Khotbah Markus 6: 6b-13 Pergi dan Beritakanlah Firman Allah

 Minggu 5 Set. Trinitatis; 04 Juli 2021

6:6b Lalu Yesus berjalan keliling dari desa ke desa sambil mengajar.

6:7 Ia memanggil kedua belas murid itu dan mengutus mereka berdua-dua. Ia memberi mereka kuasa atas roh-roh jahat,

6:8 dan berpesan kepada mereka supaya jangan membawa apa-apa dalam perjalanan mereka, kecuali tongkat, roti pun jangan, bekal pun jangan, uang dalam ikat pinggang pun jangan,

6:9 boleh memakai alas kaki, tetapi jangan memakai dua baju.

6:10 Kata-Nya selanjutnya kepada mereka: "Kalau di suatu tempat kamu sudah diterima dalam suatu rumah, tinggallah di situ sampai kamu berangkat dari tempat itu.

6:11 Dan kalau ada suatu tempat yang tidak mau menerima kamu dan kalau mereka tidak mau mendengarkan kamu, keluarlah dari situ dan kebaskanlah debu yang di kakimu sebagai peringatan bagi mereka."

6:12 Lalu pergilah mereka memberitakan bahwa orang harus bertobat,

6:13 dan mereka mengusir banyak setan, dan mengoles banyak orang sakit dengan minyak dan menyembuhkan mereka.

Sude halak na porsea na targoar ruas ni huria ingkon borhat mamaritahon dohot mamodahon hata ni Debata. Jala mangihuthon poda parjamitaon ni huria reformasi, marjamita ndada holan patoranghon siasia ni hata na tarsurat di Bibel alai dohot do manguhal lapatan ni hata i di ngolu haporseaon ni angka na umbegesa. Sian i do dapotan parsaulian di bagasan apoapo, sipaingot, panuturion, apulapul, poda na tau paubahon parange angka siihuthon Jesus i. Mulana holan Jesus do mangajari di luat hagodanganNa. Longang do natorop i umbege pangajarionNa, alai ndang ditanda dope Jesus ia so holan umboto ulaonNa uju hametmetonNa dohot mananda angka anggiNa sian amaNa si Josep. Alani asa didok Jesus: “Tung so marsangap do panurirang di luat hagodanganna, di angka dongan sabutuha dohot di bagasna. Alani ma gabe diliati Jesus nang na saluat i laho mangajari, jala sian pardalanan i ma diboto Jesus torop dope jolma na ingkon ajaran laho mananda Harajaon ni Debata. Alani do asa dipaborhat Tuhan Jesus angka siseanNa. Andorang so dipaborhat Jesus siseanNa na sampulu dua i laho marjamita dohot mangajari di luat Galilea, parjolo dilehon Ibana huaso tu nasida. Ndada holan haradeon diigil sian nasida alai parjolo dibohali nasida asa talup mangulahon parsuruon i. Ndang dipasombu Debata angka naposoNa na olo borhat mamaritahon hata i jumolo do dilehon Ibana huaso tu angka na laho borhat i. Aha do huaso i? Mansai bidang jala bagas lapatan ni hata on. Dihamkam do hagogoon ni badan nang tondi. Sian i tarida ia ulaon marbarita na uli ndang mangasahon parbinotoan alai ingkon mangasahon huaso ni Tuhan i.

Adong do strategi dipatupa Jesus i ma marsuru sisean marduadua. Tolu hali disurat si Markus pandohan marduadua (3:14; 6:7; 4:10), na patuduhon hinaringkotna. Jala mangihuthon uhum na tarsurat di 5 Musa 19: 15b, taringot tu panindangi (saksi), pinomat ingkon dua halak asa hot hata (haputusan). Marhite i ma lam tangkas taida dokdok ni ulaon mamaritahon hata ni Tuhan i. Godang do parbarita na uli tarunjun jala talpe tu hamatean molo masa parsualon siala barita na uli. Adong do parbarita nauli dipasahat tu paruhuman jala didok panggaori songon na masa di huria mulamula tu apostel Paulus. Disuru Jesus angka siseanNa borhat marduadua, lapatanna adong ma onom kalompok na dipaborhat Jesus. Sada strategi do i asa boi humatop dieahi luat i jala tumorop jolma dapotan barita nauli. Sian strategi ni Tuhan Jesus on naeng marsiajar hita, molo tataringoti ulaon marbarita nauli, sipata lupa do strategi. Mangajari dohot marjamita ndada holan ulaon verbal (holan mandok hata, poda nang sipaingot) alai ingkon tarida ma i nian marhite parulaon di siganup ari. Marhite na marduadua borhat angka sisean, asa boi nasida masiurupan mamorsan angka na dokdok laho mangaradoti patik ni Kristus mangulahon parsuruon i (Gal. 6:2). Ala mura do talu gogo anggo punjung sahalak, tupa manahan anggo dua halak (Parjamita 4: 12)

Diorai Tuhan Jesus do angka siseanNa mangahut tu diri.  Diorai Tuhan Jesus do nasida mamboan manang aha tu tongan dalan, na boi boanon nasida holan tungkot dohot sepatu. Ringkot do tungkot manang sepatu dipangke parjamita na mangaliati angka luat. Boi do i gabe sinjata uju pajumpang dohot angka pangago di tonga dalan. Aha diorai Jesus? Mamboan roti manang hajut, hepeng di hohos dohot mamangke bajubaju dua. Boasa? Parbarita nauli ndang boi marsihohot di angka na lohot di dirina, ndang boi mangunsande tu na binoanna. Molo ingkon mananon na hansit ingkon rade mangadopi. Parbarita nauli ingkon mangasahon haporseaonna tu Debata, ndang jadi lilian ni pardagingon.

Laho mamongoti jabu, jumolo ma dok hamu “dame ma di hamu na sabagas on”, taida ma na singkop do poda ni Jesus tu siseanNa di hasomalan ni halak Jahudi. Halak Jahudi burju do martamue jala sai ungkap do pintu ni bagasna tu tamue. Apala na diondolhon di pandohan i, “ia dung dibongoti hamu jabu, disi ma hamu mian, paima borhat muse”, i ma panjangkonon ni parjabu di sisean i. Nasa naung manjangkon hata ni Tuhan i, nunga be gabe sisada haporseaon dohot parbarita na uli i. Tu na so manjangkon dohot manangihon pangajarion ingkon tadingkonon nasida jabu i laos dipirpirhon nang orbuk na lohot di tot nasida songon panindangion tu nasida. Tu angka na so manjalo barita nauli, ndang ringkot leleng sisean mian disi, ai holan na pasudahon tingki nama so marguna. Alai boasa ma ingkon pirpirhonon orbuk na lohot di tot nasida i? Boi do taida na masa di pangulaon ni si Paulus (Ulaon 18:6) nang di tingki ni si Nehemia (Neh. 5: 13), na mamirpirhon orbuk i marpardomuan tu paruhuman ni Debata. Na manulak barita nauli ndang taruli di harajaon ni Debata jala tu hamatean do jambarna.

Angka ise ma i parbarita nauli? Tontu ndang holan nasida na martohonan, alai sude do halak na porsea tarjou gabe parbarita nauli marhite angka ulaon naung pinasahat ni Debata. Tapangke ma angka ulaonta i songon dalanta laho marbarita nauli. Molo disuru Debata hita borhat mambaritahon hata ni Tuhan i taingot ma Heber 3: 15 “Sadri on, di na binegemuna soaraNa, unang ma papir hamu rohamuna, songon nasida na tangkang roha uju i!” Ingkon rade do hita laho mangulahon parsuruonNa. Disi tabege hata ni Tuhan i, taoloi ma asa dapotan parsaulian hita di parngoluanta. Debata ndang holan manghatai tu hita, alai dipangke Ibana do nang ngolunta laho patolhashon hataNa. Marhite hita ma nuaeng Debata pabotohon lomo ni rohaNa. Tabaritahon ma soara ni Tuhan. Ndang holan mamaritahon alai ingkon dohot do parange gabe jamita tu saluhut jolma. Hombar tu surat ni apostel Paulus di 2 Korint 3: 3 “Ai tanda do hamu surat ni Kristus na hupature hami, sinurat so dohot tinta, marhite sian Tondi ni Debata na mangolu, i do; ndada tu panuratan batu, alai dipanuratan daging, i ma ateate”. Angka naung tabege sian Debata ingkon patubegehononta do tu angka dongan jolma. Jala ingkon adong kerjasama di angka parhalado nang ruas ni huria mangulahon parsuruon ni Tuhan i asa tulus denggan mardalan parbaritaan nauli. Taingot ma pandohan ni halak Batak: “Ndang tartuhuk salahalak pandingdingan”. Ringkot masiurupan jala marsitungkolan asa jumpang songon na nidok ni lagu i masiamin-aminan songon lampak ni gaol jala masitungkolan songon suhat dirobean. Dipargogoi Tuhan i ma hita mamaritahon hataNa. Ala marhite huasoNa do hita boi mamparbuehon parsuruon ni Tuhan i. Antong ringgas ma hita laho mamboan barita ni Tuhanta i, manghatindanghon Kristus nampuna hita ala torus do tarbege panjou ni Kristus torus di tano Batak i (pat. B.E. No.519).