Khotbah Yohanes 8: 30-36 Allah yang Memerdekakan

 Minggu 11 Set. Trinitatis; 15 Agustus 2021

8:30 Setelah Yesus mengatakan semuanya itu, banyak orang percaya kepada-Nya.

8:31 Maka kata-Nya kepada orang-orang Yahudi yang percaya kepada-Nya: "Jikalau kamu tetap dalam firman-Ku, kamu benar-benar adalah murid-Ku

8:32 dan kamu akan mengetahui kebenaran, dan kebenaran itu akan memerdekakan kamu."

8:33 Jawab mereka: "Kami adalah keturunan Abraham dan tidak pernah menjadi hamba siapa pun. Bagaimana Engkau dapat berkata: Kamu akan merdeka?"

8:34 Kata Yesus kepada mereka: "Aku berkata kepadamu, sesungguhnya setiap orang yang berbuat dosa, adalah hamba dosa.

8:35 Dan hamba tidak tetap tinggal dalam rumah, tetapi anak tetap tinggal dalam rumah.

8:36 Jadi apabila Anak itu memerdekakan kamu, kamu pun benar-benar merdeka."

Mansai arga jala margogo do sude angka na niajarhon ni Tuhan Jesus tu angka jolma. Marhite pangajarionNa torop jolma gabe porsea di Ibana. Tung pe marasingasing pangalaho, pingkiran ni angka na umbege jamita ni Tuhan Jesus. Adong na manghosomi Jesus di mulana, alai gabe porsea, adong do na holan mamerengmereng sambing alai gabe porsea di Tuhan Jesus. Pangajarion ni Jesus di bagas joro di turpuk on manghorhon hamubaon ni pangantusion ni jolma taringot tu haluaon. Hatiha dihatahon Jesus ise Ibana, torop do halak porsea. Alai ndang apala sude porsea na umbege pangajarionNa i. Ai natorop na umbege pangajarionNa i, adong do na malo na holan marguru tu pingkiranna, sibotosurat dohot Parise (8: 2-3). Ditangihon nasida do hata ni Jesus alai ndang dijangkon. Dipatangkas nasida do Jesus taringot uhum tu boroboru na targombang (8: 6-7), alai ndang dibagasan roha na olo manjalo hasintongan, holan naeng mangunjuni do nasida, ndang ungkap rohana porsea ai nunga holan mangasahon pingkiran dohot patik i nasida. Alai adong do deba na marasing hadirionna taringot tu pangajarion ni Jesus i. Adong do na tumangihon sian nasa rohana pangajarion ni Jesus, ndang mangasahon pingkiranna.

Dung madabu jolma tu bagasan dosa, marujung ma jolma i di hamatean. I do jambar ni jolma naung madabu tu bagasan dosa. Nunga dipahartobandosa jolma i, jala ingkon marujung di hamatean ma ngolu ni jolma naung madabu tu bagasan dosa. Ndang adong be jolma na boi malua sian huaso ni dosa dohot hamatean i sian dirina sandiri. Alani holong ni roha ni Debata di jolma na tinompaNa i, dilehon Ibana ma AnakNa na sasadai laho paluahon jolma sian huaso ni dosa dohot hamatean. Nuaeng naeng lma bagas antusion nasida lapatan ni haluaon i. Diajari Tuhan Jesus ma halak Jahudi naung gabe porsea di Ibana. Ndang sude halak Jahudi porsea di Tuhan Jesus hatiha i. Atik pe nunga leleng halak Jahudi targoar gabe bangso ni Debata, bangso naung malua sian parhatobanan Misir, alai mansai ringkot dope botoon nasida lapatan ni haluaon i. Songon i do nang hita naung porsea di Tuhan Jesus, neng dope lam bagas mananda Jesus i huhut mangantusi saluhut na binahenNa. Dibahen i do diajari Jesus nasida marhite pandohan: “Molo mian hamu dibagasan hatangKu, sintong ma hamu siseanKu. Dung i tandaonmuna ma na sintong i, jala paluaon na sintong i ma hamu”. Urat ni haluaon i, i ma “mian di hata ni Jesus. Adong tolu na patar boi idaonta di halak na mian di hata ni Jesus: Sintong hamu siseanKu. Sisean, ima na mangihuthon jala manghangoluhon ngolu ni Jesus. Asa ngolu ni sisean i ma naeng jumpang songon ngolu i guruNa. Tandaonmuna ma na sintong i. Hasintongan i, Jesus sandiri do i. Ibana do na padomu jolma tu Ama i. I do asa didok Ibana di Johannes 14: 6 “Ahu do dalan i dohot hasintongan dohot hangoluan. Ndang adong na sahat tu Ama i, ia so marhite Ahu”. Paluaon ni na sintong i ma hamu. Jesus sandiri do na sintong i, paluahon angka na porsea. Ro Ibana tu portibi on laho paluahon portibi on, “Ai ndang disuru Debata AnakNa tu portibi on asa uhumanNa, naeng paluaonNa portibi on tahe asa disuru (Joh. 3: 17). Asa ganup halak na mian dibagasan hata ni Jesus, na mian do i dibagasan Jesus, jala paluaon ni na sintong i ma ganup na mian di HataNa.

Dung di didok Jesus di ayat 34 “Tutu situtu do na hudok on tu hamu: hatoban ni dosa do ganup na mangulahon dosa”. Dipasunggulhon Jesus ma nuaeng hadirion ni jolma i naung diparhatoban dosa. Asa ganup halak na mangulahon dosa nunga diparhatoban dosa i ibana. Ngolu parhatobanon do ngolu ni angka na mangulahon dosa. Tangkas ma nuaeng jaloon hata ni Jesus na mandok: paluaon ni na sintong i ma hamu, jala marpardomuan do i tu sude jolma naung madabu tu bagasan dosa. Manang ise na mangulahon dosa, naung gabe hatoban ni dosa do i. Ndang tarbahen jolma i be malua sian parhatobanan ni dosa ianggo sian dirina sandiri. Nunga lam rarat tahe dosa i marhite jolma na mangulahon dosa i. Nunga gabe ulaula ni dosa jolma i diparhatobanan. Ingkon dipalua nama jolma i sian sorop ni dosa i asa malua. Na nidok ni Jesus taringot tu parhatobanan i ma ngolu na tarihot tu parhatobanan di partondion. Nasa na mangulahon dosa i ma hatoban ni dosa. Alani saleleng so mian dibagasan hataNa, halak Jahudi na so marhaluaon dope nasida sian dosa. Ai atik pe nasida bangso na pinillit Debata, molo dosa i tongtong maringanan di ngolu nasida. Gabus, ginjang ni roha, na pahosing uhum, pangalaho na so suman i do na tarida di ngolu nasida. Alani dipatudu Jesus sada hal na imbaru tu nasida i ma paboa haluaon na singkop ndada holan tu sada bangso manang ala pamilliton, alai haluaon sian saluhut dosa dohot panghorhonna.

Ganup halak naung gabe hatoban ni dosa, ndang mian di bagas ni Damang. Anak i do na tongtong mian di bagas ni Damang. Ala pangalaosion tu Damang na di banua ginjang i do dosa i. Holan Damang na di banua ginjang i do na boi paluahon jolma sian dosa. Haluaon na gok masa di halak pardosa holan di bagasan diri ni Tuhan Jesus. Nunga dipalua sian hamatean jala bongot tu hangoluan. Ibana do na paluahon hita jolma sian parhatobanan ni dosa. Ganup na dipalua Jesus i, na malua situtu do i. Ndang adong halak na boi malua sian dosa alani dirina sandiri. Debata sandiri di bagasan Jesus Kristus do na paluahon jolma sian parhatobanan ni dosa asa unang be mangulahon dosa jolma i. Ganup halak na mian di hata ni Jesus malua ma ibana sian dosa, malua ma ibana sian na mangulahon dosa, ndang ne gabe hatoban ni dosa. Ngolu ni angka na porsea di Tuhan Jesus, ima ngolu na malua. Ganup halak naung tutu dipalua Anak i, tarjou laho mamboan angka na diparhatoban asa dohot manjalo haluaon na sian Tuhan Jesus i.

Ndang sude halak na manggoari dirina porsea tu Tuhan Jesus mian dibagasan hataNa. Ai ngolu ni halak na mian dibagasan hata ni Debata tarida do i sian panggulmiton ni ngoluna, dipanghataion nang pambahenan. Halak na mian dibagasan hataNa do na tutu siseanNa, na mananda na sintong i, jala laos na sintong i do na paluahon. Na mian di hata ni Debata do na malua sian parhatobanon ni dosa. Alani mian ma hita di hata ni Debata asa malua situtu hita. Hombar tu tema ni Minggunta i ma Debata na paluahon dipaingot do tu hita, ndang margogo hita jolma paluahon dirinta sian parhatobanan ni dosa. Asa malua sian i hita ingkon gabe na porsea jala na mian dibagasan hataNa. Unang be olo hita meolmeol tu siamun manang hambirang, alai hot ma di hata ni Debata. Tarlumobi siala perkembangan ni jaman dohot teknologi di ari parpudi on, unang be nian gabe diparhatoban perkembangan ni zaman dohot teknologi on hita gabe lupa hita mian di hata ni Debata, ingkon tongtong marsitiopan tangan manatap tu ari na naeng ro, asa unang diagohon jaman on hita. Alai tapatuduhon ma naung pinalua do hita.