Khotbah Mazmur 20: 1-10 Bermegah Dalam Tuhan

 Minggu 2 Set. Trinitatis; 13 Juni 2021

20:1 Untuk pemimpin biduan. Mazmur Daud.

20:2 Kiranya TUHAN menjawab engkau pada waktu kesesakan! Kiranya nama Allah Yakub membentengi engkau!

20:3 Kiranya dikirimkan-Nya bantuan kepadamu dari tempat kudus dan disokong-Nya engkau dari Sion.

20:4 Kiranya diingat-Nya segala korban persembahanmu, dan disukai-Nya korban bakaranmu. S e l a

20:5 Kiranya diberikan-Nya kepadamu apa yang kaukehendaki dan dijadikan-Nya berhasil apa yang kaurancangkan.

20:6 Kami mau bersorak-sorai tentang kemenanganmu dan mengangkat panji-panji demi nama Allah kita; kiranya TUHAN memenuhi segala permintaanmu.

20:7 Sekarang aku tahu, bahwa TUHAN memberi kemenangan kepada orang yang diurapi-Nya dan menjawabnya dari sorga-Nya yang kudus dengan kemenangan yang gilang-gemilang oleh tangan kanan-Nya.

20:8 Orang ini memegahkan kereta dan orang itu memegahkan kuda, tetapi kita bermegah dalam nama TUHAN, Allah kita.

20:9 Mereka rebah dan jatuh, tetapi kita bangun berdiri dan tetap tegak.

20:10 Ya TUHAN, berikanlah kemenangan kepada raja! Jawablah kiranya kami pada waktu kami berseru!

20:1 Ende sian si Daud.

20:2 Sai * dialusi Jahowa ma ho di ari hagogotan, sai dipatimbul * goar ni Debata ni si Jakkob ma ho!

20:3 Ditongoshon ma tu ho panumpahion sian bagas habadiaon, jala ditungkol ho sian Sion!

20:4 Sai marningot ma Ibana di sude angka peleanmu sipanganon, sai talmis ma di rohana angka peleanmu situtungon! Sela.

20:5 Sai dilehon ma tu ho sisubut roham, jala dipasaut nasa sangkapmi.

20:6 Asa mariaia hita mida hatuaonmi, jala mamiorhon * tonggol, mangasahon goar ni Debatanta i. Sai dipasaut Jahowa ma nasa pangidoanmu.

20:7 Nuaeng pe huboto tangkas, na tinumpahan ni Jahowa miniahanna i, sai alusanna do ibana sian angka langit habadiaonna i marhitehite angka pangabahan ni hatuaon ni siamunna.

20:8 Mangasahon hureta dohot hoda do ianggo nasida, alai anggo hita goar ni Jahowa, Debatanta i do itaingot.

20:9 Martungkapan jala martinggangan ianggo nasida, alai anggo hita tong do marsihohot jongjong.

20:10 Sai tumpahi ma rajai, ale Jahowa, sai alusi ma hami di ari pangalualuannami!

 

Adong sungkun-sungkun songon on, tapanghilalahon dope manang ndang na tongtong dialusi Debata tangiang dohot pangidoanta? Tontu ingkon dohononta ma sandok na satia do tongtong Debata tu hita. Ndang dihungkupi Debata sipareonNa tu angka joujounta, rade do Tuhanta i patangitangi alualunta manang sadihari pe taho. On ma alus na ingkon tongtong hatindanghononta di jolo ni halak saluhutna molo adong na manungkun hita na mardomu tu haporseaonta. Ai ndang boi soadahononta alus ni Debata di tangiangta dohot pangidoanta. I do jamita di hita tingki on asa tongtong hita ro mangalualu tu Debata. Manang na boha pe borat ni hamaolon na taadopi, ndang tuk gogonta pasidunghon i, holan mangalualu tu Debata do. Nang raja, nang partogi sisoada do molo holan mangasahon gogona sambing. Alani dijou ma sude jolma na di hasiangan on asa mananda gogo ni Debara. Boasa didok Parpsalmen i songon i, ala ibana sandiri pe nunga didai ibana pandonganion ni Debata. Dihatindangkon ibana do saleleng di ngoluna manang boha pe borat ni parsorionna, ndang hea ibana manadingkon Debata. Jala sai tongtong do ibana monang maralohon musu dohot angka na naeng mamunu ibana. Pengalaman ni Parpsalmen i do nuaeng na arga di hita asa hita pe tapasahat ma dirinta tu Debata, paposhon rohanta laho marsomba dohot manghaporseai Tuhanta i. Manang sadihari pe rade do Debata manangihon hita. Dihagogogotan na tabolus rade Tuhanta i mangurupi hita jala unang mandele molo so migor dialusi Debata tangiangta.

Alani do unang ganggu hita, adong do Debata na sai tongtong sati jala rap dohot hita. Didok di ayat2: “Sai dialusi Jahowa ma ho di ari hagogotanmi”. Dipatuduhon Debata do tu hita hagogoonNa. Angka dia ma i, ditongos panumpahion, ditungkoli do hita. Didok muse: “dilehon sisubut roham jala dipasaut nasa sangkapmi”. Aha do sisubut rohanta? Sisubut roha lapatanna mambahen tongtong las rohanta, marhite hasasaut ni na tapingkiri. Ihut tu si, molo adong na mangondihon hita dohot na mangalehon semangat tu hita lam tamba do pos ni rohanta mangula ulaonta. Ise na boi mangondihon hita? Tondongta, alealenta, sisolhotta? Boi ma i, alai tarbatas do gogona. Debata do anggo na mangondihon hita jala Debata do pangalualuanta dohot pangurupinta di ngolu on.

Mariaia dibagasan Tuhan i do sude na marpos ni roha tu Debata. Aha ma na masa tu hita dung ditumpahi Debata hita? Tarida ma tutu panghorhornna. Nda tama hita mariaia dibagasan Tuhan i? Di ayat 6 didok: “Mariaia hita mida hatuaonmi”. Dung dilehon Debata i nuaeng pe tarida ma sian hita, mariaia ma hita mida Debata hatuaonta. Antong unang hita mandele dohot mabiar mangadopi ngolu on. manang aha na taula ingkon do jumolo pasahatonta tu Debata. Holan marhite tangiang dohot pos ni roha (haporseaon) do hita boi mangido pangurupion sian Debata. Alani molo martangiang hita tamba do panghirimonta, ala tahilala dung sahat tu Debata tangiangta i nunga hira moru boban ni ngolu sian hita. Holan paimahon alus ni tangiangta i nama hita. Molo taadopi pe angka hamaolon i ingkon adong prinsip di hita songon prinsip ni Parpsalmen on songon na hinatindanghonna di ayat 7: “Nuaeng pe huboto tangkas na tinumpahan ni Jahowa miniahanna i, sai alusanna do ibana sian angka langit habadiaonNa i marhitehite angka pangabahan ni hatuaon ni siamunNa (Sekarang aku tahu, bahwa TUHAN memberi kemenangan kepada orang yang diurapi-Nya dan menjawabnya dari sorga-Nya yang kudus dengan kemenangan yang gilang-gemilang oleh tangan kanan-Nya). Lapatanna adong panandaon ni diri di hita ai saluhutna holan marharoroan sian Debata do, molo tarasahon songon na dao Debata sian hita songon na masa di tingki on i ma na sude hita manghilalahon pangontak ni pandemic Covid-19 na so haru tangkas taboto sadihari haujunganna, hira naung ditinggalhon Debata hita, alai ingkon hatop ma hita mamareso dirinta, parangenta, panombaonta tu Debata unang parjolo hita marungutungut tu Debata huhut manihai Debata.

Ndang tartaluhon ni manang ise hagogoon ni Tuhanta i. Tandi do huaso ni Debata martimbanghon huaso na asing. Ia Debatanta ima Debata na sun gogo na tongtong manarihon na ringkot di hita. Marasing situtu do Ibana sian debata sileban. Didok di ayat 8-9: “Halak na mangasahon gogo ni Debata ingkon tongtong monang. Mangasahon hureta dohot hoda do ianggo nasida, alai anggo hita tong do marsihohot jongjong”. Alani naeng tongtong hita marhaposan tu Debta pardenggan basa i. I do jaminan ni ngolunta on. molo adong jaminan di hita adong ma panghirimon. Manang aha pe na taula molo so mardonganhon Debata maol do marparbue. Di turpuk Epistelta i Markus 4: 26-34 dipatudos tu sahalak na manuan bonina. Molo so Debata do na manumpahi gabe marisuang do saluhuta. Alai dibagasan panumpahion ni Debata, tubu do boni i jala marparbue muse jala manghorhon las ni roha tu parhauma i. Alani do manang aha pe na tasangkapi dohot na tapingkiri di ngolu on holan Tuhanta do na pasauthon. Ndang boi lomolomonta manang holan hatanta.

Na mamolus do hita di ragam ni angka situasi dohot partingkian na mubauba. Alai diigil do sian hita asa tongtong pos rohanta tu Debata. Debata do hasasaut ni nasa na taua dohot na tapingkiri. Tuhan Jesus do Rajanta naung ro tu portibi on. tu Ibana dipasahat Debata huaso patupa angka tanda halongangan gabe taruli angka na porsea i di las ni roha na sian Debata. Na umbalga sian i marhite Tuhan Jesus nunga disesa Debata dosanta jala nunga ditobus hita gabe huriaNa. Tuhan Jesus do Raja ni huria i. Ibana do na mangondihon hita di angka hagaleonta dohot di angka parsorionta siganup ari. Alani ingkon tu Ibana do hita mangalualu dibagasan pardalanan ni ngolunta. Ala Ibana do rajanta.