Khotbah Ayub 23: 10-17 Allah yang Tidak Pernah Berubah

 Minggu 19 Set. Trinitatis; 10 Oktober 2021

23:10 Karena Ia tahu jalan hidupku; seandainya Ia menguji aku, aku akan timbul seperti emas.

23:11 Kakiku tetap mengikuti jejak-Nya, aku menuruti jalan-Nya dan tidak menyimpang.

23:12 Perintah dari bibir-Nya tidak kulanggar, dalam sanubariku kusimpan ucapan mulut-Nya.

23:13 Tetapi Ia tidak pernah berubah -- siapa dapat menghalangi Dia? Apa yang dikehendaki-Nya, dilaksanakan-Nya juga.

23:14 Karena Ia akan menyelesaikan apa yang ditetapkan atasku, dan banyak lagi hal yang serupa itu dimaksudkan-Nya.

23:15 Itulah sebabnya hatiku gemetar menghadapi Dia, kalau semuanya itu kubayangkan, maka aku ketakutan terhadap Dia.

23:16 Allah telah membuat aku putus asa, Yang Mahakuasa telah membuat hatiku gemetar;

23:17 sebab bukan karena kegelapan aku binasa, dan bukan juga karena mukaku ditutupi gelap gulita."

Songon dia do jolma na tongon manaon na hansit hot marhaporseaon tu Debata na manongtong? Sian turpuk on tangkas idaonta parsorion na masa di ngolu ni si Job na daulat roha i, na burju marroha jala na biar mida Jahowa, huhut dipadao rohana sian hajahaton. Hape diloas Jahowa sibolis mangunjuni ibana laho patuduhon songon dia do parsihohotonna mangoloi Jahowa. Tingki sonang jala mamora do asa dioloi Tuhan i manang gabe dipadao do dirina uju ro pangunjunan, sahit dohot pardangolan? Burju do ibana alai ingkon bolusonna do na paet, na parir, na hansit dohot ragam ni parungkilon. Marsihohot pe ibana alai ndang gabe lias sian hasusaan ngoluna. Tung parsiajaran na arga situtu do buku ni si Job on diparngoluan ni ganup jolma. Sahat tu partingkian nuaeng on, boi do tutu dipanghilalahon jolma songon na masa tu si Job on, mananon ndang alani na binahenna. Marragam ro angka pangunjunan nang hamaolon, jala godang nang angka utiutian dohot pambahenan ni sibolis na manosak ngolu haporseaon nang parngoluon ni jolma. Ndang marisuang hasatiaon ni si Job tu Debata na manongtong i, ala di ujung ni barita i, silompit dua do dijalo ibana sian Debata singkat ni na mago sian ngoluna. Alai tahe ndang sude jolma rade manaon, alani do ra sidalian umbahen na jarang sian hita mamillit goar i gabe goar tardidi ni angka pomparanta. Sai tapasiding do asa unang masa sisongon i tu dirinta.

Marsihohot do si Job dihaporseaon nang panghirimonna tu Debata Jahowa. Nang pe naung dipandok sude holso ni rohana alai ndang humusor parsihohotonna manghaporseai Jahowa. Dihaposi do Jahowa na tongtong tigor jala sintong manguhum jolma di tano on. Ndang moru manang huurang pos ni rohana mangihuthon Tuhan i. Panindangion ni si Job na mandok: “Diboto Ibana do dalanku”, na marlapatan ndang songon na pinabotohon ni si Elipas donganna i, mardosa ibana maradophon Debata. Di Job 22: 5, didok donganna i do tu ibana: “Nda alani godang ni hajahatonmu do i dohot alani dosam angka na so marpansadian?” Tung aha pe taho dipandok nasida tu si Job tongtong unduk ibana di sude pardalananna. Ndang sipalessem manang sipaulaula parsitutuonna mangoloi Debata. Songon panindangion ni si Job, tangkas do diboto Debata saluhut angka na masa di ngolu ni ganup jolma. Debata sitompa langit dohot tano dohot pangisina i mamboto manang aha na masa jala na ringkot di saluhutna i. Jala molo tung pe ro manang na diloas angka hamaolon, diboto Debata do i. Molo tung pe diloas Debata pangunjunan i, songon ujian do i laho patauhon haporseaon ni sasahalak (1 Pet. 1: 6-7); pangunjunan sisongon i lam patauhon jala patutoru roha ni jolma (Job 42: 1-10). Jala didok do songon sere na pita do anggo ujian ni Debata. Manahan do anggo sere molo ditutung, holan rupa/wujudna do na gabe mencair disuhu 1000⁰C. Digombarhon si Job do pangunjunan na ro tu ibana i songon mangalala sere asalam pita. Jala dihilala si Job do halongangan do angka na masa di ngolu on, songon na hohom jala dipasombu Debata do angka na masa i. Alai marsiajar do si Job, dibagasan haporseaon mandok na mangolu do Debata jala na diuji Debata do ibana disi.

Tung tangkas do tarida parsihohoton ni haporseaon ni si Job, ndang ditadinghon ibana Debata nang pe tung mansai dokdok sitaonon dohot parungkilon na niadopanna. Rumingkot do dihilala ibana mangaradoti jala mangulahon hata ni Debata sian hangoluanna sandiri (ay. 12). Nang pe ingkon manaon ibana so ala ni salana, alai tongtong do marsihohot ibana di hata ni Debata. Tongtong dijamothon ibana langka nang parangena asa tongtong hombar tu lomo ni roha ni Debata. Tangkas do dipanghilalahon si Job manang aha na masa di ngoluna saguru di Debata do, i do umbahen na dipasahat si Job sandok ngoluna tu adopan ni Debata. Jala panghilalaan na songon i ma mambahen ibana gabe unduk jala hitir maradophon Debata. Hea do adong di roha ni si Job naeng mardabudabu tu Debata, hira na so tarjalo rohana angka na masa na tu ibana i. Alai dung marujiruji ibana, gabe tubu tu rohana na mandok ndang adong sala ni Debata, gariada tahe gumodang do na denggan na binahen ni Debata tu ibana. Tangkas do dihaporseaonta mandok, Debata do Sitompa saluhut na adong. Molo Ibana do na manompa saluhutna, nda saguru tu panompa i do na tinompaNa? Ingkon tubu do tu rohanta, sai angka na denggan i do bahenon ni panompa i tu angka na tinompaNa. Ndang adong na salpu sian pamotoan ni panompa i.

Sai tahirim do di ngolunta on unang masa songon na niae ni si Job. Alai sipata na boi do tahilala hira na dos songon parniahapan ni si Job masa di parmgoluonta. Lulululu hita manangkasi aha sibonsirina umbahen masa na hansit di ngolunta. Sipata olo do hita lungunan nang pe dihariburon alani dokdok ni sitaonon na tataon. Mangalualu do hita tu Debata alai ndang dapot alus na boi pasonanghon roha. Tumatangis jala mangandungi do hita pabotohon holso, hoihoi, ungutungut dohot nasa hapariron alai hira dao do Tuhan i sian hita. Uju marsahit na hinaholongan ni rohanta, martangiang do hita tu Debata mangido pangurupionNa, alai ndang songon na tapangido i masa tu dirinta. Molo masa na songon i ndang tagamon so tubu arsak, pandelean dohot ragam ni sungkunsungkun: “Boasa?” Alai sian barita na masa di parngoluon ni si Job dohot panindangionna, ringkot situtu ma naeng taparsiajari, songon dia ibana hot marhaporseaon tu Debata na manongtong i. Sitaonon na mansai posa jala leleng ndang mangorui hadaulatonna tu Debata. Na marlapatan, sitaonon ni so Job i ndang mambahen ibana sumurut sian Jahowa. Hapariron ala parsahiton na borat i ndang mambahen ibana mandao sian Debata, ndang ditundalhon ibana Debata sipartigor i alai tongtong dihaposi di sude parngoluanna. Marragam do angka pangunjunan na ro tu parngoluon on. Molo di Jakobus 1: 13 didok ndang sian Debata anggo pangunjunan tu hajahaton. Molo di buku Job on taida, sian sibolis do ro pangunjunan na tu si Job, jala diloas Debata do pangunjunan i. Nian, boi do maol dapot roha molo tasigati angka na masa i. Alai sian na masa i boi idaonta “mabiar” do nang sibolis tu huaso ni Debata. Gari tudia dohot angka aha na diula sibolis i pe diboto Debata do (Job 1: 7; 2: 2). Jala diaturhon Debata do manang aha na boi bahenon ni sibolis i tu si Job (Job 1: 10-12; 2: 6). Asa manang aha pe na masa di ngolunta on, diboto Debata do i. Diramoti jala dijagai Debata do angka na niasianNa. Molo Debata do na manjagai, ndang adong hagogoon ni manang aha pe na boi manggugai. Ndang holan tuk mangalehon pasupasu Debata, alai dohot do nang mangaramoti pasupasu na nilehonNa i. Songon si Job na tongtong marsihohot tu Debata nang pe ingkon mangadopi pangunjunan ibana songon i ma nang hita angka na porsea tu Debata na manongtong i. Taingot ma, hata ni Debata do dibahen Jesus mangadopi pangunjunan (Mat. 4: 4-10). Molo tung pe diloas Debata pangunjunan na porsuk tu parngoluonta, ndang pasombuonNa boti hita. Alani margogo ma hita mangadopi saluhutna, unang mandele, jala unang ganggu pos ni rohanta tu Debata. Tabahen ma hata ni Debata gabe gogo dohot sinjatanta mangadopi pangunjunan i.