Khotbah 2 Raja-raja 4: 42-44 Allah Memelihara UmatNya

 Minggu 8 Set Trinitatis; 25 Juli 2021

4:42 Datanglah seseorang dari Baal-Salisa dengan membawa bagi abdi Allah roti hulu hasil, yaitu dua puluh roti jelai serta gandum baru dalam sebuah kantong. Lalu berkatalah Elisa: "Berilah itu kepada orang-orang ini, supaya mereka makan."

4:43 Tetapi pelayannya itu berkata: "Bagaimanakah aku dapat menghidangkan ini di depan seratus orang?" Jawabnya: "Berikanlah kepada orang-orang itu, supaya mereka makan, sebab beginilah firman TUHAN: Orang akan makan, bahkan akan ada sisanya."

4:44 Lalu dihidangkannyalah di depan mereka, maka makanlah mereka dan ada sisanya, sesuai dengan firman TUHAN.

Di sude parulaon ni angka raja i, dijou Debata do panurirang laho pasahathon hataNa, paingothon raja dohot bangso i asa umbuk parulaonnasida tu patik ni Debata. Dijou Debata panurirang mamanghulingi raja i asa marojahan di hata ni Debata sude haputusan dohot parulaonna. Ndang sude raja manjanghon hata ni Debata na pinasahat ni panurirang i, ala sai tajom angka kritik nasida di angka pambahenan ni raja na so marojahan tu hata ni Debata. Jala hira sude do angka raja di Israel Utara hona toru ni Debata, ala nasida mangihuthon parsombaon ganaganaan (lembu emas) na pinungka sian si Jerobeam. Jala i do na nialo ni angka panurirang tarlumobi ma haroro ni panurirang Elia dohot Elisa na paboahon na margogo do Debata laho mangaramoti bangsoNa. Ndang adong gunana marsomba tu baal manang ganaganaan, ai pinauli ni tangan do i. Jala dalan patoguhon roha ni bangso i manghaporseai Debata torop do angka tanda halongangan na pinatupa ni Debata, songon na masa diturpuk on mangan 100 halak marhite sagusagu.

Adong do pandohan ni halak Batak na mandok: hancit sineat ni raut, humancitan na sineat ni butuha. Pandohan on patuduhon tung na hansit situtu do halak na so dapot mangan jala maniak panghilalaan. Jala pigapiga hali barita taringot tu anturaparon ditaringoti di Bibel, isarana na ima: Abraham dung dijou Debata haruar sian Haran gabe tinggal do ibana di Misir (1 Musa 12: 10). Dung i di tingki parnangkok ni si Josep gabe partogi diMisir, na mangihut muse barita ni Si Rut dohot si Naomi suang songon i nang na masa di turpuk jamita on. Marhite angka haraparon i, sai adong do tona na bagas i ma pangaramotion ni Debata di ngolu ni hajolmaon. Laos on do barita na uli di hita di partingkian nuaeng, asa unang mabiar hita mangadopi ragam ni hasusaan, tarlumobi disiala panghorhon ni pandemi Covid-19 na diprediksi ni angka pande bisuk masa “krisis ekonomi” tu joloan ni ari. Taingot ma ndang pasombuon ni Debata hita. Godang dalan bahenon ni Debata laho mangaramoti dohot manarihon angka na niasianNa. Turpuk on tangkas patuduhon Debata manarihon halak na male. Marragam do dipangke Debata dalan manarihon angka na porsea di hataNa.

Godang do hamaolon na niadopan ni si Elisa dohot angka hasusaan na masa di bangso i. Alai sai adong do dalan na dibahen Debata paluahon sian hagogotan. Si Elisa sahalak panurirang na porsea di huaso ni Debata jala na patuduhon huaso ni Debata di angka hamaolon na niadopanna. Sude angka tanda halongangan na pinatupa ni panurirang Elisa paboahon na tuk do huaso ni Debata paluahon hita sian hagogotan godang. Ndang lari si Elisa sian masalah na niadopanna, alai sai adong do na boi dipatupa ibana marhite huaso ni Debata asa malua sian hagogotan i. Songon na tangkas dipabotohon do di turpuk on tongon marpungu do si Elisa dohot siseanna dohot halak toropna 100 halak, alai ndang adong panganon ni nasida ala di ombas i masa haleon potir. Alai di na so panagaman adong do halak na ro sian Baal Salise mamboan sagusagu 20 sian patumonaan na niulana mangalehon pelean tu si Elisa. Ndang adong hatorangan ise do halak Baal Salise on. Uju diboan ibana sagusagu sian eme patumonaan patuduhon hasatiaonna maradophon Debata Jahowa, hombar tu uhum ni Padan na Robi. Na dilehon tu Jahowa tanda ni haporseaon, paboa Jahowa do pangaramoti. Jala marhite halak Baal Salise on boi idaonta pambahenan ni Debata, na boi do hape dipangke Debata na so tinanda, na so tinagam ni roha dohot na so adong tarsurat sejarahna di ngolunta boi ro mangurupi dohot paluahon na porsea sian hagogotan na masa di ngolu on. Toho ma na nidok ni na tarsurat di 1 Kor. 2: 9 “Na so dung niida ni mata, na so dung binege ni pinggol, na so dung hehe di bagasan roha ni jolma, i do diparade Debata di angka na manghaholongi Ibana.

Dung i disuru si Elisa ma asa dilehon natorop i asa mangan nasida (ay. 42), pandohan na lambok na manarihon natorop. Ndang dirina sandiri disarihon, nang pe sasintongna tu ibana do dipasahat sagusagu i songon pelean, alai jumolo do natorop i, ima angka naung male alani haleon potir na niadopannasida. Pambahenan na patujolohon situan natorop i, i ma sada pangalaho sitiruonta. Ai sahit bolon na masa disihatoropan nuaeng ima na holan mamingkirhon na ringkot tu dirina sandiri.

Jotjot do hita humurang di pangulaonta alani jompok ni pingkiranta dohot sompit ni pamerengta, gabe so dapot taida huaso pangaramotion ni Debata uju mangadopi sitaonon hita. Alani do asa songon na ragu do dimulana sisean ni si Elisa i, alani do asa didok ibana, beha ma pangalehonku mangganupi saratus halak? Diambati ganggu ni rohana do naposo i, ala dibilang ibana gogona sandiri. Alani ndang bilangan ni sagusagu i dison na otik, alai hatauon marida Debata na lobi sian sagusagu i do na humurang alani do ndang asal disuru si Elisa mangalehon situan natorop i mangan, alai marojahan do tu hata ni Debata, songon na nidokna di ayat 43: “Ai songon on do hata ni Jahowa: ingkon mangan angka jolma i, jala ingkon adong teba. Ojahan parsuruon ni si Elisa mangalehon natorop i asa mangan i ma borhat sian haporseaon na tangkas, na marojahan tu hata ni Debata. Ndang tubutubu ni roha ni si Elisa ibana mandok sidohononna, alai tung borhat sian haporseaon di hata ni Debata do. Poda na mansai arga do pandohan ni si Elisa on di hita di partingkian nuaeng, porsea dope tutu hita di hata ni Debata na tongon taadopi nuaeng hasusaan alani pandemi Covid-19 on? Asa ndang holan umboto hata ni Debata na ringkot alai porsea jala manghangoluhon hata ni Debata. Ai ndang holan disagusagu i hape hangoluan i, alai hata ni Debata na tahaporsea i do mamasumasu sagusagu i gabe sagat hita mangan. Toho ma songon na tarsurat di 5 Musa 8: 3 “ndada holan sagusagu hangoluan ni jolma, jala laos i do muse dipangke Tuhan Jesus mangalusi pangunjunan na ro sian sibolis tingki dung sidung Ibana marpuasa ( Mat. 4: 4). Tatiru ma pangalaho dohot pambahenan ni si Elisa mangadopi partingkian na gonting i, unang lari sian masalah, alai tapangido ma gogo asa haruar hita sian masalah i. Ndang cukup holan marungutungut alai soada pambahenan. Jotjot do hita mangula marojahan tu logika, na denggan do i. Alai sian logika na tabahen ingkon porsea do hita di hata ni Debata laho mangulahon sada ulaon. Songon na masa diturpuk on pangoloion dohor haporseaon di hata ni Debata marsaulihon angka na denggan. Gabe torang ma di hita paboa halongangan i masa molo adong pangoloion di hata ni Debata. Molo olo hita mangoloi hata ni Debata, sai na saut do lobi sian na piningkiran. Alai molo so adong do pangoloion ndang masa halongangan. Marragam do dalan ni Debata mangaramoti angka na niasianNa. Disituasi na gonting ro panguruion sian na so tinagam ni roha, jala masa halongangan i sian na so mungkin dipingkiran ni jolma. Antong ndang pingkiranta sipangasahononta mangadopi hamaolon, alai haporseaon di hata ni Debata jala pangoloion di parsuruon ni Debata do.