Khotbah Mazmur 34: 12-18 Orang Benar di Mata Tuhan

 Minggu 12 Set. Trinitatis; 22 Agustus 2021

34:12 Marilah anak-anak, dengarkanlah aku, takut akan TUHAN akan kuajarkan kepadamu!

34:13 Siapakah orang yang menyukai hidup, yang mengingini umur panjang untuk menikmati yang baik?

34:14 Jagalah lidahmu terhadap yang jahat dan bibirmu terhadap ucapan-ucapan yang menipu;

34:15 jauhilah yang jahat dan lakukanlah yang baik, carilah perdamaian dan berusahalah mendapatkannya!

34:16 Mata TUHAN tertuju kepada orang-orang benar, dan telinga-Nya kepada teriak mereka minta tolong;

34:17 wajah TUHAN menentang orang-orang yang berbuat jahat untuk melenyapkan ingatan kepada mereka dari muka bumi.

34:18 Apabila orang-orang benar itu berseru-seru, maka TUHAN mendengar, dan melepaskan mereka dari segala kesesakannya.

Aha do hatigoran? Jala boasa sai diadu jolma hatigoran? Marragam do alus na boi dohononta taringot tu sungkun-sungkun on. Alai mangihuthon pangantusion secara teologis, halak partigor di adopan ni Debata i ma halak na biar mida Jahowa. Jotjot do jumpangta pandohan biar mida Jahowa di Padan Narobi lumobi di buku na mangajarhon habisuhon. Biar mida Jahowa songon na niajarhon ni Parpsalmen di turpuk on jala na gabe sorminan manang dasor parsiajaran di tongatonga ni huria di tingki sinuaeng. Asa sian buku Psalmen on boi botoonta, matua alo ni Debata do angka siulahon hajahaton, mangangguhi pe angka partigor tongtong do i ditangihon Debata jala dipalua sian hagogotan. Pandohan i martudutudu tu ragam ni angka hamaolon na ingkon adopan ni halak na mabiar mida Debata di tongatonga ni ngoluna songon na niadopan ni Parpsalmen di turpuk on.

Borhat sian pardalanan ni ngolu Raja Daud dipatuduhon andorang so bangkit ibana gabe raja di Jerusalem laho manguduti ulaon naung pinungka ni Raja Saul, godang do diadopi ibana angka hamaolon dohot ragam ni angka pangunjunan. Dilelei si Saul do ibana jala disangkapi laho mangagohon hosanna ala jut ni rohana, ai gabe umbalga do barita hajogianna maralohon angka musu ni Israel. Di pangalaho na masa songon i, ndang adong na boi dipangasahon ia so holan pandonganion ni Jahowa. Marpangunsandean tu asi ni roha ni Jahowa do ibana di na tongon mangadopi hasusaan i. Sian na masa i do Raja Daud ro marpanindangi huhut mangarahon angka panjaha ni turpuk on. Dijou nang hita manangihon panindangionna i asa tatanda songon dia pangondihonon ni Jahowa di angka partigor. Asa sian na masa binolusna do si Daud mananda huaso dohot habalgaon ni Jahowa.

Boi pe Raja Daud mandok na songon i, ndada ala na diparsiajari, alai ala naung dihangoluhon dohot diparangehon do na marhabiaran mida Jahowa. Diboto, diparhatutu, jala dihaporseai ibana andul dumenggan mangasahon Jahowa sian hatauon ni dirina sandiri lumobi ma uju maralohon angka musu. Boha ma boi malua sian tahi ni musu na naeng mangago hosa? Sian turpuk jamita on taida ma pangajarion ni Raja Daud taringot tu ngolu na biar mida Jahowa. Andorang so dipatolhas pangajarion i, parjolo do dijou angka na naeng marbisuk, ima angka Israel. Didok:”Ro ma hamu, ale angka anaha”. Dipatudos dirina songon ama maradophon angka anakna, ima gombaran sada raja dohot na nigomgomanna. Tujuan manjalo pangajarion didok di ay.13, manghalomohon hangoluan dohot manghaholongi ariari marnida na denggan. Ndada holan tu diri sandiri alai dohot do ngolu parsaoran. Mangulahon na denggan jala mardame tu angka dongan.

Marhite turpuk jamita on dipapatar ma angka hataridaan ni jolma na biar mida Jahowa, ima: Manjagahon dila dohot bibir. Na so jadi pangkeon dila dohot bibir laho manghatahon na so denggan tu dongan. Saurdot pandohan on dohot poda ni Ap. Paulus tu huria Epesus:”Unang ma ruar hata na busuk sian pamanganmuna; naeng ma na denggan na tau padengganhon na humurang, asa dapotan uli na umbegesa”(4:29). Ndada holan tu angka jolma na tahaholongi ingkon uli panghataion alai dohot do tu jolma na mambahen sipata loja hita. Di Pilippi 4:5a didok:”Pabotohon hamu ma habasaronmuna tu saluhut halak”.

Mangalului hadameon dohot hasonangan. Halak na mabiar mida Jahowa ingkon mangharingkothon hadameon dohot hasonangan marhite na sumurut sian hajahaton jala mangulahon angka na denggan. Hasonangan ingkon dipareahi dohot diulahon, ndada na tubu boti i di parngoluonta, molo so i hamusuon do na masa jala hagunturon manahap di ngolunta. Di angka barita na tajaha sian Bibel i tardok ndang mura laho manghangoluhon hasonangan dohot hadameon. Boasa maol mangeahi dame di ngolu on? Ala torop dope sian hita na so rade talu maralohon dongan, molo dirajumi dirina sintong. Lumobi halak Batak na maniop poda on “Metmet sihapor lunjung, dijujung do simanjujungna”. Dia ma apala na nidokna disi? Ndang mura patalu roha. Molo tasulingkit do aha do lapatan ni hadameon? Somal do tadok dame jala somal do tabege jamita mangigil ngolu na mardame. Dame ndada holan roha na manganju hahurangan  ni dongan, alai na rumingkot ima paulakhon parsaoran tu haulion. Dame i ndada holan molo so niingot be hasalaan ni dongan alai parange na sai tongtong masijangkonan huhut masipauneunean tu hadengganon. Boi hita mardame tu dongan ndang ala naung taboto patupahon i alai tahe ala naung mangolu do pardengganan hadameon binahen ni Tuhan i di ngolunta ganup marsadasada. Lapatanna holan marhite naung mulak denggan do parsaoranta dohot Tuhan i umbahen boi hita mardame tu angka dongan.

Antong disungkun do hita di tingki on dia do gunana molo adong di jolma parange na mabiar mida Jahowa? Marhite turpuk jamita on tangkas dipaboa, ndang marisuang parange biar mida Jahowa i, ala Jahowa sandiri do na mamintori dirina huhut patupahon hamonangan maralohon angka parjahat. Tinggil do pinggol ni Jahowa tumangihon anggukangguk ni partigor jala siap do dibahen angka sibahen na jahat. Diondihon jala dipalua Jahowa do partigor na sai patubegehon hoihoi, holso nang pardangolanna ala dipangasahon do asi ni rohaNa. Nang pe sipata manaon na porsuk partigor i, alai ndang na dipasombu Jahowa sasada ibana manuhuk angka na dokdok i. Ndang be dirina mangadopi angka parjahat alai nunga Jahowa sandiri na manjoloani ibana. Parsiajaran ro di pangajarion taringot biar mida Jahowa tontu ndada parsiajaran parsahalian, alai parsiajaran na manghamham jala na ingkon sihangoluhononhon saleleng mangolu.

Songon dia do Jahowa manatap angka na manghabiari Ibana? Adong tolu na ingkon tatiop sian turpuk jamita on asa unang mabiar hita mangadopi ragam ni hamaolon siala angka parjahat, ima: Jahowa manatap angka partigor. Ndada holan marnida sian banua ginjang, alai tuat do Ibana manopot jala mangondihon angka partigor i. Ndang diloas marmara tondi nang pamatangna ala diolani Ibana do hagaleonna. Gariada tahe disiaphon Jahowa do angka sibahen na jat asa unang marlomolomo angka parjahat i tu angka na tigor.  Jahowa manangihon soara ni partigor. Sipata hira na so dibege Jahowa do soara ni angka na dangol, boi do i ala nunga tung mansai leleng manaon. Dihilala ndang margogo ibana mangadopi angka parjahat i. Adong do deba gabe mandele ala so diida ibana be na adong Jahowa manangihon soarana. Dipaingot jamita on do hita luhut asa unang madabu tu pandelean alai tongtong marsihohot tu Jahowa.  Jahowa paluahon angka partigor. Ndang holan manatap dohot manangihon, alai dohot do Jahowa paluahon partigor sian hagogotan, parmaraan nang hamatean. Sian Padan na Robi nunga tangkas dipatubegehon angka naposo ni Jahowa barita i jala lam nalnal ma di Padan na Imbaru. Jesus, Anak ni Jahowa disuru sian banua ginjang laho paluahon portibi on.