Khotbah Efesus 4: 1-7 Berusaha Menjaga Kesatuan Roh

 Minggu 9 Set. Trinitatis; 01 Agustus 2021

4:1 Sebab itu aku menasihatkan kamu, aku, orang yang dipenjarakan karena Tuhan, supaya hidupmu sebagai orang-orang yang telah dipanggil berpadanan dengan panggilan itu.

4:2 Hendaklah kamu selalu rendah hati, lemah lembut, dan sabar. Tunjukkanlah kasihmu dalam hal saling membantu.

4:3 Dan berusahalah memelihara kesatuan Roh oleh ikatan damai sejahtera:

4:4 satu tubuh, dan satu Roh, sebagaimana kamu telah dipanggil kepada satu pengharapan yang terkandung dalam panggilanmu,

4:5 satu Tuhan, satu iman, satu baptisan,

4:6 satu Allah dan Bapa dari semua, Allah yang di atas semua dan oleh semua dan di dalam semua.

4:7 Tetapi kepada kita masing-masing telah dianugerahkan kasih karunia menurut ukuran pemberian Kristus.

Tung mansai tangkas do pamodaion na pinasahat ni angka apostel tu parngoluan ni angka huria na parjolo i di parngoluan halak Kristen di abad na parjolo. Marharoroan do angka na porsea i sian ragam ni angka parbangsoon, Jahudi dohot na so Jahudi, na masiboan adat istiadat, budaya nang hasomalanna be. Sada pangantusion na mansai ringkot sihangoluhononhon ni huria na imbaru tubu i ima taringot tu hasadaon ni huria i, songon na taida di turpuk jamita on. Apostel Paulus pasahathon angka sipaingotna tu huria Epesus jala sada sian sipaingotna i i ma marhadomuan tu hasadaon di tongatonga ni huria i nang pe haroroan nasida sian ragam luat  manang inganan, adat manang hasomalan na marasing be songon i nang angka parhataan pe marasing situtu do. Hasadaon i mansai ringkot patuduhononhon ni huria na parjolo dohot sinuaeng laho patuduhon hadirion na imbaru di bagasan haporseaon tu Kristus Jesus, Sipalua i. Ala halak na porsea di Tuhan Jesus, nunga gabe jolma na tinompa na imbaru ibana. Laos hasadaon i muse songon dalan panindangion ni angka na porsea i maradophon angka na so porsea dope di humaliang nasida hatiha i asa gabe tiruan na denggan laho mnait angka jolma na asing asa parsidohot di parsaoran ni angka siihuthon Kristus i. Tangkas ibana mansoarahon tu huria Epesus: “Parangehon hamu ma na tama, hombar tu panjouon naung songgop tu hamu (ay. 1). Ngolu ni angka na porsea i ma ngolu nanung dijou sian haholomon laho mandapothon hatiuron na sian Debata, jala na ingkon dihangoluhon do i dibagasan pardalanan ni ngoluna. Songon hataridaan ni panindangion ni angka na porsea tu humaliangna boi do tarida marhite na mangaradoti hasadaon di tongatonga ni angka parsaoran i. Apostel Paulus paingothonhon parsaoran ni angka na porsea i asa mangaradoti hasadaon ni Tondi na pinadomu ni dame.

Dia do na nidokna hasadaon ni Tondi? Ingkon gabe sada do huria di sandok portibi on? Ingkon gabe sada ma organisasi ni huria? Ndang i na minaksudna. Hasadaon ni Tondi lapatanna, nang pe marasingasing oraganisasi ni hurianta, marasingasing rumang ni parsombaonta, marasingasing endenta, alai ingkon tarajumi sisada ihot do hita dibagasan Tondi ala sada do na tasomba ima Tuhan Jesus. Sada do haporseaonta i ma haporseaon tu Debata Sitolusada (ay. 5). Alani, molo marasing pe organisasi ni hurianta ndang pola masiparoaroaan hita, ndang pola masihumuan. Unang nian sai hira hurianta na dumenggan, huria na asing hurang denggan. Rap denggan do hurianta alai masiboan hasurunganna be, ingkon sada do halak na porsea tu Tuhan Jesus nang pe marasing denominasi huriana, sada dibagasan haporseaon tu Tuhan Jesus songon tangiang ni Tuhan Jesus di Johannes 17: 21. Mudar ni Tuhanta i do na padomuhon saluhut na porsea di Ibana, ndada aturan manang pangalaho na asing. Alani unang marmusu sada huria tu huria na asing, baliksa ingkon mardame do, i ma mangaradoti hasadaon ni Tondi. Alani ingkon taingot ma gari tu na marasing huria ingkon sada hita, nda lam tu na sahuria ma? Turpuk on manogihon asa unang masa parbolatbolatan di huria. Boha bahenonta mardame tu dongan huria na asing molo hita na sahuria pe marbadai? Boha bahenonta marsada tu hombar ni hurianta molo hita na sahuria pe marbolatbolat? Asa tulus hasadaon ni Tondi na pinadomu ni dame songon na pinangido ni ayat 3, ingkon taulahon ma ma pandohan na di ayat 2: “Martoruk ni roha situtu, marlambok jala marlambas ni roha, masihaehean dibagasan roha na holong”. Holan halak na olo patutoru dohot palambas rohana do na boi mardame, na boi mangulahon hasadaon ni Tondi i. Molo dirajumi halak dirina patorbanghu molo sai ingkon ibana na sintong jala na pistar, ndang tarbahen jolma sisongon i mardame. Molo sai ingkon hatana sibegeon jala na ingkon saut, ndang na mangaradoti hasadaon ni Tondi i. Alai halak na toruk roha, ima halak na olo manangihon hata ni donganna, na so manggogohon lomo ni rohana sambing, na mangargahon dongan, na mangargahon dohot mamparsangapi angka dongan na adong di tongatonga ni huria nang di humaliang. Na so mangapian manang mangiburu di ugasan ni donganna. Halak na lambas marroha ndang olo pahebahebahon hahurangan ni donganna, baliksa olo manalpuhon angka hahurangan ni donganna.

Marhite ayat 7 on dipaingot do hita paboa sude do hita dapotan basabasa, ndang adong sian hita na so dapotan asiasi sian Kristus, alai tutu marasing do basabasa na tu hita dohot donganta. Molo di turpuk on basabasa na nidokna ima panghobasion di tongatonga ni huria songon na dipatorang di ayat 11. Adong na gabe apsotel, panurirang, evangelist, parmahan jala pangajari. Ndang sude gabe apostel, ndang sude gabe panurirang, alai mardebadeba do hombar tu pangalehon ni Kristus. Laos i do na pinaingot ni turpuk on tu hita. Ganup do hita dapotan basabasa di tonga ni huria i. Ndada holan pandita manang parhalado na gok tingki manjalo asiasi sian Kristus; dohot do sintua, dohot do nang angka anggota majelis suang songon i nang ruas ni huria. Ganup hita masiboan ulaonta be do di tongatonga ni huria, jala tarajumi ma na sian Kristus do i tajalo. Unang be nian sai tarbege hata ungutungut na mandok: tabo situtu do angka pandita on. Alani pandohan i olo do gabe ro alus: “Molo tutu tabo situtu gabe pandita, bahen hamu ma anakkonmuna gabe pandita”. Hape angka na olo mandok “tabo situtu angka pandita on” tu singkola na asing do dibahen ianakhonna. Ganup hita masiboan ulaonta be, adong na gabe ruas alai tontu mangula ma ibana di ulaon na asing, adong sintua na mangula di ulaon na asing alai dipelehon deba tingkina mangula di huria, adong pandita, adong diakones nang evangelis na mamelehon dirina hibul tu ulaon ni huria. Dia ma na dumenggan? Rap denggan do sude, songon na di ayat 11 i, deba gabe apostel, deba gabe panurirang, dohot lan na asing. Alani, manang dia pe ulaonta di tonga ni huria tahamauliatehon ma tu Debata, unang be nian adong pandohan “rumput tetangga terlihat lebih hijau daripada rumput sendiri”. Rap rata jala rap uli do duhutduhutta dohot nampuna ni dongan, alai ra marasing rumangna dohot massamna. Unang be sai tarajumi dumenggan pasupasu na di halak sian na di hita, ai so taboto songon dia sasintongna na di halak-an. Tahamauliatehon ma na adong di hita i ma pamatang, keluarga, sinamot dohot lan angka na asing na adong di hita. Manang songon dia pe i tahasabamhon ma. Ingkon rajumanta do i silehonlehon ni Debata tu hita, jala i ma na dumenggan nuaeng di hita. Molo songon i rohanta, sonang jala dame ma hita mandalani ariari ni ngolunta. Antong hombar tu tema ni Minggunta, sude ma hita mangaradoti hasadaon ni Tondi di tonga ni huria marhite na manghamauliatehon nasa silehonlehon ni Kristus di hita. Unang be mangiburu di sinadongan ni dongan, unang be mangiburu dibasabasa na di dongan. Baliksa taulahon ma nasa basabasa na dipasahat tu hita dibagasan toruk ni roha, halambason, nang holong ni roha, masiurupan hombar tu saluhut asiasi nang sinagihonNa tu hita luhut asa jumpang dame di hurianta nang di ngolu siganup ari.