberitahukan keperkasaan TUHAN, memperdengarkan segala pujian kepada-Nya?

106:3 Berbahagialah orang-orang yang berpegang pada hukum, yang melakukan keadilan di segala waktu!

106:4 Ingatlah aku, ya TUHAN, demi kemurahan terhadap umat-Mu, perhatikanlah aku, demi keselamatan dari pada-Mu,

106:5 supaya aku melihat kebaikan pada orang-orang pilihan-Mu, supaya aku bersukacita dalam sukacita umat-Mu, dan supaya aku bermegah bersama-sama milik-Mu sendiri.

Psalmen 106 on, sada sian Psalmen pujipujian (Mazmur pujian) na mangarahon bangso ni Debata asa ro mamuji Jahowa dohot mandok mauliate tu Ibana, ala nang pe marulakulak bangso i marngarsahi Tuhan i, alai ndang gabe ditadinghon manang dihalupahon Tuhan Debata nasida. Baliksa, sai dianju do bangsoNa, sai dijangkon do molo ro nasida mulak manolsoli dosana tu Debata. Alani i jotjot do didok tu hita asa mandok mauliate tu Debata, jala nunga tung godang begeonta hata i  sian jamita. Alai roha nang pikiranta mansai maol mandok mauliate tu Debata, apalagi molo dibagasan sitaonon/kesusahan hita. Na tung asi roha marnida dihaporseaonta molo nunga ro pangunjunan, ditingki i do hita godang mangido pangurupion sian Debata, alai molo nunga tajalo pangurupion sian Debata, las ditingki i muse ma hita maol lao mandok mauliate tu Debata. Jala sipata molo tung pe tadok mauliate tu Debata holan dihata sambing na ma i, ndang dibagasan haporseaonta na tulus dohot las ni roha situhu be i. Alani marhite turpuk sadarion dohot topik na mandok “mangolu dibagasan asi ni roha Debata” lam ta pujima Debata di bahen asi ni rohaNa na manontong ro di saleleng ni lelengna i .

Dibuhai do turpuk on marhite pujipujian marningot hasangapon ni Debata, jala tarida do i di sude pardalanan ni bangso Israek. Nang pe jotjot nasida tumadingkon Debata, jala mangalupahon nasa na uli na denggan naung jinalo nasida sian Ibana. Alai tongtong do mulak roha ni Debata maradophon nasida. Alani rumang ni turpuk on i ma ende hamauliateon di las ni roha ala jumpang ni bangso i asi ni roha ni Debata atik pe tongon mangadopi rimas ni Jahowa. Dia do alana umbahen sai tongtong dipatuduhon Tuhan Debata asi ni rohaNa maradophon bangsoNa Israel? Alus na boi dapot hita, ndada sian diri ni bangsoNa i, “isarana ala ni habalgaon manang ala ni hajagoon ni bangso Israel (Ndang na gabe rugi Tuhan i molo pe diripashon Ibana bangsoNa na tangkang i)”. Alai tung ala ni hadirion ni Tuhan Debata na basa jalan na gok asi roha i do na mambahen tongtong asi roha ni Debata i to bangsoNa. Ai Debata parasi roha do Ibana jala ro di salelengnilelengna do asi ni rohaNa. Marningot hadirion ni Tuhan Debata na songon i ma, umbahen tama saluhut bangso i mulak tu Debata jala gabe pangoloi di hataNa. I do na dihatindangkon si par-Psalmen i di ay.3: hatuaon do jaloon ni bangso i molo diradoti nasida uhum ni Debata jala mangolu di bagasan hatigoran. Nang pe pandohan namarrumang panindangion i, alai laos pandohan na manjou bangso i do i asa mulak tu Tuhan Debata na basa jala parasi roha salelenglelengna i, jala mulak mangaradoti uhum dohot hatigoranNa. Jala ndang tarsirang pamujion i sian pangoloion di uhum dohot na patupahon hatigoran. Jala ndang tarpatupa hita patupa hatigoran dohot mangoloi uhum, molo so binsar sian pamujion ni roha maradophon Debata.

Dihalomohon Debata do asa hita manghaporseai Ibana, unduk jala marsomba diadopanNa, dohot mandok mauliate disude pasupasu na marragam i. Alai molo baliksa do nataulahon, patubuhon uhum dohot rimas ni Debata do i tu hita. Alai nang pe songon i, umbalga do asi ni roha dohot holong ni Debata sian rimasNa. Boasa didokkon songon i, ala diuhum Debata pe angka jolma na mardosa, asa mangolu dibagasan hamubaon ni roha do. Ala manang aha pe na dilehon Tuhan i, sasintongna denggan do saluhut na i, nang pe tarida songon na mansai maol jala loha hita laho mandalani, “saluhutna silehonlehon na denggan, nasa ulibasa na mauliutus, I ma na ro sian ginjang, sian Ama ni na tiur, na so olo muba..(Jak.1:17)”. Ala ni i di sude angka na masa tarlumobi molo ro pe hasuhaan i, pantas do hita mandok mauliate diadopan Debata, sian haporseaon na bagas boi dohononta “Halleluya mandok mauliate ma di Jahowa, ai na basa di Ibana, ai ro di salelenglelengna di asi ni rohaNa i (a. 1)”. Ala satia do Tuhan i manghaholongi hita. Mangolu pe hita nuaeng binahen ni holong ni rohaNa do. Ra molo ta bilangi angka pambahenanta na humurang di adopan ni Tuhan i, angka pangalaosionta di hataNa, marhite hata dohot pambahenanta nang tubutubu ni rohanta na roa i, tontu nunga tama tarrimas Ibana mida hita. Aut sura dibaloshon Tuhan i tu hita hombar tu angka pambahenanta, tontu ndang tarbahen mangolu hita sahat tu tingki on. ala ni i sai marulak-ulak dipasingot Debata hita marhite hataNa na dipasahat panurirang nang angka siseanNa asa mandok mmauliate hita di sude asi ni rohaNa tu hita ala mangolu dibagasan asi ni rohaNa do hita “ mandok mauliate ma hamu siala saluhutna! Ai i do dipangido Debata sian hamu marhitehite Jesus Kristus (1 Tes.5:18)”.

Molo tahaporseai do hasation ni Debata na tongtong manghaholongi hita, jala ndang manimbil sian padanNa, antong mandok mauliate ma tu Debata saonari sogot haduan ro di salelenglelengna. Debata manghaholongi hita lobi sian nasa saluhut na tinompaNa. Marningot i ma, tama hatindanghononta: pardenggan basa do Jahowa, jala ro di salelenglelengna do asi ni rohaNa. Jala ingkon pujipujion ni rohanta Ibana saleleng hita mangolu. Ingkon manongtong pamujionta di Tuhan i, di tingki las ni roha nang di arsak ni roha pe. Jala ingkon sai lehononta do tingki dohot rohanta marningot, mamilangmilangi pambahenan ni Tuhan i tu hita be. Ala nunga dihaholongi Tuhan i hita jala holong ni roha salelenglelengna dibahen manghaholongi hita. Songon i ma hita tama ingkon mangolu dibagasan holong ni roha maradophon saluhut donganta. “hamu angka haholongan, anggo songon i holong ni roha ni Debata di hita, tama ma nang hita marsihaholongan! (Joh.4:11)”.

Bangso Israel na pinillit ni Debata, ndang gabe bangso na eksklusif (manghilala holan nasida bangso na hinaholongan ni Debata), alai gabe banso tiruan ma nasida, paboa na ingkon mangolu dibagasan asi dohot holongNa na sun badia i, patudu oamujion di Ibana marhite angka parulaon siganup ari. Suang songon i nang hita, dipartutu rohanta jala tahatindanghon do, holong ni roha ni Tuhan i do na pangoluhon hita. Jala dihalomohon Tuhan i, ingkon sude jolma mananda holong ni rohaNa i. Asa hita angka naung taruli di asi ni roha ni Tuhan i, tama ingkon manghangoluhon asi ni roha si songon i maradophon saluhut donganta. Sada hataridaan ni holong ni rohanta di dongan i ma na mangurupi angka donganta, asa parsidohot mananda jala marsaulihon asi ni roha ni Tuhan i. ala sude na masa di tonga-tonga ni portibi on, na tahilala diparngoluonta sude na i holan mangasahon asi ni roha ni Debata sambing do, alani mandok mauliate ma hita tu Debata. Marhitehite na ringgas hita ro tu Ibana marhite tangiang, di parmingguon dohot di sude pangkataionta nang pambahenonta, asa mangolu ma hita dibagasan asi ni roha ni Debata i. Amin