Khotbah Markus 7: 17 - 23 Tuhan Mengetahui Isi Hatimu

 Minggu 13 Set. Trinitatis; 29 Agustus 2021

7:17 Sesudah Ia masuk ke sebuah rumah untuk menyingkir dari orang banyak, murid-murid-Nya bertanya kepada-Nya tentang arti perumpamaan itu.

7:18 Maka jawab-Nya: "Apakah kamu juga tidak dapat memahaminya? Tidak tahukah kamu bahwa segala sesuatu dari luar yang masuk ke dalam seseorang tidak dapat menajiskannya,

7:19 karena bukan masuk ke dalam hati tetapi ke dalam perutnya, lalu dibuang di jamban?" Dengan demikian Ia menyatakan semua makanan halal.

7:20 Kata-Nya lagi: "Apa yang keluar dari seseorang, itulah yang menajiskannya,

7:21 sebab dari dalam, dari hati orang, timbul segala pikiran jahat, percabulan, pencurian, pembunuhan,

7:22 perzinahan, keserakahan, kejahatan, kelicikan, hawa nafsu, iri hati, hujat, kesombongan, kebebalan.

7:23 Semua hal-hal jahat ini timbul dari dalam dan menajiskan orang."

Somal do tabege pandohan ‘halal’ dohot ‘haram’ di ugamo na asing, jala adong sada lembaga na manontuhon label ‘haram’ manang ‘halal’. Jala di hakristeon pe marhehean do aliran na mamodahon taringot tu habadion ni halak Kristen marhite parsubangon tu sipanaganon dohot si inumon, marhite peraturan nasida i dirajumi do sumintong nasida di jolo ni Debata. Pangalaho na songoni do na masa di Markus 7 on. Mansai fanatik do halak Parise dohot Sibotosurat di kesalehan yang bersifat lahiriah (pardagingon). Sada na gabe hasomalan nasida ima “mamuri tangan” andorang so marsipanganon. Dihaporsea nasida, mamboan haramunon jala mardosa do molo so marburi tangan nasida andorang so masipanganon. Mansai tajom do pinsangpinsang ni Jesus tu halak Parise dohot Sibotosurat hatihai, asa unang gabe mangaliluhon nasida tu natorop i. Didok Tuhan Jesus di turpuk on, ndang na masuk tu pamangan ni jolma namambahen ramun jolma. Roha ni jolma do mambahen jolma gabe ramun, ai ndang siida rupa Debata (Rom 2:11). Ndang parsubangon di sipanganon dohot si inumon patuduhon na sintong hita diadopan ni Debata. Ndang jolma manontuhon ise na sintong dohot na so sintong di joloNa, alai Debata do namanontuhon.

Dijoloni turpuk on dibaritahon, ala diida halak Parise sisean ni Tuhan Jesus mangan so jolo marburi gabe disungkun Parise Jesus: Boasa ndang diihuthon angka siseanmi adat ni angka situatua, ai ramun do tanganna mangan roti? (Mrk. 7:5). Alusni Jesus : Nda tung gabe ramun jolma binahen ni na ro sian ruar tu bagasan ibana; alai na ruar sian jolma i, i do mangaramuni ibana, (Mrk. 7:15). Dialo jala disosa Jesus poda ni Parise dohot Siboto Surat namandok : boi do ramun jolma marhite namasuk sian pamangan ni jolma i. Didok Jesus; naruar sian jolma i do na mangaramuni ibana. Aha do na ruar sian jolma i? Ima: panghataion, pingkiran na jahat, parmainanon, panangkaoon, panamunon, pangalangkupon, hajahaton, pangansion, pargadombuson, pangorgangon, panginsahion, ginjang ni roha, hosom, teal, elat, late. Angka ido na mambahen ramun jolma i.

Na naeng dohonon ni Jesus, diradoti halak Parise dohot Sibotosurat do patik i hape rohana digohi pingkiran na jahat, ginjang ni roha dohot neang ni roha. Radot do nasida mamatamatai natorop mangulahon patik hape nasida dang mangulahon patik i. Dipaholang nasida dirina sian na torop, ginjang rohana jala neang rohana marnida na so horongna jala ndang dipasangap nasida Debata. Ido mambahen ramun nasida. Ro do Jesus na sinuru ni Debata alai ndang dihaporseai nasida. Ndang dijangkon nasida Mesias ni Debata, gariada dihasogohon jala diparsilangkon nasida do Ibana. Burju do halak Parise dohot siboto surat mangaradoti angka patik nasida alai ndang porsea tu Jesus Sipalua i. Hape haporseaon do patuduhon sada halak sintong mangaradoti patik ni Debata. Dipangido do sian hita pos ni roha di Hata ni Debata, lapatanna; sude ngolunta marparguruan tu Jesus Kristus.

Diondolhon Jesus do; ‘naso tarbahen ramun jolma bahenon ni nasa na ro sian ruar tu bagasan ibana’, ai so bongot i tu bagasan rohana; tu butuha do i lao, dungi bolong do i muse diinganan na soding asa gabe ias saluhutna na rotak i. Na nidok ni Jesus, roha i do urat dohot mual ni nasa hata dohot ulaon ni jolma. Roha ni jolma i do pusat kepribadian na manontuhon sude pambahenan na denggan manang na roa. Roha ni jolma do na manggerakhon ngoluna mangulahon na denggan manang na jat. Molo na jat ruar sian rohana gabe na jat ma diulahon, gabe mardosa jala ramun ma ngoluna. Ndang ramun jolma manganhon sipanganon ala so jolo marburi. Alai parbue ni roha na so unduk tu Debata, i do mambahen ramun jolma gabe haruar ma hata na rumar dohot pambahenan na jahat. Sian pamerengan parduru dipatuduhon Parise i do nabadia nasida, hape tudos do nasida tu tanoman na hinapur, saksak sian duru, hape holiholi ni mate dibagasan dohot na rotak (Mat. 23:27) i do umbahen didok Jesus nasida pangansi. Idaon badia, hatana tabo jala lambok begeo hape rohana parhosom. Alani i jamot ma, sotung didok Jesus tu hita: ‘Dipapujipuji pamangan ni bangso on do Ahu, alai ia roha nasida dao do sian Ahu.

Alai tullom do dialusi Jesus, didok Jesus nasida ‘pangansi’(munafik). Jala diuduti Jesus panurirangon ni si Jesaya tu angka pemimpin ugamo ni Israel, Jesaya 29: 13 “Dipapujipuji pamangan ni bangso on do Ahu, alai ia roha nasida dao do sian Ahu. Jala magopo do pambahenannasida pasangaphon Ahu, ai patikpatik ni jolma do dipodahon nasida”.  Marhite pandohan i dipapatar Jesus na so sintong nasida bangso na unduk tu Debata, ndang sintong nasida mangaradoti patik ni Debata, pangansi do nasida. Hatana do pasangaphon Tuhan i, alai rohana mangaleai do. Pangansion do molo dibahen ngolu parugamoon gabe pangoloion parduru. Godang do ngolu na songon i nuaeng di huria. Burju marminggu hape manabunihon uloanna na ramun. Sai hira na badia idaon, hape parjimat. Angka ima rumang ni pangansi. Di hagigihon Jesus do angka si songon i. Mago do na tersirat di patik i ala tafsiran ni angka ‘situatua’ ni bangso i. Alani ma didok Jesus di ayat 8: “ ai tading do patik ni Debata dibahen hamu, laho mangaradoti adat na sian jolma”. Lupa bangso Israel papatarhon holong ni roha na tersirat di patik i, ala gabe tumimbo tafsiran na marrumang parenta dohot oraora i dibahen bangso i sian holong na tersirat di patik i. Mago holong ala patik parsubangon na pinatupa ni jolma. Turpuk on paingothon hita asa mangolu dibagasan ‘kejujuran’ ai dihasogohon Jesus do angka jolma na munafik, na sai songon na badia, sai songon na tama, hape na mamintori diri do ibana sumurung sian na asing.

Holan Debata do na boi mandodo roha parbagasan ni jolma. Ndang adong na boi tabunihonon ni jolma angka di bagasan rohana, ai disulingkit Debata do bagas tu ganup roha ni jolma i. Manang aha pe na dipingkiri jolma dibagasan rohana  diboto Debata do. Alani ndang boi margabus tu Debata songon na binahen ni halak Parise dohot Sibotosurat na fanatik mangaradoti habadiaon secara lahiriah. Godang do jolma na manabunihon na di bagasan rohana tu donganna jolma, alani do gabe adong jolma na munafik manang berpurapura, hira na burju idaon hape parjahat na sumalin, manang hira parjahat idaon hape na burju. Alai molo Debata diboto do sude na tapingkiri dohot na adong di bagasan rohanta be. Alai taingot ma ma molo tung pe diboto Debata sude n adong dibagasan rohanta, ndang na mandok gabe ndang porlu be hita martangiang, gabe tadok “ai diboto Debata do sude na adong dibagasan rohangkon”. Ndang i, jala sala do i. Antong molo diida jala diboto Debata rohanta be, naeng ma gabe halak na jujur hita di adopanNa nang di adopan ni dongan jolma. Unang gabe si pangalensem hita, ai so adong guna ni i, ala diboto Debata do saluhut na buni dibagasan rohanta be. Alani tajaga ma rohanta marhite hata ni Debata asa unang disegai sibolis, ai sai berusaha do sibolis manegai roha no jolma asa mangulahon na jat. Tapangido ma tu Debata marhite tangiang songon na tarsurat di Psalmen 51: 12 “Tompa ma roha na ias di bagasan ahu, ale Debata, jala paimbaru ma tondi na marsihohot di bagasan ahu”.