Khotbah Yohanes 3: 31-36 Allah Mengutus PutraNya dan Mengaruniakan RohNya

 Minggu Trinitatis; 30 Mei 2021

3:31 Siapa yang datang dari atas adalah di atas semuanya; siapa yang berasal dari bumi, termasuk pada bumi dan berkata-kata dalam bahasa bumi. Siapa yang datang dari sorga adalah di atas semuanya.

3:32 Ia memberi kesaksian tentang apa yang dilihat-Nya dan yang didengar-Nya, tetapi tak seorang pun yang menerima kesaksian-Nya itu.

3:33 Siapa yang menerima kesaksian-Nya itu, ia mengaku, bahwa Allah adalah benar.

3:34 Sebab siapa yang diutus Allah, Dialah yang menyampaikan firman Allah, karena Allah mengaruniakan Roh-Nya dengan tidak terbatas.

3:35 Bapa mengasihi Anak dan telah menyerahkan segala sesuatu kepada-Nya.

3:36 Barangsiapa percaya kepada Anak, ia beroleh hidup yang kekal, tetapi barangsiapa tidak taat kepada Anak, ia tidak akan melihat hidup, melainkan murka Allah tetap ada di atasnya."

 Dibagasan turpuk on dipatudu si Johannes Pandidi do taringot tu hadirion ni Jesus na sasintongna. Jesus na tuat sian Banua Ginjang, Jesus na olo marsoadahon diriNa, jala na olo tubu marhite hatutubu ni sahalak dakdanak na somal. Rade do Debata marsoadahon haDebataonNa asa boi Ibana marsaor huhut manogu jolma i asa unang mate di dosana, asa unang manguhumi jolma Ibana. Tung disangkapi Debata do asa saluhut portibi on dohot na manggulmit dibagasanna manontong dipature tu na dumenggan, dipaulak hadirion jolma i asa marningot jala mananda na manompa huhut na mangalehon saluhut na adong di jolma i. disangkapi Debata do huhut asa malua jolma i sian pambebeonna, malua sian hinahasit ni sitaonna na masa tu dirina di panosak ni portibi on. Ala ni i ma, disuru Debata ma AnakNa laho paluaon hita, jala TondiNa laho mangurupi hita mangulahon lomo ni rohaNa.

Panindangion on dipasahat si Johannes Pandidi marbonsir do sian hata na pinasahat ni angka sisean ni si Johannes Pandidi tu ibana. Ai tongon do rap manghobasi Jesus dohot siseanNa, suang songon i nang si Johannes Pandidi dohot siseanna. Alai marsual ma sisean ni si Johannes Pandidi dohot sahalak Jahudi gabe didapothon nasida ma si Johannes Pandidi (ay. 25-26). Alai manang beha pe hata nasida jala manang alani aha pe dipasahat nasida alualu i tu si Johannes Pandidi, dibahen si Johannes pandidi do i gabe dalan patoranghon hadirion ni Jesus. Di son ma patar tarida hajongjongan ni si Johannes Pandidi songon naposo haposan di jolo ni Debata. Na boi hian do nian Ibana patujolo dirina dijolo ni natorop, ai nunga jumolo nasida mananda ibana. Tangkas do dipatorang ibana dirina (ay. 28). Ndang habalgaonna dilului si Johannes Pandidi, alai habalgaon ni Jesus do.

Tangkas do dihatindangkon si Johannes Pandidi, Jesus do Kristus, na marhuaso di saluhutna, patar do huasoNa, ala sian banua ginjang do Ibana (ay. 31); siuru ni Debata do Ibana jala ndang marpanuhatan dilehon Debata TondiNa tu Ibana (ay.34), dihaholongi Debata do Ibana (ay.35). Dung i dipaandar ibana do saluhutna jala diloas do nasida mamillit: olo do nasida manjanghon Jesus manang ndang. Na so mangoloi anak i, ndang idaon ni i hangoluan, ai ndang arga dirohana pengosongan diri ni Debata dibagasan diri ni Anak i, na martudutudu tu haluaon ni jolma sian hamatean na manongtong di portibi on. Narumingkot dihirim sian hita marhite turpuk on, i ma olo do hita mamboan mulak dongan na lilu dipartondion, gabe mulak mananda Debata disude huaso na adong di Ibana, na tuk paluahon jolma i sian sude parungkilonna? Alai dibagasan pangulaon i, huhut olo do hita so pola ingkon pangijangkon roha, patimbohon diri di haburjuonta na marbarita na uli di huria i?

Sangkap ni Debata i ma asa unang mago jolma i, asa dapotan saluhut jolma i di haluaon dohot hangoluan na manongtong. Alai nang pe songon i, ndang olo Debata mamaksa jolma i asa manjalo di silehonlehon na denggan i. Arga do di Debata kebebasan ni jolma, ala ni i do di ujungna jolma i sandiri do namanontuhon jala bertanggung jawab disude parulaon dohot haputusan naung binuatna. Molo hita jolma disude kebebasan na nilehon ni Debata tu hita unduk, jala mangoloi pambahenan ni Debata di haluaon na dipasahat tu hita, tontu do las ni roha ni Debata marnida hita. Alai sebalikna, molo tapangke do kebebasan na adong di hita i manjua disangkap ni Tuhan i, marhabor ni roha ma Debata marnida hita. Sungkunsungkun ma on tu hita las ni roha ni Debata do patupaonta manang habot ni roha-Na?

Sada ukuran laho mamereng songon dia haporseaonta tu Tuhan i ima marhite haradeon ni rohanta mangurupi dongan na gale. On do na gabe kesaksian ni si Johannes marhite turpuk on, jala laos i do na gabe suhatsuhat di hita laho mangihuthon Kristus Sipalua i. Manghaporseai jala manghangoluhon pangihuthononta di Kristus Jesus Tuhan i, i do patuduhon na so marharoroan sian portibi on hita, alai na sian Ginjang do sian hadirion ni Debata. Jala ditompa Debata hita tu keabadian do songon hadirion ni Debata, ndang asa tu hamagoan. Ala jolma naung manjalo Tondi Parbadia i ma na olo marparbuehon parbue ni Tondi (Gal.5:22), i ma : holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. I do na diigil Debata sipatupaon ni angka na porsea di Ibana, umbahen disuru AnakNa Jesus Kristus ro di Tondi Parbadia tu bagasan ngolunta ganup jolma.

Tung arga do Tondi ni Debata na pinasahatNa i tu hita. Tondi Parbadia i mangelohon ragam ni pangurupion nang pasu-pasu disandok parngoluonta. Jala Tondi i do na gabe sitindang i, jala mangalehon gogo tu angka na porsea i asa marpanindangion (Luk.24:48-49, Ulaon 1:8), mangajari jala paingothon tu angka na didok ni Jesus (Joh.14:26), mangajari jala mangalehon gogo, mangalehon pos ni roha di tingki na mangadopi parungkilon (Ulaon7:55), jala na mangalehon panghirimon (Rom.5:5). Pangatusion na songon on ma na ingkon adong di roha ni saluhut halak Kristen, ala holan halak na porsea jala na mangulahon lomo ni roha ni Debata i dibagasan Anak i do na dapotan di hangoluan na manongtong di lambung ni Ama i. Tatiru ma si Johannes Pandidi na tau gabe naposo haposan di jolo ni Debata, marhite pangoloionta di patik dohot hata ni Debata, asa di ujungna diloas hita mandai denggan ni basaNa di hangoluan na salelenglelengna. Amin