Khotbah 1 Yohanes 5: 1-5 Doa Orang Beriman

 Minggu Rogate; 9 Mei 2021

5:1 Setiap orang yang percaya, bahwa Yesus adalah Kristus, lahir dari Allah; dan setiap orang yang mengasihi Dia yang melahirkan, mengasihi juga dia yang lahir dari pada-Nya.

5:2 Inilah tandanya, bahwa kita mengasihi anak-anak Allah, yaitu apabila kita mengasihi Allah serta melakukan perintah-perintah-Nya.

5:3 Sebab inilah kasih kepada Allah, yaitu, bahwa kita menuruti perintah-perintah-Nya. Perintah-perintah-Nya itu tidak berat,

5:4 sebab semua yang lahir dari Allah, mengalahkan dunia. Dan inilah kemenangan yang mengalahkan dunia: iman kita.

5:5 Siapakah yang mengalahkan dunia, selain dari pada dia yang percaya, bahwa Yesus adalah Anak Allah?

Nunga jotjot hita mambege ia tangiang ima parsaoran panghataionta tu Debata. Tangiang ma na gabe dalan asa boi mansai jonok hita tu Tuhanta i. Alai na ingkon tangkas do botoonta, ia tangiang i ndada holan dalanta marpangidoan tu Debata, alai mangihut do muse ia martangiang ima mambege jala manangihon hata ni Debata asa boi taulahon dia do lomo ni roha ni Debata jala dia ma sogo ni roha ni Debata. Mangaradoti Patik ni Debata manang mangulahon lomo ni roha ni Debata i ma songon tanda parbue ni tangiangta.

Disurat 1 Johannes on mansai nalnal do dipaandar taringot tu haporseaon. Ganup na tarjou gabe siihuthon Jesus jala gabe Kristen i ma naung porsea di Jesus Kristus. Na gabe hatandian manang ondolan ni surat 1 Johannes on i ma haporseaon na ingkon tarida di pambahenan siganup ari. Ndang holan sai dipandohan alai ingkon tarida do dingolu siganup ari. Jala surat on ditongos do songon sada pambohalion tu halak Kristen na di huria bona hatiha i di abad na parjolo. Pambohalion on dipasahat marhite angka pangajarion na hinobasan ni huria. Umbahen i do penulis 1 Jahonnes on mangondolhon ngolu ni halak na porsea ingkon ma pambahenan na i sesuai dohot haporseaon na, ala sian on do taboto naung ta tanda Jesus i. Jala hal na ditekanhon panurat on i ma marsihaholongan, jala on do na taida diturpuk jamita on ima songon dia do ngolu ni halak na porsea na mian ditongatonga ni parsaoron ni halak Kristen.

Dipartingkian ni panuratan ni 1 Johannes on hehe ma torop angka Anti Kristus laho manegai haporseaon ni halak Kristen. Didok nasida ndang tutu Jesus i mate jala hehe, ndang adong haluaon di bagasan Jesus Kristus. I do umbahen di ondolhon di ayat 1 molo porsea Jesus do Kristus, na marlapatan na tubu sian Debata ma Ibana, ndang sian portibi on. dielaela anti-Kristus i do halak Kristen na parjolo i jala dipasiaksiak angka panggomgomi, alai jaminan naung tubu nasida sian Debata i ma margogoihon nasida togu marhaporseaon di Jesus.

Turpuk on mangondohon taringot tu Jesus do Kristus. Lapatanna Jesus i ma Mesias na dibagabagahon di Padan Narobi jala digohi di Padan Naimbaru, i ma na gabe manisia. Diturpukon pe di pabotohon do tu hita taringot tu ngolu na imbaru ni halak naporsea. Jala halak na porsea tu Jesus Kristus didok do na tubu sian Debata. Lapatanna halak na porsea i na mandapothon ngolu na imbaru songon pandohan ni apostel Paulus di Gal 2:20. Ima angka halak na porsea ingkon manghaholongi Debata jala manghaholongi donganna na tubu sian Debata. Pandohan on i ma laho mangondolhon ringkot ni parsaoran (gereja) di tongatonga ni halak Kristen. Ala sude na porsea nunga gabe sada keluarga “Familia Dei” ima keluarga ni Debata. Ala holong na sian Debata do mangarahut hasadaon di tongatonga ni keluarga i. Jala tangkas do di ay.2 naeng mandok tu ganup halak na mandok dirina halak na porsea ingkon do marpanghorhon i tu pangalaho na mangaradoti patik. Ala molo manghaholongi Debata ingkon marudut do muse tu na mangaradoti patikNa. Di son ma tarida haporseaon na marparulaon i, i ma haporseaon na ingkon marparbue di ngolu siganup ari.  Jala mangulahon patik ingkon do didasori holong na sintong, i ma holong tu Debata dohot tu dongan jolma.

Songon huria na parjolo i, godang na mambahen ganggu rohanasida laho mangihuthon Jesus Kristus, jala sahat tu sadari on boi do tong dohonon godang dope na boi mambahen ganggu rohanta laho mangihuthon Jesus Kristus. Boi do i ragam ni poda haliluon na lam rarat ala ni media sosial, boi do i hamaolon ni ngolu, alai songon angka na porsea Jesus do Kristus, pos ma rohanta, urupan jala paluaon ni Jesus do hita sian saluhutna i. Hot ma hita marhaporseaon di Jesus Kristus Sipalua i.

Molo tadok na tubu sian Debata do hita, molo tahaporseai Jesus do Kristus, antong tapatuduhon ma i marhite na mangaradoti Patik ni Debata. Hatandian ni halak Kristen ndada holan di simbol salib na dipangke gabe horunghorungna manang di gantung di dinding ni jabu, alai di panghataion nang di parange na di bagasan holong do. Sian dia do gogonta laho mangulahon patik i? i ma sian Tuhan i, marhite tondi parbadia. Nunga talu dosa, hamatean, nang sibolis i dihamamate dohot haheheon ni Tuhan Jesus. Ndang margogo be sorop ni dosa i tu angka jolma na mangolu, alai paima haroro ni Jesus di ari parpudi sai maotmaot dope sibolis i mangalului sibondutonna. Bangko ni na talu do mangasangi, songon i ma nuang sibolis i paima ro ari parpudi. Umbahen i do ringkot hita marsitutu  jala jugul martangiang asa dipargogoi Debata hita mangulahon patikNa i, ai molo mangasahon gogonta do hita, ndang tarbahen hita mangulahon patikNa i. Ai halak na tubu sian Debata denggan do parsaoranna dohot Debata, i ma marhitehite tangiang. Ala panandaanta tu Debata i ma marhite Jesus Kristus, umbani  halak Kristen na sintong i ma na porsea di Jesus Kristus na gabe dalan haluaon, na mambahen Kristus gabe sitiruon ditongatonga ni ngoluna. Songon Jesus na martangiang tu Debata jala mangajarhon hita martangiang, dibaheni tama hita martangiang tu Ibana asa marparbue ngolunta hombar tu lomo ni rohaNa.

Paandaronta ma tupuk on di Minggunta Minggu Rogate na marlapatan martangiang. Marhite na martangiang, hita manghatai, marsaor, marpangidoan jala marpanghirimon tu Debata. Martin Luther mandok “dingolu ni angka na porsea, tangiang i do hosa ni partondionna (nafas kehidupan)”, doshon na mate do jolma na so mangolu be dibagasan tangiang. Ai dang adong pambahenanta nanggo sada na ture molo mangasahon hadirionta, alani tangiang ingkon do dipasahat tu adopan ni Debata dibagasan haporseaon tu Debata. Ala tung so marlapatan do tangiang jala tung marisuang sambing do i molo ndang ta pasahat i dibagasan haporseaon dohot ias ni roha tu Debata. Na paduahon didok Martin Luther do “Simul lutus Et Peccator”, angka jolma naung sintong do hita  alai dipartingkian na sarupa tongtong dope sai maringan di hita hagiothagiot madabu jalamangulahon ulaon na marloak dosa. Di pangalaho si songon i, ingkon do tongtong hita mardalan jala mangolu dibagasan tangiang asa tongtong dipargogoi hita pajamothon dirinta.

Jala na patoluhon didok Martin Luther do “Ora Et Labora”,  tabonai ma saluhut ulaonta di bagasan tangiang. Udut i didok ibana ma muse “Labora Et Orare”, ulaonta manang ngolunta ido gabe tangiangta di adopan ni Debata. Ala tangiang i do dalanta mangido pangurupion sian Debata di na mangadopi ragam ni hamaolon di portibi on, jala tangiang i ma dalanta mandok mauliate tu Debata disaluhut asi rohaNa dohot denggan basaNa naung ta jalo. Songon Jesus na martangiang tu Debata (Mark. 1:35; 6:46; Luk.22:41,44), suang songon i ma hita, ro martangiang tu Debata dibagasan haporseaon na mamolin holan tu Debata, asa marparbue ngolunta hombar tu lomo ni rohaNa. Amin