Khotbah Yesaya 35: 4 - 10 Kuatkanlah Hatimu, Jangan Takut

 Minggu 14 Set. Trinitatis; 05 September 2021

35:4 Katakanlah kepada orang-orang yang tawar hati: "Kuatkanlah hati, janganlah takut! Lihatlah, Allahmu akan datang dengan pembalasan dan dengan ganjaran Allah. Ia sendiri datang menyelamatkan kamu!"

35:5 Pada waktu itu mata orang-orang buta akan dicelikkan, dan telinga orang-orang tuli akan dibuka.

35:6 Pada waktu itu orang lumpuh akan melompat seperti rusa, dan mulut orang bisu akan bersorak-sorai; sebab mata air memancar di padang gurun, dan sungai di padang belantara;

35:7 tanah pasir yang hangat akan menjadi kolam, dan tanah kersang menjadi sumber-sumber air; di tempat serigala berbaring akan tumbuh tebu dan pandan.

35:8 Di situ akan ada jalan raya, yang akan disebutkan Jalan Kudus; orang yang tidak tahir tidak akan melintasinya, dan orang-orang pandir tidak akan mengembara di atasnya.

35:9 Di situ tidak akan ada singa, binatang buas tidak akan menjalaninya dan tidak akan terdapat di sana; orang-orang yang diselamatkan akan berjalan di situ,

35:10 dan orang-orang yang dibebaskan TUHAN akan pulang dan masuk ke Sion dengan bersorak-sorai, sedang sukacita abadi meliputi mereka; kegirangan dan sukacita akan memenuhi mereka, kedukaan dan keluh kesah akan menjauh.

Ndang adong halak na so hea mabiar manang tahutan. Tarlumobi alani panghorhon ni pandemi covid-19 tamba do bilangan ni halak na tahuton. Na metmet na magodang, na pogos nang na mora, ganup do hita tahutan. Alai tung pe ganup hita tahutan manang mabiar, unang ma tapeop nasa na margoar hatahuton manang biar, asing ni biar mida Jahowa, sae ma roha biar i intap ni manghorhon hamanaton (mawas diri) unang gabe madabu hita tubagasan rumang ni angka dosa dohot pangunjunan. Dipasahat turpuk on do tu angka naung loja jala gale laho mamorsan angka sitaonon na niadopan halak Juda hatiha i. Anggiat lam togu roha dohot haporseaon ni halak Juda margogo do Debata laho paluahon nasida. I do umbahen disuru Debata panurirang Jesaya pasahathon hataNa tu bangso Juda na mandok: “Pir ma tondimuna, unang hamu mabiar! Ida ma Debatamuna i ro martubolhon dohot mamaloshon! Ro do Ibana tongon paluahon hamu”. Boasa didok tu bangso i songon i? Asa tongtong pos roha ni halak Juda di hagogoon ni Debata na paluahon nasida sian angka sitaonon dohot hasusaan na masa na mambahen nasida tahutan. Margogo situtu do hape lapatan ni hata ni Debata manang pandohan taringot tu Debata laho mangurupi halak na tahuton. Sasintongna jumorbut do biar i sian sitaonon na songgop i. Ala sasintongna ndang sitaonon i na manubuhon biar, roha na so porsea i do na manubuhon biar. Ai tung pe malua hita sian sitaonon, alai molo ndang lam ganda jala ndang lam matoras haporseaonta, boi dope hita leleon ni biar i. Ndang adong biar na so maralus sian Debata. Asal ma rade hita laho marnida. I do asa didok: “Ida ma Debatamuna i ro martubolhon dohot mamaloshon! Ro do Ibana tongon paluahon hamu”. Marhite tanganNa sandiri do ro Debata, Ibana sandiri do manggarar dohot manalesehon saluhutna. Alani laho mangadopi manang aha pe na masa di pardalanan ni ngolunta tarlumobi siala ni panghorhon ni pandemi covid-19 on, na so jadi sirang hita sian hata nu Debata. Tongtong ma tapatubegehon hata ni Debata, ala sasadai do ubat na ummarga mangalo pandemi on. Lam ganda ma nian ringgas ni huria dohot angka parhalado manjaha dohot patubegehon hata ni Debata.

Ungkap ma ni angka na mapitung dohot pinggol ni angka na nengel. Marhajingjang ma angka na pangpang songon rusa, mariaia halak na ngungu. Angka tanda i patuduhon haimbaruon na pinatupa ni Debata na manggombarhon haluaon na manongtong jala na so adong na boi mangambati. Hahisaron ni angka na martihas na dirajumi na so boi be marhahipason marhite angka pangubation patuduhon huaso dohot hapataran ni haluaon dohot asi ni rohaNa maradophon angka na niasianNa. Mapitung, nengel, pangpang, ngungu manggombarhon jolma na so margogo na marsigantung tu asi ni roha ni jolma na di humaliangna. Alani mansai arga do hahisaron i di nasida ala marhitehite hahisaron i gabe tarbahen nasida mandalani ngolu nasida songon angka na di humaliang nasida. Hahisaron i patuduhon ia haluaon na pinatupa ni Debata i ma haluaon sian sude hagogoon na naeng mangagohon nasida. Na mangihut ia haluaon na pinatupa ni Debata huhut do paluahon portibi on sian “sitaononna” asa parsidohot portibi on “marlas ni roha”. Haluaon i dipatupa marhitehite haimbaruon tu angka na di portibi on: “marbuhalbuhal angka aek di halongonan jala sunge di adaran, tano hasang situtu gabe tao, tano bangkalbangkal gabe parmualan aek, di inganan ni pangulonan ni naga (LAI: Serigala) na sai laon tubu arung dohot tolong”. Sian angka tanda i adong do masa na so hea masa. I do patuduhon hagogoon ni Debata na so adong tudosna. Hagogoon na tuk patupa lobi sian na piningkiran ni jolma manang na boi patupaon ni hagogoon na adong di portibi on. asa na sinoarahon ni ayat 5-7 on lam patogu roha ni halak Juda na tahutan na manghirim haluaon sian na mambahen nasida tahutan dohot marsitaonon. Molo dibongoti asi ni roha dohot haluaon na sian Debata hita. Muba do panghilalaanta. Mansohot ma nasa sitaonon na tinaon ni pamatang ni jolma, sian pardagingon na partondion na tinubuhon ni dosa i. Dipasung Debata ma luhutna tu na denggan. Ndang holan dipasuang Debata angka naung sega binahen ni dosa i. Dohot do masa nang hagogoon, halongangan di haluaon na pinamasa ni Jahowa. Asa dung ro Jesus tu portibi on, marulakulak do dipatupa Jesus angka tanda halongangan. Haroro ni Debata naung mangalehon haluaon i gabe halalas ni roha godang tu saluhut jolma na tinompaNa jala Ibana do mandaoni sian habernitan naung nialaman ni jolma ondeng.

Na mangihut, mansai uli situtu dalan na dompak Sion. Ndang adong na tau manahuti angka pardalan, ndang boluson ni angka binatang panoro, dipatudos tu dalan na sonang so hariboriboan, dalan ni halak angka naung tinobus do dalan i. Di halak Israel, di goari ma on pardalanan parpudi di nasida. Nunga ganjang pardalanan na gok panamun naung binolus nasida nasailaon. Mulak ma nasida tu bagas ni Debata. Turpuk on, mangalehon di hita pamotoon na tontu jala torang situtu taringot tu dalan silehonon ni Jahowa tu hita di ari sogot, dalan hamuliaon na gok las ni roha dohot hasonangan situtu. Songon na nidok ni ayat 10 on: “jadi mulak ma sogot halak angka na pinalua ni Jahowa, jala mariaia ro tu Sion, jala halalas ni roha salelenglelengna di atas ulu nasida , dapotan hilas dohot ni roha nasida, alai maporus ma anggo arsak dohot hoihoi”.

Pir ma tondimuna, unang hamu mabiar. I do hata ni Debata laho patogu roha ni bangso Juda asa tongtong marpos ni roha di hagogoon ni Debata na tuk paluahon nasida sian hagogoon ni angka bangso na asing na mamusui nasida, na pa ro hasusaan tu nasida i. Laos i do hata ni Debata na patogu rohanta dohot sude angka na porsea mangadopi angka na masa di parngoluon on. Ndang adong na mangatasi hagogoon ni Debata jala hagogoonNa do i na paluahon hita sian angka na naeng mangago hita. Pir ma tondim, unang ho tahutan. Ndang adong halak na so hea mabiar manang tahuton. Alai marhite on dipangido do tu hita asa unang dirajai biar i ngolunta. Ai molo tahutan hita, ganggu ma rohanta dihagogoon dohot pangurupion ni Debata alani angka na masa na manosak dohot na naeng mangago ngolunta. Naeng tongtong pos rohanta, gumogo do Debata sian saluhutna i jala na paluaonNa do hita marhitehite hagogoonNa i. Asa di na tadalani ngolunta di hasiangan on mangadopi ragam ni angka tantangan, ancaman, masalah, songon i nang panghorhon ni pandemi covid-19 on, dipangido tu hita asa unang tahutan alai pir ma tondinta jala marsihohot tu Debata (Jos. 1:9). Urupan ni Tuhan i do hita mangadopi angka tantangan, ancaman dohot masalah na taadopi jala margogo do Debata paluahon hita sian i. Molo pir tondinta jala marsihohot di Tuhan i gabe dipatau do nang hita patupahon angka na patut mangadopi saluhutna i, asa tongtong taruli dipasupasu ni Debata jala gabe pasupasu ngolunta tu na humaliang. Rade situtu do haluaon di hita songon na nidok ni B.E. No. 417.