Khotbah Lukas 24: 44-53 Menjadi Saksi Kristus

 Kenaikan Tuhan Yesus, Kamis; 13 Mei 2021

24:44 Ia berkata kepada mereka: "Inilah perkataan-Ku, yang telah Kukatakan kepadamu ketika Aku masih bersama-sama dengan kamu, yakni bahwa harus digenapi semua yang ada tertulis tentang Aku dalam kitab Taurat Musa dan kitab nabi-nabi dan kitab Mazmur."

24:45 Lalu Ia membuka pikiran mereka, sehingga mereka mengerti Kitab Suci.

24:46 Kata-Nya kepada mereka: "Ada tertulis demikian: Mesias harus menderita dan bangkit dari antara orang mati pada hari yang ketiga,

24:47 dan lagi: dalam nama-Nya berita tentang pertobatan dan pengampunan dosa harus disampaikan kepada segala bangsa, mulai dari Yerusalem.

24:48 Kamu adalah saksi dari semuanya ini.

24:49 Dan Aku akan mengirim kepadamu apa yang dijanjikan Bapa-Ku. Tetapi kamu harus tinggal di dalam kota ini sampai kamu diperlengkapi dengan kekuasaan dari tempat tinggi."

24:50 Lalu Yesus membawa mereka ke luar kota sampai dekat Betania. Di situ Ia mengangkat tangan-Nya dan memberkati mereka.

24:51 Dan ketika Ia sedang memberkati mereka, Ia berpisah dari mereka dan terangkat ke sorga.

24:52 Mereka sujud menyembah kepada-Nya, lalu mereka pulang ke Yerusalem dengan sangat bersukacita.

24:53 Mereka senantiasa berada di dalam Bait Allah dan memuliakan Allah.

Somalna mansai lungun do panghilaan molo marsirang dohot na hinaholongan. Molo borhat sada ianakhon na dihaholongi tu pangarantoan, tontu parjolo sahali lungun situtu do panghilalaan ni natorasna. Tarlumobi molo marsirang ala disirang ni hamatean na tahaholongi tontu mansai lungun situtu do panghilalaanta. Boi do tadok songon i do lungun ni angka sisean ni Jesus dohot na sai tongtong mangihuthon Jesus uju di portibi on dope Ibana. Alai sasintongna taringot tu hananaek ni Jesus Kristus tu surgo, ndang na laho manadinghon angka siseanNa manang angka na mangihuthon Ibana. Alai hananaek ni Tuhan Jesus i ma sada ulaon na ingkon masa di Ibana songon naung disangkapi Jahowa. Parsirangan dohot siseanNa i ma parsirangan na manghirim las ni roha, ai na ro do Ibana muse mangalap na porsea i. Asa hananaekNa tu banua ginjang maninggalhon siseanNa mangalehon panghirimon na imbaru di angka na porsea di Ibana. andorang so sahat tusi, ditonahon tu siseanNa laho mamaritahon hamonanganNa i tu sandok portibi on. Mangauhon tona i do lapatanan ni parpunguanta di Parningotan Hananaek ni Tuhan Jesus. Alani do jamita pasahat impola na mansai ringkot tioponta di ngolunta on.

Pamilliton ni Tuhan Jesus di angka siseanNa ndada pamilliton na so martujuan. Dijou jala dipillit nasida gabe siseanNa, na naneng suruonNa do laho manguduti ulaon na pinungkaNa. Dung hehe Tuhanta sian na mate, ndang apala songon na somal be parsaoranNa dohot angka siseanNa. Dibagasan 40 ari dung hehe Ibana, holan 10 hali nari nama rap Ibana dohot angka siseanNa i. Jala di ari hananaekNa on ma parpudi rap Jesus dohot nasida. Laho marnida hananaekNa i holan angka sisean i do ditogihon Jesus nasida ruar tungkan Betania. Ndang sian angka na sangap ni bangso i marnida hananaekNa i, ndang pola ringkot di roha ni Tuhanta naeng songon na mandemontrasihon hananaekNa i, sae ma holan barita sian angka sisean i dihaporseai angka na olo porsea di Tuhan Jesus Kristus i na gabe sihangoluhononna be. Di na naneng manaek Tuhan Jesus tu banua ginjang, dipasahat ulaon i tu angka siseanNa, dipaborhat angka siseanna na jinouNa i laho manguduti ulaonNa. Asa rarat haporseaon di Jesus, manang asa sude jolma mulak marsomba tu Tuhan na marsuru Jesus i, ringkot adong pangula, parhobas na pararathon Hata i. Alani do umbahen disuru Tuhan Jesus siseanNa laho pararathon Harajaon ni Debata di portibi on. I do na ginoaran Ulaon Sending. Asa boi nasida mangulahon parenta i, parjolo dibungka i ma rohanasida asa diantusi nasida aha do na laho sibaritahonon ni nasida (ay. 45). Dipapos roha nasida marhite na manghaposi Huaso ni Tuhan Jesus. Ndang tau jolma ianggo sian dirina pararathon barita na uli i, ingkon na disuru Debata do jala na dibungka Debata do rohanta asa tau sada halak mangulahon i. Alani molo tung manjadi pe ulaon i, Debata na marsuru i do sipujion ndang gabe jolma siboan barita i. saleleng so dibungka Tuhanta roha ni jolma i, maol do roha ni jolma i mangantusi isi ni Bibel i.

Dung simpul nasida dipodai Tuhan Jesus, dipasupasu ma nasida asa margogo jala dapotan bisuk sian Debata asa unang be ganggu dohot mabiar nasida laho mararita na uli. Tangkas do nasida manghatindangkon hananaek ni Tuhan Jesus tu banua ginjang paboa tutu do Ibana hehe sian na mate jala hundul tu siamun ni Ama i. Lapatanna barita hananaek ni Tuhan Jesus i ndang barita gabus manang molo istilah nuaeng ndang barita hoax, alai situtu do. I do umbahen asa di adopan ni sisean i Ibana borhat tu banua ginjang. Asa tangkas dibereng mata nasida na masa i. Disiala ni i laos disomba nasida ma Ibana jala mulak tu huta Jerusalem, marlas ni roha situtu (ay. 51). Ndang lungun be rohanasida di parborhat ni Tuhan Jesus tu banua ginjang, sabalikna las ni roha do. Jala ingkon taparhatopot do sasintongna hananaek ni Tuhan Jesus mamboan las ni roha na sian Debata tu hita jolma. Ndang dao Tuhan Jesus sian ngolunta, atik pe borhat Ibana tu banua ginjang. Tongtong do Ibana rap dohot angka na porsea marhite Tondi Parbadia na margogoihon hita  jala manaek pe Jesus tu banua ginjang laho parade inganan di na porsea i. Marhite i di paingot hita asa unang lohot rohanta di portibi on, surgo i do sambulonta. Parningotan hananaek ni Tuhan Jesus paingothon hita asa ta pajonok tu Jesus. Pajonok diri tu Jesus marlapatan, unang lohot rohanta di portibi on, surgo i do sambulonta. Molo diloas Tuhan  pe hita mangolu di portibi on asa tapangke do ngolu napinasahat na gabe sitindangi Tuhan Jesus.

Sude do halak Kristen disuru gabe sitindangi laho pararathon barita na uli i. Alani ingkon lam ringgas do hita manangianghon dohot manumpahi ulaon sending. Pararathon barita na uli i tudos do i tu batu na nidanggurhon tu aek, tu tao na mambahen godang galumbang na marhaloho di aek i. Dimulana metmet do riak ni aek i dung i lam bidang. Songon i do ulaon sending, pungkaon mamaritahon barita na uli i parjolo sian jabu, dung i di huta manang luat, sian i mangalangka tu lingkungan na umbidang, sahat tu sandok portibi on. Diulahon mamaritahon barita na uli i, ingkon tangkas dipatuduhon parngoluan ni sipamodai i tiruan na denggan, asa mangula poda i di roha na umbegesa. Diboto Tuhan Jesus do godang ni hamaolon siadopan ni sisean i laho mangulahon tona i, alani do umbahen dipaboa hian tu nasida, jaloon nasida do Tondi Parbadia na margogoihon nasida di ulaon i. Na marlapatan ma i na tongtong do didongani Tuhan Jesus nasida nang hita, ndang dipasombu Ibana punjung angka sisean nang hita angka na porsea songon na nidokNa di Mateus 28: 20: Sai na donganangku do hamu ganup ari rasi rasa ro ajal ni hasiangan on. Ndang na mura ulaon ni angka sisean i. Hagogoon dohot huaso na sian ginjang i do na margogoihon na sinuru i di ulaon i, ndada hadirion dohot hamaloon ni sisean i. Ndang jadi ganggu, mabiar manang mandele anga na sinuru i nang pe godang hamaolon. Molo godang pe angka na mambahe hita mabiar, ndang jadi paubaon manang pahombarhombaron Hata i tu hagiot ni portibi on. Asa dao ganggu dohot biar ni roha, taingot ma Jahowa do Raja (Psalmen 96 : 10). Amen.