Khotbah Mazmur 150: 1-6 Segala yang Bernafas Memuji Tuhan

 Minggu Kantante, 2 Mei 2021

150:1 Haleluya! Pujilah Allah dalam tempat kudus-Nya! Pujilah Dia dalam cakrawala-Nya yang kuat!

150:2 Pujilah Dia karena segala keperkasaan-Nya, pujilah Dia sesuai dengan kebesaran-Nya yang hebat!

150:3 Pujilah Dia dengan tiupan sangkakala, pujilah Dia dengan gambus dan kecapi!

150:4 Pujilah Dia dengan rebana dan tari-tarian, pujilah Dia dengan permainan kecapi dan seruling!

150:5 Pujilah Dia dengan ceracap yang berdenting, pujilah Dia dengan ceracap yang berdentang!

150:6 Biarlah segala yang bernafas memuji TUHAN! Haleluya!

Somalna molo tapuji sasahalak ala taboti na binahenna mansai uli. Tudos tusi do mamuji Debata. Tapuji Ibana ala mansai uli luhut na tinompaNa. Mansai lomo do roha marnida pambahenan nauli i. Mamuji Debata ndada holan hata alai sian nasa roha manghaholongi pambahenanNa. Alani mamuji Debata huhut do patuduhon hadomuanta dohot Ibana. Psalmen 150 on ima jou jou mamuji Tuhan i. Disungguli par-Psalmen on bangso Israel mamuji Tuhan i di inganan habadiaonna i. Boi do pandohan habadiaonna i manudu tu bagas joro di Jerusalem, manang boi do manudu surgo hasonangan i. Psalmen on paingothon, ia ngolu on i ma ombas mamuji Tuhan i. Soara, panghataion, ulaon dohot sude panggulmiton ni ngolu pangkeon laho mamuji Tuhan i. Dilehon Tuhan i ngolu tu jolma, asa marhite i dipuji Debata Sitompa portibi on. Mamuji Tuhan i, i ma parbue ni panandaon na Debata do silehon ngolu, Debata do mangaramoti, Debata do mangurupi hita di ngolunta.

Songon dia do hita mamuji Debata? Mamuji Debata ndada holan marhite soara alai dohot do angka uninguningan rap mangendehon habalgaon ni Debata. Dia ma goar ni uninguningan i? Sarune, arbab, sordam, tali sajaka, ogung panggora, ogung panonggahi. I ma na somal dipangke mangendehon hasangapon ni Debata. Tapuji Ibana ala pambahenanNa na manarihon dohot mangaramoti nolunta. Di ayat 1 dipatuduhon Parpsalmen on parsitutuonna mamuji Jahowa. Didok pujionku ma Jahowa sian nasa roha. Pandohan sian nasa roha patuduhon na nionjar pos ni roha ibana mamuji Debata, ndang giot manang gere, ndang formalitas alai marsitutu jala gok las ni roha ibana marolopolop mamuji Tuhan i. Tama do halak Kristen dibagasan parsitutuon mamuji Debata di kebaktian. Molo pinamanat angka na ro tu punguan, di jabu manang di gareja, sai adong do na so sian rohana na marpungu i, ndang diboan buku endena, ndang marende, adong na manghatahatai, adong na maondok-ondok. Molo tingkina jongjong adong na sai hundul. Asing ni na mamuji Debata di ganup angka parpunguan na pinatupa ni huria dohot angka punguanpunguan, tama situtu ingkon pasangaponta Tuhan i dibagasan parngoluanta di angka ulaonta siganup ari. Asa ingkon saurdot do pamujion na ruar sian pamangan dohot pambahenan manang parniulaon siganup ari.

Digoari Parpsalmen on do angka na mangonjar ibana mamuji Jahowa. Parjolo, ala halongangan na binaenNa, na pahiangkon laut Rara dohot mangalingkuphon parangan ni raja Parao, gabe boi bangso Israel mamolus laut i. Paduahon, ala pardenggan basa Ibana jala parasi roha, na marmudumudu bangso Israel di parhorsihan Sinai jala sai manganju hatangkangon ni bangso i. Patoluhon, ala disarihon parngoluan siapari ni bangsoNa. Paopathon, ala ditaluhon musu ni bangso i. Marhite jamita on disungguli rohanta mamilang-milangi pambahenan ni Jahowa. Diparmudu-mudu hita, dipatongon hita tu jampalan na lomak. Lumobi sian i dope dilehon tu hita, marhite hamonanganna maradophon hamatean manghirim hita dihaheon sogot. I do na mangonjar hita marende mamuji Tuhan i.

Dung dirimang-rimangi Parpsalmen on hagaleon dohot balga ni pambahenan, pangurupion ni Debata di ngoluna, alani ma didok, puji hamu ma ibana ala hagogoonNa angka na sumurung i. Puji hamu ma Ibana hombar tu hinagodang ni hatimbulonNa i. Dihatindangkon parpsalmen on, dipatupa Debata do tanda halongangan di portibi on laho papatarhon huaso dohot hagogoonNa. Dipatupa Debata do tanda halongangan mangurupi na porsea i huhut laho papatarhon hagogoonNa tu na porsea asa unang ganggu manghaposi Ibana. Loja do jolma mangalului na hot, na manontong di ngoluna. Na manontong di ngolu pardagingon dohot di ngolu partondion. Loja mangula jolma anggiat hot, manontong las ni rohana, jala hot na pineopna. Muramura jolma menggol dihaporseaonna ala so ditanda Jahowa do Tuhan na hot, na so olo muba, jala manongtong. Diturpuk on dihatindangkon Parpsalmen on na holan Debata do na hot, na manontong ro di saleleng-lelengna. Jumpang hatongtongon di jolma molo biar tu Debata. Mabiar tu Debata lapatanna mangunsande tu asi ni rohaNa jala marpos ni roha tu Ibana.

Marragam rumang ni parngoluan na tabolus, parngoluan na tonggi dohot na paet. Boi do parngoluon na paet i mambahen mabiar hita. Roha biar i patuduhon hagaleonta. Ala ni biarta mangadopi parungkilon i jotjot songon na mamaksa hita tu Debata, asa dibahen na hombar tu hagiotta, manang tapaksa Debata asa hatop mangurupi hita, hape parungkilon i boi do ala hagaleonta. Ndang jolo tasungkun Tuhan i, ndang jolo tapangido panuturionNa. Jala molo adong las ni roha, ingkon parhatopotonta do, ndada ala gogonta i, ai na gale do hita. Na dipargogoi Tuhan i do hita umbahen boi marlas ni roha. Na dipasupasu Tuhan i do na taula umbahen marhasil ulaonta, ndada ala pambahenanta. Molo las pe rohanta ingkon ingotonta do, ndang adong hatauonta mambahen las rohanta ala pardosa godang do hita. Boi do lomos hita na mangolu on ala godang tabolus na hansit. Alai molo taingot pandonganion ni Debata di hita, ndang ringkot di hita mabiar. Ditogu-togu Debata do hita mamolus parngoluanta, marhite dalan na maol, dalan na tigor, asa lam pos rohanta di Ibana. Ibana na marmudumudu, na marmahan, na mangiringiring dohot mamasumasu ngolunta. Saleleng so adong pangarajumion ni sasahalak di ngoluna taringot tu pambahenan ni Debata matua andigan ndang adong pamujion haruar sian dirinan. Alani molo tabolus dalan na maol na padungohon hita do i asa sai marsigantung tu Jesus. Alani pos ma rohanta na donganan ni Jesus do hita. Antong tahamauliatehon ma pambahenanNa i.

Alus tu pambahenan ni Debata do pamujion i, ndang asa dilehon manang dipasahat Ibana na ringkot di jolma umbahen dipuji. Molo tarimangrimangi pardalanan ni ngolunta naung tabolus, ra godang do na so siat tu pingkiran angka na masa na taadopi. Godang halongangan na tajalo sian Ibana. Luhutna i patuduhon hadirionta na so tuk patupa na ringkot di parngoluanta. Ingkon rap dohot Debata do hita mangadopi angka na masa. Minggunta sadarion digoari Kantante, marlapatan endehon ma di Jahowa sada ende na imbaru. Ende na imbaru ndang holan ala na imbaru disurat manang digubah. Boi do sude ende na imbaru molo diendehon sian roha dohot tondi na imbaru. Jala boi do ende na imbaru ndang imbaru begeon molo sian roha na so imbaru mangendehonsa. Ende na imbaru na nidok ni Parpsalmen i ma ende na patuduhon haimbaruon ni ngolu di adopn ni Debata. Topik ni minggunta sadari on, sude na marhosa mamuji Tuhan manjou hita mangarahon dongan asa tongtong tubu pamujion sian ngoluna tu Debata. Tapabotohon ma tu donganta, asa unang lupa mamuji dohot pasangaphon Debata, gariada molo boi ajaranta do donganta laho mamuji Debata. Tapasangap ma Debata marhite angka naung tajalo, taparsaulihon sian Ibana. Sude ngolunta on ingkon tau pujipujian di Debata. Amen.