Khotbah Mazmur 1: 1-6 Kebahagiaan Orang Benar

 Minggu Exaudi; 16 Mei 2021

1:1 Berbahagialah orang yang tidak berjalan menurut nasihat orang fasik, yang tidak berdiri di jalan orang berdosa, dan yang tidak duduk dalam kumpulan pencemooh,

1:2 tetapi yang kesukaannya ialah Taurat TUHAN, dan yang merenungkan Taurat itu siang dan malam.

1:3 Ia seperti pohon, yang ditanam di tepi aliran air, yang menghasilkan buahnya pada musimnya, dan yang tidak layu daunnya; apa saja yang diperbuatnya berhasil.

1:4 Bukan demikian orang fasik: mereka seperti sekam yang ditiupkan angin.

1:5 Sebab itu orang fasik tidak akan tahan dalam penghakiman, begitu pula orang berdosa dalam perkumpulan orang benar;

1:6 sebab TUHAN mengenal jalan orang benar, tetapi jalan orang fasik menuju kebinasaan.

Torop halak manghirim di ngolu na tigor, ido umbahen adong jumpanganta halak na margoar si Tigor nang adong do tong na margoar si burju. Di roha ni naumbahen goar i asa tutu gabe anak na burju jala tigor di ragam ni dalan ni ngoluna. Anggiat sahat ma ngoluna di ngolu na martua, songon ngolu na hinirim ni jolma na di portibi on lumobi di halak batak na mansai ondol jala hirim di ngolu na martua ima ngolu na sari matua nang di saur matua. Adong muse nadeba, na digoari halak na martua ima halak na dapotan di angka pangomoan, ima marhitehite angka na niula ni tangan, angka pinompar dohot lan angka na asing na hombar tusi. Alai marimbar do pangantusion taringot tu ngolu na martua di turpuk on, Dia ma i?  

Dimasa ni par-Psalmen on ragam angka pangalaho nang angka prinsip ni ngolu ni nasida be, na tontu sahali mangingona di praktek sosial ni nasida. Tangkas adong dua parngoluon na pinatuduna marhite turpuk on ima ngolu ni partigor dohot ngolu ni angka pardosa, na pinadomu di parsaoran siganupari. Ido pola umbahen na dipasahat par Psalmen on tu sude angka halak partigor asa unang tarihutihut ala tangkas dipangantusion na, angka halak pardosa inghon manean dirimas ni Debata, asa marhite i, jamot ma nasida di ngoluna. Ap. Paulus di Roma 4:7 didok “halak na martua ima halak na disesa dosana”. Di sejarah ni angka halak na porsea mandok angka halak na martua ima “nasida na manontong patuduhon las ni roha (bersukacita) tung pe dibagasan arsak, ala ido tanda ni nasida”. Marhitehite Psalmen on didok ma angka jolma sisongoni jolma partigor. Jolma partigor ima halak na manontong marolopolop, marlasni roha tung dia pe na masa di ngoluna, jala ima halak na martua. Tumangkas taida sian turpuk on:

1.      Pasu-pasu ni Debata tu dalan ni ngolu ni halak partigor (Ay.1-3)

“Martua ma halak na so olo mangihuthon parjahat, na so olo jongjong tu dalan ni angka pardosa, na so olo sahundulan dohot angka pangarehei, alai sai manghalomohon patik ni Jahowa”. Tutu situtu manghangoluhon lomo ni rohani Debata, ndang sipardohot mangihuthon dalan ni parjahat jala mandao manang paholang diri sian hadirion dohot ngolu ni dosa i. Sian hata “Na so olo jongjong di dalan ni angka pardosa” patuduhon parasingan ni “na jongjong” dohot “inganan parjongjongan i”. Na jongjong manang hundul ima subjek jala inganan parjongjongani manang hundulan i ima objek, lapatanna di parnampunahon dosa i do hajongjonganna manang hundulan na sandiri, sisada hajongjongan dohot hundulan ibana mamulik sian hajongjongan dohot hundulan ni hatigoran, marasing situtu pangalahona, pambahenanna, nang na niaduna. Pangarehei ima gombaran ni halak na mian dibagasan haginjangon ni roha, na naung maol manjalo poda dohot angka pangajarion hasintongan. Sialani ido inghon jamot halak partigor asa unang saor tu bagasan dosa na boi patubu hagiot ni roha, sialani i ndang tama halak partigor jongjong dompak i. Tung mansai gogo do panait ni dosa i asa madabu hita tubagasan ibana, alani i molo monang do partigor Ii dao sian hajongjongan ni dosa i, disi ma halak partigor i dapotan tua, ima pasupasu na sian Debata.  Taruli di ngolu na martua ima na so olo mangihuthon, na so olo jongjong, dohot naso olo hundul maradophon nasa dosa dohot pangalaosion maradophon Debata (Lih.Yakobus 1:2-4). Ndang adong nanggo sada pe sian gulmit ni ngolunta na boi bongot tu bagasan hajahaton, tingki mardalan, tingki jongjong nang tingki hundul pe, alai mamangke jala pasahathon ngolunta laho mamuji pasangaphon Debata.

2.      Ngolu jala ujung ngolu ni parjahat (Ay. 4-6)

            Dao andul sian ngolu ni angka parjahat. Pardalanan ni parngoluan ni nasida digombarhon tu tolu horong: 1. Songon orbuk na hinabanghon ni alogo. Orbuk naso adong argana, gogona nang lapatanna (tidak diperhitungkan). Suman tu orbuk na so marurat, na so togu, na mura ullushonon dompak an manang dompak on, na sadihari pe boi ambolonghonon. 2. Ndang Manahan di paruhuman nang  jongjong rap dohot angka partigor. Psalmen 76:8 “Na songkal situtu do Ho, tung ise ma Manahan jongjong di jolo ni bohiM, molo sapala manombo rimasMu?”. Ndang tuk na so margogo mangadopi Mual ni Hagogoon i. Ndang holan parjahat i lonong bahenon ni Jahowa alai dohot do nang dalan ni angka parjahat i. Saluhutna nasida di pasuasehon. 3. Jala na parpudi ima Matua laho lonong do dalan ni angka parjahat. Molo pajumpang dohot uhum ni Debata ndang tarbahensa hehe, jongjong uju marpungu dohot halak partigor roha. Mago do gogo ni halak parjahat di tongatonga ni punguan ni halak na tigor roha. Margogo situtu do Uhum ni Debata, ai Debata sandiri do siramoti hinasintong dohot hinasaut ni UhumNa (ay.6).

Goar ni minggu ta ima minggu Exsaudi na marlapatan “Sai tangihon ma soaranghu ale Jahowa”, na dirahut dohot thema ni minggunta ima “Hatuaon ni angka Partigor”. Na hinirim ni torop halak ima ngolu na martua, jala ido soara pangidoanta tu Debata, jala na tuk mangalehon hatuaon i ima holan Debata. Hot ma hita di ngolu na tigor i tung pe di ragam ni na masa di hita ganup. Molo pe denggan taida ngolu ni angka parjahat i, unang ma gale hita, sai tong ma ingot ndang hot hajongjongan ni, na ura habang do i ullusonon ni alogo. Asa hatuaon na nidok ni turpuk on, i ma hinagok ni las ni roha di bagasan Tuhan i, jala hasonangan surgo i do ba tardok hatuaon na tumimbo sian nasa hatuaon na adong di portibi on. Asa ndada holan di tingki sonang boi hilalahonon na pinasupasu, dohot do nang uju di bagasan sitaonon dohot hamaolon bolas hilalahonon na dipasupasu Debata iba. I ma astuan ni hata na martua, asa andul situtu do sian na talapati di bagasan ngolunta diganup ari.

Molo tapamanat di ari naparpudi on nunga lam martamburak be hajahaton di ula jolma i “Segala cara di halalkan untuk mencapai tujuan” ndang parduli be jolma i di suara manang di uhum ni Debata. Hape tangkas do didok Debata “di tanda Jahowa do dalan ni angka partigor” asa marhite turpuk on tongtong ma hita mangulahon dohot marhaunduhon di Debata sian Ibana do haroroan ni ngolunta jala tapasiding ma angka hajahaton asa gabe pasupasu hita di nahumaliang songon parbue ni hau na di topi ni batang aek. Dipatudos hatuaon ni partigor i suman tu hau, dipasupasu ndada holan di parngoluan si sangombas saonari alai dohot do nang tu parngoluan di angka partingkian na naeng ro. I ma ngolu na manongtong. Suman ni hau na di topi ni batang aek, dilehon bohal na so ra suda, tongtong dibohali mangadopi parhosingan ni angka ari dohot ombas (musim), ndang mansohot haulionna, bulung na pe tongtong lomak, siala sandok ngoluna tongtong diparorot Debata dibagasan nasa Patik dohot habisuhon na sian Debata. Alani ingkon ganup ma nian hita mangulahi mian jala manongtong di bagasan hata ni Debata asa di si ma jumpang hatuaon ni ganup angka na tigor roha. Amen.