Khotbah Amos 7: 10-17 Tetaplah Menyuarakan Kebenaran

 Minggu 6 Set. Trinitatis; 11 Juli 2021

7:10 Lalu Amazia, imam di Betel, menyuruh orang menghadap Yerobeam, raja Israel, dengan pesan: "Amos telah mengadakan persepakatan melawan tuanku di tengah-tengah kaum Israel; negeri ini tidak dapat lagi menahan segala perkataannya.

7:11 Sebab beginilah dikatakan Amos: Yerobeam akan mati terbunuh oleh pedang dan Israel pasti pergi dari tanahnya sebagai orang buangan."

7:12 Lalu berkatalah Amazia kepada Amos: "Pelihat, pergilah, enyahlah ke tanah Yehuda! Carilah makananmu di sana dan bernubuatlah di sana!

7:13 Tetapi jangan lagi bernubuat di Betel, sebab inilah tempat kudus raja, inilah bait suci kerajaan."

7:14 Jawab Amos kepada Amazia: "Aku ini bukan nabi dan aku ini tidak termasuk golongan nabi, melainkan aku ini seorang peternak dan pemungut buah ara hutan.

7:15 Tetapi TUHAN mengambil aku dari pekerjaan menggiring kambing domba, dan TUHAN berfirman kepadaku: Pergilah, bernubuatlah terhadap umat-Ku Israel.

7:16 Maka sekarang, dengarlah firman TUHAN! Engkau berkata: Janganlah bernubuat menentang Israel, dan janganlah ucapkan perkataan menentang keturunan Ishak.

7:17 Sebab itu beginilah firman TUHAN: Isterimu akan bersundal di kota, dan anak-anakmu laki-laki dan perempuan akan tewas oleh pedang; tanahmu akan dibagi-bagikan dengan memakai tali pengukur, engkau sendiri akan mati di tanah yang najis, dan Israel pasti pergi dari tanahnya sebagai orang buangan."

Ra ndang asing hita dohot pandohan na mandok, sisogo do halak na mandok na sintong. Ndang dihalomohon portibi on dohonon na sintong. Alani gabe torop do halak na sumurut jala mabiar mandok na sintong, sotung gabe dihasogohon natorop ibana. Alai naeng marsiajar hita sian panurirang Amos na mangadopi angka hamaolon siala na pajongjong hasintongan ibana. Najolo somal do sasahalak dipalao sian sada huta. Tontu ndada asal dipalao boti, alai ala mangulahon na so denggan manang na maralo tu hatontuan ni huta i. Alai marasing sian i do ianggo na masa di turpuk on. dipalao do panurirang Amos alai ndada ala na mangulahon na so denggan. Boasa dipalao jala ise na palaohon, i ma siuhalonta sian turpuk on asa dapot hita na gabe bohal ni partondionta.

Tangkas do dihatindangkon si Amos paboa na so panurirang manang anak ni panurirang ibana. Umbahen barani pe ibana borhat sian Juda (Israel Selatan) laho manurirangi tu Israel (Utara) ala panjouon dohot parsuruon ni Debata Jahowa do. Jahowa do na manjou ibana sian ulaonna siganup ari ima parmahan jala na papungupungu parbue ni hau antajau. Lapatanna, ndada sian dirina sambing umbahen gabe panurirang ibana, ndada sinuru ni jolma, alai tung sian parsuruon ni Jahowa do. Laos songon i do nang hita, tutu ndang panurirang hita, tutu ndang sude pandita hita manang pangula ni huria hita, ra ndada anak ni panurirang manang ndang sude hita anak ni pangula ni huria. Alai, mangihuthon haporseaonta, tarjou do sude halak na porsea gabe parbarita nauli. Ndang apala ingkon gabe panurirang manang pandita sude halak, alai tarjou hita laho mamaritahon hata ni Debata. Borhat si Amos sian Juda tu Israel laho mamaritahon hata ni Debata do. Songon dia hata ni Debaa na dipasahat tu ibana laos songon i do dipasahat ibana tu halak Israel. Songon i ma nian hita. Hata ni Debata na tabege sian jamita, na tajaha sian Bibel, na tajaha sian hatorangan ni Jamita, unang ma nian holan di hita i, alai naeng ma tabaritahon tu na humaliang marhite hata nang pambahenan. Dijou jala disuru Debata do sude halak na porsea gabe sipararat hata ni Debata, holan i do, rade do hita?

Disuru Jahowa do si Amos manurirangi tu Israel, aha do sipasahatonna hombar tu parsuruon ni Debata? Disuru Debata ibana paboahon barita uhum alani pangarupaon na niula nasida, alani uhum na so sintong na dipamasa nasida tu angka na so mardihadha. Diula nasida do angka ruhut ni parugamoon manang parsombaon alai dao do ngolu nasida sian hasintongan, i do umbahen dilumbahon Debata uhum tu nasida. Ndang marsitutu be nasida dibagasan haporseaon marsomba tu Debata, holan sipaulaula manang hasomalan sambing nama parugamoon i. Burju do bangso i pasahat pelean tu bagas joro, burju mangulahon ruhut-ruhut ni parugamoon, alai digosa nasida do angka na pogos. Unang ma nian buurju, badia di na patar hape di na buni angka haramunon diula. Unang ma tutu holan digareja tapataridahon na Kristen hita, hape parulaon siganup ari ndang tapatuduhon parange songon halak Kristen.

Nian nunga godang di ginjang ni turpuk on angka uhum na dipabotohon alai diulahi muse di turpuk on. Di ayat 11, didok ingkon mate si Jerobeam marhite podang jala ingkon tarbuang tu habuangan ianggo Israel sian tanona. Di ayat 17, marmainan do jolmam di bagasan huta, jala marragean angka anakmu dohot borum marhitehite podang, jala bagon do tano on marhitehite rujiruji, jala mate di atas tano na ramun do ianggo ho jala tarboan tu habuangan ia Israel sian tanona. Sian na dua ayat on tangkas do na ingkon uhumon ni Debata bangso Israel alani pambahenan nasidana maralo tu hasintongan. Tontu ala barita uhum do diboan si Amos ndang barita las ni roha, ndada ulaon na mura ulaon ni panurirang Amos on. Nda ingkon marmara nama hosana? Ndang adong na marlomo ni roha umbege hata lumbalumba na pinasahat ni si Amos. Di ayat 10 dipabotohon na dialuhon malim Amasia do ibana tu raja Jerobeam ala disuriranghon panurirang Amos na ingkon mate raja Jerobeam. Ndada holan i tahe, songon na tarsurat di ayat 12-13 dipalao malim Amasia do muse panurirang Amos sian Betel. Betel ima inganan parsombaon ni halak Israel, jala disi ma malim Amasia mangulahon hamalimonna pasahathon angka pelean ni bangso i tu Debata. Tung borat do laho mamaritahon hasintongan, ai boi do hita gabe musu ni negara nang maralo tu ruhurruhut ni parugamoon, songon na masa tu panurirang Amos on. Hape dipasahat panurirang Amos pe lumbalumba taringot tu uhum na naeng ro asa mulak do nasida mangalului Jahowa dohot manghaholongi na denggan.

Godang do hamaolon dohot sitaonon molo manghajongjonghon hasintongan. Alani do asa adong pandohan unang ma dok na sintong i, alai dok ma na denggan. Marhite hata i diarahon asa unang manghatahon hasintongan, ala balga do resiko na mandok na sintong. Andul tumabo do manjamitahon pasupasu sian uhum, andul ummura do mamaritahon Teologi Sukses sian Teologi Salib, alai unang ma nian alani borat na i gabe talu hita dibahen. Naeng ma hita marsiajar sian panurirang Amos on, ndang mabiar ibana ala tangkas diboto ibana na sian Debata do hata i dijalo ibana. Ndang sumurut ibana nang pe gabe alo ni negara dohot panggomgomi ibana. Hot do ibana pajongjongkon hasintongan ima ingkon hona uhum do angka na mangulahon pangarupaon dohot angka na maralo tu lomo ni roha ni Debata. So tung do ala gumodang paruntungan ni na manghajongjongkon na so sintong, gabe parsidohot hita disi. Songon halak na porsea naung manjalo hata ni Debata nang haluaon, tarjou do hita manghajongjongkon hasintongan.

Alai tutu, ingkon manat do hita, so tung do tadok na manghajongjongkon hatigoran hita hape hatigoran na peol, hatigoran na gabe paruntungan tu dirinta manang horongta. Ndada tusi hita dijou jala disuru Debata. Baliksa, na ingkon hajongjongkononta ima hasintongan ni Debata. Dia ma i? Padaohon pangarupaon, ndang mamoro angka na pogos dohot na so mardihadiha, alai taulahon ma nian sumarihon angka na gale jala mangulahon na denggan. Angka on ma siulahononta jala sisoarahononta. Ingkon barani do hita secara pribadi nang secara huria (institusi) paingothon angka na sala tarlumobi tu angka panggomgomi dohot tu angka sibahen haputusan. Godang do hamaolo diadopi angka panggomgomi nang sibahen haputusan di negara nang di huria ai singgip do huaso tu pangarupaon dohot tu na marlomolomo. Ulaonta ma manangiangkon nang paingothon angka panggomgomi asa unang madabu nasida tusi, asa unang ro uhum ni Debata. Alai, atik tung adong sian hita na adong huasona, manat hita angka dongan asa unang madabu songon angka panggomgomi di partingkian ni panurirang Amos, asa unang hona uhum hita. Sandok tahe, sude hita so marimbar posisinta nang ulaonta, dijouhon turpuk on do hita asa tapararat hata ni Debata marhite na pajongjong hasintongan.